Last Updated :
22 May 2026, 12:50 PM IST
ਭਾਰਤ ਵਿੱਚ ਇਲੈਕਟ੍ਰਿਕ ਵਾਹਨਾਂ ਦੀ ਮੰਗ ਤੇਜ਼ੀ ਨਾਲ ਵੱਧ ਰਹੀ ਹੈ ਅਤੇ ਇਸੇ ਵਿਚਕਾਰ ਹੀਰੋ ਮੋਟੋਕਾਰਪ ਦੇ VIDA ਬ੍ਰਾਂਡ ਨੇ ਆਪਣਾ ਕਿਫਾਇਤੀ ਸਕੂਟਰ Hero Vida VX2 (Go Variant) ਪੇਸ਼ ਕੀਤਾ ਹੈ। ਇਹ ਸਕੂਟਰ ਖਾਸ ਤੌਰ ‘ਤੇ ਉਹਨਾਂ ਲੋਕਾਂ ਲਈ ਤਿਆਰ ਕੀਤਾ ਗਿਆ ਹੈ ਜੋ ਘੱਟ ਖਰਚੇ ਵਿੱਚ ਭਰੋਸੇਮੰਦ ਇਲੈਕਟ੍ਰਿਕ ਵਾਹਨ ਖਰੀਦਣਾ ਚਾਹੁੰਦੇ ਹਨ। ਕੰਪਨੀ ਨੇ ਇਸ ਦਾ ਧਿਆਨ ਰੋਜ਼ਾਨਾ ਦੀ ਯਾਤਰਾ ਅਤੇ ਘੱਟ ਖਰਚ ਵਾਲੀ ਮੋਬਿਲਟੀ ‘ਤੇ ਰੱਖਿਆ ਹੈ। ਸਕੂਟਰ ਦਾ ਡਿਜ਼ਾਇਨ ਸਧਾਰਣ ਪਰ ਆਧੁਨਿਕ ਹੈ, ਜਿਸ ਕਰਕੇ ਇਹ ਨੌਜਵਾਨਾਂ ਅਤੇ ਪਰਿਵਾਰਕ ਵਰਤੋਂ ਦੋਵਾਂ ਲਈ ਆਕਰਸ਼ਕ ਵਿਕਲਪ ਬਣ ਰਿਹਾ ਹੈ।
ਇਸ ਸਕੂਟਰ ਦੀ ਸਭ ਤੋਂ ਵੱਡੀ ਖ਼ਾਸੀਅਤ ਇਸ ਦਾ Battery-as-a-Service ਮਾਡਲ ਹੈ। ਇਸ ਯੋਜਨਾ ਤਹਿਤ ਗਾਹਕਾਂ ਨੂੰ ਬੈਟਰੀ ਦੀ ਪੂਰੀ ਕੀਮਤ ਇਕੱਠੀ ਨਹੀਂ ਦੇਣੀ ਪੈਂਦੀ। ਲੋਕ ਸਿਰਫ਼ ਸਕੂਟਰ ਖਰੀਦਦੇ ਹਨ ਅਤੇ ਬੈਟਰੀ ਲਈ ਵੱਖਰਾ ਭੁਗਤਾਨ ਕਰਦੇ ਹਨ। ਇਸ ਕਰਕੇ ਸਕੂਟਰ ਦੀ ਸ਼ੁਰੂਆਤੀ ਕੀਮਤ ਕਾਫ਼ੀ ਘੱਟ ਹੋ ਜਾਂਦੀ ਹੈ। ਕੰਪਨੀ ਮੁਤਾਬਕ ਇਹ ਸਕੂਟਰ ਲਗਭਗ ₹44,990 ਤੋਂ ₹59,490 ਤੱਕ ਉਪਲਬਧ ਹੈ। ਵਧ ਰਹੀਆਂ ਪੈਟਰੋਲ ਕੀਮਤਾਂ ਦੇ ਸਮੇਂ ਵਿੱਚ ਇਹ ਮਾਡਲ ਕਾਫ਼ੀ ਬਜਟ-ਫ੍ਰੈਂਡਲੀ ਮੰਨਿਆ ਜਾ ਰਿਹਾ ਹੈ ਅਤੇ ਘੱਟ ਖਰਚ ਵਾਲੀ ਯਾਤਰਾ ਲਈ ਵਧੀਆ ਚੋਣ ਬਣ ਰਿਹਾ ਹੈ।
Hero Vida VX2 ਵਿੱਚ 2.2 kWh ਅਤੇ 3.4 kWh ਦੇ ਦੋ ਬੈਟਰੀ ਵਿਕਲਪ ਦਿੱਤੇ ਗਏ ਹਨ। ਇਸ ਦੀ ਰਿਮੂਵੇਬਲ ਲਿਥੀਅਮ ਆਇਨ ਬੈਟਰੀ ਨੂੰ ਆਸਾਨੀ ਨਾਲ ਘਰ ਜਾਂ ਦਫ਼ਤਰ ਵਿੱਚ ਚਾਰਜ ਕੀਤਾ ਜਾ ਸਕਦਾ ਹੈ। ਇੱਕ ਵਾਰ ਫੁੱਲ ਚਾਰਜ ਹੋਣ ਤੋਂ ਬਾਅਦ ਇਹ ਸਕੂਟਰ ਲਗਭਗ 92 ਤੋਂ 100 ਕਿਲੋਮੀਟਰ ਤੱਕ ਦੀ ਰੇਂਜ ਦੇਣ ਦਾ ਦਾਅਵਾ ਕਰਦਾ ਹੈ। ਇਸ ਦੀ ਟਾਪ ਸਪੀਡ ਕਰੀਬ 70 ਕਿਲੋਮੀਟਰ ਪ੍ਰਤੀ ਘੰਟਾ ਹੈ। ਕੰਪਨੀ ਦੇ ਅਨੁਸਾਰ ਬੈਟਰੀ ਦੀ ਵਰਤੋਂ ਦਾ ਖਰਚ ਲਗਭਗ ₹0.90 ਤੋਂ ₹1.47 ਪ੍ਰਤੀ ਕਿਲੋਮੀਟਰ ਤੱਕ ਪੈਂਦਾ ਹੈ, ਜੋ ਪੈਟਰੋਲ ਸਕੂਟਰਾਂ ਨਾਲੋਂ ਕਾਫ਼ੀ ਸਸਤਾ ਹੈ।
ਫੀਚਰਾਂ ਦੀ ਗੱਲ ਕਰੀਏ ਤਾਂ ਇਸ ਸਕੂਟਰ ਵਿੱਚ 4.3 ਇੰਚ ਦਾ ਡਿਜ਼ੀਟਲ LCD ਡਿਸਪਲੇ ਦਿੱਤਾ ਗਿਆ ਹੈ। ਇਸ ਵਿੱਚ ਨੈਵੀਗੇਸ਼ਨ, ਬਲੂਟੂਥ ਕਨੈਕਟਿਵਟੀ ਅਤੇ ਬੈਟਰੀ ਸਟੇਟਸ ਵਰਗੀਆਂ ਜਾਣਕਾਰੀਆਂ ਮਿਲਦੀਆਂ ਹਨ। ਮੋਬਾਈਲ ਐਪ ਸਪੋਰਟ ਰਾਹੀਂ ਜੀਓ-ਫੈਂਸਿੰਗ ਅਤੇ ਐਂਟੀ ਥੈਫਟ ਟ੍ਰੈਕਿੰਗ ਵਰਗੇ ਸਮਾਰਟ ਫੀਚਰ ਵੀ ਦਿੱਤੇ ਗਏ ਹਨ। ਸਕੂਟਰ ਵਿੱਚ ਆਰਾਮਦਾਇਕ ਸੀਟ, ਵੱਡਾ ਅੰਡਰ ਸੀਟ ਸਟੋਰੇਜ ਅਤੇ ਫਲੈਟ ਫਲੋਰਬੋਰਡ ਦਿੱਤਾ ਗਿਆ ਹੈ, ਜਿਸ ਨਾਲ ਰੋਜ਼ਾਨਾ ਵਰਤੋਂ ਹੋਰ ਆਸਾਨ ਬਣ ਜਾਂਦੀ ਹੈ। ਘੱਟ ਕੀਮਤ ਅਤੇ ਵਧੀਆ ਫੀਚਰਾਂ ਕਰਕੇ ਇਹ ਸਕੂਟਰ ਬਜਟ ਇਲੈਕਟ੍ਰਿਕ ਸੈਗਮੈਂਟ ਵਿੱਚ ਮਜ਼ਬੂਤ ਵਿਕਲਪ ਬਣਦਾ ਨਜ਼ਰ ਆ ਰਿਹਾ ਹੈ।
