Last Updated :
24 June 2026, 11:45 AM IST
Courtesy: Credit: OpenAI
ਗੌਤਮ ਅਡਾਨੀ ਨੇ ਆਪਣੇ ਸੰਬੋਧਨ ਦੌਰਾਨ ਕਿਹਾ ਕਿ ਪਿਛਲੇ ਕੁਝ ਸਾਲਾਂ ਵਿੱਚ ਗਰੁੱਪ ਨੂੰ ਕਈ ਤਰ੍ਹਾਂ ਦੀਆਂ ਚੁਣੌਤੀਆਂ ਅਤੇ ਦੋਸ਼ਾਂ ਦਾ ਸਾਹਮਣਾ ਕਰਨਾ ਪਿਆ, ਪਰ ਉਨ੍ਹਾਂ ਨੇ ਹਰ ਹਾਲਾਤ ਵਿੱਚ ਮਜ਼ਬੂਤੀ ਨਾਲ ਅੱਗੇ ਵਧਣਾ ਜਾਰੀ ਰੱਖਿਆ। ਉਨ੍ਹਾਂ ਕਿਹਾ ਕਿ ਗਰੁੱਪ ਦੇ ਤਿੰਨ ਮੁੱਖ ਸਿਧਾਂਤ—ਹਿੰਮਤ, ਭਰੋਸਾ ਅਤੇ ਵਚਨਬੱਧਤਾ—ਹਰ ਔਖੇ ਸਮੇਂ ਵਿੱਚ ਉਨ੍ਹਾਂ ਦੀ ਤਾਕਤ ਬਣੇ ਰਹੇ ਹਨ।
ਅਡਾਨੀ ਨੇ ਗਰੁੱਪ ਦੇ ਕਰਮਚਾਰੀਆਂ ਦੀ ਭੂਮਿਕਾ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਉਹ ਸਿਰਫ਼ ਕਰਮਚਾਰੀ ਨਹੀਂ, ਸਗੋਂ ਦੇਸ਼ ਦੇ ਨਿਰਮਾਤਾ ਹਨ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਗਰੁੱਪ ਦੀ ਤਰੱਕੀ ਵਿੱਚ ਕਰਮਚਾਰੀਆਂ ਅਤੇ ਸਥਾਨਕ ਭਾਈਚਾਰਿਆਂ ਦਾ ਅਹਿਮ ਯੋਗਦਾਨ ਰਿਹਾ ਹੈ।
AGM ਦੌਰਾਨ ਅਡਾਨੀ ਗਰੁੱਪ ਨੇ ਨਵੀਂ ਤਿੰਨ-ਪੱਧਰੀ ਰੋਜ਼ਗਾਰ ਨੀਤੀ ਦਾ ਐਲਾਨ ਕੀਤਾ। ਇਸ ਤਹਿਤ ਸਭ ਤੋਂ ਪਹਿਲਾਂ ਪ੍ਰੋਜੈਕਟ ਸਥਾਨ ਦੇ ਨੇੜਲੇ ਇਲਾਕਿਆਂ ਦੇ ਲੋਕਾਂ ਨੂੰ ਨੌਕਰੀ ਦੇ ਮੌਕੇ ਦਿੱਤੇ ਜਾਣਗੇ।
ਇਸ ਤੋਂ ਬਾਅਦ ਸਬੰਧਿਤ ਰਾਜ ਦੇ ਨੌਜਵਾਨਾਂ ਨੂੰ ਤਰਜੀਹ ਦਿੱਤੀ ਜਾਵੇਗੀ ਅਤੇ ਫਿਰ ਹੋਰ ਖੇਤਰਾਂ ਦੇ ਉਮੀਦਵਾਰਾਂ ਨੂੰ ਮੌਕਾ ਮਿਲੇਗਾ।
ਗੌਤਮ ਅਡਾਨੀ ਨੇ ਦੱਸਿਆ ਕਿ ਮੁੰਦਰਾ ਅਤੇ ਖਾਵੜਾ ਵਰਗੇ ਪ੍ਰੋਜੈਕਟ ਸਥਾਨਾਂ 'ਤੇ 50 ਹਜ਼ਾਰ ਮਜ਼ਦੂਰਾਂ ਲਈ ਏਅਰ-ਕੰਡੀਸ਼ਨਡ ਰਿਹਾਇਸ਼ੀ ਸਹੂਲਤਾਂ ਤਿਆਰ ਕੀਤੀਆਂ ਜਾ ਰਹੀਆਂ ਹਨ। ਇਸ ਦੇ ਨਾਲ ਮੁੰਦਰਾ ਵਿੱਚ ਇੱਕ ਆਧੁਨਿਕ ਸੈਂਟਰਲਾਈਜ਼ਡ ਕਲਾਉਡ ਕਿਚਨ ਵੀ ਬਣਾਇਆ ਜਾ ਰਿਹਾ ਹੈ, ਜੋ ਹਰ ਰੋਜ਼ ਇੱਕ ਲੱਖ ਲੋਕਾਂ ਲਈ ਪੌਸ਼ਟਿਕ ਭੋਜਨ ਤਿਆਰ ਕਰੇਗਾ।
ਗਰੁੱਪ ਨੇ ਤੇਜ਼ ਅਤੇ ਪ੍ਰਭਾਵਸ਼ਾਲੀ ਫ਼ੈਸਲੇ ਲੈਣ ਲਈ ਨਵਾਂ ਤਿੰਨ-ਪੱਧਰੀ ਗਵਰਨੈਂਸ ਮਾਡਲ ਲਾਗੂ ਕਰਨ ਦਾ ਐਲਾਨ ਵੀ ਕੀਤਾ ਹੈ। ਅਡਾਨੀ ਮੁਤਾਬਕ ਇਸ ਨਾਲ ਪ੍ਰਸ਼ਾਸਨਿਕ ਪ੍ਰਕਿਰਿਆਵਾਂ ਸਰਲ ਹੋਣਗੀਆਂ ਅਤੇ ਸਾਈਟ ਪੱਧਰ ਦੇ ਫ਼ੈਸਲੇ ਪਹਿਲਾਂ ਨਾਲੋਂ ਕਾਫ਼ੀ ਘੱਟ ਸਮੇਂ ਵਿੱਚ ਲਏ ਜਾ ਸਕਣਗੇ।
ਗੁਜਰਾਤ ਦੇ ਖਾਵੜਾ ਵਿੱਚ ਬਣ ਰਹੇ ਦੁਨੀਆ ਦੇ ਸਭ ਤੋਂ ਵੱਡੇ ਨਵਿਆਉਣਯੋਗ ਊਰਜਾ ਪ੍ਰੋਜੈਕਟ ਬਾਰੇ ਜਾਣਕਾਰੀ ਦਿੰਦਿਆਂ ਅਡਾਨੀ ਨੇ ਕਿਹਾ ਕਿ ਮੌਜੂਦਾ ਸਮੇਂ ਵਿੱਚ ਉੱਥੋਂ 3,000 ਮੈਗਾਵਾਟ ਸਾਫ਼ ਊਰਜਾ ਉਤਪਾਦਨ ਹੋ ਰਿਹਾ ਹੈ। ਗਰੁੱਪ ਦਾ ਟੀਚਾ ਅਗਲੇ ਪੰਜ ਸਾਲਾਂ ਵਿੱਚ ਇਸ ਦੀ ਸਮਰੱਥਾ ਨੂੰ ਵਧਾ ਕੇ 30 ਗੀਗਾਵਾਟ ਤੱਕ ਲੈ ਜਾਣਾ ਹੈ।
ਅਡਾਨੀ ਪੋਰਟਸ ਐਂਡ ਐਸਈਜ਼ੈਡ ਲਈ ਬੀਤਿਆ ਸਾਲ ਇਤਿਹਾਸਕ ਰਿਹਾ। ਗਰੁੱਪ ਨੇ 420 ਮਿਲੀਅਨ ਮੈਟ੍ਰਿਕ ਟਨ ਕਾਰਗੋ ਹੈਂਡਲਿੰਗ ਦਾ ਰਿਕਾਰਡ ਬਣਾਇਆ। ਇਸ ਤੋਂ ਇਲਾਵਾ ਦੇਸ਼ ਦੀ ਉਦਯੋਗਿਕ ਲੋੜ ਨੂੰ ਮਜ਼ਬੂਤ ਕਰਨ ਲਈ 1 ਮਿਲੀਅਨ ਟਨ ਸਾਲਾਨਾ ਸਮਰੱਥਾ ਵਾਲਾ ਕਾਪਰ ਸਮੈਲਟਰ ਪਲਾਂਟ ਵੀ ਤਿਆਰ ਕੀਤਾ ਜਾ ਰਿਹਾ ਹੈ।
ਗੌਤਮ ਅਡਾਨੀ ਨੇ ਗਰੁੱਪ ਦੇ ਵਿੱਤੀ ਪ੍ਰਦਰਸ਼ਨ ਬਾਰੇ ਵੀ ਜਾਣਕਾਰੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਵਿੱਤੀ ਸਾਲ 2023-24 ਦੌਰਾਨ ਗਰੁੱਪ ਨੇ 82,917 ਕਰੋੜ ਰੁਪਏ ਦਾ ਰਿਕਾਰਡ EBITDA ਦਰਜ ਕੀਤਾ। ਇਸ ਦੇ ਨਾਲ ਗਰੁੱਪ ਦਾ ਕਰ ਬਾਅਦ ਮੁਨਾਫ਼ਾ 71 ਫੀਸਦੀ ਵਧ ਕੇ 40,129 ਕਰੋੜ ਰੁਪਏ ਤੱਕ ਪਹੁੰਚ ਗਿਆ, ਜਦਕਿ ਕਰਜ਼ੇ ਅਤੇ ਕਮਾਈ ਦੇ ਅਨੁਪਾਤ ਵਿੱਚ ਵੀ ਸੁਧਾਰ ਦਰਜ ਕੀਤਾ ਗਿਆ।
ਆਪਣੇ ਸੰਬੋਧਨ ਦੇ ਅੰਤ ਵਿੱਚ ਗੌਤਮ ਅਡਾਨੀ ਨੇ ਕਿਹਾ ਕਿ ਮੌਜੂਦਾ ਵਿਸ਼ਵ ਪੱਧਰੀ ਚੁਣੌਤੀਆਂ ਦੇ ਬਾਵਜੂਦ ਦੁਨੀਆ ਭਾਰਤ ਵੱਲ ਆਸ ਨਾਲ ਦੇਖ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਵਿਸ਼ਵ ਆਰਥਿਕਤਾ ਅਤੇ ਵਿਕਾਸ ਵਿੱਚ ਅਹਿਮ ਭੂਮਿਕਾ ਨਿਭਾ ਰਿਹਾ ਹੈ ਅਤੇ ਅਡਾਨੀ ਗਰੁੱਪ ਦੇਸ਼ ਦੇ ਬੁਨਿਆਦੀ ਢਾਂਚੇ, ਊਰਜਾ ਅਤੇ ਲੌਜਿਸਟਿਕਸ ਖੇਤਰ ਨੂੰ ਹੋਰ ਮਜ਼ਬੂਤ ਬਣਾਉਣ ਲਈ ਵਚਨਬੱਧ ਹੈ।
