Last Updated :
20 June 2026, 01:13 PM IST
Courtesy: pinterest
ਨਵੀਂ ਦਿੱਲੀ: ਯੋਗ, ਜੋ ਹਜ਼ਾਰਾਂ ਸਾਲ ਪਹਿਲਾਂ ਭਾਰਤ ਦੀ ਧਰਤੀ ਤੋਂ ਸ਼ੁਰੂ ਹੋਇਆ ਸੀ, ਅੱਜ ਦੁਨੀਆ ਭਰ ਵਿੱਚ ਸਿਹਤਮੰਦ ਜੀਵਨ ਸ਼ੈਲੀ ਦਾ ਅਹਿਮ ਹਿੱਸਾ ਬਣ ਚੁੱਕਾ ਹੈ। ਸਰੀਰਕ ਤੰਦਰੁਸਤੀ, ਮਾਨਸਿਕ ਸ਼ਾਂਤੀ ਅਤੇ ਭਾਵਨਾਤਮਕ ਸੰਤੁਲਨ ਲਈ ਯੋਗ ਨੂੰ ਸਭ ਤੋਂ ਪ੍ਰਭਾਵਸ਼ਾਲੀ ਵਿਧੀਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ। ਹਰ ਸਾਲ 21 ਜੂਨ ਨੂੰ ਮਨਾਇਆ ਜਾਣ ਵਾਲਾ ਅੰਤਰਰਾਸ਼ਟਰੀ ਯੋਗ ਦਿਵਸ ਦੀ ਇਸ ਵਾਰ ਥੀਮ ‘ਯੋਗਾ ਫਾਰ ਹੈਲਥੀ ਏਜਿੰਗ’ (ਸਿਹਤਮੰਦ ਬੁਢਾਪੇ ਲਈ ਯੋਗ) ਰੱਖੀ ਗਈ ਹੈ। ਇਸ ਦਾ ਮਕਸਦ ਇਹ ਦਰਸਾਉਣਾ ਹੈ ਕਿ ਯੋਗ ਹਰ ਉਮਰ ਦੇ ਲੋਕਾਂ ਲਈ ਲਾਭਦਾਇਕ ਹੈ ਅਤੇ ਖ਼ਾਸ ਤੌਰ 'ਤੇ ਵਧਦੀ ਉਮਰ ਵਿੱਚ ਸਰੀਰਕ ਤਾਕਤ, ਲਚਕਤਾ, ਮਾਨਸਿਕ ਸਪਸ਼ਟਤਾ ਅਤੇ ਭਾਵਨਾਤਮਕ ਸੰਤੁਲਨ ਬਣਾਈ ਰੱਖਣ ਵਿੱਚ ਮਦਦਗਾਰ ਹੈ।
ਇਸ ਸਾਲ ਦਾ ਮੁੱਖ ਰਾਸ਼ਟਰੀ ਯੋਗ ਦਿਵਸ ਸਮਾਗਮ ਪੱਛਮੀ ਬੰਗਾਲ ਦੀ ਰਾਜਧਾਨੀ ਕੋਲਕਾਤਾ ਦੇ ਬ੍ਰਿਗੇਡ ਗਰਾਊਂਡ ਵਿੱਚ ਆਯੋਜਿਤ ਕੀਤਾ ਜਾਵੇਗਾ। ਸਵੇਰੇ 6 ਵਜੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਇਸ ਸਮਾਗਮ ਦੀ ਅਗਵਾਈ ਕਰਨਗੇ। ਹਜ਼ਾਰਾਂ ਲੋਕ ਇੱਕੋ ਸਮੇਂ ਯੋਗ ਅਭਿਆਸ ਕਰਦੇ ਹੋਏ ਯੋਗ ਦੀ ਵਿਸ਼ਵਵਿਆਪੀ ਮਹੱਤਤਾ ਦਾ ਸੰਦੇਸ਼ ਦੇਣਗੇ।
ਦੇਸ਼ ਭਰ ਵਿੱਚ ਇੱਕੋ ਸਮੇਂ ਯੋਗ ਅਭਿਆਸ
ਭਾਰਤ ਦੇ ਵੱਖ-ਵੱਖ ਸ਼ਹਿਰਾਂ ਵਿੱਚ ਸਵੇਰੇ 7 ਵਜੇ ਤੋਂ 7:45 ਵਜੇ ਤੱਕ ਕਾਮਨ ਯੋਗਾ ਪ੍ਰੋਟੋਕੋਲ (CYP) ਅਨੁਸਾਰ ਸਮੂਹਿਕ ਯੋਗ ਸੈਸ਼ਨ ਕਰਵਾਏ ਜਾਣਗੇ। ਇਸ ਦੌਰਾਨ ਆਸਨ, ਪ੍ਰਾਣਾਯਾਮ ਅਤੇ ਧਿਆਨ ਦੀਆਂ ਵਿਧੀਆਂ ਦਾ ਅਭਿਆਸ ਕੀਤਾ ਜਾਵੇਗਾ।
ਇਤਿਹਾਸਕ ਧਰੋਹਰ ਸਥਾਨਾਂ 'ਤੇ ਵੀ ਯੋਗ ਸਮਾਗਮ
ਸੱਭਿਆਚਾਰ ਮੰਤਰਾਲੇ ਵੱਲੋਂ ਦੇਸ਼ ਦੇ 12 ਪ੍ਰਸਿੱਧ ਇਤਿਹਾਸਕ ਅਤੇ ਸੱਭਿਆਚਾਰਕ ਸਥਾਨਾਂ 'ਤੇ ਵਿਸ਼ੇਸ਼ ਯੋਗ ਪ੍ਰੋਗਰਾਮ ਕਰਵਾਏ ਜਾਣਗੇ। ਇਨ੍ਹਾਂ ਵਿੱਚ ਸ਼ਾਮਲ ਹਨ:
ਦਿੱਲੀ ਦਾ ਲਾਲ ਕਿਲਾ
ਹਰਿਦੁਆਰ ਦੀ ਹਰ ਕੀ ਪੌੜੀ
ਓਡੀਸ਼ਾ ਦਾ ਕੋਣਾਰਕ ਸੂਰਜ ਮੰਦਰ
ਕਰਨਾਟਕ ਦਾ ਹੰਪੀ ਸਮਾਰਕ ਸਮੂਹ
ਲੱਦਾਖ ਦਾ ਲੇਹ ਪੈਲੇਸ
ਮਹਾਬਲੀਪੁਰਮ ਦਾ ਸ਼ੋਰ ਟੈਂਪਲ
ਉੱਤਰ ਪ੍ਰਦੇਸ਼ ਦਾ ਸਾਰਨਾਥ
ਅਸਾਮ ਦਾ ਕਾਂਚਾਰੀ ਕਿਲਾ
ਹੈਦਰਾਬਾਦ ਦਾ ਚਾਰਮਿਨਾਰ ਇਲਾਕਾ
ਮੁੰਬਈ ਦਾ ਗੇਟਵੇ ਆਫ ਇੰਡੀਆ
ਬਿਹਾਰ ਦਾ ਨਾਲੰਦਾ ਮਹਾਵਿਹਾਰ
ਅਹਿਮਦਾਬਾਦ ਦਾ ਸਾਬਰਮਤੀ ਰਿਵਰਫਰੰਟ
ਇਨ੍ਹਾਂ ਸਮਾਗਮਾਂ ਰਾਹੀਂ ਭਾਰਤ ਦੀ ਸੱਭਿਆਚਾਰਕ ਵਿਰਾਸਤ ਅਤੇ ਯੋਗ ਪਰੰਪਰਾ ਨੂੰ ਇੱਕ ਮੰਚ 'ਤੇ ਪੇਸ਼ ਕੀਤਾ ਜਾਵੇਗਾ।
ਨਵੀਂ ਦਿੱਲੀ ਵਿੱਚ ਵਿਸ਼ਾਲ ਯੋਗ ਸਮਾਗਮ
ਰਾਸ਼ਟਰੀ ਰਾਜਧਾਨੀ ਨਵੀਂ ਦਿੱਲੀ ਵਿੱਚ ਜਵਾਹਰਲਾਲ ਨਹਿਰੂ (JLN) ਸਟੇਡੀਅਮ ਵਿੱਚ ਸਵੇਰੇ 6:15 ਵਜੇ ਵਿਸ਼ਾਲ ਯੋਗ ਸਮਾਗਮ ਕਰਵਾਇਆ ਜਾਵੇਗਾ। ਇਸ ਵਿੱਚ ਹਰ ਉਮਰ ਵਰਗ ਦੇ ਲੋਕ ਹਿੱਸਾ ਲੈਣਗੇ ਅਤੇ ਯੋਗ ਨੂੰ ਆਪਣੀ ਰੋਜ਼ਾਨਾ ਜ਼ਿੰਦਗੀ ਦਾ ਹਿੱਸਾ ਬਣਾਉਣ ਦਾ ਸੰਦੇਸ਼ ਦਿੱਤਾ ਜਾਵੇਗਾ।
