ਵੈਲੈਂਟਾਈਨ ਡੇ ਸਕੈਮ ਤੋਂ ਰਹੋ ਸਾਵਧਾਨ, ਨਹੀਂ ਤਾਂ ਖਾਤਾ ਹੋ ਸਕਦਾ ਖਾਲੀ ਇਕ ਪਲ ਵਿੱਚ

ਵੈਲੈਂਟਾਈਨ ਵੀਕ ਦੌਰਾਨ ਆਨਲਾਈਨ ਠੱਗ ਪਿਆਰ ਦੇ ਨਾਮ ’ਤੇ ਲੋਕਾਂ ਨੂੰ ਨਿਸ਼ਾਨਾ ਬਣਾਉਂਦੇ ਹਨ, ਫੇਕ ਆਫ਼ਰ ਅਤੇ ਮੈਸੇਜ ਰਾਹੀਂ ਪੈਸੇ ਤੇ ਨਿੱਜੀ ਜਾਣਕਾਰੀ ਲੁੱਟਣ ਦੀ ਕੋਸ਼ਿਸ਼ ਕਰਦੇ ਹਨ।

ਜਿਵੇਂ ਹੀ ਵੈਲੈਂਟਾਈਨ ਵੀਕ ਸ਼ੁਰੂ ਹੁੰਦਾ ਹੈ, ਆਨਲਾਈਨ ਸਕੈਮਰ ਹੋਰ ਜ਼ਿਆਦਾ ਸਰਗਰਮ ਹੋ ਜਾਂਦੇ ਹਨ। ਲੋਕ ਇਸ ਸਮੇਂ ਜਜ਼ਬਾਤੀ ਹੋ ਕੇ ਫੈਸਲੇ ਕਰ ਲੈਂਦੇ ਹਨ। ਗਿਫ਼ਟ ਅਤੇ ਸਰਪ੍ਰਾਈਜ਼ ਲਈ ਖਰਚਾ ਵਧ ਜਾਂਦਾ ਹੈ। ਇਸ ਮੌਕੇ ਦਾ ਫਾਇਦਾ ਚੁੱਕ ਕੇ ਠੱਗ ਜਾਲ ਬੁਣਦੇ ਹਨ। ਉਹ ਸੋਸ਼ਲ ਮੀਡੀਆ ਅਤੇ ਡੇਟਿੰਗ ਐਪਸ ਰਾਹੀਂ ਸੰਪਰਕ ਬਣਾਉਂਦੇ ਹਨ। ਇਮੋਸ਼ਨਲ ਕਹਾਣੀਆਂ ਸੁਣਾ ਕੇ ਭਰੋਸਾ ਜਿੱਤ ਲੈਂਦੇ ਹਨ।

ਪਿਆਰ ਦਾ ਨਾਟਕ ਕਰਕੇ ਕਿਵੇਂ ਕਰਦੇ ਹਨ ਠੱਗੀ?

ਇਹ ਸਭ ਤੋਂ ਆਮ ਸਕੈਮ ਹੈ। ਠੱਗ ਪਹਿਲਾਂ ਦੋਸਤੀ ਕਰਦੇ ਹਨ। ਕੁਝ ਦਿਨਾਂ ਵਿੱਚ ਹੀ ਗਹਿਰਾ ਜਜ਼ਬਾਤੀ ਰਿਸ਼ਤਾ ਬਣਾਉਂਦੇ ਹਨ। ਪਰ ਕਦੇ ਵੀ ਵੀਡੀਓ ਕਾਲ ਜਾਂ ਸਾਹਮਣੇ ਮਿਲਣ ਤੋਂ ਕੱਤਰਾਉਂਦੇ ਹਨ। ਫਿਰ ਅਚਾਨਕ ਕੋਈ ਐਮਰਜੈਂਸੀ ਦੱਸਦੇ ਹਨ। ਮੈਡੀਕਲ ਖਰਚਾ ਜਾਂ ਕਾਨੂੰਨੀ ਮੁਸ਼ਕਲ ਦਾ ਹਵਾਲਾ ਦੇ ਕੇ ਪੈਸੇ ਮੰਗਦੇ ਹਨ। ਪੈਸੇ ਭੇਜਣ ਤੋਂ ਬਾਅਦ ਉਹ ਗਾਇਬ ਹੋ ਜਾਂਦੇ ਹਨ।

ਨਕਲੀ ਸ਼ਾਪਿੰਗ ਵੈਬਸਾਈਟਾਂ ਕਿਵੇਂ ਫਸਾਉਂਦੀਆਂ ਹਨ?

ਵੈਲੈਂਟਾਈਨ ਡੇ ਮੌਕੇ ਕਈ ਫੇਕ ਵੈਬਸਾਈਟਾਂ ਬਣਾਈਆਂ ਜਾਂਦੀਆਂ ਹਨ। ਇਹ ਜਵਾਹਿਰਾਤ, ਪਰਫਿਊਮ ਅਤੇ ਗਿਫ਼ਟਾਂ ’ਤੇ ਵੱਡੀ ਛੂਟ ਦਿਖਾਉਂਦੀਆਂ ਹਨ। ਵੈਬਸਾਈਟ ਬਿਲਕੁਲ ਅਸਲੀ ਵਰਗੀ ਲੱਗਦੀ ਹੈ। ਆਰਡਰ ਕਰਨ ਤੋਂ ਬਾਅਦ ਸਮਾਨ ਨਹੀਂ ਆਉਂਦਾ ਜਾਂ ਘਟੀਆ ਚੀਜ਼ ਮਿਲਦੀ ਹੈ। ਕਈ ਵਾਰ ਰਿਟਰਨ ਪਾਲਿਸੀ ਵੀ ਨਹੀਂ ਹੁੰਦੀ। ਖਰੀਦਣ ਤੋਂ ਪਹਿਲਾਂ ਰਿਵਿਊ ਜ਼ਰੂਰ ਚੈੱਕ ਕਰੋ।

ਸਰਪ੍ਰਾਈਜ਼ ਗਿਫ਼ਟ ਦੇ ਫਰਜ਼ੀ ਮੈਸੇਜ ਤੋਂ ਕਿਵੇਂ ਬਚੀਏ?

ਅਕਸਰ ਅਣਜਾਣ ਨੰਬਰ ਤੋਂ ਮੈਸੇਜ ਆਉਂਦਾ ਹੈ। ਲਿਖਿਆ ਹੁੰਦਾ ਹੈ ਕਿ ਤੁਹਾਡੇ ਲਈ ਸਪੈਸ਼ਲ ਗਿਫ਼ਟ ਹੈ। ਲਿੰਕ ’ਤੇ ਕਲਿਕ ਕਰਕੇ ਡਿਲਿਵਰੀ ਚਾਰਜ ਭਰਨ ਲਈ ਕਿਹਾ ਜਾਂਦਾ ਹੈ। ਇਹ ਲਿੰਕ ਤੁਹਾਨੂੰ ਫੇਕ ਪੇਜ ’ਤੇ ਲੈ ਜਾਂਦਾ ਹੈ। ਉੱਥੇ ਤੁਹਾਡੀ ਬੈਂਕ ਜਾਂ ਕਾਰਡ ਜਾਣਕਾਰੀ ਚੋਰੀ ਕੀਤੀ ਜਾਂਦੀ ਹੈ। ਅਜਿਹੇ ਮੈਸੇਜ ’ਤੇ ਕਦੇ ਭਰੋਸਾ ਨਾ ਕਰੋ।

ਕਿਵੇਂ ਰਹੀਏ ਸੁਰੱਖਿਅਤ?

ਕਦੇ ਵੀ ਅਣਜਾਣ ਵਿਅਕਤੀ ਨੂੰ ਪੈਸੇ ਨਾ ਭੇਜੋ। ਜਿਸ ਨਾਲ ਅਸਲੀ ਜ਼ਿੰਦਗੀ ’ਚ ਮੁਲਾਕਾਤ ਨਾ ਹੋਈ ਹੋਵੇ, ਉਸ ’ਤੇ ਭਰੋਸਾ ਨਾ ਕਰੋ। ਵੈਬਸਾਈਟ ਦੀ ਸੁਰੱਖਿਆ ਅਤੇ ਰਿਵਿਊ ਚੈੱਕ ਕਰੋ। ਆਪਣੀ ਨਿੱਜੀ ਜਾਣਕਾਰੀ ਕਿਸੇ ਨਾਲ ਸਾਂਝੀ ਨਾ ਕਰੋ। ਸ਼ੱਕੀ ਲਿੰਕ ’ਤੇ ਕਲਿਕ ਕਰਨ ਤੋਂ ਬਚੋ। ਯਾਦ ਰੱਖੋ, ਪਿਆਰ ਦੇ ਨਾਮ ’ਤੇ ਆਈ ਹਰ ਗੱਲ ਸੱਚ ਨਹੀਂ ਹੁੰਦੀ।