Last Updated :
16 July 2026, 07:28 PM IST
ਓਡੀਸ਼ਾ ਦੇ ਪੁਰੀ ਵਿੱਚ ਵੀਰਵਾਰ ਨੂੰ ਭਗਵਾਨ ਜਗਨਨਾਥ ਦੀ ਵਿਸ਼ਵ ਪ੍ਰਸਿੱਧ ਰਥਯਾਤਰਾ ਦੌਰਾਨ ਭਾਰੀ ਭੀੜ ਕਾਰਨ ਭਗਦੜ ਵਰਗੀ ਸਥਿਤੀ ਪੈਦਾ ਹੋ ਗਈ। ਇਸ ਦੌਰਾਨ ਦਮ ਘੁੱਟਣ ਨਾਲ ਇੱਕ ਸ਼ਰਧਾਲੂ ਦੀ ਜਾਨ ਚਲੀ ਗਈ, ਜਦਕਿ 120 ਤੋਂ ਵੱਧ ਲੋਕ ਬੇਹੋਸ਼ ਹੋ ਗਏ ਅਤੇ ਉਨ੍ਹਾਂ ਨੂੰ ਨਜ਼ਦੀਕੀ ਹਸਪਤਾਲਾਂ ਵਿੱਚ ਭਰਤੀ ਕਰਵਾਇਆ ਗਿਆ।
ਸਵੇਰ ਤੋਂ ਹੀ ਮੰਦਰ ਦੇ ਆਲੇ-ਦੁਆਲੇ ਅਤੇ ਮੁੱਖ ਮਾਰਗਾਂ 'ਤੇ ਸ਼ਰਧਾਲੂਆਂ ਦਾ ਸੈਲਾਬ ਉਮੜਿਆ ਸੀ। ਰਵਾਇਤੀ ‘ਪਹਾਂਡੀ’ ਰਸਮ ਵੇਲੇ ਦਰਸ਼ਨਾਂ ਲਈ ਉਮੜੀ ਭੀੜ ਅਚਾਨਕ ਇੰਨੀ ਵੱਧ ਗਈ ਕਿ ਹੜ੍ਹ ਜਿਹਾ ਹਾਲਾਤ ਬਣ ਗਿਆ। ਇੱਕ ਦੂਜੇ ਨੂੰ ਧਕੇਲਣ ਕਾਰਨ ਕਈ ਸ਼ਰਧਾਲੂ ਸੜਕ 'ਤੇ ਡਿੱਗ ਗਏ ਅਤੇ ਉਨ੍ਹਾਂ ਦਾ ਦਮ ਘੁੱਟਣ ਲੱਗਾ।
ਮਾਹਿਰਾਂ ਮੁਤਾਬਕ ਭੀੜ ਦਾ ਦਬਾਅ, ਭਿਆਨਕ ਗਰਮੀ ਅਤੇ ਨਮੀ ਨੇ ਲੋਕਾਂ ਦੀ ਮੁਸ਼ਕਲ ਨੂੰ ਵਧਾ ਦਿੱਤਾ। ਹਸਪਤਾਲ ਵਿੱਚ ਜ਼ਿਆਦਾਤਰ ਮਰੀਜ਼ ਡੀਹਾਈਡ੍ਰੇਸ਼ਨ, ਗਰਮੀ ਅਤੇ ਭੀੜ ਕਾਰਨ ਹੋਈਆਂ ਸੱਟਾਂ ਨਾਲ ਪਹੁੰਚੇ। ਕੁਝ ਨੂੰ ਪ੍ਰਾਥਮਿਕ ਇਲਾਜ ਤੋਂ ਬਾਅਦ ਛੁੱਟੀ ਦੇ ਦਿੱਤਾ ਗਿਆ, ਜਦਕਿ ਕਈ 'ਤੇ ਡਾਕਟਰੀ ਨਿਗਰਾਨੀ ਜਾਰੀ ਹੈ।
ਘਟਨਾ ਤੋਂ ਤੁਰੰਤ ਬਾਅਦ ਪੁਲਿਸ, ਐਮਰਜੈਂਸੀ ਟੀਮਾਂ ਅਤੇ ਬਚਾਅ ਦਲ ਨੇ ਮੌਕੇ 'ਤੇ ਪਹੁੰਚ ਕੇ ਰਾਹਤ ਮੁਹਿੰਮ ਸ਼ੁਰੂ ਕੀਤੀ। ਪਹਿਲਾਂ ਤੋਂ ਯੋਜਨਾਬੱਧ ਐਮਰਜੈਂਸੀ ਰਸਤਿਆਂ ਰਾਹੀਂ ਫਸੇ ਲੋਕਾਂ ਨੂੰ ਕੱਢ ਕੇ ਐਂਬੂਲੈਂਸਾਂ ਵਿੱਚ ਹਸਪਤਾਲ ਭੇਜਿਆ ਗਿਆ। ਅਧਿਕਾਰੀਆਂ ਮੁਤਾਬਕ ਸਮੇਂ ਸਿਰ ਰਾਹਤ ਪਹੁੰਚਾਉਣ ਕਾਰਨ ਵੱਡਾ ਨੁਕਸਾਨ ਟਲ ਗਿਆ।
ਪ੍ਰਸ਼ਾਸਨ ਨੇ ਹੁਣ ਰਥਯਾਤਰਾ ਮਾਰਗ 'ਤੇ ਸੁਰੱਖਿਆ ਵਿਵਸਥਾ ਹੋਰ ਕੱਸ ਦਿੱਤੀ ਹੈ। ਵਾਧੂ ਸੁਰੱਖਿਆ ਬਲ, ਫਾਇਰ ਵਿਭਾਗ, ਐੱਨ.ਡੀ.ਆਰ.ਐੱਫ. ਅਤੇ ਡਾਕਟਰੀ ਟੀਮਾਂ ਨੂੰ ਆਸਪਾਸ ਦੇ ਖੇਤਰਾਂ ਵਿੱਚ ਤਾਇਨਾਤ ਕਰ ਦਿੱਤਾ ਗਿਆ ਹੈ। ਭੀੜ ਨੂੰ ਕਾਬੂ ਕਰਨ ਲਈ ਲਾਊਡਸਪੀਕਰ ਰਾਹੀਂ ਅਪੀਲ ਕੀਤੀ ਜਾ ਰਹੀ ਹੈ ਕਿ ਸ਼ਰਧਾਲੂ ਨਿਰਧਾਰਤ ਰਸਤਿਆਂ 'ਤੇ ਹੀ ਰਹਿਣ ਅਤੇ ਸੁਰੱਖਿਆ ਕਰਮੀਆਂ ਦੇ ਨਿਰਦੇਸ਼ਾਂ ਦੀ ਪਾਲਣਾ ਕਰਨ।
