ਜੰਗ ਦੇ ਵਿਚਕਾਰ ਇਰਾਨ ‘ਚ ਸਮੂਹਿਕ ਵਿਆਹ… 'ਕੁਰਬਾਨੀ ਲਈ ਤਿਆਰ' ਜੋੜਿਆਂ ਦੇ ਵੀਡੀਓ ਵਾਇਰਲ

ਅਮਰੀਕਾ ਨਾਲ ਚੱਲ ਰਹੀ ਜੰਗ ਦੇ ਦਰਮਿਆਨ ਇਰਾਨ ਦੀ ਰਾਜਧਾਨੀ ਤਹਿਰਾਨ ਤੋਂ ਇਕ ਹੈਰਾਨ ਕਰਨ ਵਾਲੀ ਤਸਵੀਰ ਸਾਹਮਣੇ ਆਈ ਹੈ। ਇੱਥੇ ਸੈਂਕੜਿਆਂ ਜੋੜਿਆਂ ਦੇ ਸਮੂਹਿਕ ਵਿਆਹ ਕਰਵਾਏ ਗਏ, ਜਿਨ੍ਹਾਂ ਨੇ ਜੰਗ ਵਿੱਚ “ਦੇਸ਼ ਲਈ ਕੁਰਬਾਨੀ” ਦੇਣ ਦੀ ਤਿਆਰੀ ਵਾਲੀ ਸਕੀਮ ਵਿੱਚ ਨਾਮ ਦਰਜ ਕਰਵਾਇਆ ਹੈ। ਹੁਣ ਇਸ ਸਮਾਗਮ ਦੇ ਵੀਡੀਓ ਅਤੇ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀਆਂ ਹਨ।

ਇਹ ਸਮਾਗਮ 19 ਮਈ ਨੂੰ ਇਰਾਨ ਦੀ ਰਾਜਧਾਨੀ Tehran ਦੇ ਇਮਾਮ ਹੋਸੈਨ ਸਕਵੇਅਰ ਵਿੱਚ ਕਰਵਾਇਆ ਗਿਆ। ਰਿਪੋਰਟਾਂ ਮੁਤਾਬਕ 100 ਤੋਂ ਵੱਧ ਜੋੜਿਆਂ ਨੇ ਇਸ ਸਮਾਗਮ ਵਿੱਚ ਹਿੱਸਾ ਲਿਆ। ਇਰਾਨੀ ਮੀਡੀਆ ਅਨੁਸਾਰ ਇਹ ਜੋੜੇ ਉਸ ਸਰਕਾਰੀ ਯੋਜਨਾ ਦਾ ਹਿੱਸਾ ਹਨ, ਜਿਸ ਵਿੱਚ ਜੰਗ ਦੌਰਾਨ ਦੇਸ਼ ਲਈ ਆਪਣੀ ਜਾਨ ਨਿਛਾਵਰ ਕਰਨ ਦੀ ਤਿਆਰੀ ਦਰਜ ਕਰਵਾਈ ਜਾਂਦੀ ਹੈ।

ਫੌਜੀ ਜੀਪਾਂ ‘ਚ ਪਹੁੰਚੇ ਲਾੜਾ-ਲਾੜੀ 

ਸਭ ਤੋਂ ਹੈਰਾਨ ਕਰਨ ਵਾਲੀ ਗੱਲ ਇਹ ਰਹੀ ਕਿ ਕਈ ਜੋੜੇ ਮਸ਼ੀਨ ਗਨਾਂ ਨਾਲ ਲੈਸ ਫੌਜੀ ਜੀਪਾਂ ਵਿੱਚ ਸਮਾਗਮ ਸਥਾਨ ‘ਤੇ ਪਹੁੰਚੇ। ਸਟੇਜ ਨੂੰ ਗੁਬਾਰਿਆਂ ਨਾਲ ਸਜਾਇਆ ਗਿਆ ਸੀ ਅਤੇ ਧਾਰਮਿਕ ਮੌਲਵੀ ਦੀ ਮੌਜੂਦਗੀ ਵਿੱਚ ਨਿਕਾਹ ਕਰਵਾਇਆ ਗਿਆ। ਸਮਾਗਮ ਦੌਰਾਨ ਨਵੇਂ ਸੁਪਰੀਮ ਲੀਡਰ Mojtaba Khamenei ਦੀ ਵੱਡੀ ਤਸਵੀਰ ਵੀ ਲਗਾਈ ਗਈ ਸੀ।

Collective wedding ceremonies were held in Tehran, where brides departed for their new homes riding on military vehicles amid the country’s wartime atmosphere. Marriage ceremonies were conducted in major public squares in the presence of thousands of people across the country… pic.twitter.com/ppxJMZf1ys

— Xëë Shäñ (@xeeshan2701) May 19, 2026

ਇਰਾਨੀ ਟੀਵੀ ‘ਤੇ ਲਾਈਵ ਦਿਖਾਇਆ ਗਿਆ ਸਮਾਗਮ

ਇਹ ਪੂਰਾ ਪ੍ਰੋਗਰਾਮ ਇਰਾਨੀ ਟੈਲੀਵਿਜ਼ਨ ‘ਤੇ ਪ੍ਰਸਾਰਿਤ ਕੀਤਾ ਗਿਆ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸਦਾ ਮਕਸਦ ਜੰਗ ਦੇ ਮਾਹੌਲ ਵਿੱਚ ਲੋਕਾਂ ਦਾ ਮਨੋਬਲ ਵਧਾਉਣਾ ਸੀ। ਸੋਸ਼ਲ ਮੀਡੀਆ ‘ਤੇ ਵੀ ਇਸ ਸਮਾਗਮ ਦੇ ਕਈ ਵੀਡੀਓ ਵਾਇਰਲ ਹੋ ਰਹੇ ਹਨ, ਜਿਨ੍ਹਾਂ ‘ਚ ਲੋਕ ਨਾਰੇ ਲਗਾਉਂਦੇ ਅਤੇ ਜਸ਼ਨ ਮਨਾਉਂਦੇ ਦਿਖ ਰਹੇ ਹਨ।

ਰਾਸ਼ਟਰਪਤੀ ਅਤੇ ਸੰਸਦ ਸਪੀਕਰ ਦਾ ਵੀ ਨਾਮ

ਰਿਪੋਰਟਾਂ ਮੁਤਾਬਕ ਇਰਾਨ ਦੇ ਰਾਸ਼ਟਰਪਤੀ Masoud Pezeshkian ਅਤੇ ਸੰਸਦ ਸਪੀਕਰ Mohammad Bagher Ghalibaf ਨੇ ਵੀ “ਸੈਲਫ ਸੈਕ੍ਰਿਫਾਈਸ” ਸਕੀਮ ਵਿੱਚ ਆਪਣਾ ਨਾਮ ਦਰਜ ਕਰਵਾਇਆ ਹੈ। ਇਸਨੂੰ ਸਰਕਾਰ ਵੱਲੋਂ ਜੰਗੀ ਸਮਰਥਨ ਇਕੱਠਾ ਕਰਨ ਦੀ ਕੋਸ਼ਿਸ਼ ਵਜੋਂ ਵੀ ਦੇਖਿਆ ਜਾ ਰਿਹਾ ਹੈ।

‘ਜੰਗ ਹੈ, ਪਰ ਵਿਆਹ ਦਾ ਹੱਕ ਵੀ’

ਇਸ ਸਮਾਗਮ ਵਿੱਚ ਸ਼ਾਮਲ ਇਕ ਨੌਜਵਾਨ ਦੁਲਹਨ ਨੇ ਇਰਾਨੀ ਮੀਡੀਆ ਨਾਲ ਗੱਲ ਕਰਦੇ ਹੋਏ ਕਿਹਾ, “ਦੇਸ਼ ਜੰਗ ਵਿੱਚ ਹੈ, ਪਰ ਨੌਜਵਾਨਾਂ ਨੂੰ ਵਿਆਹ ਕਰਨ ਦਾ ਹੱਕ ਵੀ ਹੈ।” ਇਹ ਬਿਆਨ ਹੁਣ ਸੋਸ਼ਲ ਮੀਡੀਆ ‘ਤੇ ਕਾਫ਼ੀ ਚਰਚਾ ਵਿੱਚ ਹੈ।

‘ਸਿਗੇਹ’ ਪਰੰਪਰਾ ਵੀ ਚਰਚਾ ‘ਚ

ਇਸ ਮਾਮਲੇ ਤੋਂ ਬਾਅਦ ਇਰਾਨ ਦੀ “ਸਿਗੇਹ” ਜਾਂ ਅਸਥਾਈ ਵਿਆਹ ਪ੍ਰਥਾ ਵੀ ਦੁਬਾਰਾ ਚਰਚਾ ਵਿੱਚ ਆ ਗਈ ਹੈ। ਇਹ ਸ਼ੀਆ ਪਰੰਪਰਾ ਨਾਲ ਜੁੜੀ ਹੋਈ ਮੰਨੀ ਜਾਂਦੀ ਹੈ, ਜਿਸ ਵਿੱਚ ਇਕ ਨਿਸ਼ਚਿਤ ਸਮੇਂ ਲਈ ਵਿਆਹ ਕੀਤਾ ਜਾਂਦਾ ਹੈ। ਮਾਹਿਰਾਂ ਅਨੁਸਾਰ ਜੰਗ ਅਤੇ ਸਮਾਜਿਕ ਦਬਾਅ ਦੇ ਮਾਹੌਲ ਵਿੱਚ ਇਹ ਪਰੰਪਰਾ ਫਿਰ ਸੁਰਖੀਆਂ ਵਿੱਚ ਆ ਗਈ ਹੈ।

ਜੰਗ ਦੇ ਮਾਹੌਲ ਵਿੱਚ ਵਧੀ ਤਣਾਅ

ਅਮਰੀਕਾ ਨਾਲ ਟਕਰਾਅ ਸ਼ੁਰੂ ਹੋਣ ਤੋਂ ਬਾਅਦ ਇਰਾਨ ਵਿੱਚ ਕਈ ਰੈਲੀਆਂ ਅਤੇ ਜਨ ਸਮਾਗਮ ਕਰਵਾਏ ਜਾ ਰਹੇ ਹਨ। ਸਰਕਾਰ ਇਨ੍ਹਾਂ ਰਾਹੀਂ ਲੋਕਾਂ ਵਿੱਚ ਏਕਤਾ ਅਤੇ ਸਮਰਥਨ ਦਾ ਸੰਦੇਸ਼ ਦੇਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਹੁਣ ਇਹ ਸਮੂਹਿਕ ਵਿਆਹ ਵੀ ਉਸੇ ਮੁਹਿੰਮ ਦਾ ਹਿੱਸਾ ਮੰਨੇ ਜਾ ਰਹੇ ਹਨ।