Last Updated :
02 August 2026, 06:56 PM IST
ਮਾਈਗ੍ਰੇਨ ਦੇ ਮਰੀਜ਼ਾਂ ਵਿੱਚ ਇੱਕ ਸਾਲ ਦੇ ਅੰਦਰ ਆਏ ਸੁਧਾਰ ਨੇ ਨਾ ਸਿਰਫ਼ ਉਨ੍ਹਾਂ ਦੇ ਸਿਰ ਦਰਦ ਵਾਲੇ ਦਿਨਾਂ ਦੀ ਗਿਣਤੀ ਘਟਾਈ, ਸਗੋਂ ਅਪਾਹਜਤਾ, ਜੀਵਨ ਗੁਣਵੱਤਾ, ਕੰਮ ਦੀ ਸਮਰੱਥਾ ਅਤੇ ਸਮਾਜਿਕ ਕਲੰਕ 'ਤੇ ਵੀ ਸਕਾਰਾਤਮਕ ਅਸਰ ਪਾਇਆ। OVERCOME ਨਾਂ ਦੇ ਇੱਕ ਲੰਮੀ ਮਿਆਦ ਦੇ ਲੋਕ-ਅਧਾਰਤ ਅਧਿਐਨ ਵਿੱਚ 11,634 ਬਾਲਗ ਮਰੀਜ਼ਾਂ ਦੇ ਡੇਟੇ ਦਾ ਵਿਸ਼ਲੇਸ਼ਣ ਕੀਤਾ ਗਿਆ, ਜਿਨ੍ਹਾਂ ਨੇ ਬੇਸਲਾਈਨ ਅਤੇ ਇੱਕ ਸਾਲ ਬਾਅਦ ਦੇ ਸਰਵੇਖਣ ਪੂਰੇ ਕੀਤੇ।
ਮਾਈਗ੍ਰੇਨ ਦੀ ਸਥਿਤੀ ਦਾ ਮੁਲਾਂਕਣ ਮਹੀਨਾਵਾਰ ਸਿਰ ਦਰਦ ਦਿਨਾਂ, MIDAS ਅਪਾਹਜਤਾ ਸਕੋਰ, ਅਤੇ MSQ-RFR ਸਕੋਰਾਂ ਵਿੱਚ ਤਬਦੀਲੀਆਂ ਦੇ ਆਧਾਰ 'ਤੇ ਕੀਤਾ ਗਿਆ। ਇੱਕ ਸਾਲ ਬਾਅਦ, 40.4% ਭਾਗੀਦਾਰ 'ਸੁਧਰੇ', 24.1% 'ਵਿਗੜੇ' ਅਤੇ 35.5% ਵਿੱਚ 'ਕੋਈ ਨੈੱਟ ਤਬਦੀਲੀ ਨਹੀਂ' ਪਾਈ ਗਈ। ਸੁਧਰੇ ਸਮੂਹ ਵਿੱਚ ਸਿਰ ਦਰਦ ਦੇ ਦਿਨਾਂ ਦੀ ਗਿਣਤੀ ਘਟੀ, ਅਪਾਹਜਤਾ ਸਕੋਰਾਂ ਵਿੱਚ ਗਿਰਾਵਟ ਆਈ, ਅਤੇ ਜੀਵਨ ਦੀ ਗੁਣਵੱਤਾ ਨਾਲ ਜੁੜੇ ਸਕੋਰਾਂ ਵਿੱਚ ਸੁਧਾਰ ਦੇਖਿਆ ਗਿਆ।
ਜਿਨ੍ਹਾਂ ਮਰੀਜ਼ਾਂ ਦੀ ਸਥਿਤੀ ਵਿਗੜੀ, ਉਨ੍ਹਾਂ ਵਿੱਚ ਉਲਟਾ ਪ੍ਰਭਾਅ ਵੇਖਿਆ ਗਿਆ। ਉਨ੍ਹਾਂ ਦੇ ਮਹੀਨਾਵਾਰ ਸਿਰ ਦਰਦ ਵਾਲੇ ਦਿਨ ਵਧੇ, ਰੋਲ ਫੰਕਸ਼ਨ ਰਿਸਟ੍ਰਿਕਟਿਵ ਸਕੋਰ ਘਟੇ, ਅਤੇ ਬੀਮਾਰੀ ਦਾ ਬੋਝ ਕਈ ਪੱਧਰਾਂ 'ਤੇ ਵੱਧਿਆ, ਜਿਵੇਂ ਕਿ ਭਾਵਨਾਤਮਕ ਕੰਮਕਾਜੀ ਘਾਟ, ਰੋਜ਼ਾਨਾ ਗਤੀਵਿਧੀਆਂ ਵਿੱਚ ਰੁਕਾਵਟ, ਅਤੇ ਕੰਮ ਦੀ ਉਤਪਾਦਕਤਾ 'ਤੇ ਮਾੜਾ ਪ੍ਰਭਾਅ। ਇਸ ਸਮੂਹ ਨੂੰ ਤੁਰੰਤ ਅਤੇ ਬਚਾਅ ਇਲਾਜ (acute and preventive treatment) ਦੀ ਵਧੇਰੇ ਲੋੜ ਮਹਿਸੂਸ ਹੋਈ।
ਸੁਧਰੇ ਮਰੀਜ਼ਾਂ ਨੇ ਆਪਣੀ ਕੰਮਕਾਜੀ ਸਮਰੱਥਾ ਵਿੱਚ ਸਪੱਸ਼ਟ ਸੁਧਾਰ ਦੱਸਿਆ, ਜਿਸ ਵਿੱਚ ਗਤੀਵਿਧੀ ਵਿੱਚ ਰੁਕਾਵਟ, ਪ੍ਰੈਜ਼ੈਂਟੀਇਜ਼ਮ (Presenteeism), ਅਤੇ ਸਮੁੱਚੀ ਉਤਪਾਦਕਤਾ ਘਾਟ ਵਿੱਚ ਕਮੀ ਸ਼ਾਮਲ ਸੀ। ਇਸ ਤੋਂ ਇਲਾਵਾ, ਇਹਨਾਂ ਮਰੀਜ਼ਾਂ ਨੇ ਮਾਈਗ੍ਰੇਨ ਨਾਲ ਜੁੜੇ ਕਲੰਕ ਅਤੇ ਆਪਣੀ ਬੀਮਾਰੀ ਲੁਕਾਉਣ ਦੀ ਪ੍ਰਵਿਰਤੀ ਵਿੱਚ ਵੀ ਕਮੀ ਮਹਿਸੂਸ ਕੀਤੀ। ਦਵਾਈਆਂ ਦੇ ਪੈਟਰਨ ਵੀ ਇਸ ਸੁਧਾਰ ਨਾਲ ਮੇਲ ਖਾਂਦੇ ਸਨ—ਸੁਧਰੇ ਸਮੂਹ ਵਿੱਚ ਦਵਾਈਆਂ ਦੀ ਲੋੜ ਅਤੇ ਐਕਿਊਟ ਦਵਾਈਆਂ ਦੀ ਗ਼ੈਰ-ਜ਼ਰੂਰੀ ਵਰਤੋਂ ਘਟੀ, ਜਦੋਂ ਕਿ ਵਿਗੜੇ ਸਮੂਹ ਵਿੱਚ ਇਲਾਜ ਦੀ ਮੰਗ ਵਧੀ।
ਅਧਿਐਨ ਦੇ ਨਤੀਜਿਆਂ ਨੇ ਇਹ ਸਾਬਤ ਕੀਤਾ ਕਿ ਮਾਈਗ੍ਰੇਨ ਵਿੱਚ ਥੋੜ੍ਹਾ ਜਿਹਾ ਵੀ ਸੁਧਾਰ ਮਰੀਜ਼ ਦੀ ਸਰੀਰਕ ਕਾਰਜਪ੍ਰਣਾਲੀ, ਭਾਵਨਾਤਮਕ ਸਿਹਤ, ਕੰਮਕਾਜੀ ਸਮਰੱਥਾ, ਇਲਾਜ ਦੀ ਜ਼ਰੂਰਤ ਅਤੇ ਸਮਾਜਿਕ ਧਾਰਨਾ 'ਤੇ ਡੂੰਘਾ ਪ੍ਰਭਾਅ ਪਾਉਂਦਾ ਹੈ। ਇਸ ਗੱਲ ਨੇ ਇਕ ਵਾਰ ਫਿਰ ਸਮੇਂ 'ਤੇ ਮਾਈਗ੍ਰੇਨ ਦਾ ਸਹੀ ਨਿਦਾਨ ਅਤੇ ਇਲਾਜ ਨੂੰ ਬਿਹਤਰ ਬਣਾਉਣ ਦੀ ਲੋੜ ਨੂੰ ਰੇਖਾਂਕਿਤ ਕੀਤਾ ਹੈ, ਤਾਂ ਜੋ ਮਰੀਜ਼ਾਂ ਦੀ ਰੋਜ਼ਾਨਾ ਜ਼ਿੰਦਗੀ ਅਤੇ ਕੰਮ ਦੀ ਸਮਰੱਥਾ 'ਤੇ ਪੈਣ ਵਾਲੇ ਬੋਝ ਨੂੰ ਘਟਾਇਆ ਜਾ ਸਕੇ।
