ਮਜੀਠੀਆ ਦੇ ਹੱਕ 'ਚ ਕਾਂਗਰਸ ! ਬਾਜਵਾ ਨੇ ਕਰਤਾ ਵੱਡਾ ਐਲਾਨ 

ਬਿਕਰਮ ਮਜੀਠੀਆ ਦੀ ਪਤਨੀ ਤੇ ਵਿਧਾਇਕ ਗਿਨੀਵ ਕੌਰ ਨੂੰ ਸੰਮਨ ਜਾਰੀ ਹੋਣ ਮਗਰੋਂ ਸਿਆਸਤ ਭਖੀ। ਵਿਰੋਧੀ ਧਿਰ ਮਜੀਠੀਆ ਦੇ ਨਾਲ ਖੜ੍ਹੀ। 

ਸਾਬਕਾ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਦੀ ਪਤਨੀ ਗਿਨੀਵ ਕੌਰ ਮਜੀਠੀਆ ਨੂੰ ਡਰੱਗ ਮਾਮਲੇ 'ਚ ਸੰਮਨ ਜਾਰੀ ਹੋਣ ਤੋਂ ਬਾਅਦ ਕਾਂਗਰਸ ਪਾਰਟੀ ਸਾਬਕਾ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਦੇ ਸਮਰਥਨ 'ਚ ਆ ਗਈ ਹੈ। ਅਜਿਹਾ ਅਸੀਂ ਨਹੀਂ ਕਹਿ ਰਹੇ, ਇਸਦੇ ਸੰਕੇਤ ਖੁਦ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਤੇ ਪੰਜਾਬ ਵਿਧਾਨ ਸਭਾ ਵਿਰੋਧੀ ਧਿਰ ਆਗੂ ਪ੍ਰਤਾਪ ਸਿੰਘ ਬਾਜਵਾ ਨੇ ਦਿੱਤੇ। ਬਾਜਵਾ ਨੇ ਸਿੱਧੇ ਤੌਰ 'ਤੇ ਐਲਾਨ ਕੀਤਾ ਕਿ ਕਾਂਗਰਸ ਮਹਿਲਾ ਵਿਧਾਇਕ ਨੂੰ ਸੰਮਨ ਭੇਜਣ ਦਾ ਵਿਰੋਧ ਕਰਦੀ ਹੈ। ਔਰਤਾਂ ਨੂੰ ਸਿਆਸੀ ਬਦਲਾਖੋਰੀ 'ਚ ਲਿਆਉਣਾ ਭਗਵੰਤ ਮਾਨ ਨੂੰ ਮਹਿੰਗਾ ਸਾਬਤ ਹੋਵੇਗਾ। ਬਾਜਵਾ ਨੇ ਕਿਹਾ ਕਿ ਪੰਜਾਬ ਵਿੱਚ ਕਦੇ ਵੀ ਅਜਿਹਾ ਰਿਵਾਜ ਨਹੀਂ ਰਿਹਾ ਕਿ ਔਰਤਾਂ ਨੂੰ ਕਿਸੇ ਰੰਜਿਸ਼ ਵਿੱਚ ਘਸੀਟਿਆ ਜਾਵੇ ਜਾਂ ਔਰਤਾਂ ਦੇ ਅਕਸ ਨੂੰ ਢਾਹ ਲਗਾਈ ਜਾਵੇ। 'ਆਪ' ਸਰਕਾਰ 'ਚ ਅਜਿਹਾ ਪਹਿਲੀ ਵਾਰ ਹੋ ਰਿਹਾ ਹੈ। ਇਸਦਾ ਸਖ਼ਤ ਵਿਰੋਧ ਕੀਤਾ ਜਾਵੇਗਾ। ਬਾਜਵਾ ਨੇ ਇਹਨਾਂ ਗੱਲਾਂ ਦਾ ਪ੍ਰਗਟਾਵਾ ਖੰਨਾ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕੀਤਾ।