Last Updated :
05 February 2025, 02:01 PM IST
Trending News : ਅਮਰੀਕਾ ਦੁਨੀਆ ਦਾ ਸਭ ਤੋਂ ਸ਼ਕਤੀਸ਼ਾਲੀ ਦੇਸ਼ ਹੈ। ਇਸ ਤੋਂ ਬਾਅਦ ਵੀ, ਇੱਥੋਂ ਦੇ ਲੋਕ ਆਂਡਿਆਂ ਨੂੰ ਲੈ ਕੇ ਚਿੰਤਤ ਹਨ। ਅੰਡੇ ਚੋਰੀ ਦੇ ਮਾਮਲੇ ਵੀ ਸਾਹਮਣੇ ਆਉਣੇ ਸ਼ੁਰੂ ਹੋ ਗਏ ਹਨ। ਅਮਰੀਕੀ ਸ਼ਹਿਰ ਪੈਨਸਿਲਵੇਨੀਆ ਵਿੱਚ ਅੰਡੇ ਚੋਰੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਡਿਲੀਵਰੀ ਰਿਟੇਲਰ ਤੋਂ ਲਗਭਗ ਇੱਕ ਲੱਖ ਅੰਡੇ ਚੋਰੀ ਹੋ ਗਏ ਹਨ। ਪੁਲਿਸ ਨੇ ਇਸ ਚੋਰੀ ਦਾ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਜਾਂਚ ਕਰ ਰਹੀ ਹੈ। ਪੁਲਿਸ ਦੇ ਅਨੁਸਾਰ, ਚੋਰੀ ਦੀ ਇਹ ਘਟਨਾ ਗ੍ਰੀਨ ਕੈਸਲ ਦੇ ਪੀਟ ਐਂਡ ਗੈਰੀ ਆਰਗੈਨਿਕਸ ਐਲਐਲਸੀ ਵਿੱਚ ਰਾਤ 8:40 ਵਜੇ ਦੇ ਕਰੀਬ ਵਾਪਰੀ। ਚੋਰੀ ਹੋਏ ਆਂਡਿਆਂ ਦੀ ਕੀਮਤ $40,000 ਹੈ। ਰਿਪੋਰਟ ਦੇ ਅਨੁਸਾਰ, ਇਨ੍ਹੀਂ ਦਿਨੀਂ ਅਮਰੀਕਾ ਵਿੱਚ ਅੰਡਿਆਂ ਦੀ ਭਾਰੀ ਕਮੀ ਹੈ। ਅੰਡਿਆਂ ਦੀਆਂ ਕੀਮਤਾਂ ਵਧ ਗਈਆਂ ਹਨ। ਅਮਰੀਕੀ ਖੇਤੀਬਾੜੀ ਵਿਭਾਗ ਦਾ ਕਹਿਣਾ ਹੈ ਕਿ ਅੰਡਿਆਂ ਦੀ ਔਸਤ ਥੋਕ ਕੀਮਤ $7.08 ਹੈ, ਜੋ ਕਿ ਦੋ ਸਾਲ ਪਹਿਲਾਂ ਨਾਲੋਂ ਸੱਤ ਗੁਣਾ ਵੱਧ ਹੈ। ਨਿਊਯਾਰਕ ਵਿੱਚ, ਅੰਡਿਆਂ ਦੇ ਇੱਕ ਡੱਬੇ ਦੀ ਕੀਮਤ $11.99 ਤੱਕ ਪਹੁੰਚ ਗਈ ਹੈ। ਆਂਡਾ ਲੋਕਾਂ ਦੇ ਨਾਸ਼ਤੇ ਦਾ ਇੱਕ ਮਹੱਤਵਪੂਰਨ ਹਿੱਸਾ ਹੈ, ਇਸ ਲਈ, ਕਰੋੜਾਂ ਲੋਕ ਹਰ ਰੋਜ਼ ਆਂਡੇ ਖਰੀਦਦੇ ਹਨ, ਪਰ ਹੁਣ ਆਂਡੇ ਦੀ ਕੀਮਤ ਉਨ੍ਹਾਂ ਦੇ ਬਜਟ ਨੂੰ ਵਿਗਾੜ ਰਹੀ ਹੈ।
ਸਪਲਾਈ ਘੱਟ ਹੈ ਅਤੇ ਮੰਗ ਜ਼ਿਆਦਾ, ਇਸ ਲਈ ਲੋਕਾਂ ਨੂੰ ਆਂਡਿਆਂ ਦੀ ਕੀਮਤ ਜ਼ਿਆਦਾ ਦੇਣੀ ਪੈ ਰਹੀ ਹੈ। ਬਹੁਤ ਸਾਰੇ ਲੋਕ ਅਜਿਹੇ ਹਨ ਜੋ ਕੀਮਤਾਂ ਹੋਰ ਵਧਣ ਦੇ ਡਰੋਂ ਵੱਧ ਤੋਂ ਵੱਧ ਅੰਡੇ ਸਟਾਕ ਕਰ ਰਹੇ ਹਨ। ਇਸ ਵੇਲੇ, ਸਥਿਤੀ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਕੁਝ ਥਾਵਾਂ 'ਤੇ ਪ੍ਰਚੂਨ ਗਾਹਕਾਂ ਲਈ ਖਰੀਦ ਸੀਮਾ ਵੱਧ ਤੋਂ ਵੱਧ 3 ਡੱਬੇ ਰੱਖੀ ਗਈ ਹੈ।
ਅਮਰੀਕਾ ਵਿੱਚ ਅੰਡਿਆਂ ਦੀ ਕਮੀ ਦਾ ਕਾਰਨ ਬਰਡ ਫਲੂ ਦੱਸਿਆ ਜਾ ਰਿਹਾ ਹੈ। ਇਹ ਸਮੱਸਿਆ ਪਿਛਲੇ ਕੁਝ ਮਹੀਨਿਆਂ ਤੋਂ ਚੱਲ ਰਹੀ ਹੈ। ਇੱਥੇ ਬਰਡ ਫਲੂ ਕਾਰਨ ਲੱਖਾਂ ਮੁਰਗੀਆਂ ਦੀ ਮੌਤ ਹੋ ਗਈ ਹੈ, ਜਿਸ ਕਾਰਨ ਅੰਡਿਆਂ ਦੀ ਗਿਣਤੀ ਵਿੱਚ ਭਾਰੀ ਗਿਰਾਵਟ ਆਈ ਹੈ। ਕਿਸਾਨ ਸਮੂਹ ਯੂਨਾਈਟਿਡ ਐੱਗ ਪ੍ਰੋਡਿਊਸਰਜ਼ ਨੇ ਕਿਹਾ ਕਿ ਸਾਲ 2022 ਵਿੱਚ, 104 ਮਿਲੀਅਨ ਅੰਡੇ ਦੇਣ ਵਾਲੀਆਂ ਮੁਰਗੀਆਂ ਬਰਡ ਫਲੂ ਕਾਰਨ ਮਰ ਗਈਆਂ, ਜਿਨ੍ਹਾਂ ਵਿੱਚੋਂ 29 ਮਿਲੀਅਨ ਮੁਰਗੀਆਂ ਸਿਰਫ਼ ਅਕਤੂਬਰ ਮਹੀਨੇ ਵਿੱਚ ਹੀ ਮਰ ਗਈਆਂ, ਜਿਸ ਕਾਰਨ ਬਾਜ਼ਾਰ ਵਿੱਚ ਅੰਡਿਆਂ ਦੀ ਘਾਟ ਹੈ।
