Last Updated :
20 May 2026, 01:37 PM IST
ਇਸ ਅਨੋਖੇ ਪਿੰਡ ਦਾ ਨਾਮ ਓਕੁਨੇਵੋ (Okunevo) ਹੈ। ਇਹ ਰੂਸ ਦੇ ਓਮਸਕ ਖੇਤਰ ਵਿੱਚ ਸਥਿਤ ਹੈ, ਜੋ ਪੱਛਮੀ ਸਾਈਬੇਰੀਆ ਦਾ ਹਿੱਸਾ ਮੰਨਿਆ ਜਾਂਦਾ ਹੈ। ਇਹ ਇਲਾਕਾ ਆਪਣੀ ਭਿਆਨਕ ਠੰਢ ਲਈ ਦੁਨੀਆ ਭਰ ਵਿੱਚ ਮਸ਼ਹੂਰ ਹੈ। ਸਰਦੀਆਂ ਵਿੱਚ ਇੱਥੇ ਤਾਪਮਾਨ ਮਾਇਨਸ 40 ਡਿਗਰੀ ਤੱਕ ਪਹੁੰਚ ਜਾਂਦਾ ਹੈ। ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਸ ਜਮਾਉਂਦੀ ਠੰਢ ਵਿੱਚ ਵੀ ਭਗਤੀ ਅਤੇ ਆਧਿਆਤਮਿਕਤਾ ਦੀ ਗੂੰਜ ਸੁਣਾਈ ਦਿੰਦੀ ਹੈ।
ਮਸ਼ਹੂਰ ਭਾਰਤੀ ਟਰੈਵਲਰ Indigo Trekker ਨੇ ਹਾਲ ਹੀ ਵਿੱਚ ਇਸ ਪਿੰਡ ਦੇ ਕੁਝ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਸਾਂਝੇ ਕੀਤੇ ਹਨ। ਵੀਡੀਓ ਵਿੱਚ ਬਰਫ਼ ਨਾਲ ਢੱਕੇ ਰਸਤੇ, ਠੰਢੀਆਂ ਹਵਾਵਾਂ ਅਤੇ ਉਸਦੇ ਵਿਚਕਾਰ “ਹਰੇ ਕ੍ਰਿਸ਼ਨਾ” ਦੇ ਕੀਰਤਨ ਨੇ ਲੋਕਾਂ ਨੂੰ ਹੈਰਾਨ ਕਰ ਦਿੱਤਾ। ਕਈ ਲੋਕ ਇਸ ਥਾਂ ਨੂੰ “ਰੂਸ ਦਾ ਹਿੰਦੂ ਪਿੰਡ” ਅਤੇ “ਮਿਨੀ ਇੰਡੀਆ” ਕਹਿ ਰਹੇ ਹਨ।
ਸੋਸ਼ਲ ਮੀਡੀਆ ‘ਤੇ ਕੁਝ ਲੋਕ ਇਸਨੂੰ ਰੂਸ ਦੀ ਪ੍ਰਾਚੀਨ ਹਿੰਦੂ ਸਭਿਆਚਾਰ ਨਾਲ ਜੋੜ ਰਹੇ ਹਨ, ਪਰ ਰਿਪੋਰਟਾਂ ਮੁਤਾਬਕ ਅਸਲ ਕਹਾਣੀ ਕੁਝ ਹੋਰ ਹੈ। ਓਕੁਨੇਵੋ ਵਿੱਚ ਸਨਾਤਨ ਧਰਮ ਅਤੇ ਵੈਦਿਕ ਸਭਿਆਚਾਰ ਦਾ ਪ੍ਰਸਾਰ ਪਿਛਲੇ ਕੁਝ ਦਹਾਕਿਆਂ ਵਿੱਚ ਹੋਇਆ ਹੈ। ਇੱਥੇ ਇਕ ਕ੍ਰਿਸ਼ਨਾ ਮੰਦਰ ਵੀ ਹੈ, ਜੋ ISKCON ਨਾਲ ਜੁੜਿਆ ਹੋਇਆ ਦੱਸਿਆ ਜਾਂਦਾ ਹੈ।
ਇਸ ਪਿੰਡ ਵਿੱਚ ਸਿਰਫ਼ ਕ੍ਰਿਸ਼ਨਾ ਭਗਤੀ ਹੀ ਨਹੀਂ, ਸਗੋਂ ਭਗਵਾਨ ਸ਼ਿਵ ਦੀ ਵੀ ਖਾਸ ਪੂਜਾ ਕੀਤੀ ਜਾਂਦੀ ਹੈ। ਲੋਕ ਸਵੇਰੇ ਅਤੇ ਸ਼ਾਮ ਇਕੱਠੇ ਹੋ ਕੇ ਭਜਨ-ਕੀਰਤਨ ਕਰਦੇ ਹਨ। ਮਾਇਨਸ 40 ਡਿਗਰੀ ਦੀ ਠੰਢ ਦੇ ਬਾਵਜੂਦ ਇੱਥੇ ਆਧਿਆਤਮਿਕ ਜੋਸ਼ ਘੱਟ ਨਹੀਂ ਹੁੰਦਾ। ਇਹੀ ਕਾਰਨ ਹੈ ਕਿ ਵੀਡੀਓ ਦੇਖਣ ਤੋਂ ਬਾਅਦ ਕਈ ਭਾਰਤੀ ਯੂਜ਼ਰ ਭਾਵੁਕ ਹੋ ਰਹੇ ਹਨ ਅਤੇ ਇਸਨੂੰ ਭਾਰਤੀ ਸੰਸਕ੍ਰਿਤੀ ਦੀ ਵਿਸ਼ਵ ਪੱਧਰੀ ਪਹੁੰਚ ਦਾ ਉਦਾਹਰਨ ਮੰਨ ਰਹੇ ਹਨ।
ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਲੋਕਾਂ ਵੱਲੋਂ ਵੱਖ-ਵੱਖ ਪ੍ਰਤੀਕਿਰਿਆਵਾਂ ਆ ਰਹੀਆਂ ਹਨ। ਕੁਝ ਯੂਜ਼ਰ ਕਹਿ ਰਹੇ ਹਨ ਕਿ “ਸਨਾਤਨ ਦੀ ਗੂੰਜ ਹੁਣ ਬਰਫ਼ੀਲੇ ਸਾਈਬੇਰੀਆ ਤੱਕ ਪਹੁੰਚ ਗਈ ਹੈ।” ਜਦਕਿ ਹੋਰ ਲੋਕ ਇਸ ਪਿੰਡ ਦੀ ਸ਼ਾਂਤੀ ਅਤੇ ਆਧਿਆਤਮਿਕ ਮਾਹੌਲ ਦੀ ਤਾਰੀਫ਼ ਕਰ ਰਹੇ ਹਨ। ਕਈ ਲੋਕਾਂ ਲਈ ਇਹ ਵੀਡੀਓ ਸਿਰਫ਼ ਇਕ ਟੂਰਿਸਟ ਸਪਾਟ ਨਹੀਂ, ਸਗੋਂ ਸੰਸਕ੍ਰਿਤੀਆਂ ਦੇ ਮਿਲਾਪ ਦੀ ਇਕ ਵੱਡੀ ਮਿਸਾਲ ਬਣ ਗਿਆ ਹੈ।
