ਪੀਰੀਅਡਸ ਦੌਰਾਨ ਹੋਣ ਵਾਲੀਆਂ ਇਹ ਛੋਟੀਆਂ ਗਲਤੀਆਂ ਬਣ ਸਕਦੀਆਂ ਹਨ ਵੱਡੀ ਮੁਸੀਬਤ

ਪੀਰੀਅਡਸ ਦੌਰਾਨ ਸਫ਼ਾਈ ਦਾ ਖ਼ਾਸ ਧਿਆਨ ਰੱਖਣਾ ਬਹੁਤ ਜ਼ਰੂਰੀ ਹੁੰਦਾ ਹੈ। ਪਰ ਕਈ ਕੁੜੀਆਂ ਅਣਜਾਣੇ ਵਿੱਚ ਅਜਿਹੀਆਂ ਗਲਤੀਆਂ ਕਰ ਬੈਠਦੀਆਂ ਹਨ, ਜੋ ਇਨਫੈਕਸ਼ਨ ਅਤੇ ਹੋਰ ਸਿਹਤ ਸਮੱਸਿਆਵਾਂ ਦਾ ਕਾਰਨ ਬਣ ਸਕਦੀਆਂ ਹਨ। ਮਾਹਿਰ ਵੀ ਇਨ੍ਹਾਂ ਆਦਤਾਂ ਤੋਂ ਬਚਣ ਦੀ ਸਲਾਹ ਦਿੰਦੇ ਹਨ।

ਕਈ ਕੁੜੀਆਂ ਪੀਰੀਅਡਸ ਦੌਰਾਨ ਵੱਧ ਸਫ਼ਾਈ ਰੱਖਣ ਦੀ ਕੋਸ਼ਿਸ਼ ਵਿੱਚ ਬਾਰ-ਬਾਰ ਇੰਟੀਮੇਟ ਵਾਸ਼ ਵਰਤਦੀਆਂ ਹਨ। ਪਰ ਮਾਹਿਰਾਂ ਮੁਤਾਬਕ ਇਸ ਦਾ ਜ਼ਿਆਦਾ ਇਸਤੇਮਾਲ ਵਜਾਈਨਾ ਦਾ ਕੁਦਰਤੀ pH ਸੰਤੁਲਨ ਖਰਾਬ ਕਰ ਸਕਦਾ ਹੈ। ਇਸ ਨਾਲ ਜਲਨ, ਖਾਰਸ਼ ਅਤੇ ਇਨਫੈਕਸ਼ਨ ਦਾ ਖ਼ਤਰਾ ਵੱਧ ਸਕਦਾ ਹੈ। ਸਰੀਰ ਦਾ ਆਪਣਾ ਸੁਰੱਖਿਆ ਤੰਤਰ ਹੁੰਦਾ ਹੈ ਜਿਸ ਨੂੰ ਬੇਵਜ੍ਹਾ ਪ੍ਰਭਾਵਿਤ ਨਹੀਂ ਕਰਨਾ ਚਾਹੀਦਾ। ਇਸ ਲਈ ਸਿਰਫ਼ ਲੋੜ ਪੈਣ 'ਤੇ ਹੀ ਇਸ ਦਾ ਇਸਤੇਮਾਲ ਕਰਨਾ ਚਾਹੀਦਾ ਹੈ।

ਇੱਕੋ ਪੈਡ ਲੰਬੇ ਸਮੇਂ ਤੱਕ ਲਗਾਈ ਰੱਖਣਾ

ਕਈ ਵਾਰ ਰਾਤ ਸਮੇਂ ਜਾਂ ਰੁਝੇ ਹੋਣ ਕਾਰਨ ਕੁੜੀਆਂ ਇੱਕੋ ਪੈਡ ਨੂੰ ਕਈ ਘੰਟਿਆਂ ਤੱਕ ਨਹੀਂ ਬਦਲਦੀਆਂ। ਇਹ ਆਦਤ ਬੈਕਟੀਰੀਆ ਦੇ ਵਾਧੇ ਨੂੰ ਉਤਸ਼ਾਹਿਤ ਕਰ ਸਕਦੀ ਹੈ। ਇਸ ਨਾਲ ਸਕਿਨ 'ਤੇ ਰੈਸ਼, ਖਾਰਸ਼ ਅਤੇ ਇਨਫੈਕਸ਼ਨ ਹੋਣ ਦਾ ਖ਼ਤਰਾ ਵੱਧ ਜਾਂਦਾ ਹੈ। ਮਾਹਿਰਾਂ ਅਨੁਸਾਰ ਪੈਡ ਨੂੰ ਨਿਯਮਤ ਸਮੇਂ 'ਤੇ ਬਦਲਣਾ ਚਾਹੀਦਾ ਹੈ। ਭਾਵੇਂ ਫ਼ਲੋ ਘੱਟ ਹੀ ਕਿਉਂ ਨਾ ਹੋਵੇ, ਸਫ਼ਾਈ ਨਾਲ ਸਮਝੌਤਾ ਨਹੀਂ ਕਰਨਾ ਚਾਹੀਦਾ।

ਪਾਣੀ ਘੱਟ ਪੀਣ ਦੀ ਆਦਤ

ਕੁਝ ਮਹਿਲਾਵਾਂ ਨੂੰ ਲੱਗਦਾ ਹੈ ਕਿ ਵੱਧ ਪਾਣੀ ਪੀਣ ਨਾਲ ਬਲੋਟਿੰਗ ਵਧੇਗੀ, ਇਸ ਲਈ ਉਹ ਪਾਣੀ ਘੱਟ ਪੀਂਦੀਆਂ ਹਨ। ਪਰ ਅਸਲ ਵਿੱਚ ਘੱਟ ਪਾਣੀ ਪੀਣ ਨਾਲ ਡੀਹਾਈਡ੍ਰੇਸ਼ਨ ਦੀ ਸਮੱਸਿਆ ਹੋ ਸਕਦੀ ਹੈ। ਇਸ ਕਾਰਨ ਸਿਰਦਰਦ, ਥਕਾਵਟ ਅਤੇ ਕਬਜ਼ ਵਰਗੀਆਂ ਪਰੇਸ਼ਾਨੀਆਂ ਵਧ ਸਕਦੀਆਂ ਹਨ। ਸਰੀਰ ਨੂੰ ਹਾਈਡਰੇਟ ਰੱਖਣਾ ਪੀਰੀਅਡਸ ਦੌਰਾਨ ਬਹੁਤ ਮਹੱਤਵਪੂਰਨ ਹੁੰਦਾ ਹੈ। ਇਸ ਨਾਲ ਸਰੀਰ ਵਧੀਆ ਢੰਗ ਨਾਲ ਕੰਮ ਕਰਦਾ ਹੈ ਅਤੇ ਅਸਹਜਤਾ ਵੀ ਘੱਟ ਹੁੰਦੀ ਹੈ।

ਗਿੱਲੇ ਜਾਂ ਸਿੰਥੈਟਿਕ ਅੰਡਰਗਾਰਮੈਂਟ ਪਹਿਨਣਾ

ਪੀਰੀਅਡਸ ਦੌਰਾਨ ਨਮੀ ਆਮ ਨਾਲੋਂ ਵੱਧ ਹੁੰਦੀ ਹੈ। ਜੇਕਰ ਲੰਬੇ ਸਮੇਂ ਤੱਕ ਗਿੱਲੇ ਜਾਂ ਸਿੰਥੈਟਿਕ ਕੱਪੜੇ ਪਹਿਨੇ ਜਾਣ ਤਾਂ ਫੰਗਲ ਅਤੇ ਬੈਕਟੀਰੀਅਲ ਇਨਫੈਕਸ਼ਨ ਦਾ ਖ਼ਤਰਾ ਵਧ ਸਕਦਾ ਹੈ। ਮਾਹਿਰ ਕਾਟਨ ਦੇ ਅੰਡਰਗਾਰਮੈਂਟ ਪਹਿਨਣ ਦੀ ਸਲਾਹ ਦਿੰਦੇ ਹਨ। ਇਹ ਹਵਾ ਨੂੰ ਆਸਾਨੀ ਨਾਲ ਗੁਜ਼ਰਨ ਦਿੰਦੇ ਹਨ ਅਤੇ ਨਮੀ ਘੱਟ ਰੱਖਦੇ ਹਨ। ਇਸ ਨਾਲ ਸਕਿਨ ਵੀ ਆਰਾਮਦਾਇਕ ਮਹਿਸੂਸ ਕਰਦੀ ਹੈ।

ਹੱਥ ਸਾਫ਼ ਕੀਤੇ ਬਿਨਾਂ ਪੈਡ ਬਦਲਣਾ

ਜਲਦੀ-ਜਲਦੀ ਵਿੱਚ ਕਈ ਕੁੜੀਆਂ ਪੈਡ ਬਦਲਣ ਤੋਂ ਪਹਿਲਾਂ ਜਾਂ ਬਾਅਦ ਹੱਥ ਨਹੀਂ ਧੋਂਦੀਆਂ। ਇਹ ਇੱਕ ਵੱਡੀ ਗਲਤੀ ਹੋ ਸਕਦੀ ਹੈ। ਹੱਥਾਂ 'ਤੇ ਮੌਜੂਦ ਬੈਕਟੀਰੀਆ ਸੰਵੇਦਨਸ਼ੀਲ ਹਿੱਸਿਆਂ ਤੱਕ ਪਹੁੰਚ ਕੇ ਇਨਫੈਕਸ਼ਨ ਦਾ ਕਾਰਨ ਬਣ ਸਕਦੇ ਹਨ। ਇਸ ਲਈ ਹਰ ਵਾਰ ਪੈਡ ਬਦਲਣ ਤੋਂ ਪਹਿਲਾਂ ਅਤੇ ਬਾਅਦ ਹੱਥਾਂ ਨੂੰ ਸਾਬਣ ਨਾਲ ਚੰਗੀ ਤਰ੍ਹਾਂ ਧੋਣਾ ਚਾਹੀਦਾ ਹੈ। ਇਹ ਇੱਕ ਸਧਾਰਨ ਪਰ ਬਹੁਤ ਪ੍ਰਭਾਵਸ਼ਾਲੀ ਆਦਤ ਹੈ।

ਪੀਰੀਅਡਸ ਦੌਰਾਨ ਸਫ਼ਾਈ ਕਿਉਂ ਜ਼ਰੂਰੀ?

ਪੀਰੀਅਡਸ ਕੋਈ ਬਿਮਾਰੀ ਨਹੀਂ ਸਗੋਂ ਸਰੀਰ ਦੀ ਇੱਕ ਕੁਦਰਤੀ ਪ੍ਰਕਿਰਿਆ ਹੈ। ਇਸ ਦੌਰਾਨ ਸਹੀ ਸਫ਼ਾਈ ਅਤੇ ਸਿਹਤਮੰਦ ਆਦਤਾਂ ਅਪਣਾਉਣ ਨਾਲ ਕਈ ਸਮੱਸਿਆਵਾਂ ਤੋਂ ਬਚਿਆ ਜਾ ਸਕਦਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਛੋਟੀਆਂ-ਛੋਟੀਆਂ ਸਾਵਧਾਨੀਆਂ ਭਵਿੱਖ ਵਿੱਚ ਵੱਡੀਆਂ ਸਿਹਤ ਸਮੱਸਿਆਵਾਂ ਨੂੰ ਰੋਕ ਸਕਦੀਆਂ ਹਨ। ਇਸ ਲਈ ਪੀਰੀਅਡਸ ਨੂੰ ਲੈ ਕੇ ਜਾਗਰੂਕਤਾ ਅਤੇ ਸਹੀ ਜਾਣਕਾਰੀ ਬਹੁਤ ਜ਼ਰੂਰੀ ਹੈ। ਸਫ਼ਾਈ ਹੀ ਸਿਹਤਮੰਦ ਜੀਵਨ ਦੀ ਸਭ ਤੋਂ ਵੱਡੀ ਕੁੰਜੀ ਹੈ।