Last Updated :
11 August 2026, 07:56 PM IST
OpenAI ਨੇ ਸਾਈਬਰ ਸੁਰੱਖਿਆ ਦੇ ਖੇਤਰ ਵਿੱਚ ਇੱਕ ਅਹਿਮ ਕਦਮ ਪੁੱਟਦਿਆਂ ਆਪਣਾ ਨਵਾਂ ਵਿਸ਼ੇਸ਼ AI ਮਾਡਲ GPT-5.6-Cyber ਪੇਸ਼ ਕੀਤਾ ਹੈ। ਇਹ ਮਾਡਲ ਖ਼ਾਸ ਤੌਰ 'ਤੇ ਸੌਫਟਵੇਅਰ ਦੀਆਂ ਸੁਰੱਖਿਆ ਖਾਮੀਆਂ ਨੂੰ ਲੱਭਣ ਅਤੇ ਉਨ੍ਹਾਂ ਦਾ ਵਿਸ਼ਲੇਸ਼ਣ ਕਰਨ ਲਈ ਵਿਕਸਤ ਕੀਤਾ ਗਿਆ ਹੈ। ਕੰਪਨੀ ਨੇ ਇਸ ਨੂੰ ਸ਼ੁਰੂ ਵਿੱਚ ਸਿਰਫ਼ ਕੁਝ ਚੁਣੀਆਂ ਕੰਪਨੀਆਂ ਅਤੇ ਭਰੋਸੇਮੰਦ ਸੁਰੱਖਿਆ ਮਾਹਿਰਾਂ ਤੱਕ ਸੀਮਤ ਰੱਖਣ ਦਾ ਫੈਸਲਾ ਕੀਤਾ ਹੈ। ਪਹਿਲੀ ਹੀ ਕੋਸ਼ਿਸ਼ ਵਿੱਚ ਇਸ ਮਾਡਲ ਨੇ Google Chrome ਦੇ V8 JavaScript ਇੰਜਣ ਵਿੱਚ ਅਣਜਾਣ ਸੁਰੱਖਿਆ ਖਾਮੀਆਂ ਦਾ ਪਤਾ ਲਗਾ ਕੇ ਹੈਰਾਨ ਕਰ ਦਿੱਤਾ ਹੈ।
ਇਹ AI ਮਾਡਲ ਆਮ ਉਦੇਸ਼ ਵਾਲੇ ਮਾਡਲਾਂ ਤੋਂ ਇਸ ਮਾਮਲੇ ਵਿੱਚ ਵੱਖਰਾ ਹੈ ਕਿ ਇਸ ਨੂੰ ਖ਼ਾਸ ਤੌਰ 'ਤੇ ਜ਼ੀਰੋ-ਡੇ ਖਾਮੀਆਂ ਅਤੇ ਸੌਫਟਵੇਅਰ ਕਮਜ਼ੋਰੀਆਂ ਲੱਭਣ ਲਈ ਵਿਸ਼ੇਸ਼ ਤੌਰ 'ਤੇ ਸਿਖਲਾਈ ਦਿੱਤੀ ਗਈ ਹੈ। ਇਹ ਸੁਰੱਖਿਆ ਟੀਮਾਂ ਨੂੰ ਸੰਭਾਵੀ ਖ਼ਤਰਿਆਂ ਦੀ ਸ਼ਨਾਖ਼ਤ, ਸਿਸਟਮ ਦੀ ਜਾਂਚ ਅਤੇ ਸੁਰੱਖਿਆ ਰਿਪੋਰਟ ਤਿਆਰ ਕਰਨ ਵਿੱਚ ਮਦਦ ਕਰ ਸਕਦਾ ਹੈ।
OpenAI ਦੇ ਦਾਅਵੇ ਅਨੁਸਾਰ, GPT-5.6-Cyber ਨੇ ਸਿਰਫ਼ Chrome ਦੇ V8 ਇੰਜਣ ਵਿੱਚ ਹੀ ਨਹੀਂ, ਸਗੋਂ ਇੱਕ ਓਪਨ-ਸੋਰਸ ਪ੍ਰੋਜੈਕਟ ਵਿੱਚ ਵੀ ਸੁਰੱਖਿਆ ਸੰਬੰਧੀ ਕਮਜ਼ੋਰੀਆਂ ਦਾ ਪਤਾ ਲਗਾਇਆ ਹੈ। ਇਨ੍ਹਾਂ ਖਾਮੀਆਂ ਨੂੰ ਲੱਭਣ ਤੋਂ ਬਾਅਦ, ਮਾਡਲ ਨੇ ਉਨ੍ਹਾਂ ਦੇ ਸੰਭਾਵੀ ਪ੍ਰਭਾਵਾਂ ਦਾ ਵਿਸ਼ਲੇਸ਼ਣ ਵੀ ਪੇਸ਼ ਕੀਤਾ, ਜੋ ਸਾਈਬਰ ਸੁਰੱਖਿਆ ਮਾਹਿਰਾਂ ਲਈ ਬਹੁਤ ਮਹੱਤਵਪੂਰਨ ਹੈ।
GPT-5.6-Cyber ਦੀ ਸਭ ਤੋਂ ਵੱਡੀ ਪ੍ਰਾਪਤੀ Google Chrome ਦੇ V8 JavaScript ਇੰਜਣ ਵਿੱਚ ਦੋ ਅਣਜਾਣ ਕਮਜ਼ੋਰੀਆਂ ਲੱਭਣਾ ਰਹੀ। OpenAI ਦੀ ਟੀਮ ਨੇ ਇਨ੍ਹਾਂ ਖਾਮੀਆਂ ਦੀ ਪੂਰੀ ਜਾਂਚ ਕੀਤੀ ਅਤੇ ਜ਼ਿੰਮੇਵਾਰੀ ਨਾਲ Google ਨੂੰ ਸੂਚਿਤ ਕੀਤਾ। Google ਨੇ ਤੁਰੰਤ ਇਨ੍ਹਾਂ ਨੂੰ ਠੀਕ ਕਰਦਿਆਂ ਇੱਕ ਨੂੰ CVE-2026-15903 ਰਜਿਸਟ੍ਰੇਸ਼ਨ ਨੰਬਰ ਵੀ ਦਿੱਤਾ।
OpenAI ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਇਸ ਟੂਲ ਦੀ ਵਰਤੋਂ ਸਿਰਫ਼ ਕਾਨੂੰਨੀ ਅਤੇ ਸੁਰੱਖਿਆ-ਅਧਾਰਿਤ ਉਦੇਸ਼ਾਂ ਲਈ ਹੀ ਕੀਤੀ ਜਾਣੀ ਚਾਹੀਦੀ ਹੈ। ਇਸ ਦੀ ਗ਼ਲਤ ਵਰਤੋਂ ਖ਼ਤਰਨਾਕ ਸਾਬਤ ਹੋ ਸਕਦੀ ਹੈ, ਇਸ ਲਈ ਕੰਪਨੀ ਨੇ ਇਸਨੂੰ ਸੀਮਤ ਦਾਇਰੇ ਵਿੱਚ ਰੱਖਿਆ ਹੈ। ਫਿਰ ਵੀ, ਇਹ ਉਦਾਹਰਣ AI ਦੀ ਭਵਿੱਖੀ ਸਾਈਬਰ ਸੁਰੱਖਿਆ ਖੋਜ ਵਿੱਚ ਇੱਕ ਮੀਲ ਪੱਥਰ ਸਾਬਤ ਹੋ ਸਕਦੀ ਹੈ।
