Last Updated :
29 July 2026, 11:44 AM IST
ਕੈਨੇਡਾ ਦੇ ਚੈਸਟਰਮੇਅਰ ਵਿੱਚ ਇੱਕ 18 ਸਾਲਾ ਪੰਜਾਬੀ ਨੌਜਵਾਨ ਸਾਹਿਲ ਗਰੇਵਾਲ ਦੀ ਰਹੱਸਮਈ ਮੌਤ ਨੂੰ ਲੈ ਕੇ ਪੰਜ ਸਾਲਾਂ ਤੋਂ ਚੱਲ ਰਹੀ ਜਾਂਚ ਦਾ ਅੰਤ ਹੋ ਗਿਆ ਹੈ। ਅਲਬਰਟਾ RCMP ਨੇ ਇਸ ਮਾਮਲੇ ਵਿੱਚ ਵੱਡਾ ਖੁਲਾਸਾ ਕਰਦੇ ਹੋਏ ਤਿੰਨ ਪੰਜਾਬੀ ਨੌਜਵਾਨਾਂ ਖਿਲਾਫ਼ ਫਰਸਟ-ਡਿਗਰੀ ਮਰਡਰ ਅਤੇ ਹੱਤਿਆ ਦੀ ਕੋਸ਼ਿਸ਼ ਦੀਆਂ ਗੰਭੀਰ ਧਾਰਾਵਾਂ ਦਰਜ ਕੀਤੀਆਂ ਹਨ। ਪੁਲਿਸ ਜਾਂਚ ਮੁਤਾਬਕ, ਸਾਹਿਲ ਨੂੰ ਕਫ਼ ਸੀਰਪ ਵਿੱਚ ਜਾਨਲੇਵਾ ਫੈਂਟਾਨਿਲ ਮਿਲਾ ਕੇ ਪਿਲਾਇਆ ਗਿਆ ਸੀ। ਇਹ ਜ਼ਹਿਰੀਲਾ ਮਿਸ਼ਰਣ ਅਸਲ ਵਿੱਚ ਕਿਸੇ ਹੋਰ ਨੌਜਵਾਨ ਨੂੰ ਖਤਮ ਕਰਨ ਲਈ ਤਿਆਰ ਕੀਤਾ ਗਿਆ ਸੀ, ਪਰ ਬਦਕਿਸਮਤੀ ਨਾਲ ਸਾਹਿਲ ਇਸਦਾ ਸ਼ਿਕਾਰ ਬਣ ਗਿਆ। ਆਓ ਜਾਣਦੇ ਹਾਂ ਇਸ ਦੁਖਦ ਘਟਨਾ ਦੀ ਪੂਰੀ ਕਹਾਣੀ।
ਇਹ ਘਟਨਾ 3 ਅਪ੍ਰੈਲ 2020 ਨੂੰ ਵਾਪਰੀ, ਜਦੋਂ ਸਾਹਿਲ ਨੇ ਗਲਤੀ ਨਾਲ ਫੈਂਟਾਨਿਲ ਮਿਲਿਆ ਹੋਇਆ ਕਫ਼ ਸੀਰਪ ਪੀ ਲਿਆ। ਇਸ ਤੋਂ ਤੁਰੰਤ ਬਾਅਦ ਉਸਦੀ ਤਬੀਅਤ ਬਹੁਤ ਵਿਗੜ ਗਈ ਅਤੇ ਉਸਨੂੰ ਹਸਪਤਾਲ ਲਿਜਾਇਆ ਗਿਆ। ਤਿੰਨ ਦਿਨਾਂ ਤੱਕ ਡਾਕਟਰਾਂ ਨੇ ਉਸਦੀ ਜਾਨ ਬਚਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ, ਪਰ 6 ਅਪ੍ਰੈਲ 2020 ਨੂੰ ਉਸਨੇ ਆਖ਼ਰੀ ਸਾਹ ਲਿਆ। ਇਸ ਮਾਸੂਮ ਦੀ ਮੌਤ ਨੇ ਨਾ ਸਿਰਫ਼ ਉਸਦੇ ਪਰਿਵਾਰ ਨੂੰ, ਸਗੋਂ ਪੂਰੇ ਖੇਤਰ ਦੇ ਪੰਜਾਬੀ ਭਾਈਚਾਰੇ ਨੂੰ ਡੂੰਘਾ ਸਦਮਾ ਦਿੱਤਾ ਸੀ। ਲੋਕ ਇਸ ਰਹੱਸਮਈ ਮੌਤ ਦਾ ਕਾਰਨ ਜਾਣਨ ਲਈ ਬੇਤਾਬ ਸਨ।
ਅਲਬਰਟਾ RCMP ਦੀ ਮੇਜਰ ਕ੍ਰਾਈਮ ਯੂਨਿਟ ਨੇ ਇਸ ਮਾਮਲੇ ਨੂੰ ਸਿਰਫ਼ ਇੱਕ ਹਾਦਸਾ ਨਾ ਮੰਨਦੇ ਹੋਏ ਡੂੰਘੀ ਜਾਂਚ ਸ਼ੁਰੂ ਕੀਤੀ। ਪੁਲਿਸ ਨੂੰ ਸ਼ੱਕ ਸੀ ਕਿ ਇਸ ਘਟਨਾ ਦੇ ਪਿੱਛੇ ਕੋਈ ਯੋਜਨਾਬੱਧ ਸਾਜ਼ਿਸ਼ ਹੈ। ਲਗਭਗ ਪੰਜ ਸਾਲਾਂ ਤੱਕ ਚੱਲੀ ਇਸ ਗੁੰਝਲਦਾਰ ਜਾਂਚ ਵਿੱਚ ਪੁਲਿਸ ਨੂੰ ਕਈ ਅਹਿਮ ਸੁਰਾਗ ਮਿਲੇ। ਜੁਲਾਈ 2025 ਵਿੱਚ ਪੁਲਿਸ ਨੇ ਮਾਮਲੇ ਦੇ ਮੁੱਖ ਮੁਲਜ਼ਮ ਮੋਹਿਤ ਸੰਧੂ (24 ਸਾਲ) ਨੂੰ ਗ੍ਰਿਫਤਾਰ ਕੀਤਾ ਅਤੇ ਉਸ 'ਤੇ ਹੱਤਿਆ ਅਤੇ ਹੱਤਿਆ ਦੀ ਕੋਸ਼ਿਸ਼ ਦੇ ਦੋਸ਼ ਲਾਏ। ਜਾਂਚ ਵਿੱਚ ਇਹ ਗੱਲ ਸਾਹਮਣੇ ਆਈ ਕਿ ਮੋਹਿਤ ਨੇ ਹੀ ਇਹ ਜ਼ਹਿਰੀਲਾ ਪਦਾਰਥ ਮੁਹੱਈਆ ਕਰਵਾਇਆ ਸੀ।
ਪੁਲਿਸ ਜਾਂਚ ਵਿੱਚ ਸਭ ਤੋਂ ਚੌਂਕਾਉਣੇ ਖੁਲਾਸਿਆਂ ਵਿੱਚੋਂ ਇੱਕ ਇਹ ਸੀ ਕਿ ਇਹ ਜ਼ਹਿਰੀਲਾ ਮਿਸ਼ਰਣ ਅਸਲ ਵਿੱਚ ਕੈਲਗਰੀ ਦੇ 25-ਸਾਲਾ ਜਸਕਰਨ ਸਿੱਧੂ ਨੂੰ ਖਤਮ ਕਰਨ ਲਈ ਤਿਆਰ ਕੀਤਾ ਗਿਆ ਸੀ। ਹਾਲਾਂਕਿ, ਕਿਸਮਤ ਨੇ ਜਸਕਰਨ ਦਾ ਸਾਥ ਦਿੱਤਾ ਅਤੇ ਉਸਨੇ ਉਸ ਜ਼ਹਿਰੀਲੇ ਪਦਾਰਥ ਨੂੰ ਨਾ ਤਾਂ ਛੋਹਿਆ ਅਤੇ ਨਾ ਹੀ ਪੀਤਾ। ਪਰ ਬਦਕਿਸਮਤੀ ਨਾਲ, ਉਹੀ ਮਿਸ਼ਰਣ ਸਾਹਿਲ ਦੇ ਹੱਥ ਲੱਗ ਗਿਆ ਅਤੇ ਉਸਨੂੰ ਪਤਾ ਨਾ ਲੱਗ ਸਕਿਆ ਕਿ ਇਹ ਕਿੰਨਾ ਖ਼ਤਰਨਾਕ ਹੈ। ਇਸ ਘਾਤਕ ਗਲਤੀ ਨੇ ਉਸਦੀ ਜਾਨ ਲੈ ਲਈ, ਜਦੋਂ ਕਿ ਅਸਲ ਨਿਸ਼ਾਨਾ ਸੁਰੱਖਿਅਤ ਰਿਹਾ।
ਜਾਂਚ ਨੂੰ ਹੋਰ ਅੱਗੇ ਵਧਾਉਂਦੇ ਹੋਏ, ਜੁਲਾਈ 2026 ਵਿੱਚ RCMP ਨੇ ਇਸ ਮਾਮਲੇ ਵਿੱਚ ਦੋ ਹੋਰ ਨੌਜਵਾਨਾਂ ਨੂੰ ਹਿਰਾਸਤ ਵਿੱਚ ਲਿਆ। 22 ਜੁਲਾਈ ਨੂੰ ਐਡਮੌਨਟਨ ਦੇ 24-ਸਾਲਾ ਹਰਮਨਜੋਤ ਚੰਬੜ ਨੂੰ ਗ੍ਰਿਫਤਾਰ ਕੀਤਾ ਗਿਆ, ਉਸ ਤੋਂ ਦੋ ਦਿਨ ਬਾਅਦ 24 ਜੁਲਾਈ ਨੂੰ ਰੌਕੀ ਵਿਊ ਕਾਉਂਟੀ ਦੇ 33-ਸਾਲਾ ਦਲਵੀਰ ਸਿੱਧੂ ਨੂੰ ਵੀ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਇਨ੍ਹਾਂ ਦੋਵਾਂ ਮੁਲਜ਼ਮਾਂ ਖਿਲਾਫ਼ ਵੀ ਫਰਸਟ-ਡਿਗਰੀ ਮਰਡਰ ਅਤੇ ਹੱਤਿਆ ਦੀ ਕੋਸ਼ਿਸ਼ ਦੀਆਂ ਧਾਰਾਵਾਂ ਤਹਿਤ ਮਾਮਲੇ ਦਰਜ ਕੀਤੇ ਗਏ ਹਨ। RCMP ਅਨੁਸਾਰ, ਹੁਣ ਇਨ੍ਹਾਂ ਤਿੰਨਾਂ ਮੁਲਜ਼ਮਾਂ ਵਿਰੁੱਧ ਅਦਾਲਤੀ ਕਾਰਵਾਈ ਸ਼ੁਰੂ ਕੀਤੀ ਜਾਵੇਗੀ, ਜਿੱਥੇ ਸਾਰੇ ਪੁਰਾਵਿਆਂ ਅਤੇ ਗਵਾਹਾਂ ਦੇ ਆਧਾਰ 'ਤੇ ਨਿਆਂਇਕ ਜਾਂਚ ਕੀਤੀ ਜਾਵੇਗੀ।
