Last Updated :
09 July 2026, 03:34 PM IST
Courtesy: ai image
ਨਵੀਂ ਦਿੱਲੀ: ਸੋਸ਼ਲ ਮੀਡੀਆ 'ਤੇ ਦੱਖਣੀ ਕੋਰੀਆ ਦੇ ਇੱਕ ਮੋਚੀ ਦੀ ਦੁਕਾਨ ਦਾ ਵੀਡੀਓ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ। ਵੀਡਿਓ 'ਚ ਦਿਖਾਈ ਦੇ ਰਹੀ ਦੁਕਾਨ ਆਮ ਮੋਚੀ ਦੀ ਦੁਕਾਨ ਵਾਂਗ ਨਹੀਂ, ਸਗੋਂ ਕਿਸੇ ਆਧੁਨਿਕ ਵਰਕਸ਼ਾਪ ਜਾਂ ਲਗਜ਼ਰੀ ਸਰਵਿਸ ਸੈਂਟਰ ਵਾਂਗ ਦਿਖਾਈ ਦਿੰਦੀ ਹੈ। ਇਸ ਦਾ ਸ਼ਾਨਦਾਰ ਸੈੱਟਅੱਪ, ਆਧੁਨਿਕ ਮਸ਼ੀਨਾਂ ਅਤੇ ਪੇਸ਼ੇਵਰ ਕੰਮ ਕਰਨ ਦਾ ਢੰਗ ਦੇਖ ਲੋਕ ਕਾਫੀ ਹੈਰਾਨ ਹਨ।
ਵੀਡੀਓ ਵਿੱਚ ਇੱਕ ਭਾਰਤੀ ਸੈਲਾਨੀ ਦੱਖਣੀ ਕੋਰੀਆ ਦੀ ਸੈਰ ਦੌਰਾਨ ਇਸ ਦੁਕਾਨ ਨੂੰ ਦਿਖਾਉਂਦਾ ਹੈ। ਦੁਕਾਨ ਦੀ ਸਾਫ਼-ਸੁਥਰੀ ਬਣਤਰ, ਏਅਰ ਕੰਡੀਸ਼ਨਿੰਗ, ਆਧੁਨਿਕ ਉਪਕਰਣ ਅਤੇ ਗਾਹਕਾਂ ਲਈ ਦਿੱਤੀਆਂ ਜਾ ਰਹੀਆਂ ਸੁਵਿਧਾਵਾਂ ਦੇਖ ਕੇ ਉਹ ਵੀ ਹੈਰਾਨ ਰਹਿ ਜਾਂਦਾ ਹੈ। ਵੀਡੀਓ ਵਿੱਚ ਇਹ ਵੀ ਦਿਖਾਇਆ ਗਿਆ ਹੈ ਕਿ ਦੁਕਾਨ ਦਾ ਮਾਲਕ ਆਡੀ ਕਾਰ ਰਾਹੀਂ ਆਪਣੇ ਕੰਮ ਵਾਲੀ ਥਾਂ 'ਤੇ ਪਹੁੰਚਦਾ ਹੈ, ਜਿਸਨੇ ਲੋਕਾਂ ਨੂੰ ਹੋਰ ਵੀ ਹੈਰਾਨ ਕਰ ਦਿੱਤਾ।
ਦੁਕਾਨ ਦੇ ਅੰਦਰ ਜੁੱਤਿਆਂ ਦੀ ਮੁਰੰਮਤ ਲਈ ਨਵੀਂ ਤਕਨੀਕ ਵਾਲੀਆਂ ਮਸ਼ੀਨਾਂ ਲੱਗੀਆਂ ਹੋਈਆਂ ਹਨ। ਹਰ ਕੰਮ ਬੜੀ ਬਾਰੀਕੀ ਅਤੇ ਪੇਸ਼ੇਵਰ ਢੰਗ ਨਾਲ ਕੀਤਾ ਜਾਂਦਾ ਹੈ। ਗਾਹਕਾਂ ਨੂੰ ਉੱਚ ਗੁਣਵੱਤਾ ਵਾਲੀ ਸੇਵਾ ਦੇਣ 'ਤੇ ਖਾਸ ਧਿਆਨ ਦਿੱਤਾ ਜਾਂਦਾ ਹੈ, ਜਿਸ ਕਰਕੇ ਲੋਕ ਲੰਬੀਆਂ ਕਤਾਰਾਂ ਵਿੱਚ ਖੜ੍ਹ ਕੇ ਆਪਣੀ ਵਾਰੀ ਦੀ ਉਡੀਕ ਕਰਦੇ ਹਨ।
ਵੀਡੀਓ ਦਾ ਸਭ ਤੋਂ ਹੈਰਾਨ ਕਰਨ ਵਾਲਾ ਹਿੱਸਾ ਮੁਰੰਮਤ ਦੀ ਕੀਮਤ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਜਿੱਥੇ ਭਾਰਤ ਵਿੱਚ ਜੁੱਤੇ ਦੀ ਛੋਟੀ ਮੁਰੰਮਤ ਜਾਂ ਇੱਕ ਟਾਂਕਾ ਲਗਵਾਉਣ ਲਈ ਆਮ ਤੌਰ 'ਤੇ 20 ਤੋਂ 50 ਰੁਪਏ ਤੱਕ ਖਰਚ ਹੁੰਦੇ ਹਨ, ਉੱਥੇ ਦੱਖਣੀ ਕੋਰੀਆ ਵਿੱਚ ਇੱਕ ਛੋਟੇ ਜਿਹੇ ਟਾਂਕੇ ਲਈ ਕਰੀਬ 400 ਤੋਂ 500 ਰੁਪਏ ਤੱਕ ਲਏ ਜਾਂਦੇ ਹਨ। ਇਸ ਦੇ ਬਾਵਜੂਦ ਗਾਹਕ ਇਸ ਸੇਵਾ ਨੂੰ ਤਰਜੀਹ ਦਿੰਦੇ ਹਨ ਕਿਉਂਕਿ ਉਨ੍ਹਾਂ ਨੂੰ ਉੱਚ ਮਿਆਰੀ ਕੰਮ ਅਤੇ ਪੇਸ਼ੇਵਰ ਸੇਵਾ ਮਿਲਦੀ ਹੈ।
ਮਾਹਿਰਾਂ ਦੇ ਅਨੁਸਾਰ ਦੱਖਣੀ ਕੋਰੀਆ ਵਿੱਚ ਮਜ਼ਦੂਰੀ ਦੀ ਲਾਗਤ ਕਾਫ਼ੀ ਜ਼ਿਆਦਾ ਹੈ। ਉੱਥੇ ਹਰ ਪੇਸ਼ੇ ਨੂੰ ਬਰਾਬਰ ਸਨਮਾਨ ਦਿੱਤਾ ਜਾਂਦਾ ਹੈ ਅਤੇ ਹੁਨਰਮੰਦ ਕਾਰੀਗਰਾਂ ਦੀ ਸੇਵਾ ਦੀ ਵੀ ਉੱਚੀ ਕੀਮਤ ਹੁੰਦੀ ਹੈ। ਆਧੁਨਿਕ ਉਪਕਰਣਾਂ ਦੀ ਵਰਤੋਂ, ਗੁਣਵੱਤਾ ਵਾਲਾ ਕੰਮ ਅਤੇ ਗਾਹਕਾਂ ਨੂੰ ਮਿਲਣ ਵਾਲਾ ਬਿਹਤਰ ਤਜਰਬਾ ਵੀ ਇਸ ਦੀਆਂ ਵੱਧ ਕੀਮਤਾਂ ਦਾ ਇੱਕ ਵੱਡਾ ਕਾਰਨ ਮੰਨਿਆ ਜਾਂਦਾ ਹੈ।
ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਲੋਕ ਵੱਖ-ਵੱਖ ਤਰ੍ਹਾਂ ਦੀਆਂ ਪ੍ਰਤੀਕਿਰਿਆਵਾਂ ਦੇ ਰਹੇ ਹਨ। ਕੁਝ ਲੋਕਾਂ ਨੇ ਦੱਖਣੀ ਕੋਰੀਆ ਦੇ ਪੇਸ਼ੇਵਰ ਕੰਮ ਕਰਨ ਦੇ ਢੰਗ ਅਤੇ ਹਰ ਕੰਮ ਨੂੰ ਮਿਲਦੇ ਸਨਮਾਨ ਦੀ ਤਾਰੀਫ਼ ਕੀਤੀ, ਜਦਕਿ ਕੁਝ ਨੇ ਭਾਰਤ ਅਤੇ ਦੱਖਣੀ ਕੋਰੀਆ ਵਿੱਚ ਮੁਰੰਮਤ ਦੀਆਂ ਕੀਮਤਾਂ ਦੀ ਤੁਲਨਾ ਕਰਦੇ ਹੋਏ ਹੈਰਾਨੀ ਜਤਾਈ। ਕਈ ਯੂਜ਼ਰਾਂ ਦਾ ਕਹਿਣਾ ਹੈ ਕਿ ਉੱਚ ਗੁਣਵੱਤਾ ਵਾਲੀ ਸੇਵਾ ਅਤੇ ਪੇਸ਼ੇਵਰ ਰਵੱਈਏ ਕਰਕੇ ਹੀ ਉੱਥੇ ਲੋਕ ਬਿਨਾਂ ਕਿਸੇ ਝਿਝਕ ਦੇ ਵੱਧ ਕੀਮਤ ਅਦਾ ਕਰਦੇ ਹਨ।
