Last Updated :
30 January 2024, 05:33 PM IST
Himachal News: ਹਿਮਾਚਲ ਪ੍ਰਦੇਸ਼ ਵਿੱਚ ਨਵੰਬਰ ਤੋਂ ਬੰਦ ਹੈਲੀ ਟੈਕਸੀ ਸੇਵਾਵਾਂ ਫਿਰ ਤੋਂ ਸ਼ੁਰੂ ਹੋਣ ਜਾ ਰਹੀਆਂ ਹਨ। ਤਿੰਨ ਕੰਪਨੀਆਂ ਹਿਮਾਚਲ ਵਿੱਚ ਹਵਾਈ ਸੇਵਾ ਸ਼ੁਰੂ ਕਰਨ ਲਈ ਸਹਿਮਤ ਹੋ ਗਈਆਂ ਹਨ। ਕਾਬਿਲੇ ਗੌਰ ਹੈ ਕਿ ਕੇਂਦਰੀ ਹਵਾਬਾਜ਼ੀ ਮੰਤਰਾਲੇ ਨੇ UDAN-2 ਤਹਿਤ ਗੈਰ-ਨਿਰਧਾਰਤ ਉਡਾਣਾਂ ਸ਼ੁਰੂ ਕਰਨ ਲਈ ਕੰਪਨੀਆਂ ਤੋਂ ਅਰਜ਼ੀਆਂ ਮੰਗੀਆਂ ਸਨ। ਕੰਪਨੀਆਂ ਨੇ ਚੰਡੀਗੜ੍ਹ ਤੋਂ ਪਾਲਮਪੁਰ, ਧਰਮਸ਼ਾਲਾ, ਚੰਬਾ, ਕਿਨੌਰ, ਰੇਕਾਂਗ ਪੀਓ ਤੱਕ ਹਵਾਈ ਸੇਵਾਵਾਂ ਦੇਣ ਦੀ ਗੱਲ ਕੀਤੀ ਹੈ। ਹੁਣ ਕੇਂਦਰ ਸਰਕਾਰ ਵੱਲੋਂ ਕੰਪਨੀਆਂ ਨੂੰ ਰੂਟ ਐਵਾਰਡ ਕੀਤੇ ਜਾਣੇ ਹਨ।
ਪਤਾ ਲੱਗਾ ਹੈ ਕਿ ਪਵਨ ਹੰਸ ਅਤੇ ਗਲੋਬਲ ਵੈਕਟਰ ਵਰਗੀਆਂ ਨਾਮੀ ਕੰਪਨੀਆਂ ਹਵਾਈ ਸੇਵਾਵਾਂ ਲਈ ਅੱਗੇ ਆਈਆਂ ਹਨ। ਇਹ ਸੇਵਾਵਾਂ ਚੰਡੀਗੜ੍ਹ-1 ਤੋਂ ਪਾਲਮਪੁਰ, ਧਰਮਸ਼ਾਲਾ ਅਤੇ ਚੰਬਾ, ਚੰਡੀਗੜ੍ਹ ਤੋਂ ਬੱਦੀ ਅਤੇ ਰੇਕਾਂਗ ਪੀਓ ਵਿਚਕਾਰ ਸ਼ੁਰੂ ਹੋਣਗੀਆਂ। ਇਸ ਦੇ ਨਾਲ ਹੀ ਇਕ ਹੋਰ ਕੰਪਨੀ ਨੇ ਧਰਮਸ਼ਾਲਾ, ਪਾਲਮਪੁਰ, ਚੰਬਾ, ਰੱਕੜ ਰੂਟ ਲਈ ਅਪਲਾਈ ਕੀਤਾ ਹੈ। ਸ਼ਿਮਲਾ ਸ਼ਹਿਰ ਦੇ ਸੰਜੌਲੀ ਅਤੇ ਸੋਲਨ ਦੇ ਬੱਦੀ ਹੈਲੀਪੋਰਟ ਤੋਂ ਵੀ ਸੇਵਾਵਾਂ ਸ਼ੁਰੂ ਕੀਤੀਆਂ ਜਾਣਗੀਆਂ।
ਸੂਬਾ ਸਰਕਾਰ ਨੇ ਚਾਲੂ ਵਿੱਤੀ ਸਾਲ ਦੌਰਾਨ ਇਨ੍ਹਾਂ ਹੈਲੀਪੋਰਟਾਂ ਦੇ ਨਿਰਮਾਣ ਅਤੇ ਵਿਸਥਾਰ ਲਈ 30 ਕਰੋੜ ਰੁਪਏ ਦਾ ਬਜਟ ਰੱਖਿਆ ਗਿਆ ਹੈ। ਸੈਰ ਸਪਾਟਾ ਵਿਭਾਗ ਦਾ ਕਹਿਣਾ ਹੈ ਕਿ ਹਿਮਾਚਲ ਨੂੰ ਰੇਲ, ਸੜਕ ਅਤੇ ਹਵਾਈ ਸੰਪਰਕ ਰਾਹੀਂ ਦੇਸ਼ ਦੀਆਂ ਵੱਖ-ਵੱਖ ਥਾਵਾਂ ਨਾਲ ਜੋੜਿਆ ਜਾਣਾ ਹੈ। ਹਵਾਈ ਸੇਵਾ ਅਤੇ ਸੈਰ-ਸਪਾਟਾ ਇਕ ਦੂਜੇ ਦੇ ਨਾਲ ਜੁੜੇ ਹੋਏ ਹਨ। ਰਾਜ ਸਰਕਾਰ ਨੇ ਹਾਲ ਹੀ ਵਿੱਚ ਰਾਜ ਵਿੱਚ ਹਵਾਈ ਆਵਾਜਾਈ ਸੇਵਾਵਾਂ ਨੂੰ ਮਜ਼ਬੂਤ ਕਰਨ ਲਈ ਕਈ ਕਦਮ ਚੁੱਕੇ ਹਨ। ਰਾਮਪੁਰ, ਬੱਦੀ, ਕੰਗਣੀਧਰ (ਮੰਡੀ) ਅਤੇ SASE, ਮਨਾਲੀ ਵਿਖੇ ਹੈਲੀਪੋਰਟ ਵਿਕਸਤ ਕੀਤੇ ਜਾ ਰਹੇ ਹਨ। ਸੈਰ ਸਪਾਟੇ ਦੇ ਵਿਕਾਸ ਨੂੰ ਉਤਸ਼ਾਹਿਤ ਕਰਨ ਨਾਲ ਸੈਲਾਨੀ ਘੱਟ ਸਮੇਂ ਵਿੱਚ ਹਿਮਾਚਲ ਦੇ ਅਛੂਤੇ ਸੈਰ-ਸਪਾਟਾ ਸਥਾਨਾਂ ਤੱਕ ਪਹੁੰਚ ਸਕਣਗੇ।
