Last Updated :
22 August 2026, 10:37 AM IST
Courtesy: ai image
ਰਾਮਗੜ੍ਹ: ਝਾਰਖੰਡ ਦੇ ਰਾਮਗੜ੍ਹ ਜਿਲ੍ਹੇ 'ਚ ਹਾਲ ਹੀ 'ਚ ਇੱਕ ਦਰਦਨਾਕ ਹਾਦਸਾ ਵਾਪਰਿਆ। ਬਰਕਾਕਾਨਾ ਦੇ ਹੇਹਲ 'ਚ ਸੀਮੇਂਟ ਫੈਕਟਰੀ 'ਚ ਵੱਡਾ ਧਮਾਕਾ ਹੋਇਆ, ਜਿਸ ਵਿੱਚ ਤਿੰਨ ਇੰਜੀਨਿਅਰਾਂ ਦੀ ਦਰਦਨਾਕ ਮੌਤ ਹੋ ਗਈ, ਜਦੋਂ ਕਿ ਇੱਕ ਇੰਜੀਨਿਅਰ ਤਰੁਣ ਰਵਾਨੀ ਗੰਭੀਰ ਤੌਰ 'ਤੇ ਜਖ਼ਮੀ ਹੈ। ਉਸਨੂੰ ਤੁਰੰਤ ਇਲਾਜ ਲਈ ਰਾਂਚੀ ਦੇ ਇੱਕ ਨਿੱਜੀ ਹਸਪਤਾਲ 'ਚ ਭਰਤੀ ਕਰਾਇਆ ਗਿਆ।
ਜਾਣਕਾਰੀ ਮੁਤਾਬਕ, ਇਹ ਹਾਦਸਾ ਛਿਨ ਮਸਤਿਕੇ ਸੀਮੇਂਟ ਐਂਡ ਇਸਪਾਤ ਫੈਕਟਰੀ 'ਚ ਸ਼ੁੱਕਰਵਾਰ ਦੇਰ ਰਾਤ ਵਾਪਰਿਆ। ਬਲਾਸਟ ਪਾਵਰ ਪਲਾਂਟ ਦੇ ਟਰਬਾਈਨ ਸੈਕਸ਼ਨ 'ਚ ਹੋਇਆ।
ਦੱਸਿਆ ਜਾ ਰਿਹਾ ਹੈ ਕਿ ਟਰਬਾਈਨ ਦੇ ਓਵਰਸਪੀਡ ਪੈਨਲ 'ਚ ਓਵਰਹੀਟਿੰਗ ਦੀ ਸਮੱਸਿਆ ਪੈਦਾ ਹੋਈ ਸੀ। ਇਸ ਮਗਰੋਂ ਸੁਰੱਖਿਆ ਉਪਕਰਣਾਂ ਦੇ ਕੰਮ ਨਾ ਕਰਨ ਦੀ ਗੱਲ ਸਾਹਮਣੇ ਆਈ। ਇਸੇ ਦੌਰਾਨ ਅਚਾਨਕ ਤੇਜ਼ ਧਮਾਕਾ ਹੋਇਆ। ਇਹ ਧਮਾਕਾ ਇੰਨਾ ਜੋਰਦਾਰ ਸੀ ਕਿ ਉੱਥੇ ਕੰਮ ਕਰਨ ਵਾਲੇ ਤਿੰਨ ਇੰਜੀਨਿਅਰ ਇਸਦੀ ਅੱਗ ਦੀ ਚਪੇਟ ਵਿੱਚ ਆ ਗਏ ਤੇ ਉਨ੍ਹਾਂ ਦੀ ਮੌਕੇ 'ਤੇ ਮੌਤ ਹੋ ਗਈ। ਇਸ ਘਟਨਾ ਤੋਂ ਬਾਅਦ ਇਲਾਕੇ 'ਚ ਸਨਸਨੀ ਫੈਲ ਗਈ।
ਇਸ ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਦੇਰ ਰਾਤ ਪੁਲਿਸ ਮੌਕੇ 'ਤੇ ਪਹੁੰਚੀ। ਰਾਮਗੜ੍ਹ ਦੇ ਚਾਰ-ਪੰਜ ਦਮਕਲ ਬੁਲਾ ਕੇ ਅੱਗ 'ਤੇ ਕਾਬੂ ਪਾਇਆ ਗਿਆ। ਪੁਲਿਸ ਹੁਣ ਇਸ ਮਾਮਲੇ ਦੀ ਜਾਂਚ 'ਚ ਜੁੱਟੀ ਹੋਈ ਹੈ।
ਇਨ੍ਹਾਂ ਮ੍ਰਿਤਕ ਇੰਜੀਨਿਅਰਾਂ ਵਿੱਚ ਰਾਂਚੀ ਦੇ ਫੈਕਟਰੀ ਸ਼ਿਫਟ ਇੰਚਾਰਜ ਸੰਜੀਵ ਕੁਮਾਰ ਕੇਸਰੀ (50 ਸਾਲ), ਬੋਕਾਰੋ ਦੇ ਜਗੇਸ਼ਵਰ ਵਿਹਾਰ ਤੋਂ ਵਿਨੀਤ ਮਹਤੋ (25) ਅਤੇ ਗੜ੍ਹਵਾ ਤੋਂ ਅਭਿਸ਼ੇਕ ਪਾਂਡੇ (24) ਸ਼ਾਮਲ ਹਨ।
ਇਸ ਬਲਾਸਟ ਤੋਂ ਬਾਅਦ ਉੱਥੇ ਕੰਮ ਕਰਨ ਵਾਲੇ ਮਜ਼ਦੂਰਾਂ ਨੇ ਫੈਕਟਰੀ ਪ੍ਰਬੰਧਨ ਉੱਤੇ ਕਈ ਦੋਸ਼ ਲਾਏ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸੁਰੱਖਿਆ ਨਿਯਮਾਂ 'ਚ ਅਣਗਹਿਲੀ ਕੀਤੀ ਗਈ। ਸੁਰੱਖਿਆ 'ਚ ਲਾਪਰਵਾਹੀ ਕਾਰਨ ਇਹ ਵੱਡਾ ਹਾਦਸਾ ਵਾਪਰਿਆ ਹੈ। ਇਸ ਘਟਨਾ ਤੋਂ ਬਾਅਦ ਭੜਕੇ ਮਜ਼ਦੂਰਾਂ ਨੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ ਮੁਆਵਜ਼ਾ ਦੇਣ ਦੀ ਮੰਗ ਕੀਤੀ ਹੈ। ਇਸਦੇ ਨਾਲ ਹੀ ਉਨ੍ਹਾਂ ਨਿਰਪੱਖ ਜਾਂਚ ਦੀ ਮੰਗ ਕੀਤੀ ਹੈ।
