Last Updated :
22 January 2024, 02:59 PM IST
Auto Update: ਜੇਕਰ ਤੁਸੀਂ ਟਾਟਾ ਮੋਟਰਜ਼ ਦੀ ਕੋਈ ਗੱਡੀ ਖਰੀਦਣ ਦੀ ਤਿਆਰੀ ਕਰ ਰਹੇ ਹੋ ਤਾਂ ਇਹ ਖਬਰ ਤੁਹਾਡੇ ਲਈ ਜ਼ਰੂਰੀ ਹੈ ਕਿਉਂਕਿ ਅਗਲੇ ਮਹੀਨੇ ਤੋਂ ਟਾਟਾ (Tata) ਆਪਣੇ ਸਾਰੇ ਵਾਹਨਾਂ ਦੀਆਂ ਕੀਮਤਾਂ ਵਧਾਉਣ ਜਾ ਰਹੀ ਹੈ। ਕੰਪਨੀ ਇਨਪੁਟ ਲਾਗਤ 'ਚ ਵਾਧੇ ਦੇ ਬੋਝ ਨੂੰ ਘੱਟ ਕਰਨਾ ਚਾਹੁੰਦੀ ਹੈ। ਕੀਮਤਾਂ 'ਚ ਵਾਧਾ ਪੈਟਰੋਲ ਅਤੇ ਡੀਜ਼ਲ ਇੰਜਣ ਵਾਲੀਆਂ ਕਾਰਾਂ ਦੇ ਨਾਲ-ਨਾਲ ਇਲੈਕਟ੍ਰਿਕ ਵਾਹਨਾਂ (EV) 'ਤੇ ਵੀ ਲਾਗੂ ਹੋਵੇਗਾ। ਰਿਪੋਰਟ ਅਨੁਸਾਰ ਕਾਰਾਂ ਦੀਆਂ ਕੀਮਤਾਂ 'ਚ 0.7 ਫੀਸਦੀ ਦਾ ਵਾਧਾ ਹੋਣ ਵਾਲਾ ਹੈ। ਉਧਰ, ਟਾਟਾ ਮੋਟਰਸ ਨੇ ਆਪਣੀ ਦੂਜੀ ਇਲੈਕਟ੍ਰਿਕ SUV ਪੰਚ ਲਾਂਚ ਕਰ ਦਿੱਤੀ ਹੈ। ਇਸ ਦੇ ਨਾਲ ਕੰਪਨੀ ਕੋਲ ਚਾਰ ਇਲੈਕਟ੍ਰਿਕ ਵਾਹਨ ਹੋ ਗਏ ਹਨ।
ਟਾਟਾ ਮੋਟਰਸ ਦੀ ਅਗਲੇ ਦੋ ਸਾਲਾਂ ਵਿੱਚ EVs ਲਈ ਲਗਭਗ 10,000 ਚਾਰਜਿੰਗ ਸਟੇਸ਼ਨ (Charging Station) ਸਥਾਪਤ ਕਰਨ ਦੀ ਯੋਜਨਾ ਹੈ। ਇਸ ਦੇ ਲਈ ਚਾਰਜਜੋਨ, ਗਲਾਈਡਾ, ਸਟੈਟਿਕ ਅਤੇ ਜ਼ਿਓਨ ਵਰਗੇ ਆਪਰੇਟਰਾਂ ਨਾਲ ਟਾਈ-ਅੱਪ ਕੀਤਾ ਗਿਆ ਹੈ। ਟਾਟਾ ਮੋਟਰਸ ਦੇਸ਼ ਦੇ ਈਵੀ ਸੈਗਮੈਂਟ ਵਿੱਚ ਪਹਿਲੇ ਸਥਾਨ 'ਤੇ ਹੈ। ਇਸ ਵਿੱਚ ਇੱਕ ਵੱਡਾ EV ਚਾਰਜਿੰਗ ਨੈੱਟਵਰਕ ਵੀ ਹੈ। ਕੰਪਨੀ ਨੇ 1.15 ਲੱਖ ਤੋਂ ਜ਼ਿਆਦਾ ਇਲੈਕਟ੍ਰਿਕ ਵਾਹਨ ਵੇਚੇ ਹਨ। ਚਾਰਜਜ਼ੋਨ, ਗਲਾਈਡਾ, ਸਟੈਟਿਕ ਅਤੇ ਜ਼ਿਓਨ ਦੇ ਦੇਸ਼ ਦੇ ਵੱਖ-ਵੱਖ ਸ਼ਹਿਰਾਂ ਵਿੱਚ ਲਗਭਗ 2,000 ਚਾਰਜਿੰਗ ਸਟੇਸ਼ਨ ਹਨ। ਟਾਟਾ ਮੋਟਰਜ਼ ਦੇ ਨਾਲ ਗੱਠਜੋੜ ਦੇ ਨਾਲ, ਉਨ੍ਹਾਂ ਦੀ ਗਿਣਤੀ ਵਧ ਕੇ ਲਗਭਗ 12,000 ਹੋ ਜਾਵੇਗੀ।
ਟਾਟਾ ਮੋਟਰਜ਼ ਨੇ ਕੇਂਦਰ ਸਰਕਾਰ ਨੂੰ ਹਾਈਬ੍ਰਿਡ ਕਾਰਾਂ 'ਤੇ ਟੈਕਸ ਛੋਟ ਨਾ ਦੇਣ ਦੀ ਬੇਨਤੀ ਕੀਤੀ ਹੈ। ਹਾਈਬ੍ਰਿਡ ਕਾਰ (Hybrid Car) ਸੈਗਮੈਂਟ ਦੀ ਪ੍ਰਮੁੱਖ ਕੰਪਨੀ ਟੋਇਟਾ ਨੇ ਹਾਈਬ੍ਰਿਡ ਵਾਹਨਾਂ 'ਤੇ ਟੈਕਸ ਕਟੌਤੀ ਦੀ ਮੰਗ ਕੀਤੀ ਸੀ। ਟਾਟਾ ਮੋਟਰਸ ਦੀ ਅੰਦਰੂਨੀ ਕੰਬਸ਼ਨ ਇੰਜਣ (ICE) ਅਤੇ ਇਲੈਕਟ੍ਰਿਕ ਵਹੀਕਲ (EV) ਦੋਵਾਂ ਹਿੱਸਿਆਂ ਵਿੱਚ ਮੌਜੂਦਗੀ ਹੈ। ਟਾਟਾ ਮੋਟਰਜ਼ ਦਾ ਕਹਿਣਾ ਹੈ ਕਿ ਹਾਈਬ੍ਰਿਡ ਕਾਰਾਂ 'ਤੇ ਟੈਕਸ ਘੱਟ ਨਹੀਂ ਕੀਤਾ ਜਾਣਾ ਚਾਹੀਦਾ ਕਿਉਂਕਿ ਉਹ ਈਵੀ ਨਾਲੋਂ ਜ਼ਿਆਦਾ ਪ੍ਰਦੂਸ਼ਣ ਫੈਲਾਉਂਦੀਆਂ ਹਨ। ਇਸ ਤੋਂ ਪਹਿਲਾਂ ਟਾਟਾ ਮੋਟਰਜ਼ ਨੇ ਵੀ ਅਮਰੀਕੀ ਈਵੀ ਨਿਰਮਾਤਾ ਕੰਪਨੀ ਟੇਸਲਾ ਨੂੰ ਇਲੈਕਟ੍ਰਿਕ ਕਾਰਾਂ ਦੇ ਆਯਾਤ 'ਤੇ ਟੈਕਸ ਛੋਟ ਦੇਣ ਦਾ ਵਿਰੋਧ ਕੀਤਾ ਸੀ।
