ਦਿਵਿਆਂਗਾਂ ਲਈ ਖੁਸ਼ਖਬਰੀ - ਪਹਿਲੀ ਰਾਸ਼ਟਰੀ ਟੋਲ ਫ੍ਰੀ ਹੈਲਪਲਾਈਨ ਸ਼ੁਰੂ, ਇੱਕ ਫੋਨ ਨਾਲ ਮਿਲੇਗੀ ਸਾਰੀ ਜਾਣਕਾਰੀ 

ਸਮਾਜਿਕ ਨਿਆਂ ਰਾਜ ਮੰਤਰੀ ਰਾਮਦਾਸ ਅਠਾਵਲੇ ਅਤੇ ਅਪੰਗਤਾ ਮਾਮਲਿਆਂ ਦੇ ਸਕੱਤਰ ਰਾਜੇਸ਼ ਅਗਰਵਾਲ ਨੇ ਇਸਦੀ ਸ਼ੁਰੂਆਤ ਕੀਤੀ। ਇਹ ਸੇਵਾ 21 ਤਰ੍ਹਾਂ ਦੀ ਅਪੰਗਤਾ ਵਿੱਚ 153 ਸ਼੍ਰੇਣੀਆਂ ਨੂੰ ਕਵਰ ਕਰੇਗੀ। 

ਅਪੰਗਤਾ ਨਾਲ ਸਬੰਧਤ ਸਵਾਲਾਂ ਦੇ ਜਵਾਬ ਦੇਣ ਲਈ ਪਹਿਲੀ ਰਾਸ਼ਟਰੀ ਟੋਲ-ਫ੍ਰੀ ਹੈਲਪਲਾਈਨ ਸ਼ੁਰੂ ਕੀਤੀ ਗਈ।  ਪਰਪਲ ਫੈਸਟੀਵਲ ਇੰਟਰਨੈਸ਼ਨਲ ਦੌਰਾਨ  ਸਮਾਜਿਕ ਨਿਆਂ ਰਾਜ ਮੰਤਰੀ ਰਾਮਦਾਸ ਅਠਾਵਲੇ ਅਤੇ ਅਪੰਗਤਾ ਮਾਮਲਿਆਂ ਦੇ ਸਕੱਤਰ ਰਾਜੇਸ਼ ਅਗਰਵਾਲ ਨੇ ਦਿਵਿਆਂਗਾਂ ਨੂੰ ਸਹਾਇਤਾ ਸਹੂਲਤਾਂ ਪ੍ਰਦਾਨ ਕਰਨ ਲਈ ਹੈਲਪਲਾਈਨ (1800222014) ਦੀ ਸ਼ੁਰੂਆਤ ਕੀਤੀ। ਇਸ ਮੌਕੇ 'ਤੇ ਬੋਲਦਿਆਂ ਸਕੱਤਰ ਅਗਰਵਾਲ ਨੇ ਮੁੜ ਵਸੇਬੇ ਦੀ ਪ੍ਰਕਿਰਿਆ ਨੂੰ ਸੁਚਾਰੂ ਬਣਾਉਣ, ਅਪੰਗਤਾ ਅਤੇ ਸਥਾਨਕ ਸੇਵਾਵਾਂ ਬਾਰੇ ਜਾਣਕਾਰੀ ਤੱਕ ਆਸਾਨ ਪਹੁੰਚ ਪ੍ਰਦਾਨ ਕਰਨ ਲਈ ਇੱਕ ਅਪੰਗਤਾ ਸੂਚਨਾ ਲਾਈਨ ਦੀ ਲੋੜ 'ਤੇ ਜ਼ੋਰ ਦਿੱਤਾ। ਉਹਨਾਂ ਦੱਸਿਆ ਕਿ ਇਹ ਪਹਿਲਕਦਮੀ ਦਿਵਿਆਂਗਤਾ ਨਾਲ ਸਬੰਧਤ ਸਵਾਲਾਂ ਦੇ ਜਵਾਬ ਦੇਣ ਲਈ ਪਹਿਲੀ ਸਮਰਪਿਤ IVRS (ਇੰਟਰਐਕਟਿਵ ਵਾਇਸ ਰਿਸਪਾਂਸ ਸਿਸਟਮ) ਹੈਲਪਲਾਈਨ ਵਜੋਂ ਕੰਮ ਕਰੇਗੀ।

ਕਿਵੇਂ ਕੰਮ ਕਰੇਗੀ ਹੈਲਪਲਾਈਨ  

ਇਹ ਸੇਵਾ 21 ਤਰ੍ਹਾਂ ਦੀ ਅਪੰਗਤਾ ਵਿੱਚ 153 ਸ਼੍ਰੇਣੀਆਂ ਨੂੰ ਕਵਰ ਕਰੇਗੀ। ਹੈਲਪਲਾਈਨ ਸੇਵਾਵਾਂ ਵਿੱਚ ਅਪੰਗਤਾ ਦੀ ਰੋਕਥਾਮ ਅਤੇ ਪ੍ਰਬੰਧਨ, ਵਿਸ਼ੇਸ਼ ਸਕੂਲਾਂ ਵਿੱਚ ਵਿਦਿਅਕ ਮੌਕਿਆਂ ਅਤੇ ਕੇਂਦਰ ਅਤੇ ਰਾਜ ਸਰਕਾਰਾਂ ਦੀਆਂ ਸਕੀਮਾਂ ਬਾਰੇ ਵਿਸਤ੍ਰਿਤ ਜਾਣਕਾਰੀ ਸ਼ਾਮਲ ਹੈ।ਇਹ ਕਿੱਤਾਮੁਖੀ ਸਿਖਲਾਈ, ਨੌਕਰੀ ਦੇ ਮੌਕਿਆਂ ਅਤੇ ਵਿਸ਼ੇਸ਼ ਰੁਜ਼ਗਾਰ ਐਕਸਚੇਂਜਾਂ ਬਾਰੇ ਵੀ ਵਿਸ਼ੇਸ਼ ਜਾਣਕਾਰੀ ਪ੍ਰਦਾਨ ਕਰੇਗੀ। ਹੈਲਪਲਾਈਨ ਦਾ ਉਦੇਸ਼ ਸਿੱਖਿਆ, ਸਹਾਇਕ ਯੰਤਰਾਂ ਅਤੇ ਸਮਾਜਿਕ-ਆਰਥਿਕ ਪੁਨਰਵਾਸ ਬਾਰੇ ਜਾਣਕਾਰੀ ਪ੍ਰਦਾਨ ਕਰਕੇ ਪਰਿਵਾਰਾਂ ਨੂੰ ਬੇਲੋੜੇ ਅਤੇ ਮਹਿੰਗੇ ਆਵਾਜਾਈ ਖਰਚਿਆਂ ਤੋਂ ਬਚਾਉਣਾ ਹੈ।