Last Updated :
13 July 2026, 07:49 PM IST
ਅਮਰੀਕਾ, ਈਰਾਨ ਅਤੇ ਇਜ਼ਰਾਈਲ ਦਰਮਿਆਨ ਵਧ ਰਹੇ ਤਣਾਅ ਦੇ ਵਿੱਚ ਰੂਸ ਨੇ ਆਪਣਾ ਸਭ ਤੋਂ ਖਾਸ ਏਅਰਬੋਰਨ ਕਮਾਂਡ ਜਹਾਜ਼ TU-214PU ਈਰਾਨ ਦੀ ਰਾਜਧਾਨੀ ਤਹਿਰਾਨ ਭੇਜ ਕੇ ਨਵੀਂ ਬਹਿਸ ਛੇੜ ਦਿੱਤੀ ਹੈ। ਇਹ ਜਹਾਜ਼ ਕਿਸੇ ਆਮ ਜਹਾਜ਼ ਵਾਂਗ ਨਹੀਂ ਹੈ; ਇਸ ਨੂੰ ਯੁੱਧ, ਪਰਮਾਣੂ ਹਮਲੇ ਜਾਂ ਕਿਸੇ ਵੀ ਵੱਡੀ ਐਮਰਜੈਂਸੀ ਦੌਰਾਨ ਮੁਲਕ ਦੀ ਸੱਤਾ ਨੂੰ ਹਵਾ ਵਿੱਚ ਰਹਿੰਦਿਆਂ ਸੰਭਾਲਣ ਲਈ ਵਿਸ਼ੇਸ਼ ਤੌਰ 'ਤੇ ਤਿਆਰ ਕੀਤਾ ਗਿਆ ਹੈ। ਇਸ ਨੂੰ 'ਡੂਮਸਡੇ ਪਲੇਨ' (ਪ੍ਰਲਯ ਜਹਾਜ਼) ਕਿਹਾ ਜਾਂਦਾ ਹੈ।
ਜਾਣਕਾਰਾਂ ਅਨੁਸਾਰ ਰੂਸ ਨੇ ਇਸ ਜਹਾਜ਼ ਰਾਹੀਂ ਅਮਰੀਕਾ ਅਤੇ ਉਸ ਦੇ ਸਹਿਯੋਗੀਆਂ ਨੂੰ ਇਹ ਸਾਫ਼ ਸੰਕੇਤ ਦਿੱਤਾ ਹੈ ਕਿ ਉਹ ਈਰਾਨ ਦੀ ਸੁਰੱਖਿਆ ਮੁਹਿੰਮ ਵਿੱਚ ਪੂਰੀ ਤਰ੍ਹਾਂ ਸ਼ਾਮਲ ਹੈ। ਰੂਸ ਨੇ ਅਧਿਕਾਰਤ ਤੌਰ 'ਤੇ ਇਸ ਮਿਸ਼ਨ ਬਾਰੇ ਕੋਈ ਵੱਡੀ ਜਾਣਕਾਰੀ ਸਾਂਝੀ ਨਹੀਂ ਕੀਤੀ, ਪਰ ਰੱਖਿਆ ਮਾਹਰਾਂ ਮੁਤਾਬਕ ਇਹ ਕਦਮ ਬਹੁਤ ਸੋਚੀ-ਸਮਝੀ ਰਣਨੀਤੀ ਦਾ ਹਿੱਸਾ ਹੈ। ਖਾਸ ਗੱਲ ਇਹ ਹੈ ਕਿ ਇਸ ਜਹਾਜ਼ ਦਾ ਈਰਾਨ ਪਹੁੰਚਣਾ ਅਜਿਹੇ ਸਮੇਂ ਹੋਇਆ ਹੈ, ਜਦੋਂ ਖੇਤਰ ਵਿੱਚ ਅਮਰੀਕਾ ਆਪਣੀ ਫੌਜੀ ਮੌਜੂਦਗੀ ਵਧਾ ਰਿਹਾ ਹੈ ਅਤੇ ਇਜ਼ਰਾਈਲ ਈਰਾਨ ਨੂੰ ਲੈ ਕੇ ਕਠੋਰ ਤੋਰ ਅਪਣਾ ਰਿਹਾ ਹੈ।
ਇਹ ਜਹਾਜ਼ ਇੱਕ ਉੱਡਦਾ ਹੋਇਆ ਕਮਾਂਡ ਸੈਂਟਰ ਹੈ, ਜੋ ਕਿਸੇ ਵੀ ਹਾਲਤ ਵਿੱਚ ਦੇਸ਼ ਦੀ ਰਾਜਨੀਤਕ ਅਤੇ ਫੌਜੀ ਕਮਾਨ ਨੂੰ ਬਰਕਰਾਰ ਰੱਖ ਸਕਦਾ ਹੈ। ਇਸ 'ਤੇ ਬੈਠ ਕੇ ਰਾਸ਼ਟਰਪਤੀ, ਰੱਖਿਆ ਮੰਤਰੀ ਅਤੇ ਫੌਜ ਮੁਖੀ ਸੁਰੱਖਿਅਤ ਤਰੀਕੇ ਨਾਲ ਫੈਸਲੇ ਲੈ ਸਕਦੇ ਹਨ ਅਤੇ ਸਾਰੀ ਫੌਜੀ ਕਾਰਵਾਈ ਨੂੰ ਨਿਰਦੇਸ਼ ਦੇ ਸਕਦੇ ਹਨ। ਇਸ ਦੇ ਅੰਦਰ ਉੱਚ-ਪੱਧਰੀ ਉਪਗ੍ਰਹਿ ਸੰਚਾਰ, ਜੰਗੀ ਰੇਡਾਰ ਅਤੇ ਇਲੈਕਟ੍ਰਾਨਿਕ ਯੁੱਧ ਪ੍ਰਣਾਲੀ ਮੌਜੂਦ ਹੈ।
• ਰੂਸੀ ਯਾਤਰੀ ਜਹਾਜ਼ TU-214 ਦਾ ਅਤਿ-ਆਧੁਨਿਕ ਸੈਨਿਕ ਸੰਸਕਰਣ
• ਉੱਡਣ ਦੀ ਸਮਰੱਥਾ: 6,500 ਕਿਲੋਮੀਟਰ
• ਹਵਾ ਵਿੱਚ ਰੀਫਿਊਲਿੰਗ ਦੀ ਸਹੂਲਤ, ਨਾਲ ਹੀ ਆਪਣੇ ਆਪ ਨੂੰ ਇਲੈਕਟ੍ਰਾਨਿਕ ਹਮਲਿਆਂ ਤੋਂ ਬਚਾਉਣ ਦੀ ਤਕਨੀਕ
• ਪੂਰੀ ਤਰ੍ਹਾਂ ਸੁਰੱਖਿਅਤ ਸੰਚਾਰ ਪ੍ਰਣਾਲੀ, ਜੋ ਕਿਸੇ ਵੀ ਸੰਕਟਕਾਲ ਵਿੱਚ ਹੋਰ ਏਜੰਸੀਆਂ ਨਾਲ ਸਿੱਧਾ ਲਿੰਕ ਬਣਾਈ ਰੱਖਦੀ ਹੈ
ਮਾਹਰਾਂ ਦਾ ਮੰਨਣਾ ਹੈ ਕਿ ਰੂਸ ਦਾ ਇਹ ਕਦਮ ਸਿਰਫ਼ ਇੱਕ ਫੌਜੀ ਮੁਲਾਕਾਤ ਤੋਂ ਕਿਤੇ ਵੱਧ ਹੈ। ਇਹ ਈਰਾਨ ਨੂੰ ਇੱਕ ਵੱਡਾ ਭਰੋਸਾ ਹੈ ਅਤੇ ਅਮਰੀਕਾ ਨੂੰ ਇੱਕ ਚੁਣੌਤੀ। ਇਸ ਜਹਾਜ਼ ਦੀ ਮੌਜੂਦਗੀ ਦਾ ਮਤਲਬ ਹੈ ਕਿ ਰੂਸ ਅਤੇ ਈਰਾਨ ਵਿਚਕਾਰ ਖੁਫੀਆ ਜਾਣਕਾਰੀ, ਰੱਖਿਆ ਸਮਝੌਤੇ ਅਤੇ ਸਾਂਝੀਆਂ ਫੌਜੀ ਚਾਲਾਂ ਨੂੰ ਲੈ ਕੇ ਉੱਚ ਪੱਧਰੀ ਗੱਲਬਾਤ ਹੋ ਸਕਦੀ ਹੈ। ਕੁਝ ਰੱਖਿਆ ਵਿਸ਼ਲੇਸ਼ਕਾਂ ਅਨੁਸਾਰ, ਰੂਸ ਇਸ ਰਾਹੀਂ ਅਮਰੀਕਾ ਦੇ ਖਾੜੀ ਖੇਤਰ ਵਿੱਚ ਵਧਦੇ ਪ੍ਰਭਾਵ ਨੂੰ ਰੋਕਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਇਸ ਤੋਂ ਇਲਾਵਾ, ਇਹ ਇਜ਼ਰਾਈਲ ਨੂੰ ਵੀ ਇੱਕ ਸਪੱਸ਼ਟ ਸੰਕੇਤ ਹੈ ਕਿ ਰੂਸ ਈਰਾਨ ਨੂੰ ਇਕੱਲਾ ਨਹੀਂ ਛੱਡੇਗਾ। ਹੁਣ ਸਾਰੀਆਂ ਨਿਗਾਹਾਂ ਇਸ 'ਤੇ ਹਨ ਕਿ ਅਮਰੀਕਾ ਅਤੇ ਇਜ਼ਰਾਈਲ ਇਸ ਨਵੀਂ ਰਣਨੀਤੀ ਦਾ ਕੀ ਜਵਾਬ ਦਿੰਦੇ ਹਨ।
