Last Updated :
21 March 2024, 08:23 AM IST
Punjab News: ਪੰਜਾਬ ਦੇ ਵੱਖ-ਵੱਖ ਥਾਣਿਆਂ ਵਿੱਚ ਦਰਜ ਕਰੀਬ 39 ਕੇਸਾਂ ਵਿੱਚ ਨਾਮਜ਼ਦ ਅਮਨਦੀਪ ਕੰਬੋਜ ਉਰਫ਼ ਅਮਨ ਸਕੋਡਾ ਨੂੰ ਪੁਲਿਸ ਨੇ ਪੰਜ ਦਿਨ ਦਾ ਰਿਮਾਂਡ ਖ਼ਤਮ ਹੋਣ ਮਗਰੋਂ ਅਦਾਲਤ ਵਿੱਚ ਪੇਸ਼ ਕੀਤਾ। ਇਸ ਦੌਰਾਨ ਪੁਲਿਸ ਅਮਨ ਨੂੰ ਫ਼ਿਰੋਜ਼ਪੁਰ ਵਿੱਚ ਦਰਜ ਕਰੀਬ 11 ਮਾਮਲਿਆਂ ਵਿੱਚ ਪੁੱਛਗਿੱਛ ਲਈ ਪ੍ਰੋਡਕਸ਼ਨ ਵਾਰੰਟ ’ਤੇ ਆਪਣੇ ਨਾਲ ਲੈ ਗਈ। ਜਦਕਿ ਇਸ ਤੋਂ ਪਹਿਲਾਂ ਫਾਜ਼ਿਲਕਾ ਪੁਲਿਸ ਨੇ ਪ੍ਰੈੱਸ ਕਾਨਫ਼ਰੰਸ ਕਰਕੇ ਪੰਜ ਦਿਨ ਦੀ ਪੁੱਛਗਿੱਛ ਦੌਰਾਨ ਅਮਨ ਕੋਲੋਂ ਬਰਾਮਦ ਹੋਏ ਸਮਾਨ ਬਾਰੇ ਜਾਣਕਾਰੀ ਦਿੱਤੀ ਸੀ | ਪੁਲਿਸ ਨੇ ਦਾਅਵਾ ਕੀਤਾ ਕਿ ਅਮਨ ਕੋਲ ਦੋ ਵੱਖ-ਵੱਖ ਆਧਾਰ ਕਾਰਡ ਸਨ, ਜਿਨ੍ਹਾਂ ਰਾਹੀਂ ਉਹ ਆਪਣੀ ਪਛਾਣ ਛੁਪਾ ਰਿਹਾ ਸੀ।
ਫਾਜਿਲਕਾਂ ਪੁਲਿਸ ਨੇ ਵਾਰਾਣਸੀ ਤੋਂ ਕੀਤਾ ਸੀ ਕਾਬੂ
ਫਾਜ਼ਿਲਕਾ ਪੁਲਿਸ ਨੂੰ ਸੂਹ ਮਿਲੀ ਕਿ ਅਮਨਦੀਪ ਉੱਤਰ ਪ੍ਰਦੇਸ਼ ਦੇ ਵਾਰਾਣਸੀ ਵਿਖੇ ਇੱਕ ਮਕਾਨ ਵਿੱਚ ਰਹਿ ਰਿਹਾ ਹੈ, ਜਿਸ ਤੋਂ ਬਾਅਦ ਉਸਨੂੰ ਉੱਤਰ ਪ੍ਰਦੇਸ਼ ਪੁਲਿਸ ਦੇ ਨਾਲ ਕਾਬੂ ਕਰਕੇ 16 ਮਾਰਚ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ 5 ਦਿਨ ਦਾ ਰਿਮਾਂਡ ਹਾਸਲ ਕੀਤਾ ਗਿਆ। ਉਨ੍ਹਾਂ ਦੱਸਿਆ ਕਿ ਉਕਤ ਰਿਮਾਂਡ ਦੌਰਾਨ ਇੱਕ ਲੈਪਟਾਪ, ਪੰਜ ਵੱਖ-ਵੱਖ ਮੋਬਾਈਲ ਫ਼ੋਨ, ਦੋ ਵੱਖ-ਵੱਖ ਆਧਾਰ ਕਾਰਡ, ਤਿੰਨ ਵੱਖ-ਵੱਖ ਬੈਂਕਾਂ ਦੇ ਏਟੀਐਮ, ਇੱਕ ਡਰਾਈਵਿੰਗ ਲਾਇਸੰਸ, ਇੱਕ ਪੈਨ ਡਰਾਈਵ, ਪੰਜ ਡਾਇਰੀਆਂ, ਦੋ ਪਾਵਰ ਬੈਂਕ ਅਤੇ ਪੰਜ ਸਿਮ ਕਾਰਡ ਬਰਾਮਦ ਕੀਤੇ ਗਏ ਹਨ।
