Last Updated :
03 June 2025, 04:34 PM IST
Chenab railway bridge, 35 meters higher than Eiffel Tower : ਜੰਮੂ-ਕਸ਼ਮੀਰ ਵਿੱਚ ਬਣੇ ਦੁਨੀਆ ਦਾ ਸਭ ਤੋਂ ਉੱਚੇ ਚਨਾਬ ਰੇਲਵੇ ਪੁਲ ਦਾ ਤਿੰਨ ਦਿਨਾਂ ਵਿੱਚ ਉਦਘਾਟਨ ਹੋਣ ਜਾ ਰਿਹਾ ਹੈ। ਇਹ ਊਧਮਪੁਰ-ਸ਼੍ਰੀਨਗਰ-ਬਾਰਾਮੂਲਾ ਰੇਲਵੇ ਲਿੰਕ ਪ੍ਰੋਜੈਕਟ ਦਾ ਇੱਕ ਮਹੱਤਵਪੂਰਨ ਹਿੱਸਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ 6 ਜੂਨ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ USBRL ਪ੍ਰੋਜੈਕਟ ਦਾ ਉਦਘਾਟਨ ਕਰ ਸਕਦੇ ਹਨ। ਇਸ ਦੇ ਨਾਲ ਹੀ ਕਟੜਾ ਤੋਂ ਸ਼੍ਰੀਨਗਰ ਲਈ ਦੋ ਵੰਦੇ ਭਾਰਤ ਸਪੈਸ਼ਲ ਟ੍ਰੇਨਾਂ ਨੂੰ ਹਰੀ ਝੰਡੀ ਦਿਖਾਈ ਜਾਵੇਗੀ। ਇਸ ਤੋਂ ਇਲਾਵਾ, ਚਨਾਬ ਪੁਲ ਅਤੇ ਅੰਜੀ ਖਾੜ ਪੁਲ ਦਾ ਵੀ ਉਦਘਾਟਨ ਕੀਤਾ ਜਾਵੇਗਾ। ਕੇਂਦਰੀ ਮੰਤਰੀ ਡਾ. ਜਿਤੇਂਦਰ ਸਿੰਘ ਨੇ ਇੱਕ ਸੋਸ਼ਲ ਮੀਡੀਆ ਪੋਸਟ ਵਿੱਚ ਕਿਹਾ, "ਇਤਿਹਾਸ ਰਚਣ ਜਾ ਰਿਹਾ ਹੈ... ਸਿਰਫ਼ 3 ਦਿਨ ਬਾਕੀ ਹਨ! ਦੁਨੀਆ ਦਾ ਸਭ ਤੋਂ ਉੱਚਾ ਰੇਲਵੇ ਪੁਲ, ਚਨਾਬ ਪੁਲ, ਜੰਮੂ-ਕਸ਼ਮੀਰ ਵਿੱਚ ਮਾਣ ਨਾਲ ਖੜ੍ਹਾ ਹੈ।" ਡਾ. ਸਿੰਘ ਦੇ ਅਨੁਸਾਰ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 6 ਜੂਨ, 2025 ਨੂੰ ਇਸ ਵਿਸ਼ਾਲ ਚਨਾਬ ਪੁਲ ਦਾ ਉਦਘਾਟਨ ਕਰਨਗੇ। ਉਨ੍ਹਾਂ ਕਿਹਾ ਕਿ ਇਹ ਪੁਲ 'ਨਵੇਂ ਭਾਰਤ' ਦੀ ਤਾਕਤ ਅਤੇ ਦ੍ਰਿਸ਼ਟੀ ਦਾ ਮਾਣਮੱਤਾ ਪ੍ਰਤੀਕ ਹੈ।
ਜੰਮੂ-ਕਸ਼ਮੀਰ ਦੇ ਰਿਆਸੀ ਜ਼ਿਲ੍ਹੇ ਵਿੱਚ ਚਨਾਬ ਨਦੀ 'ਤੇ ਬਣਿਆ ਦੁਨੀਆ ਦਾ ਸਭ ਤੋਂ ਉੱਚਾ ਰੇਲਵੇ ਪੁਲ, ਚਨਾਬ ਪੁਲ, ਭਾਰਤੀ ਇੰਜੀਨੀਅਰਿੰਗ ਹੁਨਰ ਅਤੇ ਤਕਨਾਲੋਜੀ ਦੀ ਇੱਕ ਸ਼ਾਨਦਾਰ ਉਦਾਹਰਣ ਹੈ। 359 ਮੀਟਰ ਦੀ ਉਚਾਈ 'ਤੇ ਸਥਿਤ, ਆਰਚ ਤਕਨਾਲੋਜੀ 'ਤੇ ਆਧਾਰਿਤ ਇਹ ਪੁਲ ਆਈਫਲ ਟਾਵਰ ਤੋਂ ਲਗਭਗ 35 ਮੀਟਰ ਉੱਚਾ ਹੈ ਅਤੇ ਆਪਣੀ ਸੁੰਦਰਤਾ ਲਈ ਵੀ ਬੇਮਿਸਾਲ ਹੈ।
1486 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣੇ ਇਸ ਪੁਲ ਦੇ ਨਿਰਮਾਣ ਨੂੰ 2003 ਵਿੱਚ ਤਤਕਾਲੀ ਅਟਲ ਬਿਹਾਰੀ ਵਾਜਪਾਈ ਸਰਕਾਰ ਨੇ ਮਨਜ਼ੂਰੀ ਦਿੱਤੀ ਸੀ। ਹਾਲਾਂਕਿ, ਇਸਨੂੰ ਬਣਾਉਣ ਵਿੱਚ 22 ਸਾਲਾਂ ਦਾ ਲੰਮਾ ਸਮਾਂ ਲੱਗਿਆ, ਪਰ ਹੁਣ ਇਸਦੇ ਪੂਰਾ ਹੋਣ ਨਾਲ, ਕਸ਼ਮੀਰ ਘਾਟੀ ਸਿੱਧੇ ਤੌਰ 'ਤੇ ਦੇਸ਼ ਦੇ ਬਾਕੀ ਹਿੱਸਿਆਂ ਨਾਲ ਰੇਲ ਰਾਹੀਂ ਜੁੜ ਜਾਵੇਗੀ। 1315 ਮੀਟਰ ਲੰਬੇ ਇਸ ਪੁਲ ਦੀ ਸਭ ਤੋਂ ਵੱਡੀ ਵਿਸ਼ੇਸ਼ਤਾ ਇਹ ਹੈ ਕਿ ਇਸਦੇ ਨਿਰਮਾਣ ਵਿੱਚ ਨਾ ਤਾਂ ਨਦੀ ਨਾਲ ਛੇੜਛਾੜ ਕੀਤੀ ਗਈ ਹੈ ਅਤੇ ਨਾ ਹੀ ਇਸ ਵਿੱਚ ਕੋਈ ਥੰਮ੍ਹ ਖੜ੍ਹਾ ਕੀਤਾ ਗਿਆ ਹੈ। ਨਦੀ ਦੇ ਦੋਵੇਂ ਪਾਸੇ ਆਰਚ ਤਕਨਾਲੋਜੀ ਦੀ ਵਰਤੋਂ ਕੀਤੀ ਗਈ ਹੈ। ਸਟੀਲ ਅਤੇ ਕੰਕਰੀਟ ਤੋਂ ਬਣੇ ਇਸ ਪੁਲ ਵਿੱਚ 29 ਹਜ਼ਾਰ ਮੀਟ੍ਰਿਕ ਟਨ ਸਟੀਲ ਦੀ ਵਰਤੋਂ ਕੀਤੀ ਗਈ ਹੈ। ਇਸ ਵਿੱਚ 17 ਸਪੈਨ ਹਨ ਅਤੇ ਛੇ ਲੱਖ ਤੋਂ ਵੱਧ ਬੋਲਟ ਲਗਾਏ ਗਏ ਹਨ।
ਚਨਾਬ ਰੇਲਵੇ ਪੁਲ ਦੀ ਅਨੁਮਾਨਿਤ ਉਮਰ ਲਗਭਗ 125 ਸਾਲ ਹੈ। ਇਸਨੂੰ ਤੇਜ਼ ਤੂਫਾਨਾਂ, ਭੂਚਾਲਾਂ ਅਤੇ 30 ਕਿਲੋਗ੍ਰਾਮ ਵਿਸਫੋਟਕਾਂ ਦਾ ਸਾਹਮਣਾ ਕਰਨ ਲਈ ਤਿਆਰ ਕੀਤਾ ਗਿਆ ਹੈ। ਇਸ ਪੁਲ 'ਤੇ ਰੇਲ ਗੱਡੀਆਂ 100 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਚੱਲ ਸਕਣਗੀਆਂ।
