Last Updated :
12 June 2026, 02:27 PM IST
ਜੇਕਰ ਤੁਸੀਂ ਟਾਟਾ ਮੋਟਰਜ਼ ਦੀ ਕੋਈ ਨਵੀਂ ਕਾਰ ਜਾਂ ਐੱਸਯੂਵੀ ਲੈਣ ਦੀ ਯੋਜਨਾ ਬਣਾ ਰਹੇ ਹੋ ਤਾਂ ਤੁਹਾਨੂੰ ਸੁਚੇਤ ਹੋ ਜਾਣਾ ਚਾਹੀਦਾ ਹੈ। ਭਾਰਤੀ ਵਾਹਨ ਨਿਰਮਾਤਾ ਕੰਪਨੀ ਟਾਟਾ ਮੋਟਰਜ਼ ਨੇ 1 ਜੁਲਾਈ 2026 ਤੋਂ ਆਪਣੀਆਂ ਸਾਰੀਆਂ ਯਾਤਰੀ ਗੱਡੀਆਂ (ਪੈਸੈਂਜਰ ਵਹੀਕਲਜ਼) ਦੀਆਂ ਕੀਮਤਾਂ ਵਿੱਚ ਇਜ਼ਾਫ਼ਾ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਵਾਧਾ ਕੰਪਨੀ ਦੇ ਪੈਟਰੋਲ, ਡੀਜ਼ਲ, ਸੀਐੱਨਜੀ ਅਤੇ ਇਲੈਕਟ੍ਰਿਕ - ਸਭ ਤਰ੍ਹਾਂ ਦੇ ਮਾਡਲਾਂ 'ਤੇ ਲਾਗੂ ਹੋਵੇਗਾ।
ਨਵੀਆਂ ਕੀਮਤਾਂ 1 ਜੁਲਾਈ ਤੋਂ ਲਾਗੂ ਹੋਣਗੀਆਂ, ਜਿਸ ਤੋਂ ਬਾਅਦ ਕੰਪਨੀ ਦੀਆਂ ਸਾਰੀਆਂ ਮੌਜੂਦਾ ਕਾਰਾਂ 'ਤੇ ਕਰੀਬ 1.5 ਫੀਸਦੀ ਤੱਕ ਮਹਿੰਗਾਈ ਦਾ ਬੋਝ ਪਵੇਗਾ। ਹਾਲਾਂਕਿ ਕੰਪਨੀ ਵੱਲੋਂ ਇਹ ਸਪੱਸ਼ਟ ਨਹੀਂ ਕੀਤਾ ਗਿਆ ਹੈ ਕਿ ਕਿਸੇ ਖਾਸ ਮਾਡਲ ਦੀ ਕੀਮਤ ਵਿੱਚ ਕਿੰਨੇ ਪ੍ਰਤੀਸ਼ਤ ਦਾ ਵਾਧਾ ਕੀਤਾ ਜਾਵੇਗਾ, ਪਰ ਹਰ ਮਾਡਲ ਅਤੇ ਉਸਦੇ ਵੇਰੀਐਂਟ ਅਨੁਸਾਰ ਇਹ ਅੰਤਰ ਵੱਖ-ਵੱਖ ਹੋ ਸਕਦਾ ਹੈ।
ਟਾਟਾ ਮੋਟਰਜ਼ ਦੇ ਅਨੁਸਾਰ, ਵਾਹਨ ਨਿਰਮਾਣ ਦੀ ਸਮੁੱਚੀ ਲਾਗਤ ਵਿੱਚ ਲਗਾਤਾਰ ਹੋ ਰਿਹਾ ਵਾਧਾ ਇਸ ਫੈਸਲੇ ਦੀ ਵੱਡੀ ਵਜ੍ਹਾ ਹੈ। ਇਸ ਲਾਗਤ ਵਾਧੇ ਦੇ ਮੁੱਖ ਕਾਰਨ ਹਨ:
• ਕੱਚੇ ਮਾਲ ਜਿਵੇਂ ਸਟੀਲ ਅਤੇ ਐਲੂਮੀਨੀਅਮ ਦੀਆਂ ਕੀਮਤਾਂ ਵਿੱਚ ਆਈ ਵਾਧਾ
• ਵਾਹਨਾਂ ਵਿੱਚ ਵਰਤੇ ਜਾਣ ਵਾਲੇ ਵੱਖ-ਵੱਖ ਪੁਰਜ਼ਿਆਂ ਦੇ ਭਾਅ ਵਧਣਾ
• ਫੈਕਟਰੀਆਂ ਦਾ ਚਲਣ ਖਰਚਾ ਅਤੇ ਪ੍ਰੋਡਕਸ਼ਨ ਖਰਚੇ ਵਿੱਚ ਹੋਇਆ ਇਜ਼ਾਫ਼ਾ
• ਗਲੋਬਲ ਪੱਧਰ 'ਤੇ ਸਪਲਾਈ ਚੇਨ ਵਿੱਚ ਪੈਦਾ ਹੋ ਰਹੀਆਂ ਰੁਕਾਵਟਾਂ
ਇਸੇ ਲਈ ਕੰਪਨੀ ਆਪਣੇ ਖਰਚਿਆਂ ਦਾ ਕੁਝ ਹਿੱਸਾ ਗਾਹਕਾਂ ’ਤੇ ਟ੍ਰਾਂਸਫਰ ਕਰਨ ਲਈ ਮਜਬੂਰ ਹੋਈ ਹੈ।
ਟਾਟਾ ਮੋਟਰਜ਼ ਦੀ ਮੌਜੂਦਾ ਲਾਈਨਅੱਪ ਵਿੱਚ ਸ਼ਾਮਲ ਇਹ ਪ੍ਰਸਿੱਧ ਮਾਡਲ 1 ਜੁਲਾਈ ਤੋਂ ਮਹਿੰਗੇ ਹੋ ਜਾਣਗੇ:
• ਟਾਟਾ ਟਿਆਗੋ
• ਟਾਟਾ ਟਿਗੋਰ
• ਟਾਟਾ ਆਲਟ੍ਰੋਜ਼
• ਟਾਟਾ ਪੰਚ
• ਟਾਟਾ ਨੇਕਸਨ
• ਟਾਟਾ ਕਰਵ
• ਟਾਟਾ ਹੈਰੀਅਰ
• ਟਾਟਾ ਸਫਾਰੀ
• ਇਸ ਤੋਂ ਇਲਾਵਾ, ਕੰਪਨੀ ਦੀਆਂ ਸਾਰੀਆਂ ਇਲੈਕਟ੍ਰਿਕ ਵਹੀਕਲਜ਼ (EVs) ਵੀ ਕੀਮਤ ਵਾਧੇ ਦੇ ਘੇਰੇ ਵਿੱਚ ਆ ਜਾਣਗੀਆਂ।
ਜਿਹੜੇ ਵੀ ਗਾਹਕ ਟਾਟਾ ਦੀ ਕੋਈ ਨਵੀਂ ਕਾਰ ਲੈਣ ਦੇ ਇੱਛੁਕ ਹਨ, ਉਨ੍ਹਾਂ ਲਈ ਜੂਨ ਮਹੀਨਾ ਵਧੇਰੇ ਫਾਇਦੇਮੰਦ ਰਹੇਗਾ। 1 ਜੁਲਾਈ ਤੋਂ ਪਹਿਲਾਂ ਕਾਰ ਖਰੀਦਣ ’ਤੇ ਗਾਹਕ ਕੀਮਤ ਵਾਧੇ ਤੋਂ ਬਚ ਸਕਦੇ ਹਨ। ਖਾਸ ਕਰਕੇ ਜਿਹੜੇ ਲੋਕ Nexon, Punch, Harrier, ਜਾਂ Safari ਵਰਗੀਆਂ ਐੱਸਯੂਵੀ ਖਰੀਦਣ ਦੇ ਮਨਸੂਬੇ ਬਣਾ ਰਹੇ ਹਨ, ਉਨ੍ਹਾਂ ਲਈ ਇਹ ਸਮਾਂ ਹੋਰ ਵੀ ਨਾਜ਼ੁਕ ਹੈ ਕਿਉਂਕਿ ਇਨ੍ਹਾਂ ਮਾਡਲਾਂ ’ਤੇ ਵਾਧੇ ਦੀ ਦਰ ਹੋਰ ਮਾਮੂਲੀ ਕਾਰਾਂ ਨਾਲੋਂ ਵੱਧ ਹੋ ਸਕਦੀ ਹੈ।
