Last Updated :
12 August 2026, 09:08 AM IST
ਮੁੰਬਈ ਦੇ ਵਿਲੇ ਪਾਰਲੇ ਇਲਾਕੇ ਵਿੱਚ ਇੱਕ ਰਿਹਾਇਸ਼ੀ ਇਮਾਰਤ ਦੀ 11ਵੀਂ ਮੰਜ਼ਿਲ 'ਤੇ ਮੰਗਲਵਾਰ ਰਾਤ ਅਚਾਨਕ ਅੱਗ ਭੜਕ ਉੱਠੀ। ਅੱਗ ਦੀ ਚਪੇਟ ਵਿੱਚ ਆ ਕੇ ਇੱਕ ਢਾਈ ਸਾਲ ਦਾ ਮਾਸੂਮ ਤੇ 23 ਸਾਲਾ ਨੌਜਵਾਨ ਔਰਤ ਸਮੇਤ ਦੋ ਲੋਕਾਂ ਦੀ ਮੌਤ ਹੋ ਗਈ, ਜਦੋਂ ਕਿ ਕਈ ਲੋਕ ਜ਼ਖ਼ਮੀ ਹੋ ਗਏ। ਇਸ ਦੁਖਦਾਈ ਘਟਨਾ ਵਿੱਚ ਅੱਠ ਵਿਅਕਤੀ ਸੜਨ-ਝੁਲਸਣ ਕਾਰਨ ਜ਼ਖ਼ਮੀ ਹੋ ਗਏ। ਸਾਰੇ ਜ਼ਖ਼ਮੀਆਂ ਨੂੰ ਫੌਰੀ ਇਲਾਜ ਲਈ ਨੇੜਲੇ ਹਸਪਤਾਲ ਲਿਜਾਇਆ ਗਿਆ। ਪੀੜਤਾਂ ਦੀ ਸ਼ਨਾਖ਼ਤ ਦੀ ਪ੍ਰਕਿਰਿਆ ਅਜੇ ਜਾਰੀ ਹੈ।
ਅੱਗ ਦਾ ਸ਼ੋਲਾ ਭਖਣ ਤੋਂ ਬਾਅਦ ਲਗਭਗ 15 ਲੋਕ ਇਮਾਰਤ ਦੀ ਛੱਤ 'ਤੇ ਆ ਕੇ ਫਸ ਗਏ। ਕਰੀਬ ਤਿੰਨ ਘੰਟਿਆਂ ਤੱਕ ਉਹ ਉੱਥੇ ਹੀ ਮਦਦ ਦੀ ਉਡੀਕ ਕਰਦੇ ਰਹੇ। ਬਾਅਦ ਵਿੱਚ ਬਚਾਅ ਦਸਤਿਆਂ ਨੇ ਉਨ੍ਹਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ। ਹਸਪਤਾਲ ਅਧਿਕਾਰੀਆਂ ਅਨੁਸਾਰ, 23 ਸਾਲਾ ਅੰਕਿਤਾ ਅਤੇ ਢਾਈ ਸਾਲ ਦਾ ਬੱਚਾ ਅਬੀਰ ਜਦੋਂ ਨਾਨਾਵਟੀ ਹਸਪਤਾਲ ਪਹੁੰਚਾਏ ਗਏ ਤਾਂ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਅੱਗ ਬੁਝਾ ਦਿੱਤੀ ਗਈ ਹੈ ਪਰ ਠੰਡਾ ਕਰਨ ਦਾ ਕੰਮ ਦੇਰ ਰਾਤ ਤੱਕ ਚੱਲਦਾ ਰਿਹਾ।
ਅੱਗ ਨੇ ਇਮਾਰਤ ਦੀ ਇਲੈਕਟ੍ਰੀਕਲ ਵਾਇਰਿੰਗ ਤੋਂ ਲੈ ਕੇ ਘਰੇਲੂ ਉਪਕਰਣਾਂ, ਸੋਫ਼ਾ-ਬੈੱਡ, ਫਾਲਸ ਸੀਲਿੰਗ, ਰਸੋਈ ਦੇ ਸਮਾਨ ਤੇ ਏ.ਸੀ. ਯੂਨਿਟ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ। ਅੱਗ ਦੀ ਲਪੇਟ ਲਗਭਗ 4,000 ਵਰਗ ਫੁੱਟ ਰਕਬੇ ਵਿੱਚ ਫੈਲੀ ਹੋਈ ਸੀ।
ਘਟਨਾ ਦੀ ਸ਼ੁਰੂਆਤ ਵਿੱਚ ਮੁੰਬਈ ਫਾਇਰ ਬ੍ਰਿਗੇਡ ਨੇ ਰਾਤ 10:08 ਵਜੇ ਇਸ ਨੂੰ ਲੈਵਲ-1 (ਹਲਕੀ ਅੱਗ) ਕਰਾਰ ਦਿੱਤਾ, ਪਰ ਕੁਝ ਮਿੰਟਾਂ ਬਾਅਦ ਹੀ ਰਾਤ 10:16 ਵਜੇ ਇਸ ਨੂੰ ਲੈਵਲ-2 (ਦਰਮਿਆਨੀ ਅੱਗ) ਮੰਨ ਲਿਆ ਗਿਆ।
ਅੱਗ ਦੀ ਸੂਚਨਾ ਮਿਲਦੇ ਹੀ ਮੌਕੇ 'ਤੇ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ, ਪੁਲਿਸ ਕਰਮੀ, ਬਿਜਲੀ ਕੰਪਨੀ ਦੀ ਟੀਮ, ਐਂਬੂਲੈਂਸਾਂ ਅਤੇ ਬੀਐਮਸੀ ਅਧਿਕਾਰੀ ਪਹੁੰਚ ਗਏ। ਅੱਗ ਦਾ ਕਾਰਨ ਅਜੇ ਸਪੱਸ਼ਟ ਨਹੀਂ ਹੋ ਸਕਿਆ, ਅਤੇ ਜਾਂਚ ਜਾਰੀ ਹੈ।
