Last Updated :
12 August 2026, 09:19 AM IST
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਖੁਦ ਖੁਲਾਸਾ ਕੀਤਾ ਹੈ ਕਿ ਪਿਛਲੇ ਮਹੀਨੇ ਤੁਰਕੀ ਦੌਰੇ ਦੌਰਾਨ ਉਨ੍ਹਾਂ ਨੂੰ ਈਰਾਨ ਵੱਲੋਂ ਸੰਭਾਵਿਤ ਹਮਲੇ ਦੇ ਡਰੋਂ ਆਪਣਾ ਜਹਾਜ਼ ਬਦਲਣਾ ਪਿਆ ਸੀ। ਇਹ ਕਾਰਵਾਈ ਇੰਨੀ ਗੁਪਤ ਰੱਖੀ ਗਈ ਕਿ ਨਾਲ ਯਾਤਰਾ ਕਰ ਰਹੇ ਪੱਤਰਕਾਰਾਂ ਨੂੰ ਵੀ ਇਸ ਬਾਰੇ ਭਨਕ ਨਾ ਲੱਗੀ। ਟਰੰਪ ਮੁਤਾਬਕ, ਨਾਟੋ ਸੰਮੇਲਨ ਵਿੱਚ ਸ਼ਿਰਕਤ ਕਰਨ ਲਈ ਜਿਸ ਬੋਇੰਗ ਵਿੱਚ ਉਹ ਸਵਾਰ ਹੋਏ ਸਨ, ਉਸ ਨੂੰ ਨਿਸ਼ਾਨਾ ਬਣਾਏ ਜਾਣ ਦਾ ਖਦਸ਼ਾ ਸਭ ਤੋਂ ਵੱਧ ਸੀ। ਉਨ੍ਹਾਂ ਸਪੱਸ਼ਟ ਕਿਹਾ ਕਿ ਜੇਕਰ ਕੋਈ ਹਮਲਾ ਹੁੰਦਾ ਤਾਂ ਉਹ ਉਸੇ ਜਹਾਜ਼ 'ਤੇ ਹੁੰਦਾ।
ਟਰੰਪ ਨੇ ਦੱਸਿਆ ਕਿ ਉਹ ਸੁਰੱਖਿਆ ਏਜੰਸੀਆਂ ਦੇ ਕਹਿਣ 'ਤੇ ਹਰ ਫੈਸਲਾ ਲੈਂਦੇ ਹਨ। ਉਨ੍ਹਾਂ ਕਿਹਾ, "ਮੈਨੂੰ ਲਗਾਤਾਰ ਧਮਕੀਆਂ ਮਿਲਦੀਆਂ ਰਹਿੰਦੀਆਂ ਹਨ, ਅਤੇ ਜੋ ਵੀ ਸੁਰੱਖਿਆ ਟੀਮ ਕਹੇ, ਮੈਂ ਉਹੀ ਕਰਦਾ ਹਾਂ।"
ਵਾਸ਼ਿੰਗਟਨ ਪੋਸਟ ਦੀ ਰਿਪੋਰਟ ਮੁਤਾਬਕ, 8 ਜੁਲਾਈ ਨੂੰ ਜਦੋਂ ਟਰੰਪ ਅੰਕਾਰਾ ਤੋਂ ਰਵਾਨਾ ਹੋ ਰਹੇ ਸਨ, ਤਾਂ ਉਹ ਕੈਮਰਿਆਂ ਦੇ ਸਾਹਮਣੇ ਕਤਰ ਵੱਲੋਂ ਤੋਹਫ਼ੇ ਵਿੱਚ ਮਿਲੇ ਬੋਇੰਗ 747-8 ਏਅਰ ਫੋਰਸ ਵਨ 'ਚ ਸਵਾਰ ਦਿਖਾਈ ਦਿੱਤੇ। ਪਰ ਅਸਲ ਵਿੱਚ ਉਹ ਉਸ ਜਹਾਜ਼ ਵਿੱਚ ਨਹੀਂ ਸਨ।
ਅਸਲ ਵਿੱਚ ਟਰੰਪ ਨੂੰ ਹਵਾਈ ਅੱਡੇ ਦੀ ਇੱਕ ਕੇਟਰਿੰਗ ਗੱਡੀ ਵਿੱਚ ਛੁਪਾ ਕੇ ਅਮਰੀਕੀ ਵਾਯੂਸੈਨਾ ਦੇ ਵੀਆਈਪੀ ਸੈਨਿਕ ਜਹਾਜ਼ C-32A ਤੱਕ ਲਿਜਾਇਆ ਗਿਆ। ਇਹ ਪੂਰੀ ਪ੍ਰਕਿਰਿਆ ਇੰਨੀ ਚੁਸਤੀ ਨਾਲ ਕੀਤੀ ਗਈ ਕਿ ਕਿਸੇ ਨੂੰ ਭਨਕ ਨਾ ਲੱਗੀ।
ਆਮ ਤੌਰ 'ਤੇ ਰਾਸ਼ਟਰਪਤੀ ਦੇ ਨਾਲ ਯਾਤਰਾ ਕਰਨ ਵਾਲੇ ਪੱਤਰਕਾਰਾਂ ਨੂੰ ਘੱਟੋ-ਘੱਟ ਇੰਨਾ ਪਤਾ ਹੁੰਦਾ ਹੈ ਕਿ ਰਾਸ਼ਟਰਪਤੀ ਕਿਸ ਜਹਾਜ਼ 'ਚ ਸਵਾਰ ਹਨ। ਪਰ ਇਸ ਵਾਰ ਅਜਿਹਾ ਨਹੀਂ ਸੀ।
ਤੁਰਕੀ ਤੋਂ ਉਡਾਣ ਭਰਨ ਤੋਂ ਬਾਅਦ ਪੱਤਰਕਾਰਾਂ ਨੂੰ ਆਪਣੀਆਂ ਖਿੜਕੀਆਂ ਦੇ ਸ਼ੇਡ ਬੰਦ ਰੱਖਣ ਦਾ ਨਿਰਦੇਸ਼ ਦਿੱਤਾ ਗਿਆ, ਤਾਂ ਜੋ ਉਹ ਬਾਹਰ ਨਾ ਵੇਖ ਸਕਣ। ਇਹ ਸਾਵਧਾਨੀ ਆਮ ਤੌਰ 'ਤੇ ਉਦੋਂ ਅਪਣਾਈ ਜਾਂਦੀ ਹੈ ਜਦੋਂ ਜਹਾਜ਼ ਖਤਰਨਾਕ ਹਵਾਈ ਖੇਤਰ ਵਿੱਚੋਂ ਲੰਘ ਰਿਹਾ ਹੋਵੇ।
ਬਾਅਦ ਵਿੱਚ ਜਦੋਂ ਪੱਤਰਕਾਰਾਂ ਨੇ ਇਸ ਬਾਰੇ ਪੁੱਛਿਆ ਤਾਂ ਟਰੰਪ ਨੇ ਕਿਹਾ, "ਸ਼ਾਇਦ ਅਸੀਂ ਖਤਰਨਾਕ ਫਲਾਈਟ 'ਤੇ ਸੀ। ਉਨ੍ਹਾਂ ਦੀ ਸੂਚੀ 'ਚ ਮੇਰਾ ਨਾਮ ਸਭ ਤੋਂ ਉੱਪਰ ਹੈ। ਜੇ ਮੈਂ ਮਰਿਆ, ਤਾਂ ਤੁਸੀਂ ਵੀ ਮਰੋਗੇ।"
ਟਰੰਪ ਵਾਲਾ C-32A ਜਹਾਜ਼ ਰਾਤ ਕਰੀਬ 10:20 ਵਜੇ ਬ੍ਰਿਟੇਨ ਦੇ RAF ਮਿਲਡਨਹਾਲ ਏਅਰਬੇਸ 'ਤੇ ਉਤਰਿਆ। ਕੁਝ ਮਿੰਟਾਂ ਬਾਅਦ ਹੀ ਪੁਰਾਣਾ ਏਅਰਫੋਰਸ ਵਨ (ਜਿਸ ਵਿੱਚ ਪੱਤਰਕਾਰ ਸਨ) ਵੀ ਉੱਥੇ ਪਹੁੰਚ ਗਿਆ। ਇਸ ਤੋਂ ਬਾਅਦ ਟਰੰਪ ਨੂੰ ਚੁੱਪ-ਚਾਪ ਪੁਰਾਣੇ ਏਅਰਫੋਰਸ ਵਨ ਵਿੱਚ ਲਿਆਂਦਾ ਗਿਆ। ਕੁਝ ਸਮੇਂ ਬਾਅਦ ਉਹ ਉਸੇ ਜਹਾਜ਼ ਤੋਂ ਉਤਰਦੇ ਦਿਖਾਈ ਦਿੱਤੇ, ਜਿਸ ਕਾਰਨ ਪੱਤਰਕਾਰਾਂ ਨੂੰ ਭਰਮ ਹੋ ਗਿਆ ਕਿ ਉਹ ਪੂਰੀ ਯਾਤਰਾ ਉਸੇ ਜਹਾਜ਼ 'ਚ ਸਨ। ਹਾਲਾਂਕਿ ਇਹ ਸਪੱਸ਼ਟ ਨਹੀਂ ਹੈ ਕਿ C-32A ਤੋਂ ਉਤਰਨ ਤੋਂ ਬਾਅਦ ਟਰੰਪ ਪੁਰਾਣੇ ਏਅਰਫੋਰਸ ਵਨ ਤੱਕ ਕਿਵੇਂ ਪਹੁੰਚੇ। ਟਰੰਪ ਨੇ ਪੱਤਰਕਾਰਾਂ ਵੱਲ ਹੱਥ ਹਿਲਾਇਆ ਪਰ ਕੋਈ ਗੱਲਬਾਤ ਨਹੀਂ ਕੀਤੀ। ਇਸ ਤੋਂ ਬਾਅਦ ਉਹ ਆਪਣੇ ਆਧਿਕਾਰਿਕ ਜਹਾਜ਼ ਏਅਰਫੋਰਸ ਵਨ ਵਿੱਚ ਬੈਠ ਕੇ ਅਮਰੀਕਾ ਪਰਤੇ।
