Last Updated :
21 December 2023, 01:16 PM IST
ਕਪੂਰਥਲਾ ਦੀ ਰੇਲ ਕੋਚ ਫੈਕਟਰੀ ਨੂੰ ਇਕ ਹੋਰ ਵੱਡਾ ਆਰਡਰ ਮਿਲਿਆ ਹੈ। RCF ਹੁਣ ਵੰਦੇ ਮੈਟਰੋ ਟ੍ਰੇਨ ਦਾ ਵੀ ਨਿਰਮਾਣ ਕਰੇਗੀ। ਰੇਲ ਕੋਚ ਫੈਕਟਰੀ ਵਲੋਂ ਵੰਦੇ ਭਾਰਤ ਸਲੀਪਰ ਵੇਰੀਐਂਟ ਦਾ ਨਿਰਮਾਣ ਕੀਤਾ ਜਾ ਰਿਹਾ ਹੈ। ਹੁਣ RCF ਨੂੰ ਰੇਲਵੇ ਬੋਰਡ ਦਿੱਲੀ ਤੋਂ 16 ਰੈਕਾਂ ਦਾ ਆਰਡਰ ਮਿਲਿਆ ਹੈ। ਬੋਰਡ ਨੇ ਵੰਦੇ ਮੈਟਰੋ ਟ੍ਰੇਨ ਦਾ ਡਿਜ਼ਾਈਨ ਜਲਦੀ ਹੀ RCF ਨੂੰ ਭੇਜਣ ਦੇ ਹੁਕਮ ਦਿੱਤੇ ਹਨ। ਮਹਾਨਗਰਾਂ ਦੀ ਲਾਈਫ ਲਾਈਨ LHB ਮੈਟਰੋ ਟ੍ਰੇਨ ਦੀ ਥਾਂ ਵੰਦੇ ਮੈਟਰੋ ਟ੍ਰੇਨ ਲਵੇਗੀ। ਇਸ ਬਦਲਾਅ 'ਤੇ ਕੰਮ ਸ਼ੁਰੂ ਹੋ ਗਿਆ ਹੈ। ਰੇਲਵੇ ਬੋਰਡ ਨੇ 18 ਦਸੰਬਰ ਨੂੰ RCF ਕਪੂਰਥਲਾ ਦੇ ਜੀਐਮ ਐਸ ਸ੍ਰੀਨਿਵਾਸ ਨੂੰ ਵੰਦੇ ਮੈਟਰੋ ਟਰੇਨ ਦੇ 16 ਕਾਰਾਂ ਦੇ ਰੈਕ ਬਣਾਉਣ ਲਈ ਪੱਤਰ ਜਾਰੀ ਕੀਤਾ ਹੈ। ਪੱਤਰ ਵਿੱਚ ਆਦੇਸ਼ ਦੇਣ ਦੇ ਨਾਲ ਬੋਰਡ ਨੇ RCF ਨੂੰ ਖੋਜ ਡਿਜ਼ਾਈਨ ਅਤੇ ਮਿਆਰ ਸੰਗਠਨ ਦੀ ਮਦਦ ਨਾਲ ਜਲਦੀ ਤੋਂ ਜਲਦੀ ਡਿਜ਼ਾਈਨ ਤਿਆਰ ਕਰਨ ਲਈ ਵੀ ਕਿਹਾ ਹੈ। ਇਸ ਦੇ ਨਿਰਮਾਣ ਦੀ ਸਮਾਂ ਸੀਮਾ ਦਾ ਪੂਰਾ ਵੇਰਵਾ 22 ਦਸੰਬਰ ਤੱਕ ਜਮ੍ਹਾਂ ਕਰਵਾਉਣ ਦੇ ਆਦੇਸ਼ ਦਿੱਤੇ ਗਏ ਹਨ।
ਅਤਿ-ਆਧੁਨਿਕ ਤੇ ਨਵੀਆਂ ਸਹੂਲਤਾਂ ਨਾਲ ਲੈਸ ਹੋਣਗੇ ਕੋਚ
ਇਸ ਹੁਕਮ ਤੋਂ ਬਾਅਦ ਆਰਸੀਐਫ ਪ੍ਰਬੰਧਕਾਂ ਵੱਲੋਂ ਇਸ ’ਤੇ ਕੰਮ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਵੰਦੇ ਮੈਟਰੋ ਟਰੇਨ 'ਚ ਕਿਹੜੀਆਂ ਸਹੂਲਤਾਂ ਹੋਣਗੀਆਂ, ਇਸ ਦਾ ਖੁਲਾਸਾ ਅਜੇ ਨਹੀਂ ਕੀਤਾ ਗਿਆ ਹੈ। ਹਾਲਾਂਕਿ ਇਹ ਤੈਅ ਹੈ ਕਿ ਇਹ ਕੋਚ ਅਤਿ-ਆਧੁਨਿਕ ਅਤੇ ਕਈ ਨਵੀਆਂ ਸਹੂਲਤਾਂ ਨਾਲ ਲੈਸ ਹੋਣਗੇ। ਐਸ ਸ੍ਰੀਨਿਵਾਸ ਨੇ ਰੇਲਵੇ ਬੋਰਡ ਨੇ ਵੰਦੇ ਮੈਟਰੋ ਟਰੇਨ ਦੇ ਨਿਰਮਾਣ ਦੀ ਜ਼ਿੰਮੇਵਾਰੀ ਉਨ੍ਹਾਂ ਦੀ ਨਿਗਰਾਨੀ ਹੇਠ ਆਰਸੀਐਫ ਨੂੰ ਸੌਂਪ ਦਿੱਤੀ ਹੈ। ਆਰਸੀਐਫ ਦੇ ਚੀਫ ਪੀਆਰਓ ਬਲਦੇਵ ਰਾਜ ਅਤੇ ਪੀਆਰਓ ਵਿਨੋਦ ਕਟੋਚ ਨੇ ਦੱਸਿਆ ਕਿ ਡਿਜ਼ਾਇਨ ਵਿਭਾਗ ਨੇ ਕੰਮ ਸ਼ੁਰੂ ਕਰ ਦਿੱਤਾ ਹੈ, ਜਿਸ ਵਿੱਚ ਆਰਡੀਐਸਓ ਦੀ ਮਦਦ ਵੀ ਲਈ ਜਾਵੇਗੀ।
ਯਾਤਰੀਆਂ ਦੀਆਂ ਸਹੂਲਤਾਂ ਵਿੱਚ ਹੋਵੇਗਾ ਵਾਧਾ
ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਫਿਲਹਾਲ ਇਸ ਦੇ ਸਪੈਸੀਫਿਕੇਸ਼ਨ, ਲਾਗਤ, ਕੁੱਲ ਖਰਚੇ ਅਤੇ ਫੀਚਰਸ ਬਾਰੇ ਕੁਝ ਦੱਸਣਾ ਸੰਭਵ ਨਹੀਂ ਹੈ। ਡਿਜ਼ਾਇਨ ਤਿਆਰ ਕਰਕੇ ਦਸੰਬਰ ਮਹੀਨੇ ਵਿੱਚ ਰੇਲਵੇ ਬੋਰਡ ਨੂੰ ਸੌਂਪ ਦਿੱਤਾ ਜਾਵੇਗਾ। ਬਲਦੇਵ ਰਾਜ ਨੇ ਦੱਸਿਆ ਕਿ ਇਸ ਸਮੇਂ ਐਲਐਚਬੀ ਮੈਟਰੋ ਟ੍ਰੇਨਾਂ ਟਰੈਕ ’ਤੇ ਚੱਲ ਰਹੀਆਂ ਹਨ। ਸਪੱਸ਼ਟ ਤੌਰ 'ਤੇ ਵੰਦੇ ਮੈਟਰੋ ਰੇਲ ਗੱਡੀਆਂ ਅਤਿ-ਆਧੁਨਿਕ ਹੋਣਗੀਆਂ ਅਤੇ ਯਾਤਰੀਆਂ ਦੀਆਂ ਸਹੂਲਤਾਂ ਨੂੰ ਹੋਰ ਵਧਾਉਣ ਲਈ ਬਣਾਈਆਂ ਜਾਣਗੀਆਂ।
