Last Updated :
26 March 2025, 09:48 AM IST
Cyber fraud : ਸਾਈਬਰ ਧੋਖਾਧੜੀ ਕਰਨ ਵਾਲਿਆਂ ਨੇ ਹੁਣ ਇੱਕ ਨਵਾਂ ਤਰੀਕਾ ਅਪਣਾਇਆ ਹੈ। ਸਾਈਬਰ ਧੋਖੇਬਾਜ਼ਾਂ ਨੇ ਜੋਤਸ਼ੀਆਂ ਦੇ ਰੂਪ ਵਿੱਚ ਪੇਸ਼ ਆ ਕੇ ਮੁੰਬਈ ਦੇ ਇੱਕ ਸਾਫਟਵੇਅਰ ਇੰਜੀਨੀਅਰ ਨਾਲ 12.50 ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ। ਠੱਗਾਂ ਨੇ ਉਸਦੀਆਂ ਕਮਜ਼ੋਰੀਆਂ ਦਾ ਫਾਇਦਾ ਉਠਾਇਆ ਅਤੇ ਧੋਖਾਧੜੀ ਕੀਤੀ। ਸ਼ਿਕਾਇਤ ਤੋਂ ਬਾਅਦ ਪੁਲਿਸ ਨੇ ਐੱਫਆਈਆਰ ਦਰਜ ਕਰ ਲਈ ਹੈ।
ਬੀਕੇਸੀ ਇਲਾਕੇ ਦੇ ਰਹਿਣ ਵਾਲੇ ਸਾਫਟਵੇਅਰ ਇੰਜੀਨੀਅਰ ਨੇ ਡਿਵਾਈਨਟਾਕ ਨਾਮਕ ਇੱਕ ਜੋਤਿਸ਼ ਐਪ ਡਾਊਨਲੋਡ ਕੀਤਾ ਸੀ। ਪੀੜਤ ਨੇ ਕਿਹਾ ਕਿ ਜਨਵਰੀ ਵਿੱਚ, ਉਸਨੇ ਐਪ ਰਾਹੀਂ ਨਿਸ਼ਾਂਤ ਨਾਲ ਗੱਲ ਕੀਤੀ, ਜੋ ਕਿ ਇੱਕ ਅਧਿਆਤਮਿਕ ਮਾਰਗਦਰਸ਼ਕ ਵਜੋਂ ਪੇਸ਼ ਆਉਂਦਾ ਸੀ। ਨਿਸ਼ਾਂਤ ਨੇ ਉਸਦੀ ਜ਼ਿੰਦਗੀ ਵਿੱਚ ਸਭ ਕੁਝ ਠੀਕ ਕਰਨ ਲਈ 6,300 ਰੁਪਏ ਮੰਗੇ । ਇੱਕ ਹਫ਼ਤੇ ਸੋਚਣ ਤੋਂ ਬਾਅਦ, ਪੀੜਤ ਨੇ ਦੁਬਾਰਾ ਨਿਸ਼ਾਂਤ ਨਾਲ ਸੰਪਰਕ ਕੀਤਾ, ਜਿਸਨੇ ਉਸਨੂੰ ਦੱਸਿਆ ਕਿ ਵੱਡੇ ਮਹਾਰਾਜ ਅੱਗੇ ਦੀ ਰਸਮ ਕਰਨਗੇ।
ਨਿਸ਼ਾਂਤ ਨੇ ਪੀੜਤ ਅਤੇ ਵੱਡੇ ਮਹਾਰਾਜ ਵਿਚਕਾਰ ਵੀਡੀਓ ਕਾਨਫਰੰਸਿੰਗ ਰਾਹੀਂ ਗੱਲਬਾਤ ਦਾ ਪ੍ਰਬੰਧ ਕੀਤਾ। ਇਸ ਤੋਂ ਬਾਅਦ ਧੋਖੇਬਾਜ਼ਾਂ ਨੇ ਆਪਣਾ ਅਸਲੀ ਰੰਗ ਦਿਖਾਉਣਾ ਸ਼ੁਰੂ ਕਰ ਦਿੱਤਾ। ਵੱਡੇ ਮਹਾਰਾਜ ਨੇ ਰਸਮ ਸ਼ੁਰੂ ਕਰਨ ਲਈ 15,300 ਰੁਪਏ ਮੰਗੇ ਅਤੇ ਫਿਰ ਵੱਖ-ਵੱਖ ਬਹਾਨਿਆਂ ਨਾਲ 28,000 ਰੁਪਏ ਹੋਰ ਮੰਗੇ ਗਏ, ਜੋ ਪੀੜਤ ਨੇ ਇਲੈਕਟ੍ਰਾਨਿਕ ਤੌਰ 'ਤੇ ਅਦਾ ਕੀਤੇ। ਜਦੋਂ ਪੀੜਤ ਨੇ ਰਸਮਾਂ ਦਾ ਸਬੂਤ ਮੰਗਿਆ ਤਾਂ ਵੱਡੇ ਮਹਾਰਾਜ ਨੇ ਰਾਤ ਨੂੰ ਉਸਨੂੰ ਫ਼ੋਨ ਕੀਤਾ ਅਤੇ 20,000 ਰੁਪਏ ਹੋਰ ਮੰਗੇ, ਇਹ ਕਹਿੰਦੇ ਹੋਏ ਕਿ ਅਧੂਰੀਆਂ ਰਸਮਾਂ ਉਸ ਲਈ ਨੁਕਸਾਨਦੇਹ ਹੋ ਸਕਦੀਆਂ ਹਨ। ਡਰ ਦੇ ਮਾਰੇ ਪੀੜਤ ਨੇ 2.41 ਲੱਖ ਰੁਪਏ ਤੱਕ ਦੇ ਦਿੱਤੇ।
ਧੋਖੇਬਾਜ਼ਾਂ ਨੇ ਉਸਨੂੰ ਹੋਰ ਡਰਾਇਆ ਅਤੇ ਕੁੱਲ 12.50 ਲੱਖ ਰੁਪਏ ਤੋਂ ਵੱਧ ਦੀ ਠੱਗੀ ਮਾਰੀ। ਇਸ ਲਈ ਉਸਨੇ ਕ੍ਰੈਡਿਟ ਕਾਰਡ ਅਤੇ ਨਿੱਜੀ ਸ਼ਾਹੂਕਾਰਾਂ ਤੋਂ ਕਰਜ਼ਾ ਲਿਆ। ਪੀੜਤ ਨੇ ਸੋਮਵਾਰ ਨੂੰ ਸਾਈਬਰ ਪੁਲਿਸ ਸਟੇਸ਼ਨ ਵਿੱਚ ਸ਼ਿਕਾਇਤ ਦਰਜ ਕਰਵਾਈ। ਇਸ ਤੋਂ ਬਾਅਦ ਪੁਲਿਸ ਨੇ ਬੀਐਨਐਸ ਅਤੇ ਸੂਚਨਾ ਤਕਨਾਲੋਜੀ ਐਕਟ ਦੀਆਂ ਧਾਰਾਵਾਂ ਤਹਿਤ ਐਫਆਈਆਰ ਦਰਜ ਕੀਤੀ।
