ਦਿੱਲੀ ‘ਚ H1N1 ਨੇ ਵਧਾਈ ਚਿੰਤਾ, ਪਰ ਨਵਾਂ ਵਾਇਰਸ ਨਹੀਂ; ICMR ਨੇ ਫਲੂ ਵੈਕਸੀਨ ਬਾਰੇ ਵੀ ਦਿੱਤੀ ਅਹਿਮ ਜਾਣਕਾਰੀ

ਦਿੱਲੀ ਵਿੱਚ ਫਲੂ ਦੇ ਮਾਮਲੇ ਵਧਣ ਕਾਰਨ ਲੋਕਾਂ ਵਿੱਚ ਚਿੰਤਾ ਬਣੀ ਹੋਈ ਹੈ। ਇਸ ਦਰਮਿਆਨ ICMR ਨੇ ਸਪੱਸ਼ਟ ਕੀਤਾ ਹੈ ਕਿ ਮੌਜੂਦਾ H1N1 ਕਿਸੇ ਨਵੇਂ ਸਟ੍ਰੇਨ ਨਾਲ ਨਹੀਂ ਜੁੜਿਆ। ਸੰਸਥਾ ਨੇ ਵੈਕਸੀਨ, ਸਾਵਧਾਨੀਆਂ ਅਤੇ ਖਤਰੇ ਵਾਲੇ ਲੋਕਾਂ ਬਾਰੇ ਵੀ ਜਾਣਕਾਰੀ ਦਿੱਤੀ ਹੈ।

ਦੇਸ਼ ਵਿੱਚ H1N1 ਦੇ ਵਧ ਰਹੇ ਮਾਮਲਿਆਂ ਨੂੰ ਲੈ ਕੇ ICMR ਨੇ ਲੋਕਾਂ ਨੂੰ ਘਬਰਾਉਣ ਦੀ ਬਜਾਏ ਸਾਵਧਾਨ ਰਹਿਣ ਦੀ ਸਲਾਹ ਦਿੱਤੀ ਹੈ। ਸੰਸਥਾ ਮੁਤਾਬਕ ਇਸ ਵਾਰ ਸਾਹਮਣੇ ਆ ਰਿਹਾ ਇਨਫੈਕਸ਼ਨ ਕਿਸੇ ਨਵੇਂ ਵਾਇਰਸ ਜਾਂ ਨਵੇਂ ਰੂਪ ਕਾਰਨ ਨਹੀਂ ਹੈ, ਬਲਕਿ ਪਹਿਲਾਂ ਤੋਂ ਜਾਣਿਆ ਮੌਸਮੀ ਇਨਫਲੂਐਂਜ਼ਾ ਵੈਰੀਐਂਟ ਹੀ ਸਰਗਰਮ ਹੈ। ਮੌਸਮ ਵਿੱਚ ਬਦਲਾਅ ਅਤੇ ਮਾਨਸੂਨ ਦੌਰਾਨ ਸਾਹ ਰਾਹੀਂ ਫੈਲਣ ਵਾਲੀਆਂ ਬਿਮਾਰੀਆਂ ਦੀ ਸਰਗਰਮੀ ਵਧਣ ਨਾਲ ਮਾਮਲੇ ਵਧੇ। ICMR ਦਾ ਕਹਿਣਾ ਹੈ ਕਿ ਦਿੱਲੀ ਵਿੱਚ ਵੀ ਹਾਲੀਆ ਹਫ਼ਤਿਆਂ ਦੌਰਾਨ ਕੇਸ ਵਧੇ ਸਨ, ਪਰ ਹੁਣ ਗਿਰਾਵਟ ਦੇ ਸੰਕੇਤ ਮਿਲ ਰਹੇ ਹਨ। ਇਸ ਲਈ ਮੌਜੂਦਾ ਹਾਲਾਤ ਨੂੰ ਲੈ ਕੇ ਬੇਵਜ੍ਹਾ ਪੈਨਿਕ ਕਰਨ ਦੀ ਲੋੜ ਨਹੀਂ ਹੈ।

H1N1 ਕੋਈ ਨਵਾਂ ਸਟ੍ਰੇਨ ਨਹੀਂ, ਵੈਕਸੀਨ ਕਰ ਸਕਦੀ ਹੈ ਬਚਾਅ

ICMR ਨੇ ਦੱਸਿਆ ਕਿ ਮੌਜੂਦਾ H1N1 ਪੁਰਾਣਾ ਅਤੇ ਜਾਣਿਆ-ਪਛਾਣਿਆ ਮੌਸਮੀ ਵੈਰੀਐਂਟ ਹੈ, ਜੋ 2025 ਤੋਂ ਸਰਕੂਲੇਸ਼ਨ ਵਿੱਚ ਹੈ। ਸੰਸਥਾ ਮੁਤਾਬਕ ਮੌਜੂਦਾ ਫਲੂ ਵੈਕਸੀਨ ਇਸ ਵਾਇਰਸ ਵਿਰੁੱਧ ਪ੍ਰਭਾਵਸ਼ਾਲੀ ਹੈ। ਹਾਲਾਂਕਿ ਹਰ ਵਿਅਕਤੀ ਲਈ ਫਲੂ ਦੀ ਵੈਕਸੀਨ ਲਾਜ਼ਮੀ ਨਹੀਂ ਦੱਸੀ ਗਈ। ਬਾਜ਼ਾਰ ਵਿੱਚ ਇਸ ਨਾਲ ਸਬੰਧਤ ਕਈ ਵੈਕਸੀਨ ਉਪਲਬਧ ਹਨ ਅਤੇ ਜਿਨ੍ਹਾਂ ਲੋਕਾਂ ਨੂੰ ਇਸ ਦੀ ਲੋੜ ਹੋਵੇ, ਉਹ ਡਾਕਟਰੀ ਸਲਾਹ ਨਾਲ ਟੀਕਾਕਰਨ ਕਰਵਾ ਸਕਦੇ ਹਨ।

ਦਿੱਲੀ ‘ਚ ਲਗਭਗ 650 ਮਾਮਲੇ ਦਰਜ

ਰਾਜਧਾਨੀ ਵਿੱਚ ਹੁਣ ਤੱਕ ਕਰੀਬ 650 ਫਲੂ ਕੇਸ ਸਾਹਮਣੇ ਆ ਚੁੱਕੇ ਹਨ। ICMR ਮੁਤਾਬਕ ਪਿਛਲੇ ਚਾਰ-ਪੰਜ ਹਫ਼ਤਿਆਂ ਦੌਰਾਨ ਦਿੱਲੀ ਵਿੱਚ ਇਨਫੈਕਸ਼ਨ ਦਾ ਪੱਧਰ ਵੱਧ ਰਿਹਾ ਸੀ, ਪਰ ਪਿਛਲੇ ਲਗਭਗ ਦੋ ਹਫ਼ਤਿਆਂ ਵਿੱਚ ਮਾਮਲਿਆਂ ਵਿੱਚ ਕਮੀ ਆਉਣੀ ਸ਼ੁਰੂ ਹੋਈ ਹੈ। ਦਿੱਲੀ ਦੇ 73 ਹਸਪਤਾਲਾਂ ਵਿੱਚ ਫਲੂ ਦੀ ਨਿਗਰਾਨੀ ਕੀਤੀ ਜਾ ਰਹੀ ਹੈ ਅਤੇ ਲੈਬਾਂ ਵਿੱਚ ਨਿਯਮਤ ਤੌਰ ‘ਤੇ ਸੈਂਪਲ ਜਾਂਚੇ ਜਾ ਰਹੇ ਹਨ।

ਬੁਖਾਰ, ਖੰਘ ਤੇ ਸਰੀਰ ਦਰਦ ਹੋ ਸਕਦੇ ਹਨ ਲੱਛਣ

H1N1 ਜਾਂ ਮੌਸਮੀ ਫਲੂ ਵਿੱਚ ਬੁਖਾਰ, ਖੰਘ, ਸਿਰ ਦਰਦ ਅਤੇ ਸਰੀਰ ਵਿੱਚ ਦਰਦ ਵਰਗੀਆਂ ਪਰੇਸ਼ਾਨੀਆਂ ਹੋ ਸਕਦੀਆਂ ਹਨ। ਜ਼ਿਆਦਾਤਰ ਮਾਮਲਿਆਂ ਵਿੱਚ ਆਰਾਮ ਅਤੇ ਉਚਿਤ ਇਲਾਜ ਨਾਲ ਮਰੀਜ਼ ਕੁਝ ਦਿਨਾਂ ਵਿੱਚ ਠੀਕ ਹੋ ਜਾਂਦੇ ਹਨ। ਹਰ ਹਲਕੇ ਲੱਛਣ ‘ਤੇ ਤੁਰੰਤ ਟੈਸਟ ਕਰਵਾਉਣਾ ਜ਼ਰੂਰੀ ਨਹੀਂ ਮੰਨਿਆ ਗਿਆ, ਪਰ ਜੇ ਤਬੀਅਤ ਵਿਗੜਦੀ ਹੈ ਤਾਂ ਡਾਕਟਰ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ।

ਬਜ਼ੁਰਗਾਂ ਤੇ ਗੰਭੀਰ ਬਿਮਾਰੀਆਂ ਵਾਲਿਆਂ ਨੂੰ ਵਧੇਰੇ ਸਾਵਧਾਨੀ

ICMR ਨੇ 65 ਸਾਲ ਤੋਂ ਵੱਧ ਉਮਰ ਦੇ ਬਜ਼ੁਰਗਾਂ, ਛੋਟੇ ਬੱਚਿਆਂ, ਗਰਭਵਤੀ ਮਹਿਲਾਵਾਂ ਅਤੇ ਪਹਿਲਾਂ ਤੋਂ ਗੰਭੀਰ ਬਿਮਾਰੀਆਂ ਨਾਲ ਜੂਝ ਰਹੇ ਲੋਕਾਂ ਨੂੰ ਖਾਸ ਸਾਵਧਾਨ ਰਹਿਣ ਲਈ ਕਿਹਾ ਹੈ। ਸ਼ੂਗਰ, ਦਿਲ ਦੀ ਬਿਮਾਰੀ, ਕਿਡਨੀ ਦੀ ਸਮੱਸਿਆ, ਦਮਾ ਜਾਂ COPD ਵਾਲੇ ਲੋਕਾਂ ਵਿੱਚ ਇਨਫਲੂਐਂਜ਼ਾ ਜ਼ਿਆਦਾ ਗੰਭੀਰ ਰੂਪ ਲੈ ਸਕਦਾ ਹੈ।

ਇਨਫੈਕਸ਼ਨ ਤੋਂ ਬਚਣ ਲਈ ਇਹ ਸਾਵਧਾਨੀਆਂ ਜ਼ਰੂਰੀ

ਫਲੂ ਤੋਂ ਬਚਾਅ ਲਈ ਹੱਥ ਵਾਰ-ਵਾਰ ਸਾਬਣ ਨਾਲ ਧੋਣੇ, ਖੰਘ ਜਾਂ ਛਿੱਕ ਆਉਣ ਵੇਲੇ ਨੱਕ-ਮੂੰਹ ਢੱਕਣਾ ਅਤੇ ਬਿਮਾਰ ਵਿਅਕਤੀ ਤੋਂ ਉਚਿਤ ਦੂਰੀ ਬਣਾਈ ਰੱਖਣਾ ਫਾਇਦੇਮੰਦ ਹੈ। ਲੱਛਣ ਹੋਣ ‘ਤੇ ਮਾਸਕ ਪਾਉਣਾ ਵੀ ਚੰਗੀ ਸਾਵਧਾਨੀ ਹੈ। ICMR ਮੁਤਾਬਕ ਫਿਲਹਾਲ ਸਥਿਤੀ ‘ਤੇ ਲਗਾਤਾਰ ਨਿਗਰਾਨੀ ਹੈ ਅਤੇ ਲੋਕਾਂ ਨੂੰ ਡਰਨ ਦੀ ਬਜਾਏ ਸਾਵਧਾਨੀ ਨਾਲ ਸਥਿਤੀ ਦਾ ਸਾਹਮਣਾ ਕਰਨਾ ਚਾਹੀਦਾ ਹੈ।