Last Updated :
18 January 2024, 04:04 PM IST
ਹਿਮਾਚਲ ਪ੍ਰਦੇਸ਼ ਟੂਰਿਜ਼ਮ ਡਿਵੈਲਪਮੈਂਟ ਕਾਰਪੋਰੇਸ਼ਨ ਨੇ ਸੈਲਾਨੀਆਂ ਲਈ ਆਪਣੇ ਹੋਟਲਾਂ ਵਿੱਚ ਛੋਟ ਦੇਣ ਦਾ ਐਲਾਨ ਕੀਤਾ ਹੈ। ਇਸਦਾ ਕਾਰਨ ਸੂਬੇ ਦੇ ਸੈਰ-ਸਪਾਟਾ ਸਥਾਨਾਂ 'ਤੇ ਬਰਫਬਾਰੀ ਨਾ ਹੋਣਾ ਦੱਸਿਆ ਜਾ ਰਿਹਾ ਹੈ। ਫਿਲਹਾਲ ਸੂਬੇ ਦੇ ਸੈਰ-ਸਪਾਟਾ ਕਾਰੋਬਾਰੀ ਅਤੇ ਸੈਲਾਨੀ ਬਰਫ ਦੀ ਉਡੀਕ ਕਰ ਰਹੇ ਹਨ। ਮੌਸਮ ਵਿਭਾਗ ਵੱਲੋਂ ਫਿਲਹਾਲ ਅਗਲੇ 10 ਦਿਨਾਂ ਤੱਕ ਬਰਫਬਾਰੀ ਦੀ ਕੋਈ ਭਵਿੱਖਬਾਣੀ ਨਹੀਂ ਕੀਤੀ ਹੈ। HPTDC ਨੇ ਸੈਲਾਨੀਆਂ ਨੂੰ ਆਪਣੇ ਹੋਟਲ ਦੇ ਕਮਰੇ ਬੁੱਕ ਕਰਵਾਉਣ 'ਤੇ 20 ਤੋਂ 40 ਫੀਸਦੀ ਛੋਟ ਦੇਣ ਦਾ ਐਲਾਨ ਕੀਤਾ ਹੈ। ਉਧਰ, ਸੈਲਾਨੀਆਂ ਨੂੰ ਆਕਰਸ਼ਿਤ ਕਰਨ ਲਈ ਪ੍ਰਾਈਵੇਟ ਹੋਟਲ ਵਾਲੇ ਵੀ ਕਮਰਿਆਂ ਦੀ ਬੁਕਿੰਗ 'ਤੇ 30 ਤੋਂ 50 ਫੀਸਦੀ ਦੀ ਛੋਟ ਦੇ ਰਹੇ ਹਨ।
ਅੱਧੇ ਰੇਟ 'ਤੇ ਕਮਰੇ ਉਪਲਬਧ
ਇਸ ਦੌਰਾਨ ਨਿਗਮ ਅਤੇ ਪ੍ਰਾਈਵੇਟ ਹੋਟਲ ਮਾਲਕਾਂ ਵੱਲੋਂ ਛੋਟ ਦੇਣ ਤੋਂ ਬਾਅਦ ਲਗਭਗ ਅੱਧੇ ਰੇਟ 'ਤੇ ਕਮਰੇ ਉਪਲਬਧ ਹਨ। ਨਿਗਮ ਦੇ ਹੋਟਲਾਂ ਵਿੱਚ ਘੱਟੋ-ਘੱਟ 20 ਫੀਸਦੀ ਅਤੇ ਵੱਧ ਤੋਂ ਵੱਧ 40 ਫੀਸਦੀ ਛੋਟ ਦਿੱਤੀ ਜਾ ਰਹੀ ਹੈ। 40% ਦੀ ਛੋਟ ਵਾਲੇ ਹੋਟਲਾਂ ਵਿੱਚ ਹੁਣ 2,000 ਰੁਪਏ ਦਾ ਕਮਰਾ 1,200 ਰੁਪਏ ਵਿੱਚ ਮਿਲੇਗਾ। ਇਸੇ ਤਰ੍ਹਾਂ 5 ਹਜ਼ਾਰ ਰੁਪਏ ਦੇ ਕਮਰੇ ਲਈ ਤੁਹਾਨੂੰ 3 ਹਜ਼ਾਰ ਰੁਪਏ ਦੇਣੇ ਪੈਣਗੇ। ਐਚਪੀਟੀਡੀਸੀ ਦੇ ਕੋਲ ਜ਼ਿਆਦਾਤਰ ਕਮਰੇ 2500 ਤੋਂ 6 ਹਜ਼ਾਰ ਰੁਪਏ ਪ੍ਰਤੀ ਦਿਨ ਵਿੱਚ ਉਪਲਬਧ ਹਨ।
ਆਨਲਾਈਨ ਬੁਕਿੰਗ ਸ਼ੁਰੂ
HPTDC ਰਾਜ ਵਿੱਚ ਵੱਖ-ਵੱਖ ਸਥਾਨਾਂ 'ਤੇ ਲਗਭਗ 53 ਹੋਟਲ ਚਲਾ ਰਿਹਾ ਹੈ। ਉਨ੍ਹਾਂ ਦੀ ਆਨਲਾਈਨ ਬੁਕਿੰਗ HPTDC ਦੀ ਵੈੱਬਸਾਈਟ 'ਤੇ ਜਾ ਕੇ ਕੀਤੀ ਜਾ ਸਕਦੀ ਹੈ। ਸਾਈਟ 'ਤੇ ਛੋਟਾਂ ਅਤੇ ਕਾਰਪੋਰੇਸ਼ਨ ਹੋਟਲਾਂ ਬਾਰੇ ਪੂਰੀ ਜਾਣਕਾਰੀ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ ਸੈਲਾਨੀ ਹੋਟਲਾਂ 'ਚ ਪਹੁੰਚ ਕੇ ਬੁਕਿੰਗ ਵੀ ਕਰਵਾ ਸਕਦੇ ਹਨ। ਮਨਾਲੀ ਹੋਟਲ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਅਨੂਪ ਠਾਕੁਰ ਨੇ ਦੱਸਿਆ ਕਿ ਔਸਤਨ 30 ਤੋਂ 50 ਫੀਸਦੀ ਤੱਕ ਡਿਸਕਾਊਂਟ ਦਿੱਤਾ ਜਾ ਰਿਹਾ ਹੈ, ਪਰ ਕੁਝ ਹੋਟਲ ਵਾਲੇ 70 ਫੀਸਦੀ ਤੱਕ ਵੀ ਡਿਸਕਾਊਂਟ ਦੇ ਰਹੇ ਹਨ। ਇਸ ਤਰ੍ਹਾਂ ਪ੍ਰਾਈਵੇਟ ਹੋਟਲਾਂ 'ਚ 5000 ਰੁਪਏ ਦਾ ਕਮਰਾ 50 ਫੀਸਦੀ ਡਿਸਕਾਊਂਟ 'ਤੇ 2500 ਰੁਪਏ ਪ੍ਰਤੀ ਦਿਨ ਅਤੇ 60 ਫੀਸਦੀ ਡਿਸਕਾਊਂਟ 'ਤੇ 2,000 ਰੁਪਏ ਪ੍ਰਤੀ ਦਿਨ 'ਚ ਉਪਲਬਧ ਹੈ।
ਛੋਟ ਸਿਰਫ ਹੋਟਲਾਂ 'ਚ
ਅਨੂਪ ਠਾਕੁਰ ਨੇ ਦੱਸਿਆ ਕਿ ਪ੍ਰਾਈਵੇਟ ਹੋਟਲਾਂ ਦੀ ਬੁਕਿੰਗ ਆਨਲਾਈਨ ਪ੍ਰਾਈਵੇਟ ਏਜੰਸੀਆਂ (ਓਯੋ, ਮੇਕ ਮਾਈ ਟ੍ਰਿਪ ਆਦਿ) ਰਾਹੀਂ ਕੀਤੀ ਜਾਂਦੀ ਹੈ। ਸੂਬੇ 'ਚ ਕੁਝ ਵੱਡੇ ਹੋਟਲ ਅਜਿਹੇ ਹਨ, ਜਿਨ੍ਹਾਂ ਨੇ ਆਪਣੀਆਂ ਵੈੱਬਸਾਈਟਾਂ ਬਣਾਈਆਂ ਹਨ ਅਤੇ ਉਨ੍ਹਾਂ 'ਤੇ ਜਾ ਕੇ ਆਨਲਾਈਨ ਬੁਕਿੰਗ ਕੀਤੀ ਜਾ ਸਕਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਛੋਟ ਸਿਰਫ ਹੋਟਲਾਂ 'ਚ ਰੂਮ ਬੁੱਕ ਕਰਵਾਉਣ 'ਤੇ ਦਿੱਤੀ ਜਾ ਰਹੀ ਹੈ।
