ਈਰਾਨ-ਅਮਰੀਕਾ ਸਮਝੌਤੇ ਤੋਂ ਬਾਅਦ ਇਜ਼ਰਾਈਲ ਨੇ ਲਏ ਵੱਡੇ ਫੈਸਲੇ, ਨਹੀਂ ਮੰਨਿਆ ਟਰੰਪ ਦਾ ਕਹਿਣਾ

ਅਮਰੀਕਾ ਅਤੇ ਈਰਾਨ ਵਿਚਾਲੇ ਜੰਗ ਖਤਮ ਕਰਨ ਲਈ ਬਣੇ ਫਰੇਮਵਰਕ ਸਮਝੌਤੇ ਤੋਂ ਬਾਅਦ ਹੁਣ ਇਜ਼ਰਾਈਲ ਨੇ ਵੱਡਾ ਰੁਖ਼ ਅਖਤਿਆਰ ਕੀਤਾ ਹੈ। ਅਮਰੀਕਾ ਦੇ ਸਭ ਤੋਂ ਕਰੀਬੀ ਸਹਿਯੋਗੀ ਮੰਨੇ ਜਾਣ ਵਾਲੇ ਦੇਸ਼ ਨੇ ਦੋ ਅਹਿਮ ਫੈਸਲੇ ਲੈਂਦਿਆਂ ਇਸ ਡੀਲ ਤੋਂ ਆਪਣੀ ਵੱਖਰੀ ਰਾਹ ਦੱਸ ਦਿੱਤੀ ਹੈ।

ਪਾਕਿਸਤਾਨ ਦੀ ਮੱਧਸਥਤਾ ਵਿੱਚ ਜਨੇਵਾ ਵਿਖੇ 19 ਜੂਨ ਨੂੰ ਇੱਕ ਫਰੇਮਵਰਕ ਸਮਝੌਤੇ 'ਤੇ ਦਸਤਖ਼ਤ ਹੋਣ ਜਾ ਰਹੇ ਹਨ, ਜਿਸ ਤਹਿਤ ਅਮਰੀਕਾ ਤੇ ਈਰਾਨ ਵਿਚਾਲੇ ਜੰਗ ਖਤਮ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਇਸ ਸਮਝੌਤੇ 'ਤੇ ਸਹਿਮਤੀ ਬਣਨ ਮਗਰੋਂ ਖਾੜੀ ਤੇ ਹੋਰ ਦੁਨੀਆਂ ਦੇ ਕਈ ਆਗੂਆਂ ਨੇ ਖੁਸ਼ੀ ਦਾ ਇਜ਼ਹਾਰ ਕੀਤਾ ਹੈ, ਪਰ ਇਜ਼ਰਾਈਲ ਵੱਲੋਂ ਅਜੇ ਤੱਕ ਕੋਈ ਰਸਮੀ ਪ੍ਰਤੀਕਿਰਿਆ ਨਹੀਂ ਦਿੱਤੀ ਗਈ ਹੈ।
ਹਾਲਾਂਕਿ, ਇਜ਼ਰਾਈਲੀ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਐਤਵਾਰ ਨੂੰ ਸੋਸ਼ਲ ਮੀਡੀਆ 'ਤੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਉਨ੍ਹਾਂ ਦੇ 80ਵੇਂ ਜਨਮ ਦਿਨ ਦੀਆਂ ਵਧਾਈਆਂ ਤਾਂ ਦਿੱਤੀਆਂ, ਪਰ ਇਸ ਸਮਝੌਤੇ ਬਾਰੇ ਕੋਈ ਸ਼ਬਦ ਨਹੀਂ ਕਿਹਾ। ਦੂਜੇ ਪਾਸੇ, ਉਨ੍ਹਾਂ ਦੀ ਸਰਕਾਰ ਵਿੱਚੋਂ ਕਈ ਅਵਾਜ਼ਾਂ ਆਈਆਂ ਹਨ ਜਿਨ੍ਹਾਂ ਇਸ ਸਮਝੌਤੇ ਨੂੰ ਇਜ਼ਰਾਈਲ ਅਤੇ ਆਜ਼ਾਦ ਦੁਨੀਆਂ ਲਈ ਨੁਕਸਾਨਦੇਹ ਕਰਾਰ ਦਿੱਤਾ ਹੈ।

ਅਮਰੀਕੀ ਜਹਾਜ਼ਾਂ ਦੀ ਮੰਗੀ ਬਰਖਾਸਤਗੀ

ਇਸ ਤੋਂ ਪਹਿਲਾਂ ਮਹੀਨਾ ਪਹਿਲਾਂ ਇਜ਼ਰਾਈਲ ਏਅਰਪੋਰਟਸ ਅਥਾਰਟੀ ਵੱਲੋਂ ਚੇਤਾਵਨੀ ਦਿੱਤੀ ਗਈ ਸੀ ਕਿ ਬੇਨ-ਗੁਰੀਅਨ ਹਵਾਈ ਅੱਡੇ 'ਤੇ ਅਮਰੀਕੀ ਰੀਫਿਊਲਿੰਗ ਜਹਾਜ਼ਾਂ ਦੀ ਮੌਜੂਦਗੀ ਨਾਲ 24 ਲੱਖ ਤੋਂ ਵੱਧ ਉਡਾਣਾਂ ਦੇ ਟਿਕਟਾਂ ਰੱਦ ਹੋ ਸਕਦੀਆਂ ਹਨ। ਹੁਣ ਟਰਾਂਸਪੋਰਟ ਮੰਤਰੀ ਮਿਰੀ ਰੇਗੇਵ ਨੇ ਫਰੇਮਵਰਕ ਸਮਝੌਤੇ ਦੀਆਂ ਖਬਰਾਂ ਆਉਣ ਮਗਰੋਂ ਨੇਤਨਯਾਹੂ ਨੂੰ ਇਨ੍ਹਾਂ ਜਹਾਜ਼ਾਂ ਨੂੰ ਹਟਾਉਣ ਦੀ ਮੰਗ ਕੀਤੀ ਹੈ।

'ਅਸੀਂ ਇਸ ਸਮਝੌਤੇ ਦਾ ਹਿੱਸਾ ਨਹੀਂ'

ਸਭ ਤੋਂ ਸਖ਼ਤ ਪ੍ਰਤੀਕਿਰਿਆ ਇਜ਼ਰਾਈਲੀ ਨੈਸ਼ਨਲ ਸਿਕਿਓਰਿਟੀ ਮੰਤਰੀ ਇਤਾਮਾਰ ਬੇਨ ਗਵੀਰ ਦੀ ਆਈ ਹੈ। ਉਨ੍ਹਾਂ ਆਪਣੇ ਟੈਲੀਗ੍ਰਾਮ ਚੈਨਲ 'ਤੇ ਸਾਫ਼ ਕਰ ਦਿੱਤਾ ਕਿ ਟਰੰਪ ਦਾ ਇਹ ਸਮਝੌਤਾ ਉਨ੍ਹਾਂ 'ਤੇ ਕੋਈ ਬਾਧਾ ਨਹੀਂ ਪਾਉਂਦਾ। ਉਨ੍ਹਾਂ ਕਿਹਾ ਕਿ ਇਜ਼ਰਾਈਲ ਹਿਜ਼ਬੁੱਲਾਹ ਦੇ ਖਾਤਮੇ ਤੋਂ ਬਿਨਾਂ ਕਿਸੇ ਵੀ ਚੀਜ਼ 'ਤੇ ਸਮਝੌਤਾ ਨਹੀਂ ਕਰੇਗਾ ਅਤੇ ਜਿਸ ਜ਼ਮੀਨ ਨੂੰ ਉਨ੍ਹਾਂ ਦੀਆਂ ਫੌਜਾਂ ਨੇ ਆਜ਼ਾਦ ਕਰਵਾਇਆ ਹੈ, ਉਸ ਦੇ ਇੱਕ ਇੰਚ ਤੋਂ ਵੀ ਪਿੱਛੇ ਨਹੀਂ ਹਟੇਗਾ।

ਕੀ ਟੁੱਟ ਜਾਵੇਗੀ ਜੰਗਬੰਦੀ?

ਇਨ੍ਹਾਂ ਬਿਆਨਾਂ ਤੋਂ ਸਾਫ਼ ਹੈ ਕਿ ਇਜ਼ਰਾਈਲ ਟਰੰਪ ਦੇ ਫੈਸਲੇ ਨੂੰ ਮੰਨਣ ਲਈ ਤਿਆਰ ਨਹੀਂ। ਜੇਕਰ ਇਜ਼ਰਾਈਲ ਨੇ ਲੈਬਨਾਨ 'ਤੇ ਹਮਲੇ ਰੋਕੇ ਤੇ ਆਪਣੀ ਫੌਜ ਵਾਪਸ ਨਾ ਬੁਲਾਈ ਤਾਂ ਇਹ ਜੰਗਬੰਦੀ ਬੇਮਾਅਨੀ ਹੋ ਸਕਦੀ ਹੈ। ਈਰਾਨ ਨੇ ਪਹਿਲਾਂ ਹੀ ਸਪੱਸ਼ਟ ਕਰ ਦਿੱਤਾ ਹੈ ਕਿ ਉਹ ਹਿਜ਼ਬੁੱਲਾਹ ਨੂੰ ਇਕੱਲਾ ਨਹੀਂ ਛੱਡੇਗਾ। ਦੇਖਣਾ ਇਹ ਹੈ ਕਿ ਆਉਣ ਵਾਲੇ ਦਿਨਾਂ ਵਿੱਚ ਇਹ ਮਾਮਲਾ ਕਿਸ ਦਿਸ਼ਾ ਵੱਲ ਵਧਦਾ ਹੈ।