ਸ਼ੇਅਰ ਬਾਜ਼ਾਰ ਦੀ ਰਫ਼ਤਾਰ ਨਾਲ 6 ਵੱਡੀਆਂ ਕੰਪਨੀਆਂ ਦੀ ਦੌਲਤ ‘ਚ 74 ਹਜ਼ਾਰ ਕਰੋੜ ਦਾ ਉਛਾਲ

ਪਿਛਲੇ ਹਫ਼ਤੇ ਭਾਰਤੀ ਸ਼ੇਅਰ ਬਾਜ਼ਾਰ ਵਿੱਚ ਕਾਫ਼ੀ ਉਤਾਰ-ਚੜ੍ਹਾਅ ਦੇਖਣ ਨੂੰ ਮਿਲਿਆ, ਪਰ ਇਸਦੇ ਬਾਵਜੂਦ ਨਿਵੇਸ਼ਕਾਂ ਦਾ ਭਰੋਸਾ ਬਣਿਆ ਰਿਹਾ। BSE ਦਾ 30 ਸ਼ੇਅਰਾਂ ਵਾਲਾ ਸੈਂਸੈਕਸ 177 ਅੰਕਾਂ ਤੋਂ ਵੱਧ ਦੀ ਤੇਜ਼ੀ ਨਾਲ ਬੰਦ ਹੋਇਆ। ਮਾਰਕੀਟ ਐਕਸਪਰਟ ਇਸਨੂੰ ਆਉਣ ਵਾਲੇ ਦਿਨਾਂ ਲਈ ਸਕਾਰਾਤਮਕ ਸੰਕੇਤ ਮੰਨ ਰਹੇ ਹਨ।

ਮੁਕੇਸ਼ ਅੰਬਾਨੀ ਦੀ ਕੰਪਨੀ ਰਿਲਾਇੰਸ ਇੰਡਸਟਰੀਜ਼ ਨੇ ਸਭ ਤੋਂ ਵੱਡੀ ਛਾਲ ਮਾਰੀ। ਕੰਪਨੀ ਦੇ ਮਾਰਕੀਟ ਕੈਪ ਵਿੱਚ 24,696 ਕਰੋੜ ਰੁਪਏ ਦਾ ਵਾਧਾ ਹੋਇਆ। ਇਸ ਨਾਲ ਰਿਲਾਇੰਸ ਦੀ ਕੁੱਲ ਵੈਲਿਊ 18.33 ਲੱਖ ਕਰੋੜ ਰੁਪਏ ਤੱਕ ਪਹੁੰਚ ਗਈ। ਨਿਵੇਸ਼ਕਾਂ ਵੱਲੋਂ ਰਿਲਾਇੰਸ ‘ਤੇ ਮਜ਼ਬੂਤ ਭਰੋਸਾ ਦੇਖਣ ਨੂੰ ਮਿਲਿਆ।

ਟੀਸੀਐਸ ਅਤੇ ICICI ਬੈਂਕ ਨੂੰ ਵੀ ਵੱਡਾ ਫਾਇਦਾ

ਦੇਸ਼ ਦੀ ਸਭ ਤੋਂ ਵੱਡੀ IT ਕੰਪਨੀ TCS ਦੇ ਮਾਰਕੀਟ ਕੈਪ ਵਿੱਚ 19,338 ਕਰੋੜ ਰੁਪਏ ਦੀ ਤੇਜ਼ੀ ਆਈ। ਇਸ ਤੋਂ ਬਾਅਦ ਕੰਪਨੀ ਦੀ ਵੈਲਿਊ 8.38 ਲੱਖ ਕਰੋੜ ਰੁਪਏ ਹੋ ਗਈ। ਉੱਥੇ ਹੀ ICICI ਬੈਂਕ ਦੇ ਮਾਰਕੀਟ ਕੈਪ ਵਿੱਚ 14,515 ਕਰੋੜ ਰੁਪਏ ਦਾ ਵਾਧਾ ਦਰਜ ਕੀਤਾ ਗਿਆ ਅਤੇ ਇਸਦੀ ਕੁੱਲ ਕੀਮਤ 9.06 ਲੱਖ ਕਰੋੜ ਰੁਪਏ ਤੱਕ ਪਹੁੰਚ ਗਈ।

LIC ਅਤੇ ਬਜਾਜ ਫਾਇਨੈਂਸ ਵੀ ਰਹੇ ਚਰਚਾ ਵਿੱਚ

ਭਾਰਤੀ ਜੀਵਨ ਬੀਮਾ ਨਿਗਮ (LIC) ਦੇ ਮਾਰਕੀਟ ਕੈਪ ਵਿੱਚ 9,076 ਕਰੋੜ ਰੁਪਏ ਦੀ ਵਾਧਾ ਦਰਜ ਕੀਤਾ ਗਿਆ। ਇਸ ਤੋਂ ਬਾਅਦ LIC ਦੀ ਕੁੱਲ ਵੈਲਿਊ 5.14 ਲੱਖ ਕਰੋੜ ਰੁਪਏ ਹੋ ਗਈ। ਉੱਥੇ ਹੀ ਬਜਾਜ ਫਾਇਨੈਂਸ ਦੇ ਮਾਰਕੀਟ ਕੈਪ ਵਿੱਚ ਵੀ ਕਰੀਬ 3,798 ਕਰੋੜ ਰੁਪਏ ਦਾ ਵਾਧਾ ਹੋਇਆ। Larsen & Toubro ਨੂੰ ਵੀ ਇਸ ਤੇਜ਼ੀ ਦਾ ਫਾਇਦਾ ਮਿਲਿਆ।

ਏਅਰਟੈਲ ਅਤੇ HDFC ਬੈਂਕ ਨੂੰ ਝਟਕਾ

ਜਿੱਥੇ ਕੁਝ ਕੰਪਨੀਆਂ ਨੂੰ ਵੱਡਾ ਫਾਇਦਾ ਹੋਇਆ, ਉੱਥੇ ਕੁਝ ਵੱਡੀਆਂ ਕੰਪਨੀਆਂ ਨੂੰ ਨੁਕਸਾਨ ਵੀ ਝੱਲਣਾ ਪਿਆ। ਭਾਰਤੀ ਏਅਰਟੈਲ ਦੇ ਮਾਰਕੀਟ ਕੈਪ ਵਿੱਚ ਸਭ ਤੋਂ ਵੱਡੀ ਗਿਰਾਵਟ ਦਰਜ ਕੀਤੀ ਗਈ। ਕੰਪਨੀ ਦੀ ਵੈਲਿਊ 20,229 ਕਰੋੜ ਰੁਪਏ ਘੱਟ ਹੋ ਗਈ। ਇਸ ਤੋਂ ਇਲਾਵਾ HDFC ਬੈਂਕ, SBI ਅਤੇ ਹਿੰਦੁਸਤਾਨ ਯੂਨੀਲੀਵਰ ਨੂੰ ਵੀ ਨੁਕਸਾਨ ਹੋਇਆ।

ਰਿਲਾਇੰਸ ਬਣੀ ਦੇਸ਼ ਦੀ ਸਭ ਤੋਂ ਕੀਮਤੀ ਕੰਪਨੀ

ਦੇਸ਼ ਦੀਆਂ ਸਭ ਤੋਂ ਕੀਮਤੀ ਕੰਪਨੀਆਂ ਦੀ ਸੂਚੀ ਵਿੱਚ ਰਿਲਾਇੰਸ ਇੰਡਸਟਰੀਜ਼ ਪਹਿਲੇ ਨੰਬਰ ‘ਤੇ ਕਾਇਮ ਰਹੀ। ਇਸ ਤੋਂ ਬਾਅਦ HDFC ਬੈਂਕ, ਭਾਰਤੀ ਏਅਰਟੈਲ, ICICI ਬੈਂਕ ਅਤੇ SBI ਦਾ ਸਥਾਨ ਰਿਹਾ। TCS, ਬਜਾਜ ਫਾਇਨੈਂਸ, L&T, ਹਿੰਦੁਸਤਾਨ ਯੂਨੀਲੀਵਰ ਅਤੇ LIC ਵੀ ਟਾਪ-10 ਕੰਪਨੀਆਂ ਵਿੱਚ ਸ਼ਾਮਲ ਰਹੀਆਂ।

ਨਿਵੇਸ਼ਕਾਂ ਲਈ ਸਕਾਰਾਤਮਕ ਸੰਕੇਤ

ਮਾਰਕੀਟ ਮਾਹਿਰਾਂ ਦਾ ਕਹਿਣਾ ਹੈ ਕਿ ਗਲੋਬਲ ਤਣਾਅ ਦੇ ਬਾਵਜੂਦ ਭਾਰਤੀ ਬਾਜ਼ਾਰ ਦੀ ਮਜ਼ਬੂਤੀ ਨਿਵੇਸ਼ਕਾਂ ਲਈ ਚੰਗਾ ਸੰਕੇਤ ਹੈ। ਜੇ ਆਉਣ ਵਾਲੇ ਦਿਨਾਂ ਵਿੱਚ ਅੰਤਰਰਾਸ਼ਟਰੀ ਹਾਲਾਤ ਸਥਿਰ ਰਹੇ ਤਾਂ ਸ਼ੇਅਰ ਬਾਜ਼ਾਰ ਵਿੱਚ ਹੋਰ ਤੇਜ਼ੀ ਦੇਖਣ ਨੂੰ ਮਿਲ ਸਕਦੀ ਹੈ।