ਨੇਪਾਲ ਹੜ੍ਹ ਤਬਾਹੀ : ਬਾਲੇਨ ਸਰਕਾਰ ਨੇ ਵਿਦੇਸ਼ੀ ਮਦਦ ਲਈ ਵਧਾਇਆ ਹੱਥ, ਤ੍ਰਿਸ਼ੂਲੀ 'ਚ ਬਚਾਅ ਕੰਮ ਠੱਪ

ਤ੍ਰਿਸ਼ੂਲੀ ਨਦੀ ਖੇਤਰ ਵਿੱਚ ਮੌਸਮ ਦੀ ਵਿਗੜਦੀ ਸਥਿਤੀ ਕਾਰਨ ਰਾਹਤ ਅਤੇ ਬਚਾਅ ਕੰਮ ਨੂੰ ਅਸਥਾਈ ਤੌਰ 'ਤੇ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਭਾਰੀ ਵਰਖਾ ਅਤੇ ਤੇਜ਼ ਹਵਾਵਾਂ ਕਾਰਨ ਹੈਲੀਕਾਪਟਰ ਉਡਾਣਾਂ ਸੰਭਵ ਨਹੀਂ ਹੋ ਰਹੀਆਂ, ਜਿਸ ਨਾਲ ਪ੍ਰਭਾਵਿਤ ਇਲਾਕਿਆਂ ਤੱਕ ਪਹੁੰਚਣਾ ਔਖਾ ਹੋ ਗਿਆ ਹੈ।

ਨੇਪਾਲ ਵਿੱਚ ਅਚਾਨਕ ਆਈ ਭਾਰੀ ਤਬਾਹੀ ਮਚਾਉਣ ਵਾਲੀ ਹੜ੍ਹ ਕਾਰਨ ਹੁਣ ਤੱਕ 579 ਤੋਂ ਵੱਧ ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ। ਲਗਪਗ 1900 ਲੋਕ ਅਜੇ ਵੀ ਲਾਪਤਾ ਹਨ, ਜਿਨ੍ਹਾਂ ਵਿੱਚ ਕਰੀਬ 30 ਵੱਖ-ਵੱਖ ਦੇਸ਼ਾਂ ਦੇ ਨਾਗਰਿਕ ਸ਼ਾਮਲ ਹਨ। ਭਾਰਤੀ ਸੈਲਾਨੀਆਂ ਨੇ ਖੁਦ ਨੂੰ ਸੁਰੱਖਿਅਤ ਵਾਪਸ ਪਹੁੰਚਦੇ ਵੇਖ ਕੇ ਤਾਂ ਰਾਹਤ ਦਾ ਸਾਹ ਲਿਆ, ਪਰ ਉਨ੍ਹਾਂ ਦੁਆਰਾ ਸਾਂਝੇ ਕੀਤੇ ਹੜ੍ਹ ਦੇ ਦ੍ਰਿਸ਼ ਭਿਆਨਕਤਾ ਨਾਲ ਭਰਪੂਰ ਹਨ। ਤ੍ਰਿਸ਼ੂਲੀ ਨਦੀ ਖੇਤਰ ਵਿੱਚ ਮੌਸਮ ਦੀ ਵਿਗੜਦੀ ਸਥਿਤੀ ਕਾਰਨ ਰਾਹਤ ਅਤੇ ਬਚਾਅ ਕੰਮ ਨੂੰ ਅਸਥਾਈ ਤੌਰ 'ਤੇ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਭਾਰੀ ਵਰਖਾ ਅਤੇ ਤੇਜ਼ ਹਵਾਵਾਂ ਕਾਰਨ ਹੈਲੀਕਾਪਟਰ ਉਡਾਣਾਂ ਸੰਭਵ ਨਹੀਂ ਹੋ ਰਹੀਆਂ, ਜਿਸ ਨਾਲ ਪ੍ਰਭਾਵਿਤ ਇਲਾਕਿਆਂ ਤੱਕ ਪਹੁੰਚਣਾ ਔਖਾ ਹੋ ਗਿਆ ਹੈ। ਨਦੀ ਦਾ ਪਾਣੀ ਲਗਾਤਾਰ ਚੜ੍ਹ ਰਿਹਾ ਹੈ, ਜਿਸ ਕਾਰਨ ਖ਼ਤਰੇ ਵਾਲੇ ਇਲਾਕਿਆਂ ਤੋਂ ਲੋਕਾਂ ਨੂੰ ਪਹਿਲਾਂ ਹੀ ਸੁਰੱਖਿਅਤ ਥਾਵਾਂ 'ਤੇ ਭੇਜ ਦਿੱਤਾ ਗਿਆ ਹੈ।

ਅੰਤਰਰਾਸ਼ਟਰੀ ਮਦਦ ਲਈ ਬਾਲੇਨ ਸਰਕਾਰ ਦਾ ਫੈਸਲਾ

ਨੇਪਾਲ ਸਰਕਾਰ ਨੇ ਆਪਣੇ ਰਵੱਈਏ ਵਿੱਚ ਤਬਦੀਲੀ ਕਰਦਿਆਂ ਹੜ੍ਹ ਰਾਹਤ ਕਾਰਜਾਂ ਵਿੱਚ ਵਿਦੇਸ਼ੀ ਮਦਦ ਸਵੀਕਾਰ ਕਰਨ ਦਾ ਫੈਸਲਾ ਕੀਤਾ ਹੈ। ਲਾਪਤਾ ਨਾਗਰਿਕਾਂ ਵਾਲੇ ਦੇਸ਼ਾਂ ਵੱਲੋਂ ਪਾਏ ਗਏ ਦਬਾਅ ਦੇ ਚਲਦਿਆਂ ਸਰਕਾਰ ਨੂੰ ਪਹਿਲਾਂ ਦੇ ਇਨਕਾਰੀ ਫੈਸਲੇ ਤੋਂ ਪਿੱਛੇ ਹਟਣਾ ਪਿਆ। ਅਧਿਕਾਰੀਆਂ ਅਨੁਸਾਰ ਹੁਣ ਫਸੀਆਂ ਸੁਰੰਗਾਂ ਵਿੱਚ ਬਚਾਅ ਕਾਰਜ ਅਤੇ ਮ੍ਰਿਤਕਾਂ ਦੀ ਪਛਾਣ ਕਰਨ ਲਈ ਅੰਤਰਰਾਸ਼ਟਰੀ ਮਾਹਿਰਾਂ ਦੀ ਸੇਵਾ ਲਈ ਜਾਵੇਗੀ। ਇਸ ਤੋਂ ਇਲਾਵਾ ਭੋਟੇਕੋਸ਼ੀ ਹੜ੍ਹ ਦੀ ਰਿਪੋਰਟਿੰਗ ਕਰਨ ਵਾਲੇ ਵਿਦੇਸ਼ੀ ਪੱਤਰਕਾਰਾਂ ਲਈ ਵੀ ਨਵੇਂ ਦਿਸ਼ਾ-ਨਿਰਦੇਸ਼ ਜਾਰੀ ਕਰ ਦਿੱਤੇ ਗਏ ਹਨ, ਜਿਨ੍ਹਾਂ ਨੂੰ ਆਪਣੇ ਪਾਸਪੋਰਟ, ਵੀਜ਼ਾ, ਸੰਸਥਾਗਤ ਪਛਾਣ-ਪੱਤਰ ਅਤੇ ਵਿੱਤੀ ਵੇਰਵੇ ਜਮ੍ਹਾਂ ਕਰਵਾਉਣੇ ਹੋਣਗੇ।

ਵਿਸ਼ਵ ਸਿਹਤ ਸੰਗਠਨ ਦੀ ਮਦਦ ਵਿੱਚ ਵਾਧਾ

ਵਿਸ਼ਵ ਸਿਹਤ ਸੰਗਠਨ ਨੇ ਨੇਪਾਲ ਹੜ੍ਹ ਰਾਹਤ ਲਈ ਆਪਣੀ ਸਹਾਇਤਾ ਵਧਾਈ ਹੈ ਅਤੇ 150,000 ਅਮਰੀਕੀ ਡਾਲਰ ਦੀ ਤੁਰੰਤ ਰਾਸ਼ੀ ਜਾਰੀ ਕੀਤੀ ਗਈ ਹੈ। ਸਥਿਤੀ ਦੇ ਮੁਲਾਂਕਣ ਜਾਰੀ ਰਹਿਣ ਨਾਲ ਹੋਰ ਵੀ ਸਹਾਇਤਾ ਦੇਣ ਦੀ ਸੰਭਾਵਨਾ ਹੈ। ਸੰਗਠਨ ਦੇ ਮੁਖੀ ਡਾ. ਟੇਡਰੋਸ ਨੇ ਸੋਸ਼ਲ ਮੀਡੀਆ 'ਤੇ ਦੱਸਿਆ ਕਿ ਆਫ਼ਤ ਤੋਂ ਕੁਝ ਘੰਟਿਆਂ ਵਿੱਚ ਹੀ ਐਮਰਜੈਂਸੀ ਸਪਲਾਈ ਭੇਜ ਦਿੱਤੀ ਗਈ ਸੀ, ਜਿਸ ਵਿੱਚ 10,000 ਲੋਕਾਂ ਲਈ ਤਿੰਨ ਮਹੀਨਿਆਂ ਦੀ ਦਵਾਈ ਅਤੇ ਸਮੱਗਰੀ, ਟੈਂਟ, 10,000 ਮਾਸਕ, ਦਸਤਾਨੇ ਅਤੇ ਸੈਨੀਟਾਈਜ਼ਰ ਸ਼ਾਮਲ ਸਨ।

ਪੱਛਮੀ ਬੰਗਾਲ ਦੇ ਲਾਪਤਾ ਸੈਲਾਨੀਆਂ ਵਿੱਚੋਂ ਦੋ ਨਾਲ ਸੰਪਰਕ

ਨੇਪਾਲ ਹੜ੍ਹ ਵਿੱਚ ਲਾਪਤਾ ਪੱਛਮੀ ਬੰਗਾਲ ਦੇ 39 ਸੈਲਾਨੀਆਂ ਵਿੱਚੋਂ ਹੁਣ ਦੋ ਨਾਲ ਸੰਪਰਕ ਹੋ ਗਿਆ ਹੈ, ਜਦੋਂ ਕਿ 37 ਅਜੇ ਵੀ ਲਾਪਤਾ ਹਨ। ਮੁੱਖ ਮੰਤਰੀ ਸੁਵੇਂਦੁ ਅਧਿਕਾਰੀ ਨੇ ਸ਼ੁੱਕਰਵਾਰ ਰਾਤ ਇਹ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਸੰਪਰਕ ਵਿੱਚ ਆਏ ਦੋਵੇਂ ਉੱਤਰ 24 ਪਰਗਨਾ ਦੇ ਬਸ਼ੀਰਹਾਟ ਇਲਾਕੇ ਦੇ ਰਹਿਣ ਵਾਲੇ ਹਨ।
ਮੁੱਖ ਮੰਤਰੀ ਨੇ ਉਸੇ ਰਾਤ ਲਾਪਤਾ ਸੈਲਾਨੀਆਂ ਦੇ ਪਰਿਵਾਰਾਂ ਨਾਲ ਵਰਚੁਅਲ ਮੀਟਿੰਗ ਕੀਤੀ, ਜੋ ਕੋਲਕਾਤਾ ਸਥਿਤ ਪੁਲਿਸ ਮੁੱਖ ਦਫ਼ਤਰ ਭਵਾਨੀ ਭਵਨ ਵਿੱਚ ਆਯੋਜਿਤ ਕੀਤੀ ਗਈ ਸੀ। ਮੀਟਿੰਗ ਮਗਰੋਂ ਉਨ੍ਹਾਂ ਕਿਹਾ ਕਿ ਇਹ ਸਿਰਫ਼ ਉਨ੍ਹਾਂ ਪਰਿਵਾਰਾਂ ਦਾ ਸੰਕਟ ਨਹੀਂ ਜਿਨ੍ਹਾਂ ਦੇ ਆਪਣੇ ਲਾਪਤਾ ਹਨ, ਸਗੋਂ ਪੂਰਾ ਸੂਬਾ ਉਨ੍ਹਾਂ ਦੀ ਚਿੰਤਾ ਵਿੱਚ ਸ਼ਾਮਲ ਹੈ ਅਤੇ ਹਰ ਸੰਭਵ ਉਪਾਅ ਕੀਤਾ ਜਾ ਰਿਹਾ ਹੈ।

ਭਾਰਤ ਵੱਲੋਂ ਰਾਹਤ ਸਮੱਗਰੀ ਲੈ ਕੇ ਹੋਰ ਜਹਾਜ਼ ਰਵਾਨਾ

ਨੇਪਾਲ ਵਿੱਚ ਮਾਨਵੀ ਸਹਾਇਤਾ ਅਤੇ ਆਫ਼ਤ ਰਾਹਤ ਕਾਰਜ ਜਾਰੀ ਹਨ। ਭਾਰਤੀ ਹਵਾਈ ਸੈਨਾ ਨੇ ਇੱਕ ਹੋਰ ਸੀ-130 ਜਹਾਜ਼ 10 ਟਨ ਦਵਾਈਆਂ ਅਤੇ ਖੁਰਾਕੀ ਸਮੱਗਰੀ ਨਾਲ ਭਰ ਕੇ ਨੇਪਾਲ ਰਵਾਨਾ ਕੀਤਾ ਹੈ। ਇਹ ਸਹਾਇਤਾ ਹੜ੍ਹ ਪ੍ਰਭਾਵਿਤ ਖੇਤਰਾਂ ਵਿੱਚ ਫਸੇ ਲੋਕਾਂ ਦੀਆਂ ਤੁਰੰਤ ਲੋੜਾਂ ਨੂੰ ਪੂਰਾ ਕਰਨ ਲਈ ਭੇਜੀ ਗਈ ਹੈ।