Last Updated :
16 May 2026, 06:07 PM IST
ਡੋਨਾਲਡ ਟਰੰਪ ਵੱਡੀਆਂ ਉਮੀਦਾਂ ਨਾਲ ਚੀਨ ਪਹੁੰਚੇ ਸਨ। ਉਮੀਦ ਕੀਤੀ ਜਾ ਰਹੀ ਸੀ ਕਿ ਦੋਵਾਂ ਦੇਸ਼ਾਂ ਵਿਚਕਾਰ ਵਪਾਰ, ਸਾਈਬਰ ਸੁਰੱਖਿਆ ਅਤੇ ਤਾਇਵਾਨ ਵਰਗੇ ਮੁੱਦਿਆਂ ‘ਤੇ ਕੋਈ ਵੱਡੀ ਸਹਿਮਤੀ ਬਣ ਸਕਦੀ ਹੈ। ਪਰ ਦੌਰੇ ਦੇ ਅੰਤ ਤੱਕ ਨਾ ਕੋਈ ਵੱਡਾ ਸਮਝੌਤਾ ਹੋਇਆ ਅਤੇ ਨਾ ਹੀ ਕੋਈ ਵੱਡੀ ਕੂਟਨੀਤਿਕ ਕਾਮਯਾਬੀ ਮਿਲੀ। ਸਭ ਤੋਂ ਵੱਧ ਚਰਚਾ ਇਸ ਗੱਲ ਦੀ ਹੋਈ ਕਿ ਟਰੰਪ ਦੀ ਟੀਮ ਚੀਨ ਤੋਂ ਮਿਲੀ ਕੋਈ ਵੀ ਚੀਜ਼ ਆਪਣੇ ਨਾਲ ਨਹੀਂ ਲੈ ਕੇ ਗਈ।
15 ਮਈ ਨੂੰ ਜਦੋਂ ਟਰੰਪ ਆਪਣੀ ਟੀਮ ਨਾਲ ਅਮਰੀਕਾ ਵਾਪਸ ਜਾਣ ਲਈ ‘ਏਅਰ ਫੋਰਸ ਵਨ’ ਵੱਲ ਵਧ ਰਹੇ ਸਨ, ਤਾਂ ਜਹਾਜ਼ ਦੀਆਂ ਸੀੜੀਆਂ ਕੋਲ ਇੱਕ ਵੱਡਾ ਡਸਟਬਿਨ ਰੱਖਿਆ ਗਿਆ ਸੀ। ਰਿਪੋਰਟਾਂ ਮੁਤਾਬਕ ਵਾਈਟ ਹਾਊਸ ਸਟਾਫ, ਸੁਰੱਖਿਆ ਅਧਿਕਾਰੀਆਂ ਅਤੇ ਪੱਤਰਕਾਰਾਂ ਨੇ ਚੀਨ ਤੋਂ ਮਿਲੀਆਂ ਹਰ ਚੀਜ਼ ਉਸ ਡਸਟਬਿਨ ਵਿੱਚ ਸੁੱਟ ਦਿੱਤੀ। ਇਸ ਵਿੱਚ ਯਾਦਗਾਰੀ ਤੋਹਫ਼ੇ, ਬੈਜ, ਪ੍ਰੈਸ ਇਨਵਾਈਟ ਅਤੇ ਇਲੈਕਟ੍ਰਾਨਿਕ ਡਿਵਾਈਸ ਵੀ ਸ਼ਾਮਲ ਸਨ।
ਅਮਰੀਕੀ ਸੁਰੱਖਿਆ ਏਜੰਸੀਆਂ ਨੇ ਪਹਿਲਾਂ ਹੀ ਸਪੱਸ਼ਟ ਹੁਕਮ ਦਿੱਤੇ ਹੋਏ ਸਨ ਕਿ ਚੀਨ ਤੋਂ ਮਿਲੀ ਕੋਈ ਵੀ ਚੀਜ਼ ‘ਏਅਰ ਫੋਰਸ ਵਨ’ ਵਿੱਚ ਨਹੀਂ ਲਿਆਂਦੀ ਜਾਵੇਗੀ। ਵਾਈਟ ਹਾਊਸ ਅਤੇ ਸੀਕ੍ਰੇਟ ਸਰਵਿਸ ਨੇ ਇਸ ਨਿਯਮ ਨੂੰ ਬਹੁਤ ਸਖ਼ਤੀ ਨਾਲ ਲਾਗੂ ਕੀਤਾ। ਅਮਰੀਕੀ ਟੀਮ ਨੂੰ ਸ਼ੱਕ ਸੀ ਕਿ ਇਨ੍ਹਾਂ ਚੀਜ਼ਾਂ ਵਿੱਚ ਜਾਸੂਸੀ ਜਾਂ ਟ੍ਰੈਕਿੰਗ ਡਿਵਾਈਸ ਛੁਪੇ ਹੋ ਸਕਦੇ ਹਨ।
ਰਿਪੋਰਟ ਮੁਤਾਬਕ ਅਮਰੀਕੀ ਡੈਲੀਗੇਸ਼ਨ ਨੂੰ ਦਿੱਤੇ ਗਏ ਬਰਨਰ ਫੋਨ ਵੀ ਡਸਟਬਿਨ ਵਿੱਚ ਸੁੱਟ ਦਿੱਤੇ ਗਏ। ਬਰਨਰ ਫੋਨ ਅਜੇਹੇ ਸਸਤੇ ਮੋਬਾਈਲ ਹੁੰਦੇ ਹਨ ਜਿਨ੍ਹਾਂ ਨੂੰ ਕੁਝ ਸਮੇਂ ਲਈ ਵਰਤ ਕੇ ਬਾਅਦ ਵਿੱਚ ਨਸ਼ਟ ਕਰ ਦਿੱਤਾ ਜਾਂਦਾ ਹੈ। ਸੁਰੱਖਿਆ ਏਜੰਸੀਆਂ ਨੂੰ ਡਰ ਸੀ ਕਿ ਇਨ੍ਹਾਂ ਡਿਵਾਈਸਾਂ ਰਾਹੀਂ ਡਾਟਾ ਚੋਰੀ ਜਾਂ ਨਿਗਰਾਨੀ ਕੀਤੀ ਜਾ ਸਕਦੀ ਹੈ।
ਅਮਰੀਕਾ ਲੰਬੇ ਸਮੇਂ ਤੋਂ ਚੀਨ ‘ਤੇ ਸਾਈਬਰ ਜਾਸੂਸੀ ਦੇ ਦੋਸ਼ ਲਗਾਉਂਦਾ ਆ ਰਿਹਾ ਹੈ। ਅਮਰੀਕੀ ਏਜੰਸੀਆਂ ਦਾ ਦਾਅਵਾ ਹੈ ਕਿ ਚੀਨ ਦੁਨੀਆ ਦੇ ਸਭ ਤੋਂ ਵੱਡੇ ਸਾਈਬਰ ਨਿਗਰਾਨੀ ਨੈੱਟਵਰਕਾਂ ਵਿੱਚੋਂ ਇੱਕ ਚਲਾ ਰਿਹਾ ਹੈ। ਕਈ ਵਾਰ ਚੀਨ ‘ਤੇ ਸਰਕਾਰੀ ਸਿਸਟਮ, ਫੌਜੀ ਡਾਟਾ ਅਤੇ ਵਿਦੇਸ਼ੀ ਕੰਪਨੀਆਂ ਦੀ ਜਾਣਕਾਰੀ ਚੋਰੀ ਕਰਨ ਦੇ ਦੋਸ਼ ਵੀ ਲੱਗੇ ਹਨ। ਇਸੇ ਲਈ ਟਰੰਪ ਪ੍ਰਸ਼ਾਸਨ ਇਸ ਦੌਰੇ ਦੌਰਾਨ ਕੋਈ ਵੀ ਖਤਰਾ ਮੋਲ ਨਹੀਂ ਲੈਣਾ ਚਾਹੁੰਦਾ ਸੀ।
‘ਨਿਊਯਾਰਕ ਪੋਸਟ’ ਦੀ ਵਾਈਟ ਹਾਊਸ ਕਰਸਪਾਂਡੈਂਟ ਐਮਿਲੀ ਗੁਡਿਨ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ X ‘ਤੇ ਇਸ ਪੂਰੀ ਘਟਨਾ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਨੇ ਲਿਖਿਆ ਕਿ ‘ਏਅਰ ਫੋਰਸ ਵਨ’ ਵਿੱਚ ਚੜ੍ਹਣ ਤੋਂ ਪਹਿਲਾਂ ਅਮਰੀਕੀ ਸਟਾਫ ਨੇ ਚੀਨ ਤੋਂ ਮਿਲੀ ਹਰ ਚੀਜ਼ ਇਕੱਠੀ ਕੀਤੀ ਅਤੇ ਜਹਾਜ਼ ਹੇਠਾਂ ਰੱਖੇ ਡਸਟਬਿਨ ਵਿੱਚ ਸੁੱਟ ਦਿੱਤੀ। ਉਨ੍ਹਾਂ ਨੇ ਸਪੱਸ਼ਟ ਕਿਹਾ ਕਿ ਚੀਨ ਤੋਂ ਕੁਝ ਵੀ ਜਹਾਜ਼ ਵਿੱਚ ਲਿਜਾਣ ਦੀ ਇਜਾਜ਼ਤ ਨਹੀਂ ਸੀ।
ਵਾਸ਼ਿੰਗਟਨ ਰਵਾਨਾ ਹੋਣ ਤੋਂ ਪਹਿਲਾਂ ਟਰੰਪ ਨੇ ਇੱਕ ਬਿਆਨ ਦੇ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ। ਜਦੋਂ ਪੱਤਰਕਾਰਾਂ ਨੇ ਉਨ੍ਹਾਂ ਤੋਂ ਪੁੱਛਿਆ ਕਿ ਕੀ ਉਨ੍ਹਾਂ ਨੇ ਚੀਨੀ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ ਸਾਈਬਰ ਹਮਲਿਆਂ ਅਤੇ ਜਾਸੂਸੀ ਬਾਰੇ ਗੱਲ ਕੀਤੀ, ਤਾਂ ਟਰੰਪ ਨੇ ਕਿਹਾ ਕਿ ਅਮਰੀਕਾ ਵੀ ਚੀਨ ਦੀ ਜਾਸੂਸੀ ਕਰਦਾ ਹੈ। ਟਰੰਪ ਨੇ ਕਿਹਾ, “ਇਹ ਉਹਨਾਂ ਚੀਜ਼ਾਂ ਵਿੱਚੋਂ ਇੱਕ ਹੈ, ਕਿਉਂਕਿ ਅਸੀਂ ਵੀ ਉਨ੍ਹਾਂ ‘ਤੇ ਕਾਫ਼ੀ ਜਾਸੂਸੀ ਕਰਦੇ ਹਾਂ।”
ਇਸ ਘਟਨਾ ਤੋਂ ਬਾਅਦ ਸੋਸ਼ਲ ਮੀਡੀਆ ‘ਤੇ ਜ਼ਬਰਦਸਤ ਚਰਚਾ ਸ਼ੁਰੂ ਹੋ ਗਈ। ਕੁਝ ਲੋਕਾਂ ਨੇ ਇਸਨੂੰ ਅਮਰੀਕਾ ਦੀ ਸੁਰੱਖਿਆ ਸਾਵਧਾਨੀ ਦੱਸਿਆ, ਜਦਕਿ ਕਈ ਲੋਕਾਂ ਨੇ ਇਸਨੂੰ ਚੀਨ ਦਾ ਜਨਤਕ ਅਪਮਾਨ ਕਰਾਰ ਦਿੱਤਾ। ਕਈ ਜਿਓਪਾਲਿਟਿਕਲ ਐਕਸਪਰਟਸ ਨੇ ਮਜ਼ਾਕੀਆ ਅੰਦਾਜ਼ ਵਿੱਚ ਕਿਹਾ ਕਿ ਸ਼ਾਇਦ ਚੀਨ ਹੀ ਦੁਨੀਆ ਦਾ ਇਕੱਲਾ ਦੇਸ਼ ਹੈ ਜਿੱਥੇ ਟਰੰਪ ਕੋਈ ਤੋਹਫ਼ਾ ਲੈਣ ਤੋਂ ਵੀ ਡਰ ਗਏ।
ਚੀਨ ਨਾਲ ਜੁੜੇ ਜਾਸੂਸੀ ਮਾਮਲਿਆਂ ਨੂੰ ਲੈ ਕੇ ਪਹਿਲਾਂ ਵੀ ਕਈ ਵਿਵਾਦ ਸਾਹਮਣੇ ਆ ਚੁੱਕੇ ਹਨ। 2023 ਵਿੱਚ ਬੀਜਿੰਗ ਸਥਿਤ ਬ੍ਰਿਟਿਸ਼ ਦੂਤਾਵਾਸ ਦੇ ਇੱਕ ਕਰਮਚਾਰੀ ਨੂੰ ਗਿਫ਼ਟ ਵਿੱਚ ਮਿਲੀ ਚਾਹ ਦੀ ਕੇਤਲੀ ਵਿੱਚ ਸੁਣਨ ਵਾਲਾ ਡਿਵਾਈਸ ਮਿਲਣ ਦਾ ਦਾਅਵਾ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਪੱਛਮੀ ਦੇਸ਼ਾਂ ਦੀ ਚਿੰਤਾ ਹੋਰ ਵੱਧ ਗਈ ਸੀ।
ਪਿਛਲੇ ਕੁਝ ਸਾਲਾਂ ਵਿੱਚ ਅਮਰੀਕਾ ਅਤੇ ਚੀਨ ਦੇ ਰਿਸ਼ਤੇ ਲਗਾਤਾਰ ਖਰਾਬ ਹੋਏ ਹਨ। ਵਪਾਰ ਯੁੱਧ, ਤਾਇਵਾਨ ਵਿਵਾਦ, ਤਕਨੀਕੀ ਪਾਬੰਦੀਆਂ ਅਤੇ ਸਾਈਬਰ ਸੁਰੱਖਿਆ ਵਰਗੇ ਮੁੱਦਿਆਂ ਨੇ ਦੋਵਾਂ ਦੇਸ਼ਾਂ ਨੂੰ ਆਮਨੇ-ਸਾਮਨੇ ਲਿਆ ਖੜ੍ਹਾ ਕੀਤਾ ਹੈ। ਟਰੰਪ ਦਾ ਇਹ ਦੌਰਾ ਵੀ ਇਸੇ ਤਣਾਅ ਭਰੇ ਮਾਹੌਲ ਵਿੱਚ ਹੋਇਆ।
ਸੂਤਰਾਂ ਮੁਤਾਬਕ ਟਰੰਪ ਅਤੇ ਸ਼ੀ ਜਿਨਪਿੰਗ ਦੀ ਗੱਲਬਾਤ ਵਿੱਚ ਤਾਇਵਾਨ, ਸਾਈਬਰ ਸੁਰੱਖਿਆ ਅਤੇ ਵਪਾਰ ਅਸੰਤੁਲਨ ਸਭ ਤੋਂ ਵੱਡੇ ਮੁੱਦੇ ਰਹੇ। ਹਾਲਾਂਕਿ ਦੋਵਾਂ ਦੇਸ਼ਾਂ ਨੇ ਜਨਤਕ ਤੌਰ ‘ਤੇ ਰਿਸ਼ਤੇ ਸੁਧਾਰਨ ਦੀ ਗੱਲ ਕੀਤੀ, ਪਰ ਅੰਦਰੂਨੀ ਤੌਰ ‘ਤੇ ਅਣਭਰੋਸਾ ਸਪੱਸ਼ਟ ਨਜ਼ਰ ਆਇਆ।
ਚੀਨ ਤੋਂ ਮਿਲੇ ਹਰ ਤੋਹਫ਼ੇ ਨੂੰ ਡਸਟਬਿਨ ਵਿੱਚ ਸੁੱਟਣਾ ਸਿਰਫ਼ ਸੁਰੱਖਿਆ ਕਦਮ ਨਹੀਂ ਸੀ, ਸਗੋਂ ਇੱਕ ਵੱਡਾ ਰਾਜਨੀਤਿਕ ਸੰਦੇਸ਼ ਵੀ ਸੀ। ਅਮਰੀਕਾ ਦੁਨੀਆ ਨੂੰ ਇਹ ਦਿਖਾਉਣਾ ਚਾਹੁੰਦਾ ਸੀ ਕਿ ਉਹ ਚੀਨ ਦੀ ਕਿਸੇ ਵੀ ਗਤੀਵਿਧੀ ‘ਤੇ ਅੱਖਾਂ ਬੰਦ ਕਰਕੇ ਭਰੋਸਾ ਨਹੀਂ ਕਰ ਸਕਦਾ।
ਅਮਰੀਕਾ ਅਤੇ ਚੀਨ ਵਿਚਕਾਰ ਵਧ ਰਹੀ ਇਹ ਦੂਰੀ ਹੁਣ ਸਿਰਫ਼ ਵਪਾਰ ਜਾਂ ਰਾਜਨੀਤੀ ਤੱਕ ਸੀਮਿਤ ਨਹੀਂ ਰਹੀ। ਤਕਨੀਕ, ਸਾਈਬਰ ਸੁਰੱਖਿਆ, ਜਾਸੂਸੀ ਅਤੇ ਵਿਸ਼ਵ ਪ੍ਰਭਾਵ ਦੀ ਲੜਾਈ ਹੁਣ ਖੁੱਲ੍ਹ ਕੇ ਸਾਹਮਣੇ ਆ ਰਹੀ ਹੈ। ਟਰੰਪ ਦੀ ਇਸ ਯਾਤਰਾ ਨੇ ਸਾਫ਼ ਕਰ ਦਿੱਤਾ ਹੈ ਕਿ ਆਉਣ ਵਾਲੇ ਸਮੇਂ ਵਿੱਚ ਦੁਨੀਆ ਦੀਆਂ ਦੋ ਸਭ ਤੋਂ ਵੱਡੀਆਂ ਤਾਕਤਾਂ ਵਿਚਕਾਰ ਟਕਰਾਅ ਹੋਰ ਤੇਜ਼ ਹੋ ਸਕਦਾ ਹੈ।
