Last Updated :
16 May 2026, 04:08 PM IST
ਟਾਟਾ ਮੋਟਰਜ਼ ਦਾ ਟੀਚਾ ਹੈ ਕਿ 2030 ਤੱਕ ਭਾਰਤ ਦੀ ਇਲੈਕਟ੍ਰਿਕ ਵਾਹਨ ਮਾਰਕੀਟ ਵਿੱਚ 45 ਤੋਂ 50 ਫੀਸਦੀ ਹਿੱਸੇਦਾਰੀ ਹਾਸਲ ਕੀਤੀ ਜਾਵੇ। ਇਸ ਲਈ ਕੰਪਨੀ ਲਗਾਤਾਰ ਨਵੇਂ EV ਮਾਡਲ ਅਤੇ ਐਡਵਾਂਸ ਟੈਕਨੋਲੋਜੀ ‘ਤੇ ਕੰਮ ਕਰ ਰਹੀ ਹੈ। ਟਾਟਾ ਮੋਟਰਜ਼ ਹੁਣ ਕੇਵਲ ਪੈਟਰੋਲ ਅਤੇ ਡੀਜ਼ਲ ਤੱਕ ਸੀਮਿਤ ਨਹੀਂ ਰਹਿਣਾ ਚਾਹੁੰਦੀ, ਸਗੋਂ ਭਵਿੱਖ ਦੀ ਗ੍ਰੀਨ ਟੈਕਨੋਲੋਜੀ ‘ਤੇ ਫੋਕਸ ਕਰ ਰਹੀ ਹੈ।
ਕੰਪਨੀ ਨੇ ਪੁਸ਼ਟੀ ਕੀਤੀ ਹੈ ਕਿ 2026 ਵਿੱਚ Tiago EV ਦਾ ਫੇਸਲਿਫਟ ਵਰਜਨ, Sierra EV, Safari EV ਅਤੇ ਪ੍ਰੀਮਿਅਮ Avinya EV ਲਾਂਚ ਕੀਤੀਆਂ ਜਾਣਗੀਆਂ। ਇਹ ਸਾਰੇ ਮਾਡਲ ਨਵੇਂ ਡਿਜ਼ਾਈਨ, ਵੱਡੇ ਬੈਟਰੀ ਪੈਕ ਅਤੇ ਲੰਬੀ ਡਰਾਈਵਿੰਗ ਰੇਂਜ ਨਾਲ ਆ ਸਕਦੇ ਹਨ। ਟਾਟਾ ਦਾ ਮੰਨਣਾ ਹੈ ਕਿ ਭਾਰਤੀ ਗਾਹਕ ਹੁਣ ਸਿਰਫ਼ ਲੁੱਕ ਨਹੀਂ, ਸਗੋਂ ਟੈਕਨੋਲੋਜੀ ਅਤੇ ਰੇਂਜ ਨੂੰ ਵੀ ਤਰਜੀਹ ਦੇ ਰਹੇ ਹਨ।
ਰਿਪੋਰਟਾਂ ਮੁਤਾਬਕ 2026 ਟਾਟਾ ਟਿਆਗੋ EV ਵਿੱਚ ਨਵਾਂ ਫਰੰਟ ਗ੍ਰਿੱਲ, ਰੀਡਿਜ਼ਾਈਨ ਹੈਡਲੈਂਪ ਅਤੇ ਨਵਾਂ ਬੰਪਰ ਦਿੱਤਾ ਜਾਵੇਗਾ। ਇਸ ਦੇ ਨਾਲ ਨਵੇਂ ਅਲੋਏ ਵੀਲ ਅਤੇ ਕਨੈਕਟਡ ਟੇਲ ਲੈਂਪ ਵੀ ਮਿਲ ਸਕਦੇ ਹਨ। ਮੀਡੀਆ ਰਿਪੋਰਟਾਂ ਦੱਸਦੀਆਂ ਹਨ ਕਿ ਇਸ ਵਾਰ ਟਿਆਗੋ EV ਵਿੱਚ ਵੱਡਾ ਬੈਟਰੀ ਪੈਕ ਵੀ ਦਿੱਤਾ ਜਾ ਸਕਦਾ ਹੈ, ਜਿਸ ਨਾਲ ਕਾਰ ਦੀ ਰੇਂਜ ਹੋਰ ਵਧੇਗੀ।
ਟਾਟਾ Sierra EV ਨੂੰ ਰਿਅਰ ਵੀਲ ਡਰਾਈਵ ਅਤੇ ਆਲ-ਵੀਲ ਡਰਾਈਵ ਦੋਵੇਂ ਆਪਸ਼ਨਾਂ ਵਿੱਚ ਲਿਆਂਦਾ ਜਾ ਸਕਦਾ ਹੈ। ਇਸ ਵਿੱਚ 65kWh ਅਤੇ 75kWh ਬੈਟਰੀ ਪੈਕ ਦੇ ਵਿਕਲਪ ਮਿਲ ਸਕਦੇ ਹਨ। ਦੂਜੇ ਪਾਸੇ Safari EV ਨੂੰ 500 ਕਿਲੋਮੀਟਰ ਤੋਂ ਵੱਧ ਦੀ ਡਰਾਈਵਿੰਗ ਰੇਂਜ ਨਾਲ ਲਿਆਂਦੇ ਜਾਣ ਦੀ ਉਮੀਦ ਹੈ। Safari EV ਦਾ ਪ੍ਰੋਡਕਸ਼ਨ ਅਗਸਤ 2026 ਤੋਂ ਸ਼ੁਰੂ ਹੋ ਸਕਦਾ ਹੈ ਅਤੇ ਇਸਦੀ ਲਾਂਚਿੰਗ ਦਿਵਾਲੀ ਦੇ ਆਸਪਾਸ ਹੋਣ ਦੀ ਸੰਭਾਵਨਾ ਹੈ।
ਟਾਟਾ ਦਾ ਪ੍ਰੀਮਿਅਮ EV ਬ੍ਰਾਂਡ Avinya ਵੀ 2026 ਦੇ ਅੰਤ ਤੱਕ ਲਾਂਚ ਹੋ ਸਕਦਾ ਹੈ। ਇਹ ਕਾਰ Gen-3 ਸਕੇਟਬੋਰਡ EV ਆਰਕੀਟੈਕਚਰ ‘ਤੇ ਤਿਆਰ ਕੀਤੀ ਜਾਵੇਗੀ। ਕੰਪਨੀ ਦਾ ਦਾਅਵਾ ਹੈ ਕਿ ਇਸ ਵਿੱਚ ਅਲਟਰਾ ਫਾਸਟ ਚਾਰਜਿੰਗ, ਹਾਈ ਬੈਟਰੀ ਪਰਫਾਰਮੈਂਸ ਅਤੇ ਲੰਬੀ ਰੇਂਜ ਵਰਗੀਆਂ ਖਾਸੀਅਤਾਂ ਹੋਣਗੀਆਂ। Avinya ਬ੍ਰਾਂਡ ਹੇਠਾਂ ਪਹਿਲਾਂ ਸਪੋਰਟਬੈਕ ਮਾਡਲ ਅਤੇ ਫਿਰ SUV ਵਰਜਨ ਲਿਆਂਦਾ ਜਾਵੇਗਾ।
ਟਾਟਾ ਮੋਟਰਜ਼ ਨੇ ਇਹ ਵੀ ਐਲਾਨ ਕੀਤਾ ਹੈ ਕਿ 2026 ਦੇ ਅੰਤ ਜਾਂ 2027 ਦੀ ਸ਼ੁਰੂਆਤ ਵਿੱਚ ਉਸਦੀ ਪਹਿਲੀ ਫਲੈਕਸ-ਫਿਊਲ ਕਾਰ ਵੀ ਮਾਰਕੀਟ ਵਿੱਚ ਆਵੇਗੀ। ਇਹ ਸੰਭਵ ਤੌਰ ‘ਤੇ Tata Punch Flex Fuel ਦਾ ਪ੍ਰੋਡਕਸ਼ਨ ਮਾਡਲ ਹੋਵੇਗਾ, ਜਿਸਨੂੰ ਪਹਿਲਾਂ ਭਾਰਤ ਮੋਬਿਲਟੀ ਸ਼ੋ 2025 ਵਿੱਚ ਕਾਂਸੈਪਟ ਰੂਪ ਵਿੱਚ ਦਿਖਾਇਆ ਗਿਆ ਸੀ। ਇਸ ਵਿੱਚ 1.2 ਲੀਟਰ ਦਾ ਤਿੰਨ-ਸਿਲੰਡਰ ਪੈਟਰੋਲ ਇੰਜਣ ਦਿੱਤਾ ਜਾ ਸਕਦਾ ਹੈ।
