Last Updated :
29 June 2026, 10:18 AM IST
Courtesy: @ICC
ਨਵੀਂ ਦਿੱਲੀ: ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ (WTC) 2025-27 ਦੀ ਅੰਕ ਸੂਚੀ ਵਿੱਚ ਵੈਸਟਇੰਡੀਜ਼ ਦੀ ਸ਼ਾਨਦਾਰ ਜਿੱਤ ਤੋਂ ਬਾਅਦ ਵੱਡਾ ਬਦਲਾਅ ਦੇਖਣ ਨੂੰ ਮਿਲਿਆ ਹੈ। ਪਹਿਲੇ ਟੈਸਟ ਵਿੱਚ ਵੈਸਟਇੰਡੀਜ਼ ਨੇ ਸ਼੍ਰੀਲੰਕਾ ਨੂੰ ਪਾਰੀ ਅਤੇ 217 ਦੌੜਾਂ ਦੇ ਵੱਡੇ ਫਰਕ ਨਾਲ ਹਰਾ ਕੇ ਨਾ ਸਿਰਫ਼ ਇਸ ਚੱਕਰ ਦੀ ਆਪਣੀ ਪਹਿਲੀ ਜਿੱਤ ਦਰਜ ਕੀਤੀ, ਸਗੋਂ ਭਾਰਤੀ ਟੀਮ ਲਈ ਵੀ ਫਾਇਦੇਮੰਦ ਸਥਿਤੀ ਬਣਾਈ। ਇਸ ਨਤੀਜੇ ਤੋਂ ਬਾਅਦ ਭਾਰਤ ਅੰਕ ਸੂਚੀ ਵਿੱਚ ਇੱਕ ਸਥਾਨ ਉੱਪਰ ਚੜ੍ਹ ਗਿਆ ਹੈ, ਜਦਕਿ ਸ਼੍ਰੀਲੰਕਾ ਨੂੰ ਵੱਡਾ ਨੁਕਸਾਨ ਝੱਲਣਾ ਪਿਆ ਹੈ।
ਐਂਟੀਗਾ ਦੇ ਸਰ ਵਿਵੀਅਨ ਰਿਚਰਡਜ਼ ਸਟੇਡੀਅਮ ਵਿੱਚ ਖੇਡੇ ਗਏ ਦੋ ਟੈਸਟ ਮੈਚਾਂ ਦੀ ਲੜੀ ਦੇ ਪਹਿਲੇ ਮੁਕਾਬਲੇ ਵਿੱਚ ਮੇਜ਼ਬਾਨ ਵੈਸਟਇੰਡੀਜ਼ ਨੇ ਹਰ ਵਿਭਾਗ ਵਿੱਚ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਕੀਤਾ। ਪਹਿਲੀ ਪਾਰੀ ਵਿੱਚ 318 ਦੌੜਾਂ ਦੀ ਵੱਡੀ ਬੜ੍ਹਤ ਬਣਾਉਣ ਤੋਂ ਬਾਅਦ ਕੈਰੇਬੀਆਈ ਗੇਂਦਬਾਜ਼ਾਂ ਨੇ ਸ਼੍ਰੀਲੰਕਾ ਦੀ ਦੂਜੀ ਪਾਰੀ ਨੂੰ ਸਿਰਫ਼ 101 ਦੌੜਾਂ 'ਤੇ ਸਮੇਟ ਦਿੱਤਾ ਅਤੇ ਪਾਰੀ ਨਾਲ ਨਾਲ 217 ਦੌੜਾਂ ਦੇ ਵੱਡੇ ਅੰਤਰ ਨਾਲ ਮੈਚ ਆਪਣੇ ਨਾਮ ਕਰ ਲਿਆ।
ਵੈਸਟਇੰਡੀਜ਼ ਦੀ ਇਸ ਯਾਦਗਾਰ ਜਿੱਤ ਵਿੱਚ ਤਜਰਬੇਕਾਰ ਤੇਜ਼ ਗੇਂਦਬਾਜ਼ ਕੇਮਾਰ ਰੋਚ ਨੇ ਅਹਿਮ ਭੂਮਿਕਾ ਨਿਭਾਈ। ਉਨ੍ਹਾਂ ਨੇ ਦੂਜੀ ਪਾਰੀ ਵਿੱਚ 11 ਓਵਰਾਂ ਦੌਰਾਨ 51 ਦੌੜਾਂ ਦੇ ਕੇ ਚਾਰ ਵਿਕਟਾਂ ਹਾਸਲ ਕੀਤੀਆਂ। ਇਸ ਤੋਂ ਇਲਾਵਾ ਜੇਡਨ ਸੀਲਜ਼ ਨੇ ਤਿੰਨ ਵਿਕਟਾਂ ਆਪਣੇ ਨਾਮ ਕਰਕੇ ਟੀਮ ਦੀ ਜਿੱਤ 'ਤੇ ਮੋਹਰ ਲਗਾਈ।
ਇਹ WTC 2025-27 ਚੱਕਰ ਵਿੱਚ ਵੈਸਟਇੰਡੀਜ਼ ਦੀ ਪਹਿਲੀ ਜਿੱਤ ਹੈ। ਟੀਮ ਹੁਣ ਤੱਕ ਨੌਂ ਟੈਸਟ ਖੇਡ ਚੁੱਕੀ ਹੈ, ਜਿਨ੍ਹਾਂ ਵਿੱਚ ਇੱਕ ਜਿੱਤ, ਇੱਕ ਡਰਾਅ ਅਤੇ ਸੱਤ ਹਾਰਾਂ ਸ਼ਾਮਲ ਹਨ। ਇਸ ਨਤੀਜੇ ਤੋਂ ਬਾਅਦ ਵੈਸਟਇੰਡੀਜ਼ ਅੰਕ ਸੂਚੀ ਵਿੱਚ ਅੱਠਵੇਂ ਸਥਾਨ 'ਤੇ ਪਹੁੰਚ ਗਈ ਹੈ।
ਦੂਜੇ ਪਾਸੇ ਸ਼੍ਰੀਲੰਕਾ ਨੂੰ ਇਸ WTC ਚੱਕਰ ਦੀ ਪਹਿਲੀ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਟੀਮ ਨੇ ਹੁਣ ਤੱਕ ਤਿੰਨ ਟੈਸਟ ਮੈਚ ਖੇਡੇ ਹਨ, ਜਿਨ੍ਹਾਂ ਵਿੱਚ ਇੱਕ ਜਿੱਤ, ਇੱਕ ਡਰਾਅ ਅਤੇ ਇੱਕ ਹਾਰ ਦਰਜ ਹੈ। ਇਸ ਹਾਰ ਕਾਰਨ ਉਸਦਾ ਅੰਕ ਪ੍ਰਤੀਸ਼ਤ (PCT) ਘਟ ਕੇ 44.44 ਰਹਿ ਗਿਆ, ਜਿਸ ਨਾਲ ਉਹ ਤੀਜੇ ਸਥਾਨ ਤੋਂ ਸਿੱਧਾ ਛੇਵੇਂ ਸਥਾਨ 'ਤੇ ਖਿਸਕ ਗਈ।
ਸ਼੍ਰੀਲੰਕਾ ਦੇ ਹੇਠਾਂ ਜਾਣ ਦਾ ਸਭ ਤੋਂ ਵੱਡਾ ਲਾਭ ਭਾਰਤੀ ਟੀਮ ਨੂੰ ਮਿਲਿਆ ਹੈ। ਭਾਰਤ ਦਾ PCT ਹੁਣ 48.15 ਹੋ ਗਿਆ ਹੈ ਅਤੇ ਟੀਮ ਪੰਜਵੇਂ ਸਥਾਨ 'ਤੇ ਪਹੁੰਚ ਗਈ ਹੈ। ਹਾਲਾਂਕਿ ਫਾਈਨਲ ਦੀ ਦੌੜ ਵਿੱਚ ਆਪਣੀ ਸਥਿਤੀ ਹੋਰ ਮਜ਼ਬੂਤ ਕਰਨ ਲਈ ਭਾਰਤ ਨੂੰ ਆਉਣ ਵਾਲੀਆਂ ਟੈਸਟ ਲੜੀਆਂ ਵਿੱਚ ਲਗਾਤਾਰ ਜਿੱਤ ਦਰਜ ਕਰਨੀ ਹੋਵੇਗੀ।
ਮੌਜੂਦਾ WTC ਅੰਕ ਸੂਚੀ ਵਿੱਚ ਆਸਟ੍ਰੇਲੀਆ 87.50 ਦੇ ਸ਼ਾਨਦਾਰ PCT ਨਾਲ ਪਹਿਲੇ ਸਥਾਨ 'ਤੇ ਕਾਬਜ਼ ਹੈ। ਦੱਖਣੀ ਅਫਰੀਕਾ 75.00 ਦੇ PCT ਨਾਲ ਦੂਜੇ ਸਥਾਨ 'ਤੇ ਹੈ। ਨਿਊਜ਼ੀਲੈਂਡ ਤੀਜੇ ਅਤੇ ਬੰਗਲਾਦੇਸ਼ ਚੌਥੇ ਸਥਾਨ 'ਤੇ ਮੌਜੂਦ ਹਨ।
ਉੱਥੇ ਹੀ ਪਾਕਿਸਤਾਨ ਲਈ ਇਹ WTC ਚੱਕਰ ਹੁਣ ਤੱਕ ਨਿਰਾਸ਼ਾਜਨਕ ਰਿਹਾ ਹੈ। ਸ਼ਾਨ ਮਸੂਦ ਦੀ ਅਗਵਾਈ ਵਾਲੀ ਟੀਮ ਚਾਰ ਵਿੱਚੋਂ ਤਿੰਨ ਟੈਸਟ ਮੈਚ ਹਾਰ ਚੁੱਕੀ ਹੈ। ਇਸ ਦੇ ਨਾਲ ਹੀ ਹੌਲੀ ਓਵਰ ਰੇਟ ਕਾਰਨ ਟੀਮ ਦੇ ਅੱਠ ਅੰਕ ਵੀ ਕੱਟੇ ਗਏ ਹਨ, ਜਿਸ ਕਾਰਨ ਪਾਕਿਸਤਾਨ ਅੰਕ ਸੂਚੀ ਵਿੱਚ ਨੌਵੇਂ ਅਤੇ ਆਖ਼ਰੀ ਸਥਾਨ 'ਤੇ ਹੈ।
