Last Updated :
26 July 2026, 11:18 AM IST
Courtesy: X@rajnathsingh
ਨਵੀਂ ਦਿੱਲੀ: 1999 ਦੇ ਕਾਰਗਿਲ ਯੁੱਧ ਦੌਰਾਨ ਭਾਰਤ ਮਾਤਾ ਦੀ ਰੱਖਿਆ ਕਰਦੇ ਹੋਏ ਆਪਣੀਆਂ ਜਾਨਾਂ ਗਵਾਉਣ ਵਾਲੇ ਬਹਾਦਰ ਸੈਨਿਕਾਂ ਦੀ ਸ਼ਹਾਦਤ ਦੀ ਯਾਦ ਵਿੱਚ ਲੱਦਾਖ ਦੇ ਦਰਾਸ ਵਿੱਚ ਕਾਰਗਿਲ ਯੁੱਧ ਸਮਾਰਕ ਵਿਖੇ ਦੋ ਦਿਨਾਂ ਸਮਾਗਮ ਸ਼ੁਰੂ ਹੋਇਆ। ਆਪ੍ਰੇਸ਼ਨ ਵਿਜੇ ਦੀ 27ਵੀਂ ਵਰ੍ਹੇਗੰਢ ਨੂੰ ਮਨਾਉਣ ਲਈ ਸ਼ਨੀਵਾਰ ਸ਼ਾਮ ਨੂੰ ਇੱਕ ਭਾਵੁਕ ਅਤੇ ਸਨਮਾਨਜਨਕ 'ਸ਼ੌਰਿਆ ਸੰਧਿਆ' (ਬਹਾਦਰੀ ਦੀ ਸ਼ਾਮ) ਦਾ ਆਯੋਜਨ ਕੀਤਾ ਗਿਆ। ਭਾਰਤ ਦੇ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਇਸ ਮੌਕੇ 'ਤੇ ਵਿਸ਼ੇਸ਼ ਤੌਰ 'ਤੇ ਦਰਾਸ ਪਹੁੰਚੇ ਅਤੇ ਉਨ੍ਹਾਂ ਨੇ ਰਾਸ਼ਟਰ ਲਈ ਸਰਵਉੱਚ ਕੁਰਬਾਨੀ ਦੇਣ ਵਾਲੇ ਨਾਇਕਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਇਸ ਦੌਰਾਨ ਮੰਤਰੀ ਨੇ ਅਮਰ ਸ਼ਹੀਦਾਂ ਦੇ ਪਰਿਵਾਰਾਂ ਨੂੰ ਇੱਕ ਰਸਮੀ ਅਤੇ ਪਵਿੱਤਰ ਕਲਸ਼ ਵੀ ਭੇਟ ਕੀਤਾ।
ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਸ਼ਨੀਵਾਰ ਨੂੰ ਦ੍ਰਾਸ ਪਹੁੰਚੇ ਅਤੇ ਸ਼ੌਰਿਆ ਸੰਧਿਆ ਵਿੱਚ ਸ਼ਾਮਲ ਹੋਏ। ਉਹ ਐਤਵਾਰ ਨੂੰ ਹੋਣ ਵਾਲੇ 'ਸ਼ਰਧਾਂਜਲੀ ਸਮਾਰੋਹ' ਦੇ ਮੁੱਖ ਮਹਿਮਾਨ ਵੀ ਹੋਣਗੇ। ਇਸ ਮੌਕੇ ਉਹ ਕਾਰਗਿਲ ਵਾਰ ਮੈਮੋਰੀਅਲ 'ਤੇ ਸ਼ਹੀਦਾਂ ਨੂੰ ਪੁਸ਼ਪ ਚੱਕਰ ਅਰਪਿਤ ਕਰਕੇ ਸ਼ਰਧਾਂਜਲੀ ਭੇਟ ਕਰਨਗੇ।
ਸਮਾਗਮ ਵਿੱਚ ਲੱਦਾਖ ਦੇ ਉਪ ਰਾਜਪਾਲ ਵੀ.ਕੇ. ਸਕਸੇਨਾ, ਫੌਜ ਮੁਖੀ ਜਨਰਲ ਧੀਰਜ ਸੇਠ, ਉੱਤਰੀ ਕਮਾਂਡ ਦੇ ਜੀਓਸੀ-ਇਨ-ਸੀ ਲੈਫ਼ਟੀਨੈਂਟ ਜਨਰਲ ਪ੍ਰਤੀਕ ਸ਼ਰਮਾ, ਕਈ ਸੀਨੀਅਰ ਫੌਜੀ ਅਧਿਕਾਰੀ, ਕਾਰਗਿਲ ਯੁੱਧ ਦੇ ਸੈਨਿਕ, ਵੀਰ ਨਾਰੀਆਂ ਅਤੇ ਸ਼ਹੀਦ ਪਰਿਵਾਰਾਂ ਦੇ ਮੈਂਬਰ ਮੌਜੂਦ ਰਹੇ।
ਸ਼ੌਰਿਆ ਸੰਧਿਆ ਦੌਰਾਨ ਲੱਦਾਖ ਸਕਾਊਟਸ ਦੇ ਬੈਂਡ ਨੇ ਦੇਸ਼ਭਗਤੀ ਨਾਲ ਭਰੇ ਗੀਤ ਪੇਸ਼ ਕੀਤੇ। ਏ.ਆਰ. ਰਹਿਮਾਨ ਦਾ ਪ੍ਰਸਿੱਧ ਗੀਤ 'ਮਾਂ ਤੁਜੇ ਸਲਾਮ' ਵੀ ਪੇਸ਼ ਕੀਤਾ ਗਿਆ, ਜਿਸ ਨੇ ਮੌਜੂਦ ਲੋਕਾਂ ਨੂੰ ਭਾਵੁਕ ਕਰ ਦਿੱਤਾ। ਇਸ ਤੋਂ ਬਾਅਦ ਮਹਿਮਾਨਾਂ ਨੇ ਵਾਰ ਮੈਮੋਰੀਅਲ ਦੇ ਓਬੇਲਿਸਕ ਕੋਲ ਮੋਮਬੱਤੀਆਂ ਜਗਾ ਕੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਦਿੱਤੀ।
ਰਾਤ ਪੈਂਦੇ ਹੀ 'ਵੀਰ ਭੂਮੀ' ਖੇਤਰ ਵਿੱਚ ਬਣੇ ਸ਼ਹੀਦ ਸਮਾਰਕਾਂ ਨੂੰ ਰੌਸ਼ਨੀ ਨਾਲ ਸਜਾਇਆ ਗਿਆ, ਜਿਸ ਨਾਲ ਪੂਰਾ ਇਲਾਕਾ ਦੇਸ਼ਭਗਤੀ ਦੇ ਰੰਗ ਵਿੱਚ ਰੰਗਿਆ ਨਜ਼ਰ ਆਇਆ।
ਦੋ ਦਿਨਾਂ ਦੇ ਸਮਾਗਮ ਦਾ ਸਮਾਪਨ ਐਤਵਾਰ ਨੂੰ ਹੋਣ ਵਾਲੇ ਸ਼ਰਧਾਂਜਲੀ ਸਮਾਰੋਹ ਨਾਲ ਹੋਵੇਗਾ। ਇਸ ਮੌਕੇ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਅਤੇ ਫੌਜ ਮੁਖੀ ਸਮੇਤ ਸੀਨੀਅਰ ਸੈਨਿਕ ਅਧਿਕਾਰੀ, ਕਾਰਗਿਲ ਯੁੱਧ ਦੇ ਸਾਬਕਾ ਜਵਾਨ, ਸ਼ਹੀਦਾਂ ਦੇ ਪਰਿਵਾਰਕ ਮੈਂਬਰ, ਨਾਗਰਿਕ ਅਧਿਕਾਰੀ ਅਤੇ ਸੇਵਾ ਨਿਭਾ ਰਹੇ ਸੈਨਿਕ ਕਾਰਗਿਲ ਦੇ ਅਮਰ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਟ ਕਰਨਗੇ। ਇਸ ਦੇ ਨਾਲ ਹੀ ਦਿੱਲੀ ਦੇ ਨੈਸ਼ਨਲ ਵਾਰ ਮੈਮੋਰੀਅਲ ਤੋਂ ਦ੍ਰਾਸ ਤੱਕ ਕੱਢੀ ਗਈ 'ਸ਼ੌਰਿਆ ਵਿਜੇ ਯਾਤਰਾ' ਦਾ ਵੀ ਸਮਾਪਨ ਕੀਤਾ ਜਾਵੇਗਾ।
ਕਾਰਗਿਲ ਵਿਜੇ ਦਿਵਸ ਦੀ 27ਵੀਂ ਵਰ੍ਹੇਗੰਢ 'ਤੇ, ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਟਿੱਪਣੀ ਕੀਤੀ ਕਿ ਜਿੱਥੇ ਭਾਰਤ ਨਵੀਨਤਾ ਦੇ ਰਸਤੇ ਲੱਭ ਰਿਹਾ ਹੈ, ਉੱਥੇ ਪਾਕਿਸਤਾਨ ਘੁਸਪੈਠ ਦੇ ਤਰੀਕੇ ਲੱਭ ਰਿਹਾ ਹੈ। ਜਿੱਥੇ ਭਾਰਤ ਜਹਾਜ਼ ਡਿਜ਼ਾਈਨ ਕਰ ਰਿਹਾ ਹੈ, ਉੱਥੇ ਪਾਕਿਸਤਾਨ ਅੱਤਵਾਦ ਨੂੰ ਡਿਜ਼ਾਈਨ ਕਰਨ ਵਿੱਚ ਰੁੱਝਿਆ ਹੋਇਆ ਹੈ। ਭਾਰਤ ਇੱਕ ਸਟਾਰਟਅੱਪ ਈਕੋਸਿਸਟਮ ਬਣਾ ਰਿਹਾ ਹੈ, ਜਦੋਂ ਕਿ ਪਾਕਿਸਤਾਨ ਇੱਕ ਅੱਤਵਾਦੀ ਈਕੋਸਿਸਟਮ ਬਣਾ ਰਿਹਾ ਹੈ। ਭਾਰਤ ਸੈਮੀਕੰਡਕਟਰ ਬਣਾ ਰਿਹਾ ਹੈ, ਜਦੋਂ ਕਿ ਪਾਕਿਸਤਾਨ ਆਤਮਘਾਤੀ ਬੰਬ ਤਿਆਰ ਕਰ ਰਿਹਾ ਹੈ।
ਭਾਰਤ ਪੁਲਾੜ ਮਿਸ਼ਨਾਂ ਲਈ ਮਾਨਤਾ ਪ੍ਰਾਪਤ ਕਰ ਰਿਹਾ ਹੈ, ਜਦੋਂ ਕਿ ਪਾਕਿਸਤਾਨ ਪ੍ਰੌਕਸੀ ਮਿਸ਼ਨ ਚਲਾ ਰਿਹਾ ਹੈ। ਭਾਰਤ ਪੁਲਾੜ ਵਿੱਚ ਸੈਟੇਲਾਈਟ ਲਾਂਚ ਕਰ ਰਿਹਾ ਹੈ, ਜਦੋਂ ਕਿ ਪਾਕਿਸਤਾਨ ਸਰਹੱਦ ਪਾਰ ਅੱਤਵਾਦੀਆਂ ਨੂੰ ਭੇਜਣਾ ਜਾਰੀ ਰੱਖਦਾ ਹੈ।
ਉਨ੍ਹਾਂ ਕਿਹਾ ਕਿ ਭਾਰਤ ਦੁਨੀਆ ਨੂੰ ਸਾਫਟਵੇਅਰ ਪ੍ਰਦਾਨ ਕਰਦਾ ਹੈ, ਜਦੋਂ ਕਿ ਪਾਕਿਸਤਾਨ ਸਲੀਪਰ ਸੈੱਲ ਸਪਲਾਈ ਕਰਦਾ ਹੈ। ਭਾਰਤ ਡੇਟਾ ਸੈਂਟਰ ਬਣਾਉਂਦਾ ਹੈ, ਜਦੋਂ ਕਿ ਪਾਕਿਸਤਾਨ ਕੱਟੜਪੰਥੀਕਰਨ ਦੇ ਕੇਂਦਰ ਸਥਾਪਤ ਕਰਦਾ ਹੈ। ਭਾਰਤ ਦੁਨੀਆ ਨੂੰ ਏਆਈ ਰਾਹੀਂ ਜੋੜਦਾ ਹੈ, ਜਦੋਂ ਕਿ ਪਾਕਿਸਤਾਨ ਅੱਤਵਾਦ ਨੂੰ ਹਵਾਲਾ ਨੈੱਟਵਰਕ ਨਾਲ ਜੋੜਦਾ ਹੈ। ਇਹ ਸਪੱਸ਼ਟ ਹੈ ਕਿ ਸਾਡੇ ਰਸਤੇ ਵੱਖੋ-ਵੱਖਰੇ ਹਨ। ਅਜਿਹੇ ਹਾਲਾਤ ਵਿੱਚ, ਜੇਕਰ ਪਾਕਿਸਤਾਨ ਸਾਡੇ ਰਾਹ ਵਿੱਚ ਰੋੜੇ ਅਟਕਾਏਗਾ ਤਾਂ ਸਾਡੀਆਂ ਹਥਿਆਰਬੰਦ ਫੌਜਾਂ ਢੁਕਵਾਂ ਜਵਾਬ ਦੇਣ ਲਈ ਤਿਆਰ ਹਨ।
