Last Updated :
24 July 2026, 08:40 AM IST
ਦਿੱਲੀ ਦੇ ਜੰਤਰ-ਮੰਤਰ 'ਤੇ CJP ਵੱਲੋਂ ਕੀਤਾ ਜਾ ਰਿਹਾ ਪ੍ਰਦਰਸ਼ਨ ਹੁਣ ਆਰਥਿਕ ਮਾਹਿਰਾਂ ਦੀ ਨਜ਼ਰ ਵਿੱਚ ਇੱਕ ਵੱਡੀ ਚਿੰਤਾ ਬਣ ਗਿਆ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇਕਰ ਇਹ ਵਿਰੋਧ ਲੰਮਾ ਚੱਲਿਆ ਤਾਂ ਵਿਦੇਸ਼ੀ ਨਿਵੇਸ਼ਕ ਭਾਰਤੀ ਬਾਜ਼ਾਰ ਪ੍ਰਤੀ ਸਾਵਧਾਨ ਹੋ ਸਕਦੇ ਹਨ, ਜਿਸਦਾ ਸਿੱਧਾ ਅਸਰ ਭਾਰਤੀ ਰੁਪਏ ਅਤੇ ਸ਼ੇਅਰ ਬਾਜ਼ਾਰ 'ਤੇ ਪੈ ਸਕਦਾ ਹੈ। ਪਹਿਲਾਂ ਹੀ ਅਮਰੀਕਾ-ਈਰਾਨ ਤਣਾਅ ਕਾਰਨ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋ ਰਿਹਾ ਹੈ, ਜਿਸ ਨਾਲ ਵਿਸ਼ਵ ਆਰਥਿਕਤਾ 'ਤੇ ਦਬਾਅ ਹੈ। ਅਜਿਹੇ ਵਿੱਚ CJP ਦਾ ਲੰਮਾ ਵਿਰੋਧ ਨਿਵੇਸ਼ਕਾਂ ਲਈ ਚਿੰਤਾ ਵਧਾਉਣ ਵਾਲਾ ਕਾਰਕ ਬਣ ਸਕਦਾ ਹੈ।
SEBI-ਰਜਿਸਟਰਡ ਮਾਰਕੀਟ ਮਾਹਿਰ ਅਨੁਜ ਗੁਪਤਾ ਦਾ ਕਹਿਣਾ ਹੈ ਕਿ ਫਿਲਹਾਲ ਭਾਰਤੀ ਇਕੁਇਟੀ ਬਾਜ਼ਾਰ 'ਤੇ ਦਬਾਅ ਹੈ। ਉਨ੍ਹਾਂ ਅਨੁਸਾਰ ਕੱਚੇ ਤੇਲ ਦੀਆਂ ਵੱਧ ਰਹੀਆਂ ਕੀਮਤਾਂ ਅਤੇ ਅੰਤਰਰਾਸ਼ਟਰੀ ਤਣਾਅ ਪਹਿਲਾਂ ਹੀ ਬਾਜ਼ਾਰ ਨੂੰ ਪ੍ਰਭਾਵਿਤ ਕਰ ਰਹੇ ਹਨ, ਅਤੇ ਹੁਣ CJP ਦਾ ਲੰਮਾ ਪ੍ਰਦਰਸ਼ਨ ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ (FIIs) ਨੂੰ ਭਾਰਤ ਤੋਂ ਦੂਰ ਕਰ ਸਕਦਾ ਹੈ। ਖਾਸ ਗੱਲ ਇਹ ਹੈ ਕਿ FIIs ਨੇ ਜੁਲਾਈ 2026 ਵਿੱਚ ਲਗਭਗ ਇੱਕ ਸਾਲ ਬਾਅਦ ਭਾਰਤੀ ਬਾਜ਼ਾਰ ਵਿੱਚ ਨੈੱਟ ਖਰੀਦਦਾਰੀ ਕੀਤੀ ਸੀ, ਪਰ ਹੁਣ ਇਹ ਰੁਝਾਨ ਬਦਲ ਸਕਦਾ ਹੈ।
Enrich Money ਦੇ CEO ਪੋਨਮੁਦੀ ਆਰ ਨੇ ਇਸ ਸਥਿਤੀ ਨੂੰ ਰੁਪਏ ਲਈ ਚੁਣੌਤੀ ਭਰਿਆ ਦੱਸਿਆ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ CJP ਵਿਰੋਧ ਕਾਰਨ ਪ੍ਰਸ਼ਾਸਨ ਅਤੇ ਨੀਤੀਆਂ ਦੀ ਨਿਰੰਤਰਤਾ 'ਤੇ ਸਵਾਲ ਉੱਠੇ ਤਾਂ ਗਲੋਬਲ ਨਿਵੇਸ਼ਕ ਸੁਚੇਤ ਹੋ ਸਕਦੇ ਹਨ, ਜਿਸ ਨਾਲ ਪੂੰਜੀ ਦਾ ਪ੍ਰਵਾਹ ਘੱਟ ਸਕਦਾ ਹੈ। ਇਸ ਦਾ ਸਿੱਧਾ ਨਤੀਜਾ ਰੁਪਏ ਵਿੱਚ ਗਿਰਾਵਟ, ਆਯਾਤ (ਖਾਸ ਕਰਕੇ ਤੇਲ) ਮਹਿੰਗਾ ਹੋਣਾ ਅਤੇ ਮਹਿੰਗਾਈ ਵਧਣਾ ਹੋ ਸਕਦਾ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਭਾਰਤ ਨੂੰ ਆਪਣੀ ਸੰਸਥਾਗਤ ਵਿਸ਼ਵਸ਼ਨੀਲਤਾ ਅਤੇ ਨੀਤੀਗਤ ਸਥਿਰਤਾ ਬਣਾਈ ਰੱਖਣੀ ਬਹੁਤ ਜ਼ਰੂਰੀ ਹੈ, ਕਿਉਂਕਿ ਇਹੀ ਭਾਰਤ ਦੀ ਆਰਥਿਕ ਤਾਕਤ ਦਾ ਅਧਾਰ ਹੈ। ਉਨ੍ਹਾਂ ਅਨੁਸਾਰ ਬਾਜ਼ਾਰ ਥੋੜ੍ਹੇ ਸਮੇਂ ਦੀਆਂ ਮਾੜੀਆਂ ਖਬਰਾਂ ਨੂੰ ਹਜ਼ਮ ਕਰ ਲੈਂਦੇ ਹਨ, ਪਰ ਲੰਮੀ ਅਨਿਸ਼ਚਿਤਤਾ ਉਨ੍ਹਾਂ ਨੂੰ ਬਹੁਤ ਜ਼ਿਆਦਾ ਕਮਜ਼ੋਰ ਬਣਾ ਸਕਦੀ ਹੈ।
ਮਾਹਿਰਾਂ ਦੀ ਸਲਾਹ ਹੈ ਕਿ ਹੁਣ ਘੱਟ ਕੀਮਤ 'ਤੇ ਸ਼ੇਅਰ ਖਰੀਦਣ ਦੀ ਕੋਈ ਵੀ ਯੋਜਨਾ ਫਿਲਹਾਲ ਰੋਕ ਕੇ ਰੱਖੀ ਜਾਵੇ। ਬਾਜ਼ਾਰ ਵਿੱਚ ਉਤਰਾਅ-ਚੜ੍ਹਾਅ ਦੀ ਸੰਭਾਵਨਾ ਨੂੰ ਦੇਖਦੇ ਹੋਏ ਨਿਵੇਸ਼ਕਾਂ ਨੂੰ ਸੁਚੇਤ ਰਹਿਣ ਦੀ ਸਲਾਹ ਦਿੱਤੀ ਜਾ ਰਹੀ ਹੈ। ਇਸ ਸਮੇਂ ਸੋਨੇ ਨੂੰ ਇੱਕ ਸੁਰੱਖਿਅਤ ਵਿਕਲਪ ਵਜੋਂ ਦੇਖਿਆ ਜਾ ਰਿਹਾ ਹੈ, ਪਰ ਸ਼ੇਅਰ ਬਾਜ਼ਾਰ ਵਿੱਚ ਮੌਕੇ ਵੀ ਲੁਕੇ ਹੋਏ ਹਨ। ਫਿਲਹਾਲ ਨਿਵੇਸ਼ਕਾਂ ਲਈ ਧੀਰਜ ਅਤੇ ਸਮਝਦਾਰੀ ਨਾਲ ਫੈਸਲਾ ਲੈਣਾ ਹੀ ਸਭ ਤੋਂ ਸਹੀ ਰਾਹ ਮੰਨਿਆ ਜਾ ਰਿਹਾ ਹੈ।
