Last Updated :
21 July 2026, 08:51 AM IST
ਅਮਰੀਕਾ ਵੱਲੋਂ ਈਰਾਨ ਖ਼ਿਲਾਫ਼ ਫੌਜੀ ਕਾਰਵਾਈ ਥੰਮ੍ਹ ਨਹੀਂ ਰਹੀ ਹੈ। ਮੰਗਲਵਾਰ ਰਾਤ ਨੂੰ ਅਮਰੀਕੀ ਸੈਂਟਰਲ ਕਮਾਂਡ (ਸੈਂਟਕਾਮ) ਨੇ ਈਰਾਨ ਦੇ ਦੱਖਣੀ ਸ਼ਹਿਰਾਂ ਸੀਰਿਕ, ਬੰਦਰ ਅੱਬਾਸ, ਕੇਸ਼ਮ ਟਾਪੂ, ਚਾਬਹਾਰ ਅਤੇ ਕੋਨਾਰਕ ਵਿੱਚ ਤਬਾਹਕੁੰਨ ਹਮਲੇ ਕੀਤੇ। ਈਰਾਨੀ ਮੀਡੀਆ ਨੇ ਇਨ੍ਹਾਂ ਇਲਾਕਿਆਂ ਵਿੱਚ ਵੱਡੇ ਧਮਾਕਿਆਂ ਦੀ ਖਬਰ ਦਿੱਤੀ ਹੈ, ਜਦਕਿ ਅਮਰੀਕੀ ਕਮਾਂਡ ਦਾ ਕਹਿਣਾ ਹੈ ਕਿ ਇਸ ਅਭਿਆਨ ਵਿੱਚ ਈਰਾਨ ਦੇ ਫੌਜੀ ਕਮਾਂਡ ਸੈਂਟਰਾਂ, ਮਿਜ਼ਾਈਲ ਲਾਂਚਰਾਂ, ਡਰੋਨ ਠਿਕਾਣਿਆਂ ਅਤੇ ਹਵਾਈ ਰੱਖਿਆ ਪ੍ਰਣਾਲੀਆਂ ਨੂੰ ਨਿਸ਼ਾਨਾ ਬਣਾਇਆ ਗਿਆ।
ਜਿੱਥੇ ਇੱਕ ਪਾਸੇ ਅਮਰੀਕਾ ਆਪਣੀਆਂ ਹਵਾਈ ਕਾਰਵਾਈਆਂ ਜਾਰੀ ਰੱਖ ਰਿਹਾ ਹੈ, ਉੱਥੇ ਈਰਾਨ ਵੀ ਪਿੱਛੇ ਹਟਣ ਲਈ ਤਿਆਰ ਨਹੀਂ ਦਿਖਾਈ ਦੇ ਰਿਹਾ। ਈਰਾਨੀ ਰੈਵੋਲਿਊਸ਼ਨਰੀ ਗਾਰਡ (IRGC) ਨੇ ਦਾਅਵਾ ਕੀਤਾ ਹੈ ਕਿ ਉਸਨੇ ਕੁਵੈਤ ਦੇ ਅਹਿਮਦ ਅਲ-ਜਾਬੇਰ ਏਅਰ ਬੇਸ 'ਤੇ ਤਾਇਨਾਤ ਅਮਰੀਕੀ ਰਾਡਾਰ ਅਤੇ ਮਿਜ਼ਾਈਲ ਰੱਖਿਆ ਪ੍ਰਣਾਲੀਆਂ ਨੂੰ ਆਪਣੇ ਹਮਲਿਆਂ ਦਾ ਨਿਸ਼ਾਨਾ ਬਣਾਇਆ। IRGC ਮੁਤਾਬਕ ਇਸ ਹਮਲੇ ਵਿੱਚ ਅਰਲੀ ਵਾਰਨਿੰਗ ਰਾਡਾਰ, FPS-117 ਰਾਡਾਰ, ਪੈਟਰੀਅਟ ਏਅਰ ਡਿਫੈਂਸ ਅਤੇ ਸੈਟੇਲਾਈਟ ਕਮਿਊਨੀਕੇਸ਼ਨ ਸਿਸਟਮ ਨੂੰ ਨਸ਼ਟ ਕਰ ਦਿੱਤਾ ਗਿਆ। ਹਾਲਾਂਕਿ, ਇਨ੍ਹਾਂ ਦਾਅਵਿਆਂ ਦੀ ਸੁਤੰਤਰ ਤੌਰ 'ਤੇ ਪੁਸ਼ਟੀ ਨਹੀਂ ਹੋ ਸਕੀ ਹੈ।
ਇਸ ਤੋਂ ਇਲਾਵਾ, ਈਰਾਨੀ ਫੌਜ ਨੇ ਆਪਣੇ ਆਪਰੇਸ਼ਨ 'ਸਾਏਕੇਹ' ਦੇ 18ਵੇਂ ਪੜਾਅ ਅਧੀਨ ਕੁਵੈਤ ਦੇ ਕੈਂਪ ਅਰੀਫਜਾਨ ਵਿੱਚ ਅਮਰੀਕੀ HIMARS ਆਰਟਿਲਰੀ ਸਿਸਟਮ 'ਤੇ ਸਤ੍ਹਾ-ਤੋਂ-ਸਤ੍ਹਾ ਮਿਜ਼ਾਈਲਾਂ ਨਾਲ ਹਮਲਾ ਕਰਨ ਦਾ ਵੀ ਦਾਅਵਾ ਕੀਤਾ ਹੈ। ਈਰਾਨ ਦਾ ਕਹਿਣਾ ਹੈ ਕਿ ਇਸ ਹਮਲੇ ਨਾਲ ਅਮਰੀਕੀ ਫੌਜ ਦੀ ਹਮਲਾਵਰ ਅਤੇ ਬਚਾਅ ਸਮਰੱਥਾ ਨੂੰ ਵੱਡਾ ਝਟਕਾ ਲੱਗਾ ਹੈ।
ਖੇਤਰੀ ਹਾਲਾਤਾਂ ਨੂੰ ਹੋਰ ਵੀ ਗੁੰਝਲਦਾਰ ਬਣਾਉਂਦਿਆਂ, ਯਮਨ ਦੇ ਈਰਾਨ ਸਮਰਥਿਤ ਹੂਤੀ ਬਗਾਵੀਆਂ ਨੇ ਸਾਊਦੀ ਅਰਬ ਖ਼ਿਲਾਫ਼ ਬਾਬ-ਅਲ-ਮੰਡੇਬ ਜਲਡਮਰੂਮ ਵਿੱਚ ਸਮੁੰਦਰੀ ਨਾਕਾਬੰਦੀ ਦਾ ਐਲਾਨ ਕਰ ਦਿੱਤਾ ਹੈ। ਇਹ ਰਣਨੀਤਕ ਜਲਮਾਰਗ ਲਾਲ ਸਾਗਰ ਦਾ ਮੁੱਖ ਪ੍ਰਵੇਸ਼ ਦੁਆਰ ਹੈ, ਜਿੱਥੋਂ ਵਿਸ਼ਵ ਦੇ ਲਗਭਗ 10% ਸਮੁੰਦਰੀ ਵਪਾਰ ਦੀ ਆਵਾਜਾਈ ਹੁੰਦੀ ਹੈ। ਹੂਤੀਆਂ ਨੇ ਸਪੱਸ਼ਟ ਕੀਤਾ ਕਿ ਸਾਊਦੀ ਜਹਾਜ਼ਾਂ ਨੂੰ ਇਸ ਰਾਹੀਂ ਗੁਜ਼ਰਨ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ ਅਤੇ ਸਾਰੇ ਸਾਊਦੀ ਸਮੁੰਦਰੀ ਜਹਾਜ਼ ਉਨ੍ਹਾਂ ਦੇ ਨਿਸ਼ਾਨੇ 'ਤੇ ਰਹਿਣਗੇ।
ਈਰਾਨ ਦੇ ਅੰਦਰ ਵੀ ਫੌਜੀ ਚੌਕਸੀ ਵਧਾ ਦਿੱਤੀ ਗਈ ਹੈ। ਦੱਖਣ-ਪੱਛਮੀ ਸ਼ਹਿਰ ਸ਼ਿਰਾਜ਼ ਵਿੱਚ ਸੋਮਵਾਰ ਦੇਰ ਰਾਤ ਵੱਡੇ ਧਮਾਕਿਆਂ ਦੀਆਂ ਆਵਾਜ਼ਾਂ ਸੁਣਾਈ ਦਿੱਤੀਆਂ, ਜਦਕਿ ਬੁਸ਼ਹਰ ਵਿੱਚ ਈਰਾਨ ਦੇ ਮੁੱਖ ਪ੍ਰਮਾਣੂ ਪਲਾਂਟ ਦੀ ਸੁਰੱਖਿਆ ਨੂੰ ਵੇਖਦਿਆਂ ਹਵਾਈ ਰੱਖਿਆ ਪ੍ਰਣਾਲੀ ਨੂੰ ਪੂਰੀ ਤਰ੍ਹਾਂ ਸਰਗਰਮ ਕਰ ਦਿੱਤਾ ਗਿਆ ਹੈ। ਖੇਤਰ ਵਿੱਚ ਵਧਦੇ ਫੌਜੀ ਤਣਾਅ ਕਾਰਨ ਅੰਤਰਰਾਸ਼ਟਰੀ ਭਾਈਚਾਰੇ ਵਿੱਚ ਚਿੰਤਾ ਵਧ ਗਈ ਹੈ ਅਤੇ ਕਈ ਦੇਸ਼ਾਂ ਨੇ ਆਪਣੇ ਨਾਗਰਿਕਾਂ ਨੂੰ ਇਸ ਖੇਤਰ ਤੋਂ ਬਾਹਰ ਨਿਕਲਣ ਦੀ ਸਲਾਹ ਦਿੱਤੀ ਹੈ।
