Last Updated :
19 February 2025, 02:20 PM IST
Courtesy: ਸਕਾਰਪਿਓ ਦੀ ਰਫ਼ਤਾਰ ਇੰਨੀ ਤੇਜ਼ ਸੀ ਕਿ ਗੱਡੀ ਚਕਨਾਚੂਰ ਹੋ ਗਈ
ਝਾਰਖੰਡ ਦੇ ਗਿਰੀਡੀਹ ਇਲਾਕੇ 'ਚ 2 ਵੱਖ ਵੱਖ ਭਿਆਨਕ ਸੜਕ ਹਾਦਸਿਆਂ ਨੇ 8 ਜਣਿਆਂ ਦੀ ਜਾਨ ਲੈ ਲਈ। ਇੱਕ ਵਿਅਕਤੀ ਜਖ਼ਮੀ ਵੀ ਹੋਇਆ। ਜਿਸਦਾ ਇਲਾਜ ਹਜ਼ਾਰੀਬਾਗ ਸਦਰ ਹਸਪਤਾਲ ਵਿਖੇ ਚੱਲ ਰਿਹਾ ਹੈ। ਇਹ ਦੋਵੇਂ ਹਾਦਸੇ ਦੇਰ ਰਾਤ ਵਾਪਰੇ। ਪਹਿਲਾ ਹਾਦਸਾ ਜ਼ਿਲ੍ਹੇ ਦੇ ਮਧੂਬਨ ਥਾਣਾ ਖੇਤਰ ਸਥਿਤ ਪੁਲਿਸ ਚੌਕੀ ਨੇੜੇ ਵਾਪਰਿਆ। ਮੋਟਰਸਾਈਕਲ ਅਤੇ ਸਕਾਰਪੀਓ ਦੀ ਟੱਕਰ 'ਚ 6 ਲੋਕਾਂ ਦੀ ਮੌਤ ਹੋ ਗਈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਉਲਟ ਦਿਸ਼ਾ ਤੋਂ ਆ ਰਹੇ ਮੋਟਰਸਾਈਕਲ ਸਵਾਰ ਨੂੰ ਬਚਾਉਣ ਦੀ ਕੋਸ਼ਿਸ਼ ਦੌਰਾਨ ਸਕਾਰਪੀਓ ਚਾਲਕ ਆਪਣਾ ਸੰਤੁਲਨ ਗੁਆ ਬੈਠਾ ਅਤੇ ਬਾਈਕ ਸਵਾਰ ਦੋ ਨੌਜਵਾਨਾਂ ਨੂੰ ਟੱਕਰ ਮਾਰਨ ਤੋਂ ਬਾਅਦ ਸਕਾਰਪਿਓ ਦਰੱਖ਼ਤ ਨਾਲ ਜਾ ਟਕਰਾਈ। ਸਕਾਰਪੀਓ ਦੀ ਤੇਜ਼ ਰਫਤਾਰ ਕਾਰਨ ਸਕਾਰਪੀਓ ਅਤੇ ਬਾਈਕ ਦੋਵੇਂ ਹੀ ਹਵਾ ਵਿੱਚ ਉਡ ਗਏ ਅਤੇ ਸਾਰਿਆਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਮੋਟਰਸਾਈਕਲ ਸਵਾਰ ਦੋਵੇਂ ਨੌਜਵਾਨਾਂ ਤੇ ਸਕਾਰਪਿਓ ਸਵਾਰ 4 ਜਣਿਆਂ ਦੀ ਮੌਤ ਹੋਈ।
ਘਟਨਾ ਦੀ ਸੂਚਨਾ ਮਿਲਦੇ ਹੀ ਪੁਲਿਸ ਨੇ ਮੌਕੇ 'ਤੇ ਪਹੁੰਚ ਕੇ ਲਾਸ਼ਾਂ ਨੂੰ ਕਬਜ਼ੇ 'ਚ ਲੈ ਕੇ ਪੋਸਟਮਾਰਟਮ ਲਈ ਗਿਰੀਡੀਹ ਭੇਜ ਦਿੱਤਾ। ਦੂਜਾ ਹਾਦਸਾ ਗਿਰੀਡੀਹ ਦੇ ਬਗੋਦਰ ਦਾ ਹੈ। ਇਹ ਹਾਦਸਾ ਅਟਕਾ-ਮੁੰਦਰੋ ਰੋਡ 'ਤੇ ਸਥਿਤ ਬਿਹਾਰ ਨੇੜੇ ਵਾਪਰਿਆ। ਇਸ ਵਿੱਚ ਬਾਈਕ ਸਵਾਰ ਦੋ ਵਿਅਕਤੀਆਂ ਦੀ ਮੌਤ ਹੋ ਗਈ। ਜਦਕਿ ਇੱਕ ਦਾ ਹਜ਼ਾਰੀਬਾਗ ਸਦਰ ਹਸਪਤਾਲ ਵਿਖੇ ਇਲਾਜ ਚੱਲ ਰਿਹਾ ਹੈ। ਇਸ ਸਬੰਧੀ ਸਥਾਨਕ ਲੋਕਾਂ ਨੇ ਦੱਸਿਆ ਕਿ ਬੀਤੀ ਰਾਤ 12 ਵਜੇ ਤਿੰਨ ਨੌਜਵਾਨ ਬਾਈਕ 'ਤੇ ਬਿਹਾਰ ਦੇ ਮੁੰਦਰੋ ਤੋਂ ਆਪਣੇ ਘਰ ਆ ਰਹੇ ਸਨ। ਰਸਤੇ 'ਚ ਹਾਦਸੇ ਦਾ ਸ਼ਿਕਾਰ ਹੋ ਗਏ।
