ਲਖਨਊ ਤੋਂ ਦਿੱਲੀ ਜਾ ਰਹੀ ਇੰਡੀਗੋ ਫਲਾਇਟ 'ਚ ਬੰਬ! ਟਿਸ਼ੂ ਪੇਪਰ ਮਿਲਣ ਨਾਲ ਮਚੀ ਹਫ਼ੜਾ-ਦਫ਼ੜੀ, ਤੁਰੰਤ ਰੋਕੀ ਗਈ ਫਲਾਈਟ  

ਲਖਨਊ ਤੋਂ ਦਿੱਲੀ ਜਾਣ ਵਾਲੀ ਇੰਡੀਗੋ ਫਲਾਇਟ 'ਚ ਉਸ ਵੇਲੇ ਹੜਕੰਪ ਮਚ ਗਿਆ, ਜਦੋਂ ਅਚਾਨਕ ਫਲਾਈਟ 'ਚ ਬੰਬ ਹੋਣ ਦੀ ਸੂਚਨਾ ਮਿਲੀ। ਸ਼ੱਕੀ ਬੰਬ ਹੋਣ ਦੀ ਚੇਤਾਵਨੀ ਮਿਲਣ ਤੋਂ ਤੁਰੰਤ ਬਾਅਦ ਜਹਾਜ਼ ਨੂੰ ਰਨਵੇਅ 'ਤੇ ਰੋਕ ਦਿੱਤਾ ਗਿਆ, ਅਤੇ ਸੁਰੱਖਿਆ ਏਜੰਸੀਆਂ ਨੇ ਜਹਾਜ਼ ਅਤੇ ਆਲੇ ਦੁਆਲੇ ਦੇ ਖੇਤਰ ਦੀ ਪੂਰੀ ਤਲਾਸ਼ੀ ਸ਼ੁਰੂ ਕਰ ਦਿੱਤੀ।

ਨਵੀਂ ਦਿੱਲੀ: ਲਖਨਊ ਤੋਂ ਦਿੱਲੀ ਜਾ ਰਹੀ ਇੰਡੀਗੋ ਦੀ ਇੱਕ ਫਲਾਈਟ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲਣ ਤੋਂ ਬਾਅਦ ਸ਼ੁੱਕਰਵਾਰ ਨੂੰ ਹਫ਼ੜਾ-ਦਫ਼ੜੀ ਮਚ ਗਈ। ਲਗਭਗ 180 ਯਾਤਰੀਆਂ ਨੂੰ ਲੈ ਕੇ ਜਾ ਰਹੀ ਇਹ ਉਡਾਣ ਸਵੇਰੇ 10:45 ਵਜੇ ਰਵਾਨਾ ਹੋਣ ਵਾਲੀ ਸੀ। ਉਡਾਣ ਭਰਨ ਤੋਂ ਠੀਕ ਪਹਿਲਾਂ, ਕ੍ਰੂ ਮੈਂਬਰ ਨੂੰ ਸ਼ੱਕੀ ਬੰਬ ਹੋਣ ਦੀ ਚੇਤਾਵਨੀ ਮਿਲੀ। 

 

ਟਾਇਲਟ ਵਿੱਚੋਂ ਮਿਲਿਆ ਟਿਸ਼ੂ ਪੇਪਰ  

ਪੀਟੀਆਈ ਦੀ ਇੱਕ ਰਿਪੋਰਟ ਦੇ ਮੁਤਾਬਿਕ, ਚੇਤਾਵਨੀ ਮਿਲਣ ਤੋਂ ਤੁਰੰਤ ਬਾਅਦ ਜਹਾਜ਼ ਨੂੰ ਰਨਵੇਅ 'ਤੇ ਰੋਕ ਦਿੱਤਾ ਗਿਆ, ਅਤੇ ਸੁਰੱਖਿਆ ਏਜੰਸੀਆਂ ਨੇ ਜਹਾਜ਼ ਅਤੇ ਆਲੇ ਦੁਆਲੇ ਦੇ ਖੇਤਰ ਦੀ ਪੂਰੀ ਤਲਾਸ਼ੀ ਸ਼ੁਰੂ ਕਰ ਦਿੱਤੀ। ਤਲਾਸ਼ੀ ਦੌਰਾਨ, ਜਹਾਜ਼ ਦੇ ਟਾਇਲਟ ਵਿੱਚੋਂ ਇੱਕ ਟਿਸ਼ੂ ਪੇਪਰ ਮਿਲਿਆ ਜਿਸ 'ਤੇ 'ਬੰਬ' ਸ਼ਬਦ ਲਿਖਿਆ ਹੋਇਆ ਸੀ। ਇਸ ਖੋਜ ਤੋਂ ਬਾਅਦ, ਸੁਰੱਖਿਆ ਉਪਾਅ ਹੋਰ ਵੀ ਤੇਜ਼ ਕਰ ਦਿੱਤੇ ਗਏ ਸਨ।

ਅਫ਼ਵਾਹ ਨਿਕਲੀ ਚੇਤਾਵਨੀ
ਹਾਲਾਂਕਿ, ਪੂਰੀ ਤਲਾਸ਼ੀ ਤੋਂ ਬਾਅਦ, ਜਹਾਜ਼ ਵਿੱਚੋਂ ਕੋਈ ਵਿਸਫੋਟਕ ਨਹੀਂ ਮਿਲਿਆ ਅਤੇ ਇਹ ਜਾਣਕਾਰੀ ਸਿਰਫ਼ ਇੱਕ ਅਫ਼ਵਾਹ ਨਿਕਲੀ। ਸੁਰੱਖਿਆ ਮਨਜ਼ੂਰੀ ਮਿਲਣ ਤੋਂ ਬਾਅਦ ਅੱਗੇ ਦੀਆਂ ਪ੍ਰਕਿਰਿਆਵਾਂ ਸ਼ੁਰੂ ਕੀਤੀਆਂ ਗਈਆਂ। ਇਸ ਘਟਨਾ ਕਾਰਨ ਉਡਾਣ ਦੇ ਸੰਚਾਲਨ ਵਿੱਚ ਦੇਰੀ ਹੋਈ, ਅਤੇ ਯਾਤਰੀਆਂ ਨੂੰ ਕੁਝ ਸਮਾਂ ਇੰਤਜ਼ਾਰ ਕਰਨਾ ਪਿਆ।

ਅਧਿਕਾਰੀਆਂ ਨੇ ਦੱਸਿਆ ਕਿ ਜਾਂਚ ਦੇ ਦੌਰਾਨ ਕੋਈ ਵਿਸਫੋਟਕ ਜਾਂ ਹਾਨੀਕਾਰਕ ਪਦਾਰਥ ਨਹੀਂ ਮਿਲੇ ਅਤੇ ਅੱਗੇ ਦੀਆ ਕਾਨੂੰਨੀ ਤੇ ਸੁਰਖਿਆ ਗਤੀਵਿਧੀਆਂ ਜਾਰੀ ਹਨ। ਫਿਲਹਾਲ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਟਿਸ਼ੂ ਪੇਪਰ ਤੇ ਇਹ ਸ਼ਬਦ ਕਿਹਨੇ ਲਿਖੇ ਤੇ ਇਸਦੇ ਮਗਰ ਕਿਸਦਾ ਹੱਥ ਹੋ ਸਕਦਾ ਹੈ।

ਲਖਨਊ ਵੱਲ ਮੋੜੀਆਂ ਗਈਆਂ ਤਿੰਨ ਉਡਾਣਾਂ 

ਇਸ ਦੌਰਾਨ, ਵੀਰਵਾਰ ਰਾਤ ਨੂੰ ਦਿੱਲੀ ਵਿੱਚ ਮੌਸਮ ਇੱਕ ਵਾਰ ਫਿਰ ਵਿਗੜ ਗਿਆ, ਜਿਸ ਕਾਰਨ ਤਿੰਨ ਉਡਾਣਾਂ ਲਖਨਊ ਲਈ ਮੋੜੀਆਂ ਗਈਆਂ। ਇੰਡੀਗੋ ਦੀ ਉਡਾਣ 6E 1054, ਬੈਂਕਾਕ ਤੋਂ ਦਿੱਲੀ ਜਾ ਰਹੀ ਸੀ, 12:18 ਵਜੇ ਲਖਨਊ ਵਿੱਚ ਉਤਰੀ ਅਤੇ ਸ਼ੁੱਕਰਵਾਰ ਸਵੇਰੇ 7:56 ਵਜੇ ਦਿੱਲੀ ਲਈ ਰਵਾਨਾ ਹੋਈ। ਗੁਹਾਟੀ ਤੋਂ ਦਿੱਲੀ ਜਾ ਰਹੀ ਫਲਾਈਟ 6E 6317, 12:26 ਵਜੇ ਲਖਨਊ ਵਿੱਚ ਉਤਰੀ ਅਤੇ 3:21 ਵਜੇ ਰਵਾਨਾ ਹੋਈ। ਨਾਗਪੁਰ ਤੋਂ ਦਿੱਲੀ ਜਾ ਰਹੀ ਫਲਾਈਟ 6E 6573, 12:42 ਵਜੇ ਉਤਰੀ ਅਤੇ 3:12 ਵਜੇ ਰਵਾਨਾ ਹੋਈ।