Last Updated :
28 May 2023, 02:56 PM IST
ਚੇਨਈ ਸੁਪਰ ਕਿੰਗਜ਼ ਐਤਵਾਰ ਰਾਤ ਨੂੰ 2023 ਇੰਡੀਅਨ ਪ੍ਰੀਮੀਅਰ ਲੀਗ ਦੇ ਖ਼ਿਤਾਬੀ ਮੁਕਾਬਲੇ ਵਿੱਚ ਗੁਜਰਾਤ ਟਾਇਟਨਸ ਨਾਲ ਭਿੜੇਗੀ। ਮਹਿੰਦਰ ਸਿੰਘ ਧੋਨੀ ਦੀ ਅਗਵਾਈ ਵਾਲੀ ਟੀਮ ਪੰਜਵੇਂ ਆਈਪੀਐੱਲ ਖਿਤਾਬ ਦੀ ਦਾਵੇਦਾਰੀ ਲਈ ਖੇਡੇਗੀ, ਜਿਸ ਨਾਲ ਕਿ ਉਹ ਮੁੰਬਈ ਇੰਡੀਅਨਜ਼ ਦੀ ਬਰਾਬਰੀ ਕਰ ਲਵੇਗੀ, ਜੋ ਮੌਜੂਦਾ ਟੂਰਨਾਮੈਂਟ ਦੇ ਇਤਿਹਾਸ ਦੀ ਸਭ ਤੋਂ ਸਫਲ ਟੀਮ ਹੈ। ਇਤਫਾਕਨ, ਸੀਐੱਸਕੇ ਅਤੇ ਐੱਮਆਈ, ਦੋਵੇਂ ਹੀ ਅਜਿਹੀਆਂ ਧਿਰਾਂ ਹਨ ਜਿਨ੍ਹਾਂ ਨੇ ਲਗਾਤਾਰ ਦੋ ਬਾਰ ਆਈਪੀਐੱਲ ਖਿਤਾਬ ਜਿੱਤਿਆ ਹੈ; ਸੀਐੱਸਕੇ ਨੇ 2010 ਅਤੇ 2011 ਵਿੱਚ ਇਹ ਖਿਤਾਬ ਜਿੱਤਿਆ ਹੈ, ਐੱਮਆਈ ਨੇ 2019 ਅਤੇ 2020 ਦੇ ਐਡੀਸ਼ਨਾਂ ਵਿੱਚ ਇਹ ਉਪਲਬਧੀ ਹਾਸਲ ਕੀਤੀ ਹੈ।
ਟਾਈਟਨਜ਼ ਦਾ ਟੀਚਾ ਇਸ ਉਪਲਬਧੀ ਨੂੰ ਹਾਸਲ ਕਰਨ ਵਾਲੀ ਤੀਜੀ ਟੀਮ ਬਣਨ ਦਾ ਹੋਵੇਗਾ ਪਰ ਸੀਐਸਕੇ ਦੇ ਮੁੱਖ ਕੋਚ ਸਟੀਫਨ ਫਲੇਮਿੰਗ ਦਾ ਮੰਨਣਾ ਹੈ ਕਿ ਹਾਰਦਿਕ ਪੰਡਯਾ ਦੀ ਅਗਵਾਈ ਵਾਲੀ ਟੀਮ ਲਈ ਅਜਿਹਾ ਕਰਨਾ ‘ਬਹੁਤ ਹੀ ਔਖਾ’ ਹੋਵੇਗਾ।
“ਇਹ ਅਸੰਭਵ ਹੈ, ਉਹਨਾਂ (ਜੀ.ਟੀ.) ਲਈ ਇਹ ਕਰਨਾ ਬਹੁਤ ਔਖਾ ਹੋਵੇਗਾ (ਹੱਸਦੇ ਹੋਏ)। ਨਹੀਂ, ਉਹ ਇੱਕ ਵਧੀਆ ਧਿਰ ਹਨ।” ਫਲੇਮਿੰਗ ਨੇ ਸ਼ਨਿੱਚਰਵਾਰ ਨੂੰ ਮੈਚ ਤੋਂ ਪਹਿਲਾਂ ਹੋਈ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ ਕਿ ਤੁਹਾਨੂੰ ਇਹ ਮੰਨਣਾ ਹੋਵੇਗਾ ਕਿ ਉਨ੍ਹਾਂ ਨੇ ਬਹੁਤ ਹੀ ਥੋੜ੍ਹੇ ਸਮੇਂ ਵਿੱਚ ਜੋ ਕੁਝ ਹਾਸਲ ਕੀਤਾ, ਉਹ ਸੱਚਮੁੱਚ ਹੀ ਕਾਬਿਲੇ ਤਾਰੀਫ਼ ਹੈ।
ਮੈਨੂੰ ਉਹਨਾਂ ਦਾ ਕੋਚਿੰਗ ਦੇਣ ਦਾ ਢੰਗ ਬਹੁਤ ਪਸੰਦ ਹੈ, ਉਹ ਅਸਲ ਵਿੱਚ ਸੰਤੁਲਿਤ ਟੀਮ ਹੈ। ਆਸ਼ੀਸ਼, ਆਪਣੀਆਂ ਸਾਰੀਆਂ ਬਾਰੀਕੀਆਂ ਸਮੇਤ ਖੇਡ ਦੀ ਭਰਭੂਰ ਸਮਝ ਪ੍ਰਾਪਤ ਕਰ ਚੁੱਕੇ ਹਨ, ਚੇਨਈ ਵਿੱਚ ਕੰਮ ਕਰਨ ਤੋਂ ਬਾਅਦ ਉਹਨਾਂ ਦਾ ਉਤਸ਼ਾਹ ਸੱਚਮੁੱਚ ਵਧੀਆ ਹੈ। ਉਨ੍ਹਾਂ ਨੇ ਜੋ ਕੀਤਾ ਹੈ ਉਸ ਲਈ ਅਸੀਂ ਉਹਨਾਂ ਦਾ ਬਹੁਤ ਹੀ ਜ਼ਿਆਦਾ ਸਨਮਾਨ ਕਰਦੇ ਹਾਂ ਪਰ ਬਾਰ-ਬਾਰ ਜਿੱਤਣਾ ਬਹੁਤ ਮੁਸ਼ਕਲ ਹੈ।
ਦਿਲਚਸਪ ਗੱਲ ਇਹ ਹੈ ਕਿ ਗੁਜਰਾਤ ਟਾਈਟਨਜ਼ ਦੇ ਟੀਮ ਨਿਰਦੇਸ਼ਕ ਵਿਕਰਮ ਸੋਲੰਕੀ ਨੇ ਵੀ ਉਹਨਾਂ ਦੀ ਸ਼ਲਾਘਾ ਕੀਤੀ ਪਰ ਇਹ ਵੀ ਕਿਹਾ ਕਿ ਇੱਥੇ ਉਨ੍ਹਾਂ ਦੇ ‘ਹੋਮ ਗਰਾਉਂਡ’ ਦੀਆਂ ਸਥਿਤੀਆਂ ਦਾ ਗਿਆਨ ਉਨ੍ਹਾਂ ਨੂੰ ਚੰਗੀ ਮਜਬੂਤੀ ਪ੍ਰਦਾਨ ਕਰੇਗਾ।
ਉਹਨਾਂ ਨੇ ਕਿਹਾ ਕਿ ਅਸੀਂ ਇੱਥੇ ਕਈ ਵਾਰ ਖੇਡੇ ਹਾਂ, ਇੱਥੇ ਫਾਈਨਲ (ਪਿਛਲੇ ਸਾਲ) ਵੀ ਖੇਡੇ ਅਤੇ ਵੱਡੇ ਮੈਚਾਂ ਵਿੱਚ ਸਫਲ ਵੀ ਰਹੇ, ਸਾਡਾ ਤਜ਼ਰਬਾ ਇਥੇ ਬਿਹਤਰ ਹੈ। ਅਸੀਂ ਪੂਰੀ ਤਰਾਂ ਤਿਆਰ ਹਾਂ।
ਸੋਲੰਕੀ ਨੇ ਅੱਗੇ ਕਿਹਾ ਕਿ ਅਸੀਂ ਸੀਐੱਸਕੇ ਦੁਆਰਾ ਦਿੱਤੇ ਗਏ ਇਸ ਤਰ੍ਹਾਂ ਦੇ ਸਨਮਾਨ ਦੀ ਪੂਰੀ ਤਰ੍ਹਾਂ ਸ਼ਲਾਘਾ ਕਰਦੇ ਹਾਂ। ਉਹ ਕਈ ਸਾਲਾਂ ਤੋਂ ਸ਼ਾਨਦਾਰ ਟੀਮ ਰਹੀ ਹੈ ਅਤੇ ਹੁਣ ਵੀ ਹੈ, ਅਸੀਂ ਇਸਦਾ ਸਨਮਾਨ ਕਰਦੇ ਹਾਂ।
