328 ਪਵਿੱਤਰ ਸਰੂਪ ਗੁੰਮ ਮਾਮਲਾ, ਐਸਜੀਪੀਸੀ ਕਾਬਜ਼ ਗੁੱਟ ਦੀ ਚੁੱਪੀ ਬਣੀ ਵੱਡਾ ਦੋਸ਼

ਪੰਜਾਬ ਵਿਧਾਨ ਸਭਾ ਸਪੀਕਰ ਕੁਲਤਾਰ ਸਿੰਘ ਸੰਧਵਾ ਨੇ 328 ਪਵਿੱਤਰ ਸਰੂਪਾਂ ਦੇ ਮਾਮਲੇ ‘ਚ ਐਸਜੀਪੀਸੀ ਕਾਬਜ਼ ਗੁੱਟ ਦੀ ਚੁੱਪੀ ਨੂੰ ਸਿੱਧੀ ਤੌਰ ‘ਤੇ ਗੁਨਾਹ ਦੀ ਗਵਾਹੀ ਕਰਾਰ ਦਿੱਤਾ।

Last Updated : 07 January 2026, 07:21 PM IST

ਚੰਡੀਗੜ੍ਹ ‘ਚ ਬੋਲਦਿਆਂ ਸੰਧਵਾ ਨੇ ਕਿਹਾ ਕਿ ਐਸਜੀਪੀਸੀ ਕਾਬਜ਼ ਗੁੱਟ ਖੁਦ ਮੰਨਦਾ ਹੈ ਕਿ ਈਸ਼ਰ ਸਿੰਘ ਕਮੇਟੀ ਅਤੇ ਆੰਤਰਿੰਗ ਕਮੇਟੀ ਨੇ ਦੋਸ਼ੀਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਦੀ ਸਿਫ਼ਾਰਸ਼ ਕੀਤੀ ਸੀ। ਫਿਰ ਸਵਾਲ ਉਠਦਾ ਹੈ ਕਿ ਅੱਜ ਤੱਕ ਉਹ ਸਿਫ਼ਾਰਸ਼ਾਂ ਲਾਗੂ ਕਿਉਂ ਨਹੀਂ ਹੋਈਆਂ। ਕੀ ਦੋਸ਼ੀਆਂ ਨੂੰ ਬਚਾਉਣ ਲਈ ਜਾਣਬੁੱਝ ਕੇ ਫ਼ਾਈਲਾਂ ਦਬਾਈਆਂ ਗਈਆਂ। ਇਹ ਚੁੱਪ ਸਿਰਫ਼ ਲਾਪਰਵਾਹੀ ਨਹੀਂ, ਇੱਕ ਸੋਚੀ-ਸਮਝੀ ਚਾਲ ਲੱਗਦੀ ਹੈ।

ਕੀ ਦੋਸ਼ੀ ਆਪਣੇ ਹੀ ਗੁੱਟ ਦੇ ਸਨ?

ਸੰਧਵਾ ਨੇ ਸਿੱਧਾ ਸਵਾਲ ਕੀਤਾ ਕਿ ਕੀ ਦੋਸ਼ੀ ਇੰਨੇ ਤਾਕਤਵਰ ਸਨ ਜਾਂ ਫਿਰ ਆਪਣੇ ਹੀ ਗਰੁੱਪ ਨਾਲ ਸਬੰਧਿਤ ਸਨ ਕਿ ਉਨ੍ਹਾਂ ਨੂੰ ਸਜ਼ਾ ਨਹੀਂ ਦਿੱਤੀ ਗਈ। ਉਨ੍ਹਾਂ ਕਿਹਾ ਕਿ ਪੰਥਕ ਮਰਿਆਦਾ ਨੂੰ ਪਾਸੇ ਰੱਖ ਕੇ ਰਾਜਨੀਤਕ ਹਿਤ ਪਹਿਲਾਂ ਰੱਖੇ ਗਏ। ਸਿੱਖ ਕੌਮ ਦੀਆਂ ਭਾਵਨਾਵਾਂ ਨਾਲ ਖੇਡ ਕਰਨਾ ਕਦੇ ਵੀ ਮਾਫ਼ੀਯੋਗ ਨਹੀਂ ਹੋ ਸਕਦਾ।

ਸੰਗਤ ਤੋਂ ਸੱਚ ਲੁਕਾਉਣ ਦੀ ਮਜਬੂਰੀ ਕੀ ਸੀ?

ਉਨ੍ਹਾਂ ਕਿਹਾ ਕਿ ਜੇ ਰਿਪੋਰਟਾਂ ਸਹੀ ਸਨ ਤਾਂ ਸੰਗਤ ਨੂੰ ਸੱਚ ਕਿਉਂ ਨਹੀਂ ਦੱਸਿਆ ਗਿਆ। ਜਾਨਬੁੱਝ ਕੇ ਸੱਚ ਲੁਕਾਉਣਾ ਸਭ ਤੋਂ ਵੱਡਾ ਦੋਸ਼ ਹੈ। ਇਹ ਚੁੱਪ ਦੋਸ਼ੀਆਂ ਦੀ ਪਿੱਠ ਥੱਪਣ ਦੇ ਬਰਾਬਰ ਹੈ। ਐਸਜੀਪੀਸੀ ਵਰਗੀ ਸੰਸਥਾ ਤੋਂ ਇਹ ਉਮੀਦ ਨਹੀਂ ਸੀ ਕਿ ਉਹ ਇੰਨੀ ਸੰਵੇਦਨਸ਼ੀਲ ਗੱਲ ‘ਤੇ ਖਾਮੋਸ਼ ਰਹੇਗੀ।

ਰਿਪੋਰਟ ਗਲਤ ਸੀ ਤਾਂ ਸੱਚ ਸਾਹਮਣੇ ਕਿਉਂ ਨਹੀਂ ਆਇਆ?

ਸੰਧਵਾ ਨੇ ਕਿਹਾ ਕਿ ਜੇ ਜਾਂਚ ਕਮੇਟੀਆਂ ਦੀਆਂ ਰਿਪੋਰਟਾਂ ਗਲਤ ਸਨ ਤਾਂ ਅੱਜ ਤੱਕ ਅਸਲ ਸੱਚ ਕਿਉਂ ਨਹੀਂ ਰੱਖਿਆ ਗਿਆ। ਇਹ ਦੋਹਰੀ ਨੀਤੀ ਸਿੱਖ ਸੰਸਥਾਵਾਂ ਦੀ ਭਰੋਸੇਯੋਗਤਾ ਨੂੰ ਵੱਡਾ ਝਟਕਾ ਹੈ। ਸਿੱਖ ਜਗਤ ਨੂੰ ਹਨੇਰੇ ‘ਚ ਰੱਖਣਾ ਕਿਸੇ ਵੀ ਹਾਲਤ ‘ਚ ਜਾਇਜ਼ ਨਹੀਂ।

ਇਨਸਾਫ਼ ਰੋਕਣ ਵਾਲੇ ਹੱਥ ਕੌਣ ਸਨ?

ਉਨ੍ਹਾਂ ਕਿਹਾ ਕਿ ਅੱਜ ਸਿੱਖ ਸਮਾਜ ਨੂੰ ਪੂਰਾ ਹੱਕ ਹੈ ਜਾਣਨ ਦਾ ਕਿ ਇਨਸਾਫ਼ ਦੇ ਰਾਹ ‘ਚ ਰੁਕਾਵਟ ਕੌਣ ਬਣਿਆ। ਸਵਾਲ ਸਿਰਫ਼ ਰਿਪੋਰਟ ਲਿਖਣ ਵਾਲਿਆਂ ਦਾ ਨਹੀਂ, ਬਲਕਿ ਉਨ੍ਹਾਂ ਦਾ ਵੀ ਹੈ ਜਿਨ੍ਹਾਂ ਨੇ ਕਾਰਵਾਈ ਰੋਕੀ। ਇਹ ਨਾਮ ਸਾਹਮਣੇ ਆਉਣੇ ਹੀ ਚਾਹੀਦੇ ਹਨ।

ਚੁੱਪ ਰਹਿਣ ਵਾਲੇ ਇਤਿਹਾਸ ‘ਚ ਗੁਨਹਗਾਰ ਰਹਿਣਗੇ?

ਸੰਧਵਾ ਨੇ ਸਖ਼ਤ ਚੇਤਾਵਨੀ ਦਿੱਤੀ ਕਿ ਪਵਿੱਤਰ ਸਰੂਪਾਂ ਦੀ ਬੇਅਦਬੀ ਅਤੇ ਲਾਪਰਵਾਹੀ ‘ਤੇ ਚੁੱਪ ਰਹਿਣ ਵਾਲੇ ਕਦੇ ਵੀ ਬਚ ਨਹੀਂ ਸਕਣਗੇ। ਦੋਸ਼ੀਆਂ ਨੂੰ ਪਨਾਹ ਦੇਣ ਵਾਲੇ ਇਤਿਹਾਸ ਦੇ ਕਟਘਰੇ ‘ਚ ਹਮੇਸ਼ਾਂ ਗੁਨਹਗਾਰ ਮੰਨੇ ਜਾਣਗੇ। ਸਿੱਖ ਕੌਮ ਇਹ ਸਭ ਨਾ ਭੁੱਲੇਗੀ ਨਾ ਮਾਫ਼ ਕਰੇਗੀ।

Tags :