Last Updated :
11 April 2025, 02:59 PM IST
Fire breaks out at residential building in Toronto's Little Italy : ਟੋਰਾਂਟੋ ਦੇ ਲਿਟਲ ਇਟਲੀ ਇਲਾਕੇ ਵਿੱਚ ਅੱਗ ਲੱਗਣ ਨਾਲ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਹੈ ਅਤੇ ਦੋ ਹੋਰ ਜ਼ਖਮੀ ਹੋ ਗਏ ਹਨ। ਟੋਰਾਂਟੋ ਫਾਇਰ ਚੀਫ ਜਿਮ ਜੈਸੋਪ ਨੇ ਕਿਹਾ ਕਿ ਸਵੇਰੇ 10:30 ਵਜੇ ਦੇ ਕਰੀਬ ਉਨ੍ਹਾਂ ਦੇ ਅਮਲੇ ਨੂੰ ਬਾਥਰਸਟ ਸਟਰੀਟ ਦੇ ਨੇੜੇ ਕਾਲਜ ਸਟਰੀਟ 'ਤੇ ਇੱਕ ਤਿੰਨ ਮੰਜ਼ਿਲਾ ਇਮਾਰਤ ਵਿੱਚ ਅੱਗ ਲੱਗਣ ਬਾਰੇ ਸੂਚਨਾ ਮਿਲੀ ਸੀ। ਫਾਇਰਫਾਈਟਰਾਂ ਨੇ ਪਹੁੰਚਣ 'ਤੇ ਖਿੜਕੀਆਂ ਵਿੱਚੋਂ ਭਾਰੀ ਅੱਗ ਦੀਆਂ ਲਪਟਾਂ ਅਤੇ ਧੂੰਆਂ ਨਿਕਲਦਾ ਦੇਖਿਆ। ਜੈਸੋਪ ਨੇ ਕਿਹਾ ਕਿ ਸੜਦੀ ਇਮਾਰਤ ਵਿੱਚੋਂ ਤਿੰਨ ਲੋਕਾਂ ਨੂੰ ਬਚਾਇਆ ਗਿਆ, ਪਰ ਇੱਕ ਨੂੰ ਮੌਕੇ 'ਤੇ ਮ੍ਰਿਤਕ ਐਲਾਨ ਦਿੱਤਾ ਗਿਆ।
ਪੈਰਾਮੈਡਿਕਸ ਦੇ ਅਨੁਸਾਰ, ਅੱਗ ਵਿੱਚੋਂ ਕੱਢੇ ਗਏ ਦੋ ਹੋਰ ਲੋਕਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਟੋਰਾਂਟੋ ਫਾਇਰ ਦਾ ਕਹਿਣਾ ਹੈ ਕਿ ਇਮਾਰਤ ਦੀ ਪਹਿਲੀ ਮੰਜ਼ਿਲ 'ਤੇ ਇੱਕ ਵਪਾਰਕ ਜਗ੍ਹਾ ਹੈ ਅਤੇ ਦੂਜੀ ਅਤੇ ਤੀਜੀ ਰਿਹਾਇਸ਼ੀ ਮੰਜ਼ਿਲ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਅੱਗ ਰਿਹਾਇਸ਼ੀ ਮੰਜ਼ਿਲਾਂ ਵਿੱਚੋਂ ਇੱਕ ਤੋਂ ਲੱਗੀ ਸੀ। ਜੈਸੋਪ ਨੇ ਪੁਸ਼ਟੀ ਕੀਤੀ ਕਿ ਅੱਗ 'ਤੇ ਕਾਬੂ ਪਾ ਲਿਆ ਗਿਆ ਹੈ, ਪਰ ਅਮਲਾ ਕਈ ਘੰਟਿਆਂ ਲਈ ਘਟਨਾ ਸਥਾਨ 'ਤੇ ਰਹੇਗਾ। ਉਨ੍ਹਾਂ ਕਿਹਾ ਕਿ ਅੱਗ ‘ਤੇ ਪੂਰੀ ਤਰ੍ਹਾਂ ਕਾਬੂ ਪਾ ਲਿਆ ਗਿਆ ਹੈ। ਹਾਲਾਂਕਿ ਕਲਿੰਟਨ ਸਟਰੀਟ ਅਤੇ ਮੈਨਿੰਗ ਐਵੇਨਿਊ ਦੇ ਵਿਚਕਾਰ ਕਾਲਜ ਸਟਰੀਟ 'ਤੇ ਸੜਕਾਂ ਬੰਦ ਹਨ। ਓਂਟਾਰੀਓ ਫਾਇਰ ਮਾਰਸ਼ਲ ਦੇ ਦਫ਼ਤਰ ਨੂੰ ਜਾਂਚ ਲਈ ਬੁਲਾਇਆ ਗਿਆ ਹੈ।
ਉਧਰ, ਬਰੈਂਪਟਨ ਵਿੱਚ ਇੱਕ ਵਾਹਨਾਂ ਦੀ ਟੱਕਰ ਤੋਂ ਬਾਅਦ ਦੋ ਲੋਕਾਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਏ ਗਏ। ਇਹ ਘਟਨਾ ਕੈਸਲਮੋਰ ਰੋਡ ਅਤੇ ਰਾਏ ਐਵੇਨਿਊ ਦੇ ਵਿਚਕਾਰ ਮੈਕਵੀਨ ਡਰਾਈਵ 'ਤੇ ਰਾਤ ਕਰੀਬ 10:20 ਵਜੇ ਵਾਪਰੀ। ਹਾਦਸੇ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ ਹੈ। ਦੋ ਬਾਲਗਾਂ ਨੂੰ ਮੌਕੇ ਤੋਂ ਹਸਪਤਾਲ ਲਿਜਾਇਆ ਗਿਆ, ਜਿਨ੍ਹਾਂ ਵਿਚੋਂ ਇੱਕ ਗੰਭੀਰ ਜ਼ਖਮੀ ਹੈ। ਪੁਲਿਸ ਨੇ ਇੱਕ ਅਪਡੇਟ 'ਚ ਕਿਹਾ ਕਿ ਦੋਨਾਂ ਬਾਲਗਾਂ ਦੀ ਹਾਲਤ ਸਥਿਰ ਹੈ।
