Last Updated :
04 July 2026, 09:29 AM IST
ਗਵਾਦਰ: ਪਾਕਿਸਤਾਨ ਦੇ ਬਲੋਚਿਸਤਾਨ ਸੂਬੇ ਦੇ ਗਵਾਦਰ ਜ਼ਿਲ੍ਹੇ ਵਿੱਚ ਸਥਿਤ ਜੀਵਾਨੀ ਦੇ ਪਨਵਾਨ ਇਲਾਕੇ ਵਿੱਚ ਪਾਕਿਸਤਾਨ ਕੋਸਟ ਗਾਰਡ ਕੈਂਪ 'ਤੇ ਸ਼ੁੱਕਰਵਾਰ ਸ਼ਾਮ ਨੂੰ ਇੱਕ ਵੱਡਾ ਹਮਲਾ ਹੋਇਆ। ਪਾਬੰਦੀਸ਼ੁਦਾ ਵੱਖਵਾਦੀ ਸੰਗਠਨ ਬਲੋਚ ਲਿਬਰੇਸ਼ਨ ਆਰਮੀ (ਬੀਐਲਏ) ਨੇ ਹਮਲੇ ਦੀ ਜ਼ਿੰਮੇਵਾਰੀ ਲੈਂਦੇ ਹੋਏ ਦਾਅਵਾ ਕੀਤਾ ਹੈ ਕਿ ਇਸ ਹਮਲੇ ਵਿੱਚ 30 ਤੋਂ ਵੱਧ ਪਾਕਿਸਤਾਨ ਕੋਸਟ ਗਾਰਡ ਕਰਮਚਾਰੀ ਮਾਰੇ ਗਏ ਅਤੇ ਕਈ ਹੋਰ ਜ਼ਖਮੀ ਹੋ ਗਏ।
ਸਮੂਹ ਦੇ ਮੀਡੀਆ ਵਿੰਗ ਹਕਾਲ ਨੇ 43 ਸਕਿੰਟ ਦਾ ਜੋ ਵੀਡਿਓ ਸਾਂਝਾ ਕੀਤਾ, ਉਸ ਵਿੱਚ ਵਿਸਫੋਟਕਾਂ ਨਾਲ ਭਰਿਆ ਟਰੱਕ ਕੈਂਪ ਦੇ ਅੰਦਰ ਪ੍ਰਵੇਸ਼ ਕਰਦਾ ਦਿਖਾਈ ਦੇ ਰਿਹਾ ਹੈ ਅਤੇ ਥੋੜ੍ਹੀ ਹੀ ਦੇਰ ਬਾਅਦ ਜਬਰਦਸਤ ਵਿਸਫੋਟ ਹੁੰਦਾ ਹੈ। ਇਸਦੇ ਬਾਅਦ ਜਾਰੀ ਕੀਤੇ ਗਏ ਹੋਰ ਵੀਡਿਓ ਵਿੱਚ ਕੈਂਪ ਦਾ ਵੱਡਾ ਹਿੱਸਾ ਪੂਰੀ ਤਰ੍ਹਾਂ ਤਬਾਹ ਹੋਣ ਦਾ ਦਾਅਵਾ ਕੀਤਾ ਗਿਆ ਹੈ।
BLA ਦੇ ਮੁਤਾਬਕ, ਟਰੱਕ 'ਚ ਹੋਏ ਵਿਸਫੋਟ ਦੇ ਤੁਰੰਤ ਬਾਅਦ ਉਸਦੇ ਵਿਸ਼ੇਸ਼ ਲੜਾਕੂ ਦਸਤੇ ਫਤੇਹ ਸਕਵਾਡ ਨੇ ਚਾਰੋ ਪਾਸੇ ਕੈਂਪ ਤੇ ਹਮਲਾ ਕੀਤਾ।
ਸਮੂਹ ਨੇ ਬਿਆਨ ਵਿੱਚ ਦੱਸਿਆ ਕਿ ਹਮਲੇ ਤੋਂ ਤੁਰੰਤ ਬਾਅਦ, ਸਾਡੀ ਐਡਵਾਂਸ ਯੂਨਿਟ - ਫਤਿਹ ਸਕੁਐਡ - ਤੇਜ਼ੀ ਨਾਲ ਅਤੇ ਤਾਲਮੇਲ ਨਾਲ ਚਾਰੇ ਦਿਸ਼ਾਵਾਂ ਤੋਂ ਤਬਾਹ ਹੋਏ ਕੈਂਪ 'ਤੇ ਹਮਲਾ ਕਰਨ ਲਈ ਅੱਗੇ ਵਧੀ।" ਬੀਐਲਏ ਦਾ ਦਾਅਵਾ ਹੈ ਕਿ ਫਤਿਹ ਸਕੁਐਡ ਦੇ ਲੜਾਕਿਆਂ ਨੇ ਬਚੇ ਹੋਏ ਕੋਸਟ ਗਾਰਡ ਕਰਮਚਾਰੀਆਂ ਨਾਲ ਨੇੜਿਓਂ ਲੜਾਈ ਕੀਤੀ ਅਤੇ ਇਸ ਸਾਂਝੇ ਆਪ੍ਰੇਸ਼ਨ ਦੌਰਾਨ 30 ਤੋਂ ਵੱਧ ਸੈਨਿਕਾਂ ਨੂੰ ਮਾਰ ਦਿੱਤਾ। ਬੁਲਾਰੇ ਜੀਅੰਦ ਬਲੋਚ ਨੇ ਅੱਗੇ ਕਿਹਾ, ਜਖ਼ਮੀਆਂ ਦੀ ਸਥਿਤੀ ਕਾਫੀ ਗੰਭੀਰ ਹੈ ਅਤੇ ਮਲਬੇ ਥੱਲੇ ਦੱਬੇ ਵਿਅਕਤੀਆਂ ਨੂੰ ਦੇਖਦੇ ਹੋਏ ਮ੍ਰਿਤਕਾਂ ਦੀ ਸੰਖਿਆ ਵੱਧਣ ਦੀ ਸੰਭਾਵਨਾ ਹੈ।
ਸੰਗਠਨ ਨੇ ਕਿਹਾ ਕਿ ਉਹ ਜਲਦੀ ਹੀ ਆਪਣੇ ਅਧਿਕਾਰਤ ਚੈਨਲਾਂ ਰਾਹੀਂ ਪੂਰੇ ਆਪ੍ਰੇਸ਼ਨ ਦਾ ਵਿਸਤ੍ਰਿਤ ਬਿਓਰਾ ਜਾਰੀ ਕਰੇਗਾ। ਬੀਐਲਏ ਨੇ ਇਹ ਵੀ ਦਾਅਵਾ ਕੀਤਾ ਕਿ ਪਾਕਿਸਤਾਨੀ ਸੁਰੱਖਿਆ ਬਲਾਂ ਵਿਰੁੱਧ ਉਸਦੀ ਹਥਿਆਰਬੰਦ ਮੁਹਿੰਮ "ਬਲੋਚਿਸਤਾਨ ਲਈ ਪੂਰੀ ਆਜ਼ਾਦੀ" ਪ੍ਰਾਪਤ ਹੋਣ ਤੱਕ ਉਸੇ ਤੀਬਰਤਾ ਨਾਲ ਜਾਰੀ ਰਹੇਗੀ। ਹਾਲਾਂਕਿ, ਪਾਕਿਸਤਾਨੀ ਫੌਜ ਅਤੇ ਸਰਕਾਰੀ ਅਧਿਕਾਰੀਆਂ ਨੇ ਅਜੇ ਤੱਕ ਅਧਿਕਾਰਤ ਤੌਰ 'ਤੇ ਹਮਲੇ ਦੇ ਨਤੀਜੇ ਵਜੋਂ ਹੋਈਆਂ ਮੌਤਾਂ, ਜ਼ਖਮੀਆਂ ਜਾਂ ਨੁਕਸਾਨ ਦੀ ਗਿਣਤੀ ਦੀ ਪੁਸ਼ਟੀ ਨਹੀਂ ਕੀਤੀ ਹੈ। ਨਤੀਜੇ ਵਜੋਂ, ਬੀਐਲਏ ਦੁਆਰਾ ਕੀਤੇ ਗਏ ਦਾਅਵਿਆਂ ਦੀ ਸੁਤੰਤਰ ਤੌਰ 'ਤੇ ਪੁਸ਼ਟੀ ਨਹੀਂ ਕੀਤੀ ਜਾ ਸਕੀ।
