Last Updated :
24 August 2026, 09:45 PM IST
ਪ੍ਰਵਰਤਨ ਨਿਰਦੇਸ਼ਾਲਾ (ED) ਦੀ ਚੰਡੀਗੜ੍ਹ ਜ਼ੋਨਲ ਦਫ਼ਤਰ ਵੱਲੋਂ ਜਾਅਲੀ ਕਾਲ ਸੈਂਟਰ ਰਾਹੀਂ ਵਿਦੇਸ਼ੀ ਨਾਗਰਿਕਾਂ ਨਾਲ ਧੋਖਾਧੜੀ ਅਤੇ ਧਨ ਸ਼ੋਧਨ ਦੇ ਮਾਮਲੇ ਵਿੱਚ ਵੱਡੀ ਕਾਰਵਾਈ ਕੀਤੀ ਗਈ ਹੈ। ਈ.ਡੀ. ਦੀਆਂ ਟੀਮਾਂ ਨੇ ਚੰਡੀਗੜ੍ਹ, ਮੋਹਾਲੀ ਅਤੇ ਮੱਧ ਪ੍ਰਦੇਸ਼ ਵਿੱਚ ਫੈਲੇ 8 ਵੱਖ-ਵੱਖ ਠਿਕਾਣਿਆਂ 'ਤੇ ਇੱਕੋ ਵੇਲੇ ਛਾਪੇਮਾਰੀ ਕੀਤੀ। ਇਹ ਕਾਰਵਾਈ ਵਿਜੈ ਰਾਜ ਕਪੂਰੀਆ, ਵਰਿੰਦਰ ਰਾਜ, ਮੈਸਰਜ਼ ਇਨਫਿਮਮ ਐਂਟਰਪ੍ਰਾਈਜ਼ ਅਤੇ ਉਨ੍ਹਾਂ ਨਾਲ ਸਬੰਧਤ ਹੋਰ ਸੰਸਥਾਵਾਂ ਦੇ ਅਹਾਤਿਆਂ 'ਤੇ ਕੀਤੀ ਗਈ, ਜਿੱਥੋਂ 20 ਲੱਖ ਰੁਪਏ ਦੀ ਨਕਦੀ, ਡਿਜੀਟਲ ਉਪਕਰਨ ਅਤੇ ਹੋਰ ਕਾਫ਼ੀ ਸਾਮਾਨ ਜ਼ਬਤ ਹੋਇਆ ਹੈ।
ਈ.ਡੀ. ਨੇ ਇਹ ਜਾਂਚ ਪੰਜਾਬ ਪੁਲਿਸ ਦੇ ਥਾਣਾ ਸੋਹਾਣਾ (SAS ਨਗਰ, ਮੋਹਾਲੀ) ਵਿੱਚ ਦਰਜ FIR ਅਤੇ ਦੋਸ਼ੀਆਂ ਖ਼ਿਲਾਫ਼ ਦਾਖ਼ਲ ਚਾਰਜਸ਼ੀਟ ਦੇ ਆਧਾਰ 'ਤੇ ਸ਼ੁਰੂ ਕੀਤੀ ਸੀ। ਪੁਲਿਸ ਜਾਂਚ ਵਿੱਚ ਖੁਲਾਸਾ ਹੋਇਆ ਸੀ ਕਿ ਮੋਹਾਲੀ ਦੇ ਸੈਕਟਰ 108 ਸਥਿਤ ਇਮਾਰ (EMAAR) ਬਿਲਡਿੰਗ, ਪਲਾਟ ਨੰਬਰ 29 ਤੋਂ ਇੱਕ ਗੈਰ-ਕਾਨੂੰਨੀ ਅਤੇ ਜਾਅਲੀ ਕਾਲ ਸੈਂਟਰ ਚਲਾਇਆ ਜਾ ਰਿਹਾ ਸੀ, ਜੋ ਵਿਦੇਸ਼ੀ ਨਾਗਰਿਕਾਂ ਨੂੰ ਨਿਸ਼ਾਨਾ ਬਣਾ ਕੇ ਠੱਗੀ ਦਾ ਧੰਦਾ ਕਰਦਾ ਸੀ।
ਜਾਂਚ ਵਿੱਚ ਇਹ ਵੀ ਪਾਇਆ ਗਿਆ ਕਿ ਪੀੜਤਾਂ ਕੋਲੋਂ ਠੱਗੇ ਗਏ ਪੈਸੇ ਨੂੰ PAYPAL, STRIPE, ਬੈਂਕਿੰਗ ਚੈਨਲਾਂ, ਬਿਟਕੋਇਨ/ਕ੍ਰਿਪਟੋਕਰੰਸੀ ਅਤੇ ਹਵਾਲਾ ਰਾਹੀਂ ਵੱਖ-ਵੱਖ ਖਾਤਿਆਂ ਵਿੱਚ ਟ੍ਰਾਂਸਫਰ ਕੀਤਾ ਜਾਂਦਾ ਸੀ। ਇਸ ਤੋਂ ਬਾਅਦ ਇਨ੍ਹਾਂ ਫੰਡਾਂ ਨੂੰ ਅਮਰੀਕਾ ਸਥਿਤ ਜਾਅਲੀ/ਸ਼ੈੱਲ ਕੰਪਨੀਆਂ ਦੇ ਖਾਤਿਆਂ ਵਿੱਚ ਘੁਮਾ ਕੇ ਧਨ ਸ਼ੋਧਨ ਕੀਤਾ ਜਾਂਦਾ ਸੀ। ਈ.ਡੀ. ਨੇ ਖੁਲਾਸਾ ਕੀਤਾ ਕਿ ਮੈਸਰਜ਼ ਇਨਫਿਮਮ ਐਂਟਰਪ੍ਰਾਈਜ਼ LLP ਦੇ ਬੈਂਕ ਖਾਤੇ ਵਿੱਚ ਕਈ ਸ਼ੱਕੀ ਵਿਦੇਸ਼ੀ ਸ਼ੈੱਲ ਸੰਸਥਾਵਾਂ ਤੋਂ ਸਿੱਧੇ ਤੌਰ 'ਤੇ ਫੰਡ ਪ੍ਰਾਪਤ ਹੋਏ ਸਨ, ਜਿਸ ਨੇ ਪੂਰੇ ਮਾਮਲੇ ਨੂੰ ਹੋਰ ਗੰਭੀਰ ਬਣਾ ਦਿੱਤਾ ਹੈ।
