Last Updated :
03 March 2025, 08:33 PM IST
Courtesy: file photo
ਗੁਜਰਾਤ ਅਤੇ ਫਰੀਦਾਬਾਦ ਏਟੀਐਸ ਨੇ ਇੱਕ ਅੱਤਵਾਦੀ ਨੂੰ ਗ੍ਰਿਫ਼ਤਾਰ ਕੀਤਾ। ਜਿਸਤੋਂ ਪੁੱਛਗਿੱਛ ਤੋਂ ਬਾਅਦ ਰਾਮ ਮੰਦਿਰ 'ਤੇ ਅੱਤਵਾਦੀ ਹਮਲੇ ਦਾ ਪਰਦਾਫਾਸ਼ ਹੋਇਆ। ਫਰੀਦਾਬਾਦ ਤੋਂ ਗ੍ਰਿਫ਼ਤਾਰ ਕੀਤੇ ਗਏ ਅੱਤਵਾਦੀ ਵੱਲੋਂ ਦਿੱਤੀ ਗਈ ਜਾਣਕਾਰੀ ਤੋਂ ਬਾਅਦ ਸੁਰੱਖਿਆ ਏਜੰਸੀਆਂ ਨੇ ਖੰਡਰਾਂ ਵਿੱਚ ਲੁਕਾਏ ਗਏ ਦੋ ਗ੍ਰਨੇਡ ਬਰਾਮਦ ਕੀਤੇ ਹਨ। ਸੁਰੱਖਿਆ ਏਜੰਸੀਆਂ ਨੇ ਆਈਬੀ ਦੇ ਸਹਿਯੋਗ ਨਾਲ ਫਰੀਦਾਬਾਦ ਤੋਂ ਅੱਤਵਾਦੀ ਅਬਦੁਲ ਰਹਿਮਾਨ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਗੁਜਰਾਤ ਏਟੀਐਸ ਨੇ ਅੱਤਵਾਦੀ ਦੀ ਫੋਟੋ ਵੀ ਜਾਰੀ ਕੀਤੀ ਹੈ।
ਜਾਣਕਾਰੀ ਅਨੁਸਾਰ, ਉਸਨੂੰ ਰਾਮ ਮੰਦਿਰ 'ਤੇ ਹਮਲਾ ਕਰਨ ਲਈ ਆਈਐਸਆਈ ਨੇ ਸਿਖਲਾਈ ਦਿੱਤੀ ਸੀ। ਉਸਨੂੰ ਪਾਕਿਸਤਾਨੀ ਖੁਫੀਆ ਏਜੰਸੀ ਆਈਐਸਆਈ ਨੇ ਦੋ ਹੱਥਗੋਲੇ ਦਿੱਤੇ ਸਨ, ਜਿਨ੍ਹਾਂ ਨੂੰ ਉਹ ਅਯੁੱਧਿਆ ਲੈ ਜਾਣਾ ਚਾਹੁੰਦਾ ਸੀ। ਉਸਨੇ ਇਹ ਗ੍ਰਨੇਡ ਇੱਕ ਖੰਡਰ ਵਿੱਚ ਲੁਕਾਏ ਸਨ। ਉਸਦੇ ਕੋਲੋਂ ਕਈ ਸ਼ੱਕੀ ਵੀਡੀਓ ਵੀ ਬਰਾਮਦ ਹੋਏ ਹਨ, ਜਿਨ੍ਹਾਂ ਵਿੱਚ ਦੇਸ਼ ਦੇ ਪ੍ਰਮੁੱਖ ਧਾਰਮਿਕ ਸਥਾਨਾਂ ਬਾਰੇ ਜਾਣਕਾਰੀ ਸੀ। ਗ੍ਰਿਫ਼ਤਾਰ ਕੀਤੇ ਗਏ ਅੱਤਵਾਦੀ ਦੀ ਉਮਰ ਸਿਰਫ਼ 19 ਸਾਲ ਹੈ।
ਦੋਸ਼ੀ ਅਬਦੁਲ ਰਹਿਮਾਨ ਪੇਸ਼ੇ ਤੋਂ ਮਾਸ ਵੇਚਣ ਵਾਲਾ ਹੈ। ਸੁਰੱਖਿਆ ਏਜੰਸੀਆਂ ਦੇ ਅਨੁਸਾਰ, ਉਸਨੂੰ ਇੱਕ ਆਈਐਸਆਈ ਹੈਂਡਲਰ ਨੇ ਦੋ ਗ੍ਰਨੇਡ ਦਿੱਤੇ ਸਨ। ਇਹ ਕਾਰਵਾਈ ਭਾਰਤ ਦੀ ਸੁਰੱਖਿਆ ਏਜੰਸੀ NIA ਅਤੇ ਗੁਜਰਾਤ ATS ਦੀ ਜਾਣਕਾਰੀ 'ਤੇ ਕੀਤੀ ਗਈ। ਜਾਣਕਾਰੀ ਅਨੁਸਾਰ, ਅਬਦੁਲ ਰਹਿਮਾਨ ਜਮਾਤਾਂ ਵਿੱਚ ਜਾਂਦਾ ਰਹਿੰਦਾ ਸੀ। ਅਯੁੱਧਿਆ ਦੇ ਮਿਲਕੀਪੁਰ ਦਾ ਰਹਿਣ ਵਾਲਾ ਰਹਿਮਾਨ, ਸ਼ੰਕਰ ਦੇ ਨਾਮ ਹੇਠ ਫਰੀਦਾਬਾਦ ਦੇ ਪਾਲੀ ਵਿੱਚ ਲੁਕਿਆ ਹੋਇਆ ਸੀ। ਉਹ ਇੱਥੇ ਇੱਕ ਟਿਊਬਵੈੱਲ ਵਾਲੇ ਕਮਰੇ ਵਿੱਚ ਰਹਿੰਦਾ ਸੀ, ਜਿਸਦੇ ਮਾਲਕ ਦੀ ਕੁਝ ਦਿਨ ਪਹਿਲਾਂ ਮੌਤ ਹੋ ਗਈ ਸੀ। ਇਸਨੂੰ ਗੁਜਰਾਤ ਏਟੀਐਸ ਦੀ ਵੱਡੀ ਸਫਲਤਾ ਵਜੋਂ ਦੇਖਿਆ ਜਾ ਰਿਹਾ ਹੈ।
