Last Updated :
18 June 2026, 07:56 PM IST
ਪੈਰਿਸ ਵਿੱਚ ਚੱਲ ਰਹੇ ਯੂਰਪ ਦੇ ਸਭ ਤੋਂ ਵੱਡੇ ਟੈਕਨਾਲੋਜੀ ਉਤਸਵ 'ਵੀਵਾਟੇਕ 2026' ਦੇ 10ਵੇਂ ਸੰਸਕਰਣ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਆਪਣੇ ਸੰਬੋਧਨ ਵਿੱਚ ਭਾਰਤ ਦੀ ਤਕਨੀਕੀ ਸੋਚ ਦੀ ਵਿਲੱਖਣ ਪਹਿਚਾਣ ਕਰਵਾਈ। ਇਸ ਵਾਰ ਇਸ ਗਲੋਬਲ ਸਮਾਗਮ ਵਿੱਚ ਭਾਰਤ 'ਏ.ਆਈ. ਕੰਟਰੀ ਪਾਰਟਨਰ' ਵਜੋਂ ਸ਼ਾਮਲ ਹੋਇਆ ਹੈ। ਪੀ.ਐਮ. ਮੋਦੀ ਨੇ ਕਿਹਾ ਕਿ ਤਕਨੀਕ ਸਿਰਫ ਕੁਝ ਚੁਣੇ ਹੋਇਆਂ ਲਈ ਨਹੀਂ, ਸਗੋਂ ਸਾਰਿਆਂ ਦੀ ਭਲਾਈ ਲਈ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਨੂੰ ਭਾਰਤੀ ਪਰਿਪੇਖ ਵਿੱਚ ਪਰਿਭਾਸ਼ਿਤ ਕਰਦਿਆਂ ਕਿਹਾ ਕਿ ਇੱਥੇ AI ਦਾ ਮਤਲਬ 'ਆਲ ਇੰਕਲੂਸਿਵ' ਹੈ, ਯਾਨੀ ਅਜਿਹੀ ਤਕਨੀਕ ਜੋ ਹਰ ਵਰਗ, ਹਰ ਖੇਤਰ ਅਤੇ ਹਰ ਇਨਸਾਨ ਨੂੰ ਨਾਲ ਲੈ ਕੇ ਚੱਲੇ।
ਪ੍ਰਧਾਨ ਮੰਤਰੀ ਨੇ ਭਾਰਤ ਅਤੇ ਯੂਰਪੀ ਸੰਘ ਵਿਚਕਾਰ ਹਾਲ ਹੀ ਵਿੱਚ ਹੋਏ ਮੁਕਤ ਵਪਾਰ ਸਮਝੌਤੇ ਨੂੰ ਇਤਿਹਾਸਕ ਕਦਮ ਦੱਸਿਆ। ਉਨ੍ਹਾਂ ਕਿਹਾ ਕਿ ਇਹ ਸਮਝੌਤਾ ਦੋਵਾਂ ਧਿਰਾਂ ਲਈ ਨਵੇਂ ਵਪਾਰਕ ਦਰਵਾਜ਼ੇ ਖੋਲ੍ਹੇਗਾ ਅਤੇ ਨਿਵੇਸ਼ ਨੂੰ ਉਤਸ਼ਾਹ ਦੇਵੇਗਾ। ਖਾਸ ਤੌਰ 'ਤੇ, ਇਹ ਟੈਲੈਂਟ, ਟੈਕਨੋਲੋਜੀ ਅਤੇ ਸੈਰ-ਸਪਾਟੇ ਦੇ ਆਦਾਨ-ਪ੍ਰਦਾਨ ਨੂੰ ਨਵੀਂ ਉਚਾਈ ਦੇਵੇਗਾ। ਇਸ ਸਾਲ ਨੂੰ 'ਭਾਰਤ-ਫਰਾਂਸ ਇਨੋਵੇਸ਼ਨ ਈਅਰ' ਵਜੋਂ ਮਨਾਏ ਜਾਣ ਨਾਲ ਫਰਾਂਸ ਭਾਰਤ ਅਤੇ ਪੂਰੇ ਯੂਰਪ ਵਿਚਕਾਰ ਤਕਨੀਕੀ ਸਾਂਝ ਨੂੰ ਮਜ਼ਬੂਤ ਕਰਨ ਵਿੱਚ ਅਹਿਮ ਰੋਲ ਅਦਾ ਕਰ ਰਿਹਾ ਹੈ।
ਪੀ.ਐਮ. ਮੋਦੀ ਨੇ ਦੁਨੀਆਂ ਭਰ ਦੇ ਨਿਵੇਸ਼ਕਾਂ ਅਤੇ ਟੈਕ ਕੰਪਨੀਆਂ ਨੂੰ ਭਾਰਤ ਆਉਣ ਦਾ ਨਿਵੇਦਨ ਕਰਦਿਆਂ ਦੱਸਿਆ ਕਿ ਭਾਰਤ ਦੁਨੀਆਂ ਦਾ ਸਭ ਤੋਂ ਵੱਡਾ ਪ੍ਰਤਿਭਾ ਕੇਂਦਰ ਹੈ। ਸਰਕਾਰ ਨੇ 'ਈਜ਼ ਆਫ ਡੂਇੰਗ ਬਿਜ਼ਨਸ' ਨੂੰ ਤਰਜੀਹ ਦਿੰਦਿਆਂ ਨਿਯਮਾਂ ਨੂੰ ਸਰਲ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਸਟਾਰਟਅੱਪਸ ਅਤੇ ਇਨੋਵੇਸ਼ਨ ਨੂੰ ਹੁਲਾਰਾ ਦੇਣ ਲਈ ਸਰਕਾਰ ਪ੍ਰਾਈਵੇਟ ਸੈਕਟਰ ਨੂੰ 50 ਅਰਬ ਡਾਲਰ ਤੋਂ ਵੱਧ ਦੀ ਪ੍ਰੋਤਸਾਹਨ ਰਾਸ਼ੀ ਦੇ ਰਹੀ ਹੈ। ਨਾਲ ਹੀ, ਭਾਰਤ ਦੁਨੀਆਂ ਦਾ ਸਭ ਤੋਂ ਸਸਤਾ ਡਾਟਾ ਅਤੇ ਹਰੀ ਊਰਜਾ ਮੁਹੱਈਆ ਕਰਵਾਉਣ ਵਿੱਚ ਵੀ ਅਗਰਣੀ ਹੈ।
ਪੀ.ਐਮ. ਮੋਦੀ ਨੇ ਪਿਛਲੇ ਦਹਾਕੇ ਵਿੱਚ ਭਾਰਤ ਵਿੱਚ ਡਿਜ਼ੀਟਲ ਖੇਤਰ ਵਿੱਚ ਆਏ ਬਦਲਾਅ ਦਾ ਵੇਰਵਾ ਦਿੰਦਿਆਂ ਦੱਸਿਆ ਕਿ ਅੱਜ ਦੁਨੀਆਂ ਦੇ ਕੁੱਲ ਰੀਅਲ-ਟਾਈਮ ਡਿਜ਼ੀਟਲ ਲੈਣ-ਦੇਣ ਦਾ 50% ਹਿੱਸਾ ਅਕੇਲੇ ਭਾਰਤ ਵਿੱਚ ਹੁੰਦਾ ਹੈ। ਇਹ ਡਿਜ਼ੀਟਲ ਕ੍ਰਾਂਤੀ ਹੁਣ ਫਰਾਂਸ ਵਿੱਚ ਵੀ ਦਿਖਾਈ ਦੇ ਰਹੀ ਹੈ, ਜਿੱਥੇ ਏਫੀਲ ਟਾਵਰ ਅਤੇ ਪੈਰਿਸ ਏਅਰਪੋਰਟ ਵਰਗੇ ਸਥਾਨਾਂ 'ਤੇ ਯੂ.ਪੀ.ਆਈ. ਰਾਹੀਂ ਭੁਗਤਾਨ ਦੀ ਸਹੂਲਤ ਉਪਲਬਧ ਹੈ। ਡਿਜ਼ੀਲਾਕਰ ਵਰਗੀਆਂ ਡਿਜ਼ੀਟਲ ਪਬਲਿਕ ਸੁਵਿਧਾਵਾਂ ਅੱਜ ਵਿਸ਼ਵ ਲਈ ਮਿਸਾਲ ਪੇਸ਼ ਕਰ ਰਹੀਆਂ ਹਨ।
ਪ੍ਰਧਾਨ ਮੰਤਰੀ ਨੇ ਆਪਣੀ ਟੈਕ ਨੀਤੀ ਨੂੰ ਸਪੱਸ਼ਟ ਕਰਦਿਆਂ ਕਿਹਾ ਕਿ ਸਰਕਾਰ ਦਾ ਰੋਲ ਢਾਂਚਾ ਤਿਆਰ ਕਰਨ ਦਾ ਹੈ, ਜਦੋਂ ਕਿ ਇੰਡਸਟਰੀ ਨਵੀਨਤਾ, ਸਟਾਰਟਅੱਪਸ ਨਵੇਂ ਬਦਲਾਅ ਅਤੇ ਗਲੋਬਲ ਪਾਰਟਨਰ ਇਸ ਨੂੰ ਵਿਸ਼ਵ ਪੱਧਰ 'ਤੇ ਵਿਸਤਾਰ ਦੇਣਗੇ। ਉਨ੍ਹਾਂ ਗਲੋਬਲ ਟੈਕ ਦਿੱਗਜਾਂ ਨੂੰ ਭਾਰਤ ਦੇ ਨਾਲ ਹੱਥ ਮਿਲਾਉਣ ਅਤੇ ਅਜਿਹੀ ਤਕਨੀਕ ਵਿਕਸਤ ਕਰਨ ਦੀ ਅਪੀਲ ਕੀਤੀ, ਜੋ ਮਨੁੱਖਤਾ ਦੇ ਹਰ ਵਰਗ ਨੂੰ ਲਾਭ ਪਹੁੰਚਾ ਸਕੇ।
