Last Updated :
24 July 2026, 10:16 AM IST
ਵਟਸਐਪ ਆਪਣੇ ਯੂਜ਼ਰਾਂ ਨੂੰ ਇੱਕ ਹੋਰ ਸੁਰੱਖਿਅਤ ਤਜਰਬਾ ਦੇਣ ਲਈ ਆਪਣੇ ਟੂ-ਸਟੈਪ ਵੈਰੀਫਿਕੇਸ਼ਨ ਫੀਚਰ ਨੂੰ ਅੱਪਡੇਟ ਕਰਨ 'ਤੇ ਵਿਚਾਰ ਕਰ ਰਿਹਾ ਹੈ। ਫਿਲਹਾਲ ਇਹ ਫੀਚਰ 6-ਅੰਕਾਂ ਦੇ ਨਿਊਮਰਿਕ PIN 'ਤੇ ਆਧਾਰਿਤ ਹੈ, ਪਰ ਨਵੀਂ ਵਿਵਸਥਾ ਅਧੀਨ ਯੂਜ਼ਰਾਂ ਨੂੰ ਅੱਖਰਾਂ ਅਤੇ ਅੰਕਾਂ ਦੇ ਮਿਸ਼ਰਣ ਵਾਲਾ ਪਾਸਵਰਡ ਸੈੱਟ ਕਰਨ ਦਾ ਵਿਕਲਪ ਦਿੱਤਾ ਜਾ ਸਕਦਾ ਹੈ। WABetaInfo ਦੀ ਰਿਪੋਰਟ ਮੁਤਾਬਕ ਇਹ ਫੀਚਰ ਅਜੇ ਵਿਕਾਸ ਦੇ ਸ਼ੁਰੂਆਤੀ ਪੜਾਅ 'ਤੇ ਹੈ ਅਤੇ ਹਾਲੇ ਬੀਟਾ ਟੈਸਟਿੰਗ ਲਈ ਵੀ ਉਪਲਬਧ ਨਹੀਂ ਹੈ।
ਇਹ ਬਦਲਾਅ ਖਾਸ ਤੌਰ 'ਤੇ ਉਨ੍ਹਾਂ ਲੋਕਾਂ ਲਈ ਲਾਹੇਵੰਦ ਰਹੇਗਾ ਜੋ ਵਟਸਐਪ ਰਾਹੀਂ ਬੈਂਕਿੰਗ, ਪੈਸੇ ਭੇਜਣ ਜਾਂ ਹੋਰ ਵਿੱਤੀ ਕੰਮ ਕਰਦੇ ਹਨ। ਪਾਸਵਰਡ ਵਿੱਚ ਅੱਖਰਾਂ ਅਤੇ ਅੰਕਾਂ ਦਾ ਮਿਸ਼ਰਣ ਹੋਣ ਕਾਰਨ ਇਸ ਨੂੰ ਤੋੜਨਾ ਜ਼ਿਆਦਾ ਮੁਸ਼ਕਲ ਹੋ ਜਾਵੇਗਾ, ਜਿਸ ਨਾਲ ਅਕਾਉਂਟ ਹੈਕਿੰਗ ਜਾਂ ਚੋਰੀ ਦਾ ਖ਼ਤਰਾ ਘੱਟ ਹੋਵੇਗਾ।
ਟੂ-ਸਟੈਪ ਵੈਰੀਫਿਕੇਸ਼ਨ ਹਮੇਸ਼ਾ ਇੱਕ ਵਿਕਲਪਿਕ ਫੀਚਰ ਰਿਹਾ ਹੈ, ਇਸ ਲਈ ਜਿਹੜੇ ਯੂਜ਼ਰ ਇਸ ਨੂੰ ਵਰਤਣਾ ਨਹੀਂ ਚਾਹੁੰਦੇ, ਉਨ੍ਹਾਂ 'ਤੇ ਇਸ ਨਵੇਂ ਬਦਲਾਅ ਦਾ ਕੋਈ ਪ੍ਰਭਾਵ ਨਹੀਂ ਪਵੇਗਾ। ਉਹ ਆਪਣੀ ਮਰਜ਼ੀ ਨਾਲ ਪੁਰਾਣੇ PIN ਸਿਸਟਮ ਜਾਂ ਨਵੇਂ ਪਾਸਵਰਡ ਸਿਸਟਮ ਵਿੱਚੋਂ ਚੋਣ ਕਰ ਸਕਣਗੇ। ਫਿਲਹਾਲ ਕੰਪਨੀ ਨੇ ਇਸ ਫੀਚਰ ਨੂੰ ਲਾਂਚ ਕਰਨ ਬਾਰੇ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਹੈ ਅਤੇ ਇਸਨੂੰ ਲਾਂਚ ਤੋਂ ਪਹਿਲਾਂ ਪੂਰੀ ਤਰ੍ਹਾਂ ਰੱਦ ਜਾਂ ਬਦਲਿਆ ਵੀ ਜਾ ਸਕਦਾ ਹੈ।
ਯੂਜ਼ਰ ਆਪਣੇ ਵਟਸਐਪ ਅਕਾਉਂਟ ਵਿੱਚ ਟੂ-ਸਟੈਪ ਵੈਰੀਫਿਕੇਸ਼ਨ ਸੈਟਿੰਗਾਂ ਨੂੰ ਆਸਾਨੀ ਨਾਲ ਮੈਨੇਜ ਕਰ ਸਕਦੇ ਹਨ। ਇਸ ਲਈ:
• ਵਟਸਐਪ ਖੋਲ੍ਹੋ ਅਤੇ ਸੈਟਿੰਗਾਂ 'ਤੇ ਜਾਓ।
• 'ਅਕਾਉਂਟ' ਵਿਕਲਪ ਚੁਣੋ।
• 'ਟੂ-ਸਟੈਪ ਵੈਰੀਫਿਕੇਸ਼ਨ' 'ਤੇ ਟੈਪ ਕਰੋ।
• ਉੱਥੇ ਤੁਸੀਂ ਇਸ ਫੀਚਰ ਨੂੰ ਚਾਲੂ ਜਾਂ ਬੰਦ ਕਰ ਸਕਦੇ ਹੋ ਅਤੇ PIN ਜਾਂ ਈਮੇਲ ਪਤਾ ਬਦਲ ਸਕਦੇ ਹੋ।
ਇਸ ਤੋਂ ਇਲਾਵਾ, ਵਟਸਐਪ ਕਈ ਹੋਰ ਫੀਚਰਾਂ 'ਤੇ ਵੀ ਕੰਮ ਕਰ ਰਿਹਾ ਹੈ। ਹਾਲ ਹੀ ਵਿੱਚ, ਐਪ ਨੇ ਐਂਡਰਾਇਡ ਅਤੇ iOS ਦੋਵਾਂ ਪਲੇਟਫਾਰਮਾਂ 'ਤੇ 'ਯੂਜ਼ਰਨੇਮ' ਸਪੋਰਟ ਜੋੜਨਾ ਸ਼ੁਰੂ ਕੀਤਾ ਹੈ, ਹਾਲਾਂਕਿ ਇਹ ਫੀਚਰ ਫਿਲਹਾਲ ਸੀਮਤ ਯੂਜ਼ਰਾਂ ਲਈ ਹੀ ਉਪਲਬਧ ਹੈ। ਇਸ ਤੋਂ ਇਲਾਵਾ, iOS ਯੂਜ਼ਰਾਂ ਲਈ ਇੱਕ ਨਵਾਂ ਸ਼ਾਰਟਕੱਟ ਵੀ ਲਿਆਂਦਾ ਗਿਆ ਹੈ, ਜਿਸ ਨਾਲ ਕਾਲਾਂ ਦੌਰਾਨ ਐਪਲ ਦੇ ਮਾਈਕ੍ਰੋਫੋਨ ਮੋਡਾਂ (ਜਿਵੇਂ ਕਿ ਵੌਇਸ ਆਈਸੋਲੇਸ਼ਨ, ਵਾਈਡ ਸਪੈਕਟ੍ਰਮ) ਵਿਚਕਾਰ ਸਵਿਚ ਕਰਨਾ ਪਹਿਲਾਂ ਨਾਲੋਂ ਸੌਖਾ ਹੋ ਗਿਆ ਹੈ।
