Last Updated :
21 August 2026, 07:04 PM IST
ਯਮਨ ਅਤੇ ਸੋਮਾਲੀਆ ਦੇ ਤੱਟੀ ਖੇਤਰਾਂ ਵਿੱਚ ਸਮੁੰਦਰੀ ਲੁਟੇਰਿਆਂ ਵੱਲੋਂ ਕਬਜ਼ੇ ਵਿੱਚ ਲਏ ਗਏ ਦੋ ਵਪਾਰਕ ਜਹਾਜ਼ਾਂ ਵਿੱਚ ਸਵਾਰ 22 ਭਾਰਤੀ ਨਾਵਿਕ ਸੁਰੱਖਿਅਤ ਦੱਸੇ ਗਏ ਹਨ। ਵਿਦੇਸ਼ ਮੰਤਰਾਲੇ ਨੇ ਅਧਿਕਾਰਤ ਤੌਰ 'ਤੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ ਕਿ ਸਾਰੇ ਨਾਵਿਕ ਠੀਕ ਹਨ ਅਤੇ ਉਨ੍ਹਾਂ ਦੀ ਸੁਰੱਖਿਅਤ ਰਿਹਾਈ ਲਈ ਸਬੰਧਤ ਏਜੰਸੀਆਂ ਨਾਲ ਗੱਲਬਾਤ ਜਾਰੀ ਹੈ। ਇਹ ਘਟਨਾ ਪਿਛਲੇ ਕੁਝ ਦਿਨਾਂ ਵਿੱਚ ਵਾਪਰੀ ਹੈ, ਜਿਸ ਵਿੱਚ ਇੱਕ ਟੈਂਕਰ ਅਤੇ ਇੱਕ ਹੋਰ ਪੋਤ ਨੂੰ ਹਥਿਆਰਬੰਦ ਸਮੂਹਾਂ ਨੇ ਆਪਣੇ ਕਾਬੂ ਵਿੱਚ ਲਿਆ। ਭਾਰਤ ਸਰਕਾਰ ਨੇ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਰਾਹਤ ਕਾਰਜਾਂ ਨੂੰ ਤੇਜ਼ ਕਰ ਦਿੱਤਾ ਹੈ।
20 ਅਗਸਤ ਨੂੰ ਇਰੀਟ੍ਰੀਆ ਦੇ ਝੰਡੇ ਹੇਠ ਚੱਲ ਰਹੇ ਤੇਲ ਟੈਂਕਰ ‘ਐੱਮ.ਟੀ. ਸਿਬੂ 1' ਨੂੰ ਅਦਨ ਦੀ ਖਾੜੀ ਵਿੱਚ ਯਮਨ ਦੇ ਤੱਟ ਤੋਂ ਲਗਭਗ 30 ਸਮੁੰਦਰੀ ਮੀਲ ਦੂਰ ਹਥਿਆਰਬੰਦ ਲੁਟੇਰਿਆਂ ਨੇ ਆਪਣੇ ਕਬਜ਼ੇ ਵਿੱਚ ਲੈ ਲਿਆ। ਇਸ ਟੈਂਕਰ 'ਤੇ 16 ਭਾਰਤੀ ਨਾਵਿਕ ਸਵਾਰ ਸਨ। ਜਹਾਜ਼ ਦੇ ਚਾਲਕ ਦਲ ਵੱਲੋਂ ਮਦਦ ਦੀ ਪੁਕਾਰ ਮਿਲਣ ਤੋਂ ਬਾਅਦ ਯੂ.ਕੇ. ਮੈਰੀਟਾਈਮ ਟ੍ਰੇਡ ਆਪਰੇਸ਼ਨਜ਼ (ਯੂ.ਕੇ.ਐੱਮ.ਟੀ.ਓ.) ਕੇਂਦਰ ਨੇ ਇਸ ਘਟਨਾ ਦੀ ਪੁਸ਼ਟੀ ਕੀਤੀ। ਜਹਾਜ਼ ਨੂੰ ਫਿਰ ਸੋਮਾਲੀਆ ਵੱਲ ਮੋੜ ਦਿੱਤਾ ਗਿਆ, ਜਿਸ ਤੋਂ ਬਾਅਦ ਭਾਰਤੀ ਅਧਿਕਾਰੀ ਲਗਾਤਾਰ ਨਿਗਰਾਨੀ ਕਰ ਰਹੇ ਹਨ।
ਦੂਜੀ ਘਟਨਾ 17 ਅਗਸਤ ਨੂੰ ਸੋਮਾਲੀਆ ਦੇ ਪੁੰਟਲੈਂਡ ਤੱਥ ਦੇ ਨੇੜੇ ਵਾਪਰੀ, ਜਿੱਥੇ ਕੈਮਰੂਨ ਝੰਡੇ ਵਾਲੇ ਜਹਾਜ਼ ‘ਐੱਮ/ਵੀ ਲੁਤੁਫ਼' ਨੂੰ ਅਗਵਾ ਕਰ ਲਿਆ ਗਿਆ। ਇਸ ਜਹਾਜ਼ 'ਤੇ ਕੁੱਲ 10 ਚਾਲਕ ਦਲ ਦੇ ਮੈਂਬਰ ਸਨ, ਜਿਨ੍ਹਾਂ ਵਿੱਚੋਂ 6 ਭਾਰਤੀ ਸਨ। ਖੁਫੀਆ ਜਾਣਕਾਰੀ ਮੁਤਾਬਕ, ਇਹ ਜਹਾਜ਼ ਮੋਗਾਦਿਸ਼ੂ ਸਥਿਤ ਤੁਰਕੀ ਦੇ ਮਿਲਟਰੀ ਟ੍ਰੇਨਿੰਗ ਸੈਂਟਰ ਲਈ ਸੰਚਾਰ ਉਪਕਰਣ, ਸੈਟੇਲਾਈਟ ਸਾਜ਼ੋ-ਸਾਮਾਨ ਅਤੇ ਹਥਿਆਰ ਲੈ ਕੇ ਜਾ ਰਿਹਾ ਸੀ। ਅੱਠ ਲੁਟੇਰਿਆਂ ਨੇ ਇਸ ਨੂੰ ਪੁੰਟਲੈਂਡ ਦੇ ਡੰਗੋਰੋਯੋ ਜ਼ਿਲ੍ਹੇ ਵਿੱਚ ਗਾਰਮਾਲ ਨੇੜੇ ਤੱਥ ਵੱਲ ਮੋੜ ਲਿਆ। ਮੰਨਿਆ ਜਾ ਰਿਹਾ ਹੈ ਕਿ ਇਹ ਲੁਟੇਰੇ ਉਸੇ ਗਰੁੱਪ ਨਾਲ ਸਬੰਧਤ ਹਨ, ਜਿਸ ਨੇ ਅਪ੍ਰੈਲ ਵਿੱਚ ‘ਐੱਮ/ਵੀ ਸਵਾਰਡ’ ਨੂੰ ਵੀ ਅਗਵਾ ਕੀਤਾ ਸੀ।
ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਰਣਧੀਰ ਜੈਸਵਾਲ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਸਰਕਾਰ ਨੇ ਇਸ ਮਾਮਲੇ ਨੂੰ ਤਰਜੀਹ ਦਿੱਤੀ ਹੈ ਅਤੇ ਸਾਰੇ ਭਾਰਤੀ ਨਾਵਿਕਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਕਦਮ ਚੁੱਕੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਦੋਵੇਂ ਜਹਾਜ਼ ਵੱਖ-ਵੱਖ ਖੇਤਰਾਂ ਵਿੱਚ ਹਨ, ਪਰ ਸਾਡੀ ਟੀਮ ਸਥਾਨਕ ਅਧਿਕਾਰੀਆਂ ਅਤੇ ਅੰਤਰਰਾਸ਼ਟਰੀ ਸਮੁੰਦਰੀ ਏਜੰਸੀਆਂ ਨਾਲ ਤਾਲਮੇਲ ਕਰ ਰਹੀ ਹੈ। ਹੁਣ ਤੱਕ ਲੁਟੇਰਿਆਂ ਵੱਲੋਂ ਕਿਸੇ ਕਿਸਮ ਦੀ ਕੋਈ ਹਿੰਸਕ ਕਾਰਵਾਈ ਦੀ ਖਬਰ ਨਹੀਂ ਹੈ, ਜਿਸ ਨਾਲ ਰਾਹਤ ਦਾ ਸਾਹ ਲਿਆ ਗਿਆ ਹੈ।
ਹਾਲ ਦੇ ਸਮੇਂ ਵਿੱਚ ਅਦਨ ਦੀ ਖਾੜੀ ਅਤੇ ਸੋਮਾਲੀਆ ਤੱਥ ਦੇ ਆਸ-ਪਾਸ ਸਮੁੰਦਰੀ ਲੁਟੇਰੇ ਦੀਆਂ ਵਾਪਰਦੀਆਂ ਘਟਨਾਵਾਂ ਨੇ ਅੰਤਰਰਾਸ਼ਟਰੀ ਸਮੁੰਦਰੀ ਸੁਰੱਖਿਆ ਨੂੰ ਚੁਣੌਤੀ ਦਿੱਤੀ ਹੈ। ਭਾਰਤ ਨੇ ਸਮੁੰਦਰੀ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਅਤੇ ਭਵਿੱਖ ਵਿੱਚ ਅਜਿਹੀਆਂ ਘਟਨਾਵਾਂ ਨੂੰ ਰੋਕਣ ਲਈ ਖੇਤਰੀ ਸਮੁੰਦਰੀ ਸਹਿਯੋਗ ਵਧਾਉਣ ਦੀ ਗੱਲ ਕੀਤੀ ਹੈ। ਇਸ ਦੇ ਨਾਲ ਹੀ, ਵਿਦੇਸ਼ ਮੰਤਰਾਲੇ ਨੇ ਨਾਵਿਕਾਂ ਦੇ ਪਰਿਵਾਰਾਂ ਨਾਲ ਸੰਪਰਕ ਵੀ ਸਥਾਪਤ ਕੀਤਾ ਹੈ ਤਾਂ ਜੋ ਉਨ੍ਹਾਂ ਨੂੰ ਹਰ ਸੰਭਵ ਸਹਾਇਤਾ ਪ੍ਰਦਾਨ ਕੀਤੀ ਜਾ ਸਕੇ।
