Last Updated :
29 April 2026, 05:05 PM IST
ਅੱਜਕੱਲ੍ਹ ਫਿਟ ਰਹਿਣ ਦੀ ਦੌੜ ਵਿੱਚ ਲੋਕ ਆਪਣੀ ਡਾਇਟ ‘ਤੇ ਧਿਆਨ ਦੇ ਰਹੇ ਹਨ, ਪਰ ਅਧੂਰੀ ਜਾਣਕਾਰੀ ਕਾਰਨ ਕਈ ਨਿਊਟ੍ਰਿਸ਼ਨ ਮਿਥਕ ਫੈਲ ਰਹੇ ਹਨ ਜੋ ਸਿਹਤ ਲਈ ਖਤਰਨਾਕ ਹੋ ਸਕਦੇ ਹਨ।ਅੱਜ ਦੇ ਸਮੇਂ ‘ਚ ਫਿਟਨੈੱਸ ਇੱਕ ਟ੍ਰੈਂਡ ਬਣ ਗਿਆ ਹੈ। ਹਰ ਕੋਈ ਆਪਣੀ ਡਾਇਟ ਬਦਲ ਕੇ ਸਿਹਤਮੰਦ ਬਣਨਾ ਚਾਹੁੰਦਾ ਹੈ। ਪਰ ਇਸ ਦੌਰਾਨ ਕਈ ਵਾਰ ਲੋਕ ਗਲਤ ਜਾਣਕਾਰੀ ਦਾ ਸ਼ਿਕਾਰ ਹੋ ਜਾਂਦੇ ਹਨ। ਸੋਸ਼ਲ ਮੀਡੀਆ, ਦੋਸਤਾਂ ਦੀ ਸਲਾਹ ਅਤੇ ਇੰਟਰਨੈੱਟ ‘ਤੇ ਮਿਲਦੀ ਅਧੂਰੀ ਜਾਣਕਾਰੀ ਕਰਕੇ ਲੋਕ ਅਜਿਹੀਆਂ ਗੱਲਾਂ ‘ਤੇ ਵਿਸ਼ਵਾਸ ਕਰ ਲੈਂਦੇ ਹਨ ਜੋ ਸੱਚ ਨਹੀਂ ਹੁੰਦੀਆਂ। ਇਸ ਕਰਕੇ ਨਿਊਟ੍ਰਿਸ਼ਨ ਨਾਲ ਜੁੜੇ ਮਿਥਕ ਤੇਜ਼ੀ ਨਾਲ ਫੈਲ ਰਹੇ ਹਨ।
ਐਕਸਪਰਟਸ ਮੰਨਦੇ ਹਨ ਕਿ ਹਰ ਇਨਸਾਨ ਦਾ ਸਰੀਰ ਵੱਖਰਾ ਹੁੰਦਾ ਹੈ ਅਤੇ ਉਸ ਦੀਆਂ ਲੋੜਾਂ ਵੀ ਵੱਖਰੀਆਂ ਹੁੰਦੀਆਂ ਹਨ। ਇਸ ਲਈ ਇੱਕੋ ਡਾਇਟ ਸਭ ਲਈ ਠੀਕ ਨਹੀਂ ਹੋ ਸਕਦੀ। ਕਈ ਲੋਕ ਟ੍ਰੈਂਡਿੰਗ ਡਾਇਟ ਨੂੰ ਬਿਨਾਂ ਸੋਚੇ ਸਮਝੇ ਫੋਲੋ ਕਰ ਲੈਂਦੇ ਹਨ, ਜਿਸ ਨਾਲ ਉਹਨਾਂ ਨੂੰ ਫਾਇਦੇ ਦੀ ਬਜਾਏ ਨੁਕਸਾਨ ਹੋ ਸਕਦਾ ਹੈ। ਸਹੀ ਡਾਇਟ ਉਹ ਹੈ ਜੋ ਤੁਹਾਡੇ ਸਰੀਰ ਅਤੇ ਜੀਵਨਸ਼ੈਲੀ ਦੇ ਅਨੁਸਾਰ ਹੋਵੇ।
ਬਹੁਤ ਸਾਰੇ ਲੋਕ ਮੰਨਦੇ ਹਨ ਕਿ ਅੰਡੇ ਖਾਣ ਨਾਲ ਕੋਲੇਸਟਰੋਲ ਵਧਦਾ ਹੈ ਅਤੇ ਦਿਲ ਦੀਆਂ ਬਿਮਾਰੀਆਂ ਦਾ ਖਤਰਾ ਵਧ ਜਾਂਦਾ ਹੈ। ਪਰ ਸੱਚਾਈ ਇਹ ਨਹੀਂ ਹੈ। ਰਿਸਰਚ ਦੱਸਦੀ ਹੈ ਕਿ ਆਮ ਤੌਰ ‘ਤੇ ਅੰਡੇ ਖਾਣ ਨਾਲ ਕੋਲੇਸਟਰੋਲ ‘ਤੇ ਵੱਡਾ ਅਸਰ ਨਹੀਂ ਪੈਂਦਾ। ਅੰਡੇ ਪ੍ਰੋਟੀਨ ਅਤੇ ਹੋਰ ਜਰੂਰੀ ਪੋਸ਼ਕ ਤੱਤਾਂ ਦਾ ਵਧੀਆ ਸਰੋਤ ਹਨ, ਇਸ ਲਈ ਸੰਤੁਲਿਤ ਮਾਤਰਾ ਵਿੱਚ ਇਹ ਸਿਹਤ ਲਈ ਫਾਇਦੇਮੰਦ ਹਨ।
ਅਕਸਰ ਲੋਕ ਕਿਸੇ ਦੇ ਵਜ਼ਨ ਦੇ ਆਧਾਰ ‘ਤੇ ਉਸਦੀ ਸਿਹਤ ਬਾਰੇ ਫੈਸਲਾ ਕਰ ਲੈਂਦੇ ਹਨ। ਪਰ ਇਹ ਗੱਲ ਪੂਰੀ ਤਰ੍ਹਾਂ ਸਹੀ ਨਹੀਂ ਹੈ। ਕਈ ਲੋਕ ਵੱਧ ਵਜ਼ਨ ਦੇ ਬਾਵਜੂਦ ਫਿਟ ਹੁੰਦੇ ਹਨ, ਜਦਕਿ ਕੁਝ ਲੋਕ ਨਾਰਮਲ ਵਜ਼ਨ ਦੇ ਹੋਣ ਦੇ ਬਾਵਜੂਦ ਅੰਦਰੂਨੀ ਬਿਮਾਰੀਆਂ ਨਾਲ ਜੂਝ ਰਹੇ ਹੁੰਦੇ ਹਨ। ਸਿਹਤ ਦਾ ਸਬੰਧ ਸਿਰਫ਼ ਵਜ਼ਨ ਨਾਲ ਨਹੀਂ, ਸਗੋਂ ਜੀਵਨਸ਼ੈਲੀ ਅਤੇ ਖੁਰਾਕ ਨਾਲ ਹੁੰਦਾ ਹੈ।
ਕਈ ਲੋਕ ਮੰਨਦੇ ਹਨ ਕਿ ਫੈਟ ਅਤੇ ਕਾਰਬੋਹਾਈਡਰੇਟ ਵਜ਼ਨ ਵਧਾਉਣ ਦੇ ਮੁੱਖ ਕਾਰਨ ਹਨ। ਇਸ ਕਰਕੇ ਉਹ ਇਹਨਾਂ ਨੂੰ ਆਪਣੀ ਡਾਇਟ ਤੋਂ ਹਟਾ ਦਿੰਦੇ ਹਨ। ਪਰ ਅਸਲ ਵਿੱਚ ਸਰੀਰ ਨੂੰ ਠੀਕ ਤਰ੍ਹਾਂ ਕੰਮ ਕਰਨ ਲਈ ਦੋਵੇਂ ਦੀ ਲੋੜ ਹੁੰਦੀ ਹੈ। ਜ਼ਿਆਦਾ ਮਾਤਰਾ ਹੀ ਸਮੱਸਿਆ ਬਣਦੀ ਹੈ, ਨਾ ਕਿ ਇਹ ਤੱਤ ਆਪਣੇ ਆਪ।
ਕੁਝ ਲੋਕ ਮੰਨਦੇ ਹਨ ਕਿ ਮਾਸ ਆਂਤਾਂ ਵਿੱਚ ਸੜ ਜਾਂਦਾ ਹੈ, ਜੋ ਸਰੀਰ ਲਈ ਨੁਕਸਾਨਦਾਇਕ ਹੁੰਦਾ ਹੈ। ਪਰ ਵਿਗਿਆਨਕ ਤੌਰ ‘ਤੇ ਇਹ ਗੱਲ ਗਲਤ ਹੈ। ਸਾਡਾ ਪਚਾਉਣ ਤੰਤਰ ਮਾਸ ਨੂੰ ਠੀਕ ਤਰੀਕੇ ਨਾਲ ਪਚਾਉਣ ਲਈ ਬਣਿਆ ਹੈ। ਇਹ ਪਹਿਲਾਂ ਪੇਟ ਵਿੱਚ ਟੁੱਟਦਾ ਹੈ ਅਤੇ ਫਿਰ ਆਂਤਾਂ ਵਿੱਚ ਅਸਾਨੀ ਨਾਲ ਅਬਜ਼ੋਰਬ ਹੋ ਜਾਂਦਾ ਹੈ।
ਲੋਕ ਅਕਸਰ ਸਮਝਦੇ ਹਨ ਕਿ ਲੋ-ਫੈਟ ਫੂਡ ਹਮੇਸ਼ਾਂ ਸਿਹਤਮੰਦ ਹੁੰਦਾ ਹੈ। ਪਰ ਇਹ ਜ਼ਰੂਰੀ ਨਹੀਂ। ਕਈ ਪ੍ਰੋਸੈਸਡ ਲੋ-ਫੈਟ ਪ੍ਰੋਡਕਟਸ ਵਿੱਚ ਸੁਆਦ ਵਧਾਉਣ ਲਈ ਵਾਧੂ ਸ਼ੂਗਰ ਅਤੇ ਹੋਰ ਪਦਾਰਥ ਮਿਲਾਏ ਜਾਂਦੇ ਹਨ, ਜੋ ਸਿਹਤ ਲਈ ਨੁਕਸਾਨਦਾਇਕ ਹੋ ਸਕਦੇ ਹਨ। ਇਸ ਲਈ ਹਰ ਚੀਜ਼ ਦਾ ਪੂਰਾ ਨਿਊਟ੍ਰਿਸ਼ਨ ਪ੍ਰੋਫਾਈਲ ਵੇਖਣਾ ਜਰੂਰੀ ਹੈ।
ਨਿਊਟ੍ਰਿਸ਼ਨ ਨਾਲ ਜੁੜੇ ਮਿਥਕ ਤੁਹਾਡੀ ਸਿਹਤ ਨੂੰ ਨੁਕਸਾਨ ਪਹੁੰਚਾ ਸਕਦੇ ਹਨ। ਇਸ ਲਈ ਜ਼ਰੂਰੀ ਹੈ ਕਿ ਤੁਸੀਂ ਸਹੀ ਜਾਣਕਾਰੀ ਦੇ ਆਧਾਰ ‘ਤੇ ਆਪਣੀ ਡਾਇਟ ਬਣਾਓ। ਕਿਸੇ ਵੀ ਟ੍ਰੈਂਡ ਨੂੰ ਅੰਨ੍ਹੇ ਵਾਂਗ ਨਾ ਫੋਲੋ ਕਰੋ ਅਤੇ ਸੰਤੁਲਿਤ ਖੁਰਾਕ ਨੂੰ ਆਪਣੀ ਜੀਵਨਸ਼ੈਲੀ ਦਾ ਹਿੱਸਾ ਬਣਾਓ।
