China Door ਨਾਲ ਵੱਢੀ ਗਈ ਗਲੇ ਦੀ ਨਾੜ, 6 ਸਾਲ ਦੀ ਬੱਚੀ ਦੀ ਮੌਤ, ਪਿਤਾ ਨਾਲ ਬਾਈਕ 'ਤੇ ਬੈਠਕੇ ਜਾ ਰਹੀ ਸੀ 

ਪੰਜਾਬ ਸਰਕਾਰ ਨੇ ਬੇਸ਼ੱਕ ਚਾਈਨਾ ਡੋਰ ਤੇ ਸਖਤੀ ਕੀਤੀ ਹੈ ਪਰ ਹਾਲੇ ਵੀ ਇਸਦੀ ਵਿਕਰੀ ਤੇ ਪੂਰੀ ਤਰ੍ਹਾਂ ਨਾਲ ਰੁਕੀ ਨਹੀਂ ਹੈ। ਤੇ ਜਿਹੜਾ ਇਸਦੀ ਵਿਕਰੀ ਕਰਦਾ ਹੋਇਆ ਫੜ੍ਹਿਆ ਗਿਆ ਉਸਨੂੰ 5 ਸਾਲ ਦੀ ਕੈਦ ਤੇ ਇੱਕ ਲੱਖ ਰੁਪਿਆ ਜ਼ੁਰਮਾਨ ਦੇਣਾ ਤੈਅ ਕੀਤਾ ਗਿਆ। ਕਈ ਸ਼ਰਾਰਤੀ ਅਨਸਰ ਹਾਲੇ ਵੀ ਇਸਨੂੰ ਵੇਚ ਰਹੇ ਹਨ। ਏਸੇ ਦਾ ਹੀ ਨਤੀਜਾ ਹੈ ਕਿ ਅੰਮ੍ਰਿਤਸਰ ਵਿੱਚ ਚਾਈਨਾ ਡੋਰ ਨਾਲ ਇੱਕ 6 ਸਾਲ ਦੀ ਬੱਚੀ ਦੀ ਮੌਤ ਹੋਣ ਦੀ ਖਬਰ ਸਾਹਮਣੇ ਆਈ ਹੈ।   

ਅੰਮ੍ਰਿਤਸਰ। ਗੁਰੂ ਨਗਰੀ ਤੋਂ ਇੱਕ ਬਹੁਤ ਹੀ ਮੰਦਭਾਗੀ ਖਬਰ ਸਾਹਮਣੇ ਆਈ ਹੈ, ਇੱਥੇ ਬਾਈਕ ਤੇ ਜਾ ਰਹੀ ਇੱਕ 6 ਸਾਲ ਦੀ ਬੱਚੀ ਦੀ ਚਾਈਨਾ ਡੋਰ ਨਾਲ ਗਲੇ ਦੀ ਨਾੜ ਵੱਢੀ ਗਈ ਜਿਸ ਕਾਰਨ ਉਸਦੀ ਮੌਤ ਹੋ ਗਈ। ਅੰਮ੍ਰਿਤਸਰ ਦੇ ਬਟਾਲਾ ਰੋਡ ਦੇ ਨੇੜੇ ਬੀਆਰਟੀਐੱਸ ਫਲਾਈਓਵਰ ਨੇੜੇ ਦੀ ਇਹ ਘਟਨਾ ਦੱਸੀ ਜਾ ਰਹੀ ਹੈ।  ਪੀੜਤਾ ਦੀ ਪਛਾਣ ਖੁਸ਼ੀ ਵਜੋਂ ਹੋਈ ਹੈ, ਜਦੋਂ ਇਹ ਘਟਨਾ ਵਾਪਰੀ, ਉਹ ਆਪਣੇ ਮਾਪਿਆਂ ਨਾਲ ਬਾਈਕ 'ਤੇ ਢਪਈ ਖੇਤਰ ਤੋਂ ਵੇਰਕਾ ਵੱਲ ਜਾ ਰਹੀ ਸੀ। ਜਦੋਂ ਤੱਕ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ ਤਾਂ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਮ੍ਰਿਤਕ ਬੱਚੀ ਦੇ ਪਿਤਾ ਮਨੀ ਸਿੰਘ ਨੇ ਦੱਸਿਆ ਕਿ ਉਹ ਆਪਣੀ ਪਤਨੀ ਕੋਮਲ ਕੌਰ ਅਤੇ ਬੇਟੀ ਖੁਸ਼ੀ ਨਾਲ ਵੇਰਕਾ ਵਾਪਸ ਆ ਰਿਹਾ ਸੀ ਅਤੇ ਮੈਟਰੋ ਬੱਸ ਦੇ ਪੁਲ 'ਤੇ ਜਾ ਰਿਹਾ ਸੀ ਕਿ ਪਤੰਗ ਦੀ ਤਾਰ ਆਪਸ 'ਚ ਫਸ ਗਈ ਅਤੇ ਉਸ ਦਾ ਗਲਾ ਕੱਟਿਆ ਗਿਆ। ਉਸ ਨੇ ਕਿਹਾ ਕਿ ਉਸ ਨੂੰ ਬਹੁਤ ਜ਼ਿਆਦਾ ਖੂਨ ਵਹਿਣ ਲੱਗਾ।

ਪੰਜਾਬ ਸਰਕਾਰ ਨੇ ਬਣਾਇਆ ਇਹ ਸਖਤ ਕਾਨੂੰਨ

ਚਾਈਨਾ ਸਟ੍ਰਿੰਗ ਦੀਆਂ ਪਤੰਗਾਂ ਉਡਾਉਣ, ਵੇਚਣ ਅਤੇ ਖਰੀਦਣ ਵਾਲਿਆਂ ਨੂੰ ਪੰਜਾਬ ਸਰਕਾਰ 5 ਸਾਲ ਦੀ ਕੈਦ ਅਤੇ 1 ਲੱਖ ਰੁਪਏ ਜੁਰਮਾਨਾ ਕਰੇਗੀ। ਸਰਕਾਰ ਨੇ ਅਜਿਹੇ ਲੋਕਾਂ ਨੂੰ ਸਖ਼ਤ ਚੇਤਾਵਨੀ ਦਿੱਤੀ ਹੈ। ਗੌਰਤਲਬ ਹੈ ਕਿ ਲੋਹੜੀ, ਮਕਰ ਸੰਕ੍ਰਾਂਤੀ ਅਤੇ ਬਸੰਤ ਪੰਚਮੀ ਦੇ ਤਿਉਹਾਰਾਂ ਦੀ ਆਮਦ ਦੇ ਨਾਲ ਹੀ ਪਤੰਗ ਉਡਾਉਣ 'ਤੇ ਮਾਰੂ ਚੀਨੀ ਤਾਰਾਂ ਦੀ ਵਰਤੋਂ ਕਾਰਨ ਬੇਕਸੂਰ ਮਨੁੱਖੀ ਜਾਨਾਂ ਅਤੇ ਬੇਜ਼ੁਬਾਨ ਪਸ਼ੂ-ਪੰਛੀਆਂ ਦੇ ਸਿਰ 'ਤੇ ਇੱਕ ਵਾਰ ਫਿਰ ਮੌਤ ਦਾ ਡਰ ਮੰਡਰਾ ਰਿਹਾ ਹੈ।